റോമഗാറാര് 3 - സാമി സേദി1 ആന എഗുദാരല്ലാത്ത ജാദിഗാള്‌ന ബ്‌ഡ എഗുദാര്‌ക്ക് എന്ത് പെരിമെ? അല്ല, പരിസേദനെ സാത്ത്‌റ ഗേന്റവാരായി ഇര്‌ക്കുവാദ്‌നാലെ എന്തൊന്റു ഉവഗര ഇര്‌ക്ക്‌ന്റ? 2 ഇര്‌ക്ക്‌ന്റ്, എല്ലാ ദിന്‌സ്‌ല്‌മ് എഞ്ചോ ഉവഗരഗാള് ഇര്‌ക്ക്‌ന്റ്. അയി ഉവഗരഗാള്‌ല് ഒണ്ണാവാദ് കാര്യ എന്നുവാദ് സാമി സൊല്ലുസുലാക്കഗാള്‌ന അവാര് കയിക്ക് കൊഡുത്തിര്‌ക്കുവാദ്‌ത്തെ. 3 എഗുദാര്‌ല് ലേസ ആള്‌ഗാള് നമ്പാത്താദ്‌നാലെ സാമിമ് താന് സൊന്ന ബാക്ക്‌ന തവാറ്‌സി നമ്പ്യ മുഡ്യാത്താവാന് ആവാന? 4 ഇല്ലെഗേ ഇല്ലെ. എല്ലാ മന്‌സാര്‌ഗാള്‌മ് ഉറുട്ടു സൊന്റവാര് ആനാല്‌മ് സാമി സത്ത്യമുള്ളവാന്‌ത്തെ. <<നീ സൊല്ലുവ നായാത്ത്‌ല് താനെ നീ നേര്‌മെഗാറാന് എന്റ് കാട്ടുവായി, ആര്‌മ് നിന്നോഡ ബാദിത്ത് ഗെലിസി കഡാക്കമാട്ടാര്>> എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്കുവ പാസെ സാമി സത്ത്യഗാറാന്‌ത്തെ. 5 ആന നമ്മ തപ്പ് ഗേഗാട്ടി സാമി എത്ത്‌റ നേര്‌മെഗാറാന് എന്റ് കാണ്യ മുഡിമെന്റ് ആരാറ്റ സൊന്നദാന നമ്മ എന്തെന്റ് ബദ്‌ല് സൊല്ലുല? അന്നാപ്പ് നമാന ദെ്ണ്ടിക്കുവ സാമി നേര്‌മല്ലത്തവാന് എന്റ് ബര്‌മല്ല? (ഇദ് പൊദുവുലു മന്‌സാന് സൊല്ലുവ നായനത്തെ നാന് സൊന്റെ) 6 ഇല്ലെഗേ ഇല്ലെ, സാമി നീദില്ലത്തവാനാന സാമിക്ക് ഉലഗാന എത്തെ ബിദിക്ക്യ മുഡിമ്? 7 ഒരുത്താന്: <<എന്ന് ഉറുട്ടുനാലെ സാമി സത്ത്യാമ് സാമി പേര്‌പെരിമേമ് സേത്തി സേത്തി ഉജാക്കുവാദ്‌നാലെ എനാന പാവ ഗേന്റവാന് എന്റ് സൊല്ലുവാദ് എന്ത്‌ക്ക്?>> എന്റ് സൊന്നാനെന്റ് ബെയിന്. 8 അത്ത്യായിന്തദാന <<നല്ലാദ് കെ്ഡേക്ക്യ ബേ്ണ്ടി കെ്ട്ടാദ് ഗേഡൊ>> എന്റ് സൊല്ലുവ പാസെത്തെ അദ്. എമ്മ അത്തെ സൊല്ലുന്റേമെന്റ് ലേസ ആള്‌ഗാള് എമാന പറ്റി നൊണ്ടു സൊന്റാരല്ല. ഇത്തവാള്‌ഗാള്‌ക്ക് ബരുവ ദെ്ണ്ടണെ കെ്ഡേക്ക്യുള്ളാദ്‌ത്തെ. ആര്‌മ് നേര്‌മെഗാറാരല്ല 9 അദ്‌നാലെ എന്ത്? എഗുദാര് ജാദിക്ക് പട്ട നമ്മ എഗുദാരല്ലാത്ത ജാദിഗാള്‌ന ബ്‌ഡ ഉജാന്തവാര? ഇല്ലെഗേ ഇല്ലെ, എഗുദാര് ജാദിക്ക് പട്ടവാര്‌മ് എഗുദാര് അല്ലാത്ത ജാദിഗാള്‌മ് ഒന്റേ ഒപ്പ പാവാക്ക് അഡിമെഗാള്‌ത്തെ എന്റ് നമ്മ മുദാല് താനെ കാട്ട്‌നാമല്ല. 10 സാമി സൊല്ലുസുലാക്കാത്ത്‌ല് സൊല്ലിര്‌ക്കുവ പാസെ: <<നേര്‌മെഗാറാന് ആര്‌മില്ലെ, ഒരുത്താന് ഗുഡില്ലെ. 11 നെപ്പ് കെ്ഡേസ്‌ന്റവാന് ആര്‌മില്ലെ, സാമിന നെനേക്ക്‌ന്റവാര് ആര്‌മില്ലെ. 12 എല്ലാര്‌മ് സാമിന തള്ളി ഒന്റേ ഒപ്പ ഒന്റുക്കാഗത്തവരായി തള്ള്‌നാര്. ആര്‌മ് നല്ലാദ് ഗേവാദില്ലെ, ഒന്റാള് ഗുഡി ഗേവാദില്ലെ.>> 13 <<അവാര് ബായിലിന്ത് ബരുവ നായഗാളൊട്ടുക്കു മൂഡാത്ത സാവു കുയിലിന്ത് ബരുവ നാറ്റന പാസെത്തെ, അവാര് നായഗാളെല്ല ബഞ്ചിക്കുവ നായഗാള്‌ത്തെ.>><<മന്‌സാര്‌ഗാള്‌ന കൊല്ലുവ പാമ്പ് നഞ്ച്‌ന പാസെത്തെ അവാര് സൊല്ലുവ നായഗാള്‌മ്.>> 14 <<അവാര് ബായിലിന്ത് ബരുവ നായഗാളൊട്ടുക്കുമു സാപ്പ ഇക്കുവ നായഗാള്‌മ് കീ്ട്ട്‌ഗ ബെത്ത് സൊല്ലുവ നായഗാള്‌മ്‌ത്തെ.>> 15 <<അവാര് കൊലെ ഗേയ ബേ്ണ്ടി ഓഡി നഡാക്ക്‌ന്റാര്. 16 അവാര് പോവ പട്ട്‌ലെല്ല ആള്‌ഗാള്‌ന കെ്ഡ്‌സുവ കാര്യഗാള്‌മ്, കജട്ട പഡുസുവ കാര്യഗാള്‌മ്‌ത്തെ ഗേന്റാര്. 17 നിമ്മ്‌ദ്യായി പെ്ളേക്ക്യ അവാര്‌ക്ക് തെര്യാദിര്‌ക്ക്‌ന്റ്.>> 18 <<അവാര് സാമിക്ക് അഞ്ചുവാദില്ലെ>> എന്റ്‌ത്തെ. 19 മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവ കാര്യഗാള് അയി സട്ട കെ്ഡേത്തവാര് അദ്‌ക്ക് കെ്ട്ട്‌പട്ട് നഡാക്ക്യ ബേ്ണ്ടിത്തെ. ആന അവാര്‌മ് അയി സട്ടപഡി നഡാക്കുവാദില്ലെ എന്റ് കാട്ട്‌ന്റ്. അത്തെ ഒന്റാള്‌ക്ക്‌മ് നാന് തപ്പ് ഗേഗാലെ എന്റ് സൊല്ല്യ മുഡ്യാമാട്ട. അത്തെ ലോഗാത്ത്‌ല എല്ലാ മന്‌സാര്‌ഗാള്‌മ് സാമി കണ്ണ്‌ക്ക് ദെ്ണ്ടണെ കെ്ഡേക്ക്യ തഗ്‌ദ്യുള്ളവാര്‌ത്തെ. 20 അദ്‌നാലെ മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവ കാര്യഗാള്‌ന ഗേവാദ്‌നാലെ ആര്‌മ് സാമി കണ്ണ്‌ക്ക് നേര്‌മെഗാറാര് ആവാദില്ലെ. ആന പാവാന പറ്റ്യുള്ള അറുവു കെ്ഡേക്ക്‌ന്റ്. നമ്പിക്കെനാലെ നേര്‌മെഗാറാര് ആവാദ് 21 ആന സാമി സട്ടപഡി അല്ലാദെ താനെ സാമി മന്‌സാര്‌ഗാള്‌ന നേര്‌മെഗാറാര് മാഡ്‌ന്റാന് എന്നുവാദ് ഇന്നാല് ബെ്ളിപട്ട്‌റ്‌ന്റ്. മോസെ ബെത്ത സാമിസട്ട ഇദ് നേര്‌ത്തെ എന്റ് സൊന്റു, സാമിദാസ്‌ഗാള്‌മ് ഇദ് നേര്‌ത്തെ എന്റ് സൊന്റാര്. 22 ഏസ്സ് ക്‌റ്‌സ്‌ത്ത്‌ന നമ്പുവ നമ്പിക്കേന ബെത്ത് സാമി എല്ലാ ആള്‌ഗാള്‌നാമ് നേര്‌മെഗാറാര് മാഡ്‌ന്റാന്. ക്‌റ്‌സ്‌ത്ത്‌ന നമ്പ്‌ന്റവാര്‌ക്ക്‌ത്തെ സാമി ഇത്തെ ഗേവാദ്. ഈ കാര്യാത്ത്‌ല് സാമി എഗുദാരെന്റൊ എഗുദാരല്ലത്തവാരെന്റൊ പ്‌റ്‌ത്ത് നോഡുവാദില്ലെ. 23 എന്ത്‌ക്കെന്റ് സൊന്ന എല്ലാ മന്‌സാര്‌ഗാള്‌മ് പാവ ഗേന്ത് സാമി കണ്ണ്‌ക്ക് മദ്‌പ്പില്ലത്തവാരായി തള്ള്‌നാര്. 24 സാമി തന്ന് പ്‌ണ്ണ്യനാലെ ക്‌റ്‌സ്‌ത്ത് ഏസ്സ്‌ന ബെത്ത് നമാന ബ്‌ഡിസ്യെ്ഡ്‌ത്ത് നേര്‌മെഗാറാര് മാഡ്‌നാന്. അദ് കെ്ഡേസ്യ ബേ്ണ്ടി ആര്‌മ് ബെലെ കൊഡുക്ക്യ തേവില്ലെ. 25 ക്‌റ്‌സ്‌ത്ത് ഏസ്സ്‌ന നമ്പ്‌ന്റവാര്‌ക്ക് അയാള് സൂസുന സോരെനാലെ തപ്പ് കെ്ട്ടി പാവ തീര്യ ബേ്ണ്ടി സാമി അയാള്‌ന എല്ലാര്‌ക്ക് ബേ്ണ്ടി ഒപ്പ്‌സി കൊഡുത്ത്‌റ്‌ന്റാന്. താന് നേര്‌മെഗാറാന് എന്റ് കാട്ട്യ ബേ്ണ്ടിത്തെ സാമി അത്തെ ഗേന്ത്‌റ്ക്കുവാദ്. എന്ത്‌ക്കെന്റ് സൊന്ന തനാക്കിര്‌ക്കുവ പൊറിമേല് അവാര് മുന്നുക്കു ഗേന്ത പാവഗാള്‌ന പൊറുത്തു തന്താനല്ല. 26 താന് നേര്‌മെഗാറാന് എന്റ്‌മ് ഏസ്സ്‌ന നമ്പ്‌ന്റവാന്‌ന താന് നേര്‌മെഗാറാന് മാഡ്‌ന്റാന് എന്റ്‌മ് ഈ കാലാത്ത്‌ല് കാട്ടി കൊഡുക്ക്യത്തെ സാമി അത്തെ ഗേന്താദ്. 27 അദ്‌നാലെ നമാക്ക് പെരിമെപഡ്യ എന്തൊന്റു കാര്യ ഇര്‌ക്ക്‌ന്റ? ഇല്ലെഗേ ഇല്ലെ. എന്ത്‌നാലെ? മോസെ ബെത്ത സാമി സട്ടപഡി നഡാന്താദ്‌നാലേഗ? അല്ല, നമ്മ നമ്പുവ നമ്പിക്കെനാലേത്തെ. 28 അത്തെ മോസെ ബെത്ത സാമി സട്ടപഡി നഡാക്കുവാദ്‌നാലെ അല്ല നമ്മ നമ്പുവ നമ്പിക്കെനാലേത്തെ സാമി നമാന നേര്‌മെഗാറാര് മാഡുവാദ് എന്റ് നമ്മ കണാക്ക് മാഡ്‌ന്റാമ്. 29 അല്ല, ഈ സാമി എഗുദാര്‌ക്ക് താനെത്തെ സാമ്യ? എഗുദാരല്ലാത്ത ജാദിഗാള്‌ക്ക്‌മ് സാമ്യല്ലാഗ? സെരിത്തെ, എഗുദാര് അല്ലത്തവാര്‌ത്ത്‌മ് സാമിത്തെ. 30 സാമി ഒരുത്താന്‌ത്തെ. അദ്‌നാലെ എഗുദാരാഡൊ എഗുദാരല്ലാത്തവാരാഡൊ അവാര് ഏസ്സ് ക്‌റ്‌സ്‌ത്തോഡ ബെത്ത്‌റ്‌ക്കുവ നമ്പിക്കെനാലേത്തെ സാമി അവാര്‌ന നേര്‌മെഗാറാര് മാഡുവാദ്. 31 അദ്‌നാലെ ഈ സൊല്ലുവ നമ്പിക്കേന ബെത്ത് നമ്മ മോസെ ബെത്ത സാമിസട്ടന ബെലെ ഇല്ലത്താദ് മാഡ്‌ന്റാമ? ഇല്ലെഗേ ഇല്ലെ. ഈ നമ്പിക്കെനാലെ നമ്മ അയി സട്ടന ഒറേപ്പുള്ളാദ്‌ത്തെ മാഡ്‌ന്റാമ്. |
New Life Computer Institute