റോമഗാറാര് 6 - സാമി സേദിപാവ ഗേഗാത്ത പെ്ളേപ്പ് 1 അദ്‌നാലെ ഇദ്‌ന പറ്റി നമ്മ എന്തെന്റ് സൊല്ല്യ? സാമി സേത്തി സേത്തി പ്‌ണ്ണ്യ ഗേന്ത്‌കൊണ്ട്‌റ്‌ക്ക്യ ബേ്ണ്ടി പാവ ഗേന്ത് കൊണ്ട്‌റ്ക്കുഡൊ എന്റ് സൊല്ല്യാഗ? 2 അത്തെ സൊല്ലഗേ ബേ്ഡ. പാവ ഗേവാദ്‌ക്ക് കല്ല് ബെത്ത നമ്മ ഇന്നിമ് എത്തെ പാവ ഗേന്ത് കൊണ്ടു പെ്ളേക്ക്യ മുഡിമ്? അദ്‌ക്ക് നമ്മ സത്തവാര്‌ത്തെ. 3 ഏസ്സ് ക്‌റ്‌സ്‌ത്തോഡ ഒന്റായി എ്ണേയ ബേ്ണ്ടി നമ്മ മുളിഗി ഇ്ളാഗിര്‌ക്ക്‌ന്റാമ്. അത്തെ നീര്‌ക്ക് മുളിഗി ഇ്ളാഗിര്‌ക്കുവ നമ്മ അയാളോഡൊപ്പ സത്ത്‌റ്‌ന്റാമ് എന്റ് നിമാക്ക് തെരിവാദില്ലേഗ? 4 അത്തെ അയാള് സാവുക്കു എ്ണേന്തവാരാന മുളുക്കാത്ത്‌ല് അയാളോഡൊപ്പ താനെ നമാന മഡെ ബെ്ട്ടി പാത്ത്‌നാര്. അത്തെ ക്‌റ്‌സ്‌ത്ത് സത്ത് അപ്പാന് സാമിക്കിര്‌ക്കുവ മ്‌ഗ്‌ന്ത സക്‌തില് ഉജുര്‌ളാഗി അയാള്‌ക്ക് പുദ്യ പെ്ളേപ്പ് കെ്ഡേത്ത പാസെ നമാക്ക്‌മ് പുദ്യ പെ്ളേപ്പ് കെ്ഡേക്ക്യ ബേ്ണ്ടിത്തെ. 5 ക്‌റ്‌സ്‌ത്ത് സത്ത സാവുക്കു നമ്മാമ് എ്ണേവദാന, അയാള് സാവുലിന്ത് ഉജുര്‌ളാഗ്‌ന പാസെ നമ്മാമ് ഉജുര്‌ളാഗ്‌ല. 6 നമ്മ ഇന്നി പാവ ഗേവാദ്‌ക്ക് അഡിമ്യാഗാദെ നമ്മ് പാവ സരിഗലാത്ത്‌ല പാവ ഗേവ പളാക്കന ഇല്ലാദെ മാഡ്യ ബേ്ണ്ടി പാവ ഗേന്ത് നഡാന്തിന്ത നമ്മ് പള്യ പെ്ളേപ്പ്‌ന ക്‌റ്‌സ്‌ത്തോഡൊപ്പ കുരുസുക്കു സേത്തി ആണി അഡിത്ത് തള്ള്‌നാമ് എന്റ് നമ്മ കണാക്കാക്ക്‌ന്റാമ്. 7 അത്തെ സത്തവാന് പാവ ഗേവ പെ്ളേപ്പ്‌ലിന്ത് തപ്പിസി കഡാന്ത്‌റ്‌ന്റാന്. 8 നമ്മ ക്‌റ്‌സ്‌ത്തോഡൊപ്പ സത്താദ്‌നാലെ അയാളോഡൊപ്പ പെ്ളേക്ക്‌ല എന്റ് നമ്മ നമ്പ്‌ന്റാമ്. 9 ക്‌റ്‌സ്‌ത്ത് സത്ത് ഉജുര്‌ളാഗ്‌നാദ്‌നാലെ ഇന്നി സാഗമാട്ടാന്. സാവുക്കു ഇന്നി അയാള്‌ന ആള്യ മുഡ്യാമാട്ട എന്റ് നമാക്ക് തെരിന്റ്. 10 ഏസ്സ് നമ്മ് പാവാക്ക് ബേ്ണ്ടി ഒന്റു ജമ്പ് സത്താന്. ഇന്നി നമ്മ് പാവാക്ക് ബേ്ണ്ടി അയാള് സാഗമാട്ടാന്. അയാള് പെ്ളേക്കുവാദൊ സാമിക്ക് ബേ്ണ്ടിത്തെ പെ്ളേക്ക്‌ന്റാന്. 11 അദേപാസെത്തെ നിമ്മാമ് പെ്ളേക്കുഡൊ. സത്തവാര്‌ക്ക് പാവ ഗേയ മുഡ്യാത്ത പാസെ നിമ്മാമ് പാവ ഗേയ മുഡ്യാത്തവാര് എന്റ്‌മ് ക്‌റ്‌സ്‌ത്ത് ഏസ്സ്‌നാലെ സാമിക്ക് ബേ്ണ്ടി പെ്ളേക്ക്‌ന്റവാര്‌ത്തെ എന്റ്‌മ് നിമ്മ നെനേത്ത് നഡാന്. 12 അദ്‌നാലെ അളിന്ത് പോവ നിമ്മ് സരിഗല ആസെപഡുവ കെ്ട്ട ആസെഗാള്‌ന ഗേന്ത് പാവാക്ക് അഡിമെഗാള് ആഗാദേന്. 13 നിമ്മ സത്തിന്ത് ഉജുര്‌ളാഗ്‌നവാര് ആനാദ്‌നാലെ നിമ്മ് സരിഗലന സാമി ആസെപഡുവ കാര്യഗാള് ഗേയ ബേ്ണ്ടി സാമിക്ക് അഡിമെ മാഡി ബെയിന്. നിമ്മ് സരിഗല ആസെപഡുവ കെ്ട്ട കാര്യഗാള് ഗേന്ത് കൊണ്ടു നിമ്മ് സരിഗലന പാവാക്ക് അഡിമെ മാഡി ബെക്കാദേന്. 14 എന്ത്‌ക്കെന്റ് സൊന്ന, മോസെ ബെത്ത സാമിസട്ടന നോഡി കൊണ്ടല്ല, സാമി ഗേവ പ്‌ണ്ണ്യന നോഡി കൊണ്ടുത്തെ നിമ്മ ഇന്നാല് പെ്ളേക്ക്‌ന്റ്‌റ്. അദ്‌നാലെ നിമ്മ ഇന്നി പാവാക്ക് അഡിമെ ആഗാദേന്. നേര്‌മെഗാറാരായി പെ്ളേക്ക്യ കഡാമെ പട്ടവാര് 15 അന്നാപ്പ് എന്തെന്റ് സൊല്ല്യ? മോസെ ബെത്ത സാമിസട്ടന നോഡി കൊണ്ടല്ല, സാമി ഗേവ പ്‌ണ്ണ്യന നോഡി കൊണ്ടുത്തെ പെ്ളേക്കുവാദ്‌നാലെ നമ്മ പാവ ഗേയാഗ? ഗേഗാഗേ ബേ്ഡ. 16 ഇദ് നിമാക്ക് തെരിവാദില്ലേഗ? ആരാറ്റ സൊല്ലുപഡിക്ക് നഡാക്ക്യ നിമ്മ നിമാന താനെ ഒപ്പിസി കൊഡുത്തു അയാള് സൊല്ലുപഡി നഡാക്കാട്ടി നിമ്മ അയാള്‌ക്ക് അഡിമെഗാളായിര്‌ക്കുവുറു. അദേപാസെ പാവാക്ക് നിമ്മ അഡിമെഗാള് ആനദാന നിമാക്ക് സാവ ഗെദി ബര്‌മ്, സാമി ആസെപഡി നഡാന്തദാന നിമ്മ നേര്‌മെഗാറാര് ആവുറു. 17-18 മുന്നുക്കു പാവ ഗേവാദ്‌ക്ക് അഡിമെഗാളായിന്ത നിമാന പാവ നഡാത്തിന്ത്‌ദ്. ആന എമ്മ പഡിസി തന്ത ബുദ്ദി നായഗാള്‌ന നിമ്മ മനേസ്സാറ തങ്കാരിത്ത് പാവ ഗേവാദ്‌ന തള്ള്‌ന്‌റ്. അത്തെ നിമ്മ നേരാന കാര്യഗാള് ഗേവാദ്‌ക്ക് അഡിമെഗാള് ആനാദ്‌നാലെ നാന് സാമിക്ക് നണ്ണി സൊന്റെ. 19 നിമാക്ക് അത്ത്‌റ നെപ്പ്‌കെ്ഡേസ്യ മുഡ്യാത്താദ്‌നാലെ പൊദുവുലു മന്‌സാന്‌ക്ക് തെരിവ ദിന്‌സ്‌ല് നാന് നിമാക്ക് ഇത്തെ സൊന്റെ, നിമ്മ ഒന്റു കാലാത്ത്‌ല് നിമ്മ് സരിഗലാത്ത്‌ല ഒന്റൊന്റു ബാഗഗാള്‌ന മാനതാന ഇല്ലാത്ത കാര്യഗാള്‌ക്ക്‌മ് കെ്ട്ട കാര്യഗാള്‌ക്ക്‌മ് ഒപ്പിസി കൊഡുത്തു കൊണ്ടു കെ്ട്ട കാര്യഗാള് ഗേന്തിന്ത്‌റ്. ആന അദേപാസെ ഇന്നാല് നിമ്മ് സരിഗലാത്ത്‌ല ഒന്റൊന്റു ബാഗഗാള്‌ന സുത്താപ്പുള്ളാദ് മാഡ്യ ബേ്ണ്ടി നേര്‌മെ ഉള്ള കാര്യഗാള്‌ക്ക് അഡിമെ മാഡി ഒപ്പിസി കൊഡുനു. 20 നിമ്മ പാവ ഗേവാദ്‌ക്ക് അഡിമെഗാള് ആയിന്ത കാലാത്ത്‌ല് നേര്‌മ്യാന കാര്യഗാള്‌ക്ക് സെറ്റെ ഗുഡി എ്ണേഗാദിന്ത്‌റ്. 21 അയി ഗളിഗേല് നിമ്മ ഗേന്ത കാര്യന നെനേക്കാട്ടി നിമാക്ക് നാണത്തെ ബര്‌മല്ല. അദ് ഗേന്തനാലെ എന്തുവഗര കെ്ഡേത്ത്‌ദ്? അത്തെ ഗേവാദ്‌നാലെ കഡേസിക്ക് സാവുത്തെ ബര്‌മല്ല. 22 ആന ഇന്നാല് നിമ്മ പാവ ഗേവാദ്‌ന തള്ളി സാമിക്ക് അഡിമെഗാള് ആയിര്‌ക്ക്‌ന്റ്‌റ്. അദുക്കുള്ള ഉവഗര നിമ്മ സുത്താപ്പുള്ളവാരായി തീരുവാദ്‌മ് കഡേസില് നിമാക്ക് എന്നാല്‌ക്ക്‌മ് ഇര്‌ക്കുവ പെ്ളേപ്പ് കെ്ഡേക്കുവാദ്‌മ്‌ത്തെ. 23 പാവ ഗേവാദ്‌ക്ക് കെ്ഡേക്കുവ കൂലി സാവുത്തെ, സാമി ഗേവ ദാന എന്നുവാദ് നമ്മ് ആണ്ടവാനാന ഏസ്സ് ക്‌റ്‌സ്‌ത്ത്‌ല് കെ്ഡേക്കുവ എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ത്തെ. |
New Life Computer Institute