1 Johana 2 - UVORO GHWALOLI KWA WANDU WOSE

Kristo mwaruri wetu

¹ Wanake wangu, nendemwandikila malagho agha, eri simwadee kaung'a, ela ilyi mundungi wenyu adea kaung'a, tio na mumoju etilombelagha kwa Aba, Jesu Kristo mhachi.

² Kristo niye etifunyilagha kaung'a zetu, na si kaung'a zetu tu, ela na kaung'a za urumengu ghose.

³ Nesi timanyagha putu kamba tanamweni Mlungu, ilyi tawata milomu yake.

⁴ Uyu mundu eghoragha “wanamweni,” naye sewatagha milomu yake ni mndimi, na fulo ingi sawesi amweni kwake.

⁵ Ela uwo wose ewatagha ghore zake, amweni kwake mashayo gha Mlungu ghakatiso. Kwa undu ughu tamanya fulo kamba tio amweni kwake.

⁶ Mundu uwo wose eghoragha kamba wanakalagha amweni kwa Mlungu, ni suti akale selyi kwenyi Jesu Kristo eluo kekala.

Mlomu mwishi

⁷ Washayo, si kughamba kamba nendemwandikila mlomu mwishi kungi, ela mlomu ghwa ko kale mughusikile kufuma kudyowa; mulomu ghwa ko kale ni ghore muisikile.

⁸ Hata sani nendemwandikila mlomu mwishi ghuo ghwa fulo kwa Kristo na kwenyu. Kwa kukala kiza chendeita noko na mlangazi ghwa fulo ghwawaka.

⁹ Uwo wose eghora ni wa mlangazi na amumenyile wakwawe, wanatulagha kizeni.

¹⁰ Uwo wose amshaile wakwawe, wanakalagha kele mlangazi, na kwake sikuwesi kukwalisa mundungi.

¹¹ Ela uwo wose emumenyagha wakwawe, uwo kizeni, na ondesela na kiza, naye semanyagha andu eghendagha, kwa kukala kiza chamdea saone.

¹² Nendemwandikila inyo wanake, kwa kukala kaung'a zenyu zafwilo waya kwa undu ghwa Kristo.

¹³ Nendewandika kwenyu inyo wana aba, kwa kukala mwanamweni iye eluo kufuma kudyowa. Nendewandika kwenyu inyo wandu wa irika kwa kukala mwamusima ulya Mlaghelaghe.

¹⁴ Nendewandika kwenyu inyo wanake, kwa kukala mwanamweni Aba. Nendewandika kwenyu inyo wana aba, kwa kukala mwanamweni Mlungu kufuma kudyowa. Nendewandika kwenyu inyo wandu wa irika, kwa kukala muo na ndighi na ilagho lya Mlungu lyanakalagha amweni kwenyu na mwamusima ulya Mlaghelaghe.

¹⁵ Simwashaye urumengu hata vindu va urumengu. Ngera mundungi ashaya urumengu, ushayo ghwa Aba sighuo amweni kwake.

¹⁶ Kwani vindu vose vio urumenguni ni va tamaa ya muli na va tamaa ya meso na kwa kukukasa, navo ivi si kwa undu ghwa Aba, ela ni kwa undu ghwa urumengu.

¹⁷ Nagho urumengu ghuitagha na tamaa zake, ela uyu edeagha mashayo gha Mlungu ujetula moyo kwa kale na kale.

Wamaiza wa Kristo

¹⁸ Wanake wangu, kudua kuo avui; na selyi musikile kamba mumaiza wa Kristo ondeja, na hata indakwenyi wamaiza wengi wa Kristo weja; kwa hung'u, tamanya kamba kudua kuo avui.

¹⁹ Wandu awa wanafumile kwetu, ela kwa fulo siweluo wetu. Ngera weluo wetu, macha watulanyagha nesi, ela wanafumile, eri imanyikane mwazi kamba awo wose siweluo wetu.

²⁰ Ela inyo mwajuzo Roho wa Kuela ni Kristo, nenyo inyose mwamanya agho.

²¹ Nendemwandikila, si kwa kukala simuweni fulo, ela kwa kukala mwanaiweni na mwanaweni kamba ndimi si fulo ingi.

²² Nani mundimi sala uyu emukanagha Jesu kukala ni Kristo? Uyu ni mumaiza wa Kristo, emukanagha Aba na Mwana.

²³ Sikuwesi mundungi emukanagha Mwana ewo na Aba. Kumdumusa Mwana ni kumdumusa Aba. Uyo emughoragha Mwana umughoragha Aba.

²⁴ Kwa hung'u, agha musikile kufuma kudyowa ghakale amweni kwenyu. Ilyi agha musikile kufuma kudyowa ghakala amweni kwenyu, mjekala amweni kwa Mwana na amweni kwa Aba.

²⁵ Nalyo ilyi nilyo Kristo atilagile, Umana ghwa kale na kale.

²⁶ Nendemwandikila hung'u kwa undu ghwa walye wejemwemba.

²⁷ Ela inyo mwananyinyilo Roho wa Kristo. Na ikakala Roho wake uwo amweni kwenyu, simushayagha kufundiso ni mundungi. Kwani Roho wake umufundisagha kila kindu, naye agha efundisagha ni gha fulo na si ndimi ingi; na kwa hung'u selyi kwenyi emufundisagha, mkale kele Kristo.

²⁸ Ndamu wanake, kaleni amweni kwa Kristo, eri ngelo eonekagha mumange na simwanyavurike na kufwishika Ijua ekujagha.

²⁹ Ngera mwamanya kamba Kristo ni wa hachi, mujemanya kamba kila mumoju edeagha hachi wanavelo ni Mlungu.