1 Johana 3 - UVORO GHWALOLI KWA WANDU WOSE

Wanake wa Mlungu

¹ Zighaneni selyi Aba atishaile! Mashayo ghake ni mabwaa, gha isi kuito wana wa Mlungu; na fulo niko kwenyi tio. Ilyi nilyo lyideagha urumengu sighwatimanye, kwa kukala sighomueni Mlungu.

² Washayo, Ndamu isi nisi wana wa Mlungu. Indakwenyi siimanyikagha selyi tijekala, ela tamanya ilyi Kristo aoneka, tijekala selyi ewo, kwani tijemwona selyi ewo.

³ Naye uwo wose amukosereagha Kristo ni suti akuelese, kwani Kristo ni wa kuela.

⁴ Mundu uwo wose edeagha kaung'a, ondevunja sheria ya Mlungu, kwa kukala kaung'a ni kuvunja sheria.

⁵ Nenyo mwamanya kamba Kristo wanajile kufunya kaung'a, na amweni kwake sikuwesi kaung'a ingi.

⁶ Kwa hung'u, sikuwesi mundungi edeagha kaung'a amwonile ango amweni.

⁷ Wanake, mundungi samwembe. Uyu edeagha gha hachi ni mhachi selyi Kristo ewo mhachi.

⁸ Uyo wose edeagha kaung'a ni wa shetani, kwa kukala shetani wanadeile kaung'a kufuma kudyowa. Kwa undu ughu Mwana wa Mlungu keja eri ahakile kazi za shetani.

⁹ Mwana ungi wa Mlungu sadeagha kaung'a, kwani gha Mlungu ghanakalagha amweni kwake, andu iye ni Mwana wa Mlungu.

¹⁰ Kwa ngila iyi waoneka ni weo weo wana wa Mlungu na ni weo weo wana wa shetani. Uwo wose sedeagha gha hachi si wa Mlungu ungi, hata na uyu semushaile wakwawe.

Kushayana

¹¹ Kwani ughu nigho uvoro mughusikile kufuma kudyowa, tishayane isi wenyi na isi wenyi.

¹² Sitejekala sa Kaini eluo na shetani, hata kumuulagha wakwawe. Nini chimdeile kamuulagha wakwawe? Ni kwa kukala madeo ghake gheluo gha laghelaghe na gha wakwawe gheluo gha hachi.

¹³ Kwa hung'u, simwashinike wana wakwetu, ilyi mwamenyo ni wandu wa urumengu.

¹⁴ Timanye kamba tanaitile kufuma kele kifwa tikangila kele umana, kwa kukala tawashaya wana wakwetu. Uyu seo na mashayo uwo kifweni.

¹⁵ Uyo wose emumenyagha wakwawe ni muulaghi; nenyo mwamanya kamba muulaghi ungi sekalagha na umana amweni kwake.

¹⁶ Kwa ngila iyi tamanya mashayo, andu Kristo wanafunyile umana ghwake kwa undu ghwetu. Na natose yanatifweni tifunye umana ghwetu kwa undu ghwa wana wakwetu.

¹⁷ Ngera mundungi ewo na mali ya urumengu ughu na amwone wakwawe sawesi, na akulise ngolo yake kwa wakwawe, udimagha ije kughora wanamshaile Mlungu?

¹⁸ Wanake wangu, sitashaye kwa kughora ango kuhelea, ela tishaye kwa madeo na kwa fulo.

Kukala mang'oni kwa Mlungu

¹⁹ Kwa ngila iyi tijemanya kamba nisi wandu wa fulo, na ngolo zetu zijekala na sere hambiri ya Mlungu.

²⁰ Ilyi ngolo zetu zatitaghanya, ni kwa kukala Mlungu ni mubwaa kuchumba ngolo zetu na wanaweni ghose.

²¹ Washayo, ngera ngolo zetu sizetitaghanyagha, tio na udimo hambiri ya Mlungu;

²² na tadima kupata icho chose timlombagha, kwa kukala tawata milomu yake na kudea agha ghemuboelagha.

²³ Nagho ughu nigho mlomu ghwake, timudumuse Mwana wake Jesu Kristo na tishayane isi wenyi na isi wenyi selyi Kristo atilaghize.

²⁴ Nawo wose wewatagha milomu ya Mlungu wanakalagha amweni kwa Mlungu, naye Mlungu wanakalagha amweni kwawe, kwa Roho uyu atihawile.