1 Johana 1 - UVORO GHWALOLI KWA WANDU WOSE

Ghore ya umana

¹ Tamuwandikila ighulu ya Ghore ya Umana yeluo kufuma kudyoweni, iyi tiisikile, tikaiona na meso ghetu, tikaizighana na kuiwata na mikono yetu.

² Umana ughu ghooneke, tikaghuona na kughushuhudia; nesi tikaghueresa uvoro ghwa umana ghwa kale na kale kwenyu ughu gholuo kwa Aba na teonyezo isi.

³ Ghalye tionile na kusikila tamweresera nanyose, eri mkale na ungaro nesi na ungaro ghwetu ni ngila mojori na Aba na Mwana wake Jesu Kristo.

⁴ Na tamwandikila agha eri kuboelo kwetu kukatile.

Mlungu ni mlangazi

⁵ Ndamu uvoro tighusikile kwa Mwana wake na tamughorera ni ughu; Mlungu ni mlangazi na kwake sikuwesi kiza.

⁶ Tikaghamba tio na ungaro na Mlungu na sena takala na kiza, tio wandimi na sitikalagha kele fulo ingi;

⁷ ela ilyi takala kele mlangazi selyi ewo wa mlangazi, tio na ungaro isi wenyi. Nayo bighati ya Jesu Mwana wake itielesagha kaung'a zetu zose.

⁸ Tikaghamba sitiwesi kaung'a, tendekuemba isi wenyi, na fulo sikuwesi amweni kwetu.

⁹ Ela ilyi taghora kaung'a zetu kwa Mlungu, iye ni mdumusiliki na wa hachi, naye ujetifwila waya kaung'a zetu na kutielesa kele ghose sighewo gha hachi.

¹⁰ Ilyi taghora sitiwesi kaung'a, tamdea Mlungu kukala mndimi, na ghore yake siiwo amweni kwetu.