റോമഗാറാര് 5 - സാമി സേദിസാമ്യോഡ രാജി കൂഡുനാദ്‌ക്കുള്ള ഗുണഗാള് 1 ഏസ്സ് ക്‌റ്‌സ്‌ത്ത്‌ന നമ്പ്‌നാദ്‌നാലെ നമ്മ സാമി കണ്ണ്‌ക്ക് നേര്‌മെഗാറാര് ആനാമ്. അത്തെ നമ്മ് ആണ്ടവാന് ഏസ്സ് ക്‌റ്‌സ്‌ത്ത് നമാക്ക് ഗേന്ത കാര്യനാലെ സാമിമ് നമ്മാമ് രാജി കൂഡിര്‌ന്റാമ്. 2 ക്‌റ്‌സ്‌ത്ത് ഏസ്സോഡ ബെത്ത്‌റ്‌ക്കുവ നമ്പിക്കെനാലെ സാമി പ്‌ണ്ണ്യ ഗേന്ത് കെ്ഡേത്ത ഈ പെ്ളേപ്പ്‌ക്ക് നമാക്ക് ഇന്നാല് എജ്ജ്യ മുഡിന്ത്‌ദ്. അത്തെ നമ്മ സാമി മദ്‌പ്പ്‌ക്ക് പങ്ക്‌ഗാറാര് ആവാമ് എന്നുവ നെഞ്ചഡെന പറ്റി നമ്മ പെരിമെപഡ്‌ന്റാമ്. 3 അദ്‌താനേമല്ല, നമ്മ പഡുവ കജട്ടഗാള്‌ന പറ്റിമ് നമ്മ പെരിമെപഡ്‌ന്റാമ്. എന്ത്‌ക്കെന്റ് സൊന്ന, നമ്മ പഡുവ കജട്ടഗാള് നമാന പൊറിമെഗാറാര് മാഡ്‌ന്റ് എന്റ്‌മ്, 4 പൊറിമെഗാറാര് ആഗാട്ടി നമ്മ സാമി കണ്ണ്‌ക്ക് നല്ല ഗുണ ഉള്ളവാര് ആന്റാമ് എന്റ്‌മ്, നല്ല ഗുണ ഉള്ളവാര് ആഗാട്ടി സാമി നമാക്ക് നല്ലാദ് ഗേവാന് എന്നുവ നെഞ്ചഡെ ഉള്ളവാര് ആന്റാമ് എന്റ്‌മ് നമാക്ക് തെരിന്റ്. 5 നെഞ്ചഡെ ബെത്ത്‌റ്‌ക്കുവ ഈ കാര്യ നഡാക്കാദിര്‌ക്ക മാട്ട. എന്ത്‌ക്കെന്റ് സൊന്ന, സാമി നമ്മോഡ അളാവുക്കു മീ്റി സീവാന്‌ബെത്ത്‌റ്‌ന്റാന് എന്റ് നമാക്ക് തെരിന്റ്. ഇദ്‌ന ഒറേപ്പ് മാഡ്യത്തെ സാമി തന്ന് നിഗാല്‌ന നമാക്ക് തന്ത്‌റ്‌ക്കുവാദ്. 6 സാമി ആസെപഡി നഡാക്ക്യ മുഡ്യാദെ നമ്മ കുറ്റകൊറേവുള്ളവാര് ആയിര്‌ക്കാട്ടി താനെ ക്‌റ്‌സ്‌ത്ത് നമാക്ക് ബേ്ണ്ടി സാമി സൊന്ന ഗളിഗേല് താനെ സത്താന്. 7 നേര്‌മെഗാറാന്‌ക്ക് ബേ്ണ്ടി ആരാറ്റ സാവാദ് സുരുക്കത്തെ, ആന നല്ല കാര്യഗാള് ഗേന്റവാന്‌ക്ക് ബേ്ണ്ടി ഒന്റു സമ്യ ആരാറ്റ സായ ഒരുങ്കുവാരെങ്കൊ. 8 ആന നമ്മ പാവ ഗേന്റവാര് ആയിര്‌ക്കാട്ടി താനെ ക്‌റ്‌സ്‌ത്ത് നമാക്ക് ബേ്ണ്ടി സത്താന്. അത്തെ സാമിക്ക് നമ്മോഡിര്‌ക്കുവ സീവാന്‌ന നമാക്ക് കാട്ടി തന്ത്‌റ്‌ന്റാന്. 9 ക്‌റ്‌സ്‌ത്ത് നമാക്ക് ബേ്ണ്ടി സൂസുന സോരെനാലെ നമ്മ സാമി കണ്ണ്‌ക്ക് നേര്‌മെഗാറാര് ആനാമ്. അത്ത്യായിന്ത നേര്‌മെഗാറാര് ആന പ്‌റ സാമി മൊനേക്ക്‌പട്ട് ആള്‌ഗാള്‌ന ദെ്ണ്ടിക്കുവ ഗളിഗേല് ക്‌റ്‌സ്‌ത്ത് നമാന ഒറേപ്പായിമ് കാപാറ്റുവാന്. 10 നമ്മ സാമിക്ക് പോട്ടിഗാറാര് ആയിര്‌ക്കാട്ടി താനെ സാമി തന്ന് മഗാന്‌ന സായ ബെത്താദ്‌നാലെ സാമിമ് നമ്മാമ് രാജി കൂഡുനാമ്. അത്തെ സാമ്യോഡ രാജി കൂഡുന പ്‌റ ക്‌റ്‌സ്‌ത്ത്‌ക്കിര്‌ക്കുവ ഉജുരുനാലെ നമ്മ തപ്പിസി കഡാക്കുവാദ് എത്ത്‌റാഗോ ഒറേപ്പുള്ള കാര്യത്തെ. 11 അദ്‌താനേമല്ല, നമ്മ ഇന്നാല് സാമിന പറ്റി പെരിമെപഡ്‌ന്റാമ്, എന്ത്‌ക്കെന്റ് സൊന്ന, സാമി നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌ന ബെത്ത് നമാന തന്നോഡ രാജി കൂഡുസുനാന്. ആദാമ്‌മ് ക്‌റ്‌സ്‌ത്ത്‌മ് 12 ഒന്റേ ഒന്റു മന്‌സാന് ഗേന്ത തപ്പ്‌നാലെത്തെ പാവ ഉലഗാക്ക് ബന്താദ്, അയാള് പാവ ഗേന്താദ്‌നാലെ സാവുമു ഉലഗാക്ക് ബന്ത്‌ദ്. അത്തെ എല്ലാ മന്‌സാര്‌ഗാള്‌മ് പാവ ഗേന്താദ്‌നാലെ എല്ലാവാര്‌ക്ക്‌മ് സാവ ഗെദി ബന്ത്‌ദ്. 13 മോസെ ബെത്ത സാമിസട്ട കെ്ഡേക്കാത്ത മുദാല് താനെ ഉലഗാത്ത്‌ല മന്‌സാന് പാവ ഗേന്തിന്താന്. ആന അയി ഗളിഗെ മാട്ട്‌ക്ക് ഗേന്തിന്ത പാവാന കണാക്ക് ബെക്കാലെ. എന്ത്‌ക്കെന്റ് സൊന്ന അയി ഗളിഗേല് സട്ട ഇല്ലാദിന്ത്‌ദ്. 14 ആന ആദാമ് പെ്ളേത്തിന്ത കാലാത്ത്‌ലിന്ത് മോസെ പെ്ളേത്തിന്ത കാല മാട്ട്‌ക്ക് പെ്ളേത്തിന്ത ആള്‌ഗാള്‌ക്ക്‌മ് സാവു ബന്തിന്ത്‌ദ്. ആദാമ് സട്ടപഡി നഡാക്കാദെ പാവ ഗേന്ത പാസെ പാവ ഗേഗാത്തവാര്‌ക്ക്‌മ് സാവു ബന്തിന്ത്‌ദ്. ആദാമ് ബര്യ ഇന്ത ക്‌റ്‌സ്‌ത്ത്‌ന കാട്ടുവ ഉരുവ ആയിന്താന്. 15 ആദാമ് ഗേന്ത പാവ കാര്യാമ് സാമി ക്‌റ്‌സ്‌ത്ത്‌ന ബെത്ത് പ്‌ണ്ണ്യ ഗേന്ത കാര്യാമ് ഒന്റേ പാസെ അല്ല. ആദാമ് എന്നുവ ഒന്റു മന്‌സാന് ഗേന്ത പാവാനാലെ എഞ്ചോ ആള്‌ഗാള് സത്താദ് നേര്‌ത്തെ. ആന ഏസ്സ് ക്‌റ്‌സ്‌ത്ത് എന്നുവ ഒന്റു മന്‌സാന് ഗേന്ത് കൊഡുത്ത പ്‌ണ്ണ്യനാലെ എഞ്ചോ ആള്‌ഗാള്‌ക്ക് സാമി ഗേവ ദാനാക്ക് എജ്ജ്യ മുഡിന്ത്‌ദ്. അയി സാമി പ്‌ണ്ണ്യ എത്ത്‌റാഗോ ദൊഡ്ഡാദ്‌ത്തെ. 16 ഒരുത്താന് പാവ ഗേന്താദ്‌നാലെ ബന്ത ഗെദിമ് സാമി ഗേന്ത ദാനാമ് ഒന്റേ പാസെ അല്ല. ഒരുത്താന് പാവ ഗേന്താദ്‌നാലെ ദെ്ണ്ടണേക്ക് ബിദിക്കുവ ബിദി ബന്ത്‌ദ്. ആന സാമി ഗേന്ത ദാനനാലെ എഞ്ചോ പാവഗാള്‌ന തീത്ത് നേര്‌മെഗാറാര് മാഡ്യ ബെക്കുവ ബിദി ബന്ത്‌ദ്. 17 ഒരുത്താന് പാവ ഗേന്താദ്‌നാലെ എല്ലാ മന്‌സാര്‌ഗാള്‌മ് സാവുക്കാളാനാര്. ആന അളാവുക്കു മീ്റ്‌ന സാമി പ്‌ണ്ണ്യ കെ്ഡേസ്‌നവാര്‌മ് സാമി പാവാന കണാക്ക് ബെക്കാദെ നേര്‌മെഗാറാര് മാഡ്‌ന ആള്‌ഗാള്‌മ് ആനവാര് ഏസ്സ് ക്‌റ്‌സ്‌ത്ത് എന്നുവ ഒന്റു മന്‌സാന്‌നാലെ എന്നാല്‌ക്ക്‌മ് പെ്ളേക്കുവാര്. 18 അത്തെ ഒന്റു തപ്പ് ഗേന്താദ്‌നാലെ എല്ലാ മന്‌സാര്‌ഗാള്‌നാമ് ദെ്ണ്ടിക്കുവ ബിദി ബന്ത പാസെ ഒരുത്താന് ഗേന്ത നേര്‌മ്യാന കാര്യ എല്ലാ മന്‌സാര്‌ഗാള്‌നാമ് നേര്‌മെഗാറാര് മാഡി ഉജുരുന കൊഡുക്ക്യ ബെത്ത്‌ദ്. 19 ഒരുത്താന് സാമി സൊല്ലുപഡിക്ക് നഡാക്കാത്താദ്‌നാലെ എഞ്ചോ ആള്‌ഗാള് പാവ ഗേന്റവാര് ആന പാസെ ഒരുത്താന് സാമി സൊല്ലുപഡിക്ക് നഡാക്ക്‌ന്റവാന് ആനാദ്‌നാലെ എഞ്ചോ ആള്‌ഗാള് നേര്‌മെഗാറാര് ആവാര്. 20 മോസെ ബെത്ത സാമിസട്ട ബന്താദോഡത്തെ സാമി സട്ടപഡി നഡാക്കാദെ ഗേവ കാര്യഗാള്‌മ് പെര്‌ഗ്‌നാദ്. ആന പാവ ഗേവ കാര്യഗാള് പെരിഗി ഗുഡി സാമി മന്‌സാന്‌ക്ക് സേത്തി സേത്തി പ്‌ണ്ണ്യ ഗേന്താന്. 21 പാവ നമാന സാവുക്കാള് മാഡി നഡാത്ത്‌ന പാസെ സാമി പ്‌ണ്ണ്യാമ് നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌നാലെ നമാന നേര്‌മെഗാറാര് മാഡി എന്നാല്‌ക്ക്‌മ് ഇര്‌ക്കുവ പെ്ളേപ്പ് കെ്ഡേക്ക്യ ബേ്ണ്ടി നഡാത്ത്‌ന്റ്. |
New Life Computer Institute