റോമഗാറാര് 16 - സാമി സേദിപവുലോസു ബിനാത്ത 1 നമ്മ് ഏസ്സ്‌ഗാറിസിമ് കെമ്‌കെ്റേല ഏസ്സ്‌ഗാറാര് കൂട്ടാത്ത്‌ല ഗിലാസഗാറിസിമ് ആന പേവന പറ്റി തെര്യ ബേ്ണ്ടി നാന് നിമാക്ക് സൊല്ലുവാദ്: 2 അവാള് നിമ്മ് പട്ട്‌ക്ക് ബര്‌ഗാട്ടി സാമിക്ക് പട്ടവാര്‌ക്ക് തഗ്‌ന്ത പാസെ നിമ്മ അവാള്‌ന ആണ്ടവാന്‌ക്കുള്ളവാള് എന്റ് നെനേത്ത് തങ്കാരിക്കുഡൊ. നിമ്മ താനെ അവാള്‌ക്ക് ബേ്ഡ്‌മാനാദെല്ല കൊഡുത്തു അവാള്‌ന കയിതാങ്കുഡൊ. എന്ത്‌ക്കെന്റ് സൊന്ന അവാള് എനനാമ് ബേ്റെ എഞ്ചോ ആള്‌ഗാള്‌നാമ് കയി താങ്കിര്‌ന്റാള്. 3 ക്‌റ്‌സ്‌ത്ത് ഏസ്സ്‌ക്ക് ബേ്ണ്ടി ഗേവ ഗിലാസത്ത്‌ല് എന്നോഡ എ്ണേന്ത് ഗിലാസ ഗേന്റവാരാന പ്‌റ്‌സ്‌ക്കില്ലനാമ് അക്കിലാസ്‌നാമ് നാന് കേ്ട്ടേന് എന്റ് സൊല്ലു. 4 അവാര് എന്നുജുരുന കാപാറ്റ്യ ബേ്ണ്ടി തമ്മ് ഉജുരുന കൊഡുക്ക്യ ഗുഡി ഒരിങ്കിന്താര്. നാന് താനേമല്ല, എഗുദാരല്ലാത്ത എല്ലാ ഏസ്സ്‌ഗാറാര് കൂട്ടഗാള്‌മ് ഗുഡി അവാര്‌ക്ക് നണ്ണി സൊന്റാര്. 5 അവാര് ബീ്ഡ്‌ക്ക് കുമ്മുഡ്യ ബരുവ ഏസ്സ്‌ഗാറാര് കൂട്ടനാമ് നാന് കേ്ട്ടേനെന്റ് സൊല്ലു. ആസ്യ നാഡ്‌ല് ബെത്ത് ആദ്യ ക്‌റ്‌സ്‌ത്ത്‌ന നമ്പ്‌നവാന്‌മ് എനാക്ക് മെച്ച്‌പ്‌ഡിത്തവാന്‌മ് ആന എപ്പനത്തോസുനാമ് നാന് കേ്ട്ടേനെന്റ് സൊല്ലു. 6 നിമാക്ക് ബേ്ണ്ടി എത്ത്‌റാഗോ കജട്ട പട്ട മറിയനാമ് നാന് കേ്ട്ടേനെന്റ് സൊല്ലു. 7 എന്ന് കൂട്ടാര്‌മ് എന്നോഡൊപ്പ ജെയില്‌ലിന്തവാര്‌മ് ആന അന്ത്‌റെനിക്കോസുനാമ്, ജൂന്യാവുനാമ് നാന് കേ്ട്ടേനെന്റ് സൊല്ലു. അവാര് അപ്പോസുത്തലാര് കൂട്ടാത്ത്‌ല് പേര് കേ്ട്ടവാര്‌മ് എനാക്ക് മുദാലെ ഏസ്സ്‌ന നമ്പ്‌നവാര്‌മ്‌ത്തെ. 8 ആണ്ടവാന്‌ന നമ്പി എനാക്ക് മെച്ച്‌പ്‌ഡിത്തവാനാന അമ്പ്‌ളിതോസുനാമ് നാന് കേ്ട്ടേനെന്റ് സൊല്ലു. 9 ക്‌റ്‌സ്‌ത്ത്‌ക്ക് ബേ്ണ്ടി എമ്മോഡൊപ്പ എ്ണേന്ത് ഗിലാസ ഗേവ ഉറുവനോസുനാമ് എനാക്ക് മെച്ച്‌പ്‌ഡിത്ത താക്കുനാമ് നാന് കേ്ട്ടേനെന്റ് സൊല്ലു. 10 ക്‌റ്‌സ്‌ത്തോഡ എത്ത്‌റ നമ്പിക്കെ ഇര്‌ക്ക്‌ന്റ് എന്റ് കാട്ടി കൊഡുത്തിന്തവാനാന അപ്പെലേസ്‌നാമ് നാന് കേ്ട്ടേനെന്റ് സൊല്ലു. അരിസ്‌ത്തൊവൂസു ബീ്ഡ്‌ഗാറാര്‌നാമ് നാന് കേ്ട്ടേനെന്റ് സൊല്ലു. 11 എന്ന് കൂട്ടാര്‌ക്ക് പട്ട എരോദ്യനാമ് നാന് കേ്ട്ടേനെന്റ് സൊല്ലു. നറ്‌ക്ക്യോസു ബീ്ഡ്‌ഗാറാര്‌ല് ആണ്ടവാന്‌ക്ക് പട്ടവാര്‌നാമ് നാന് കേ്ട്ടേനെന്റ് സൊല്ലു. 12 ആണ്ടവാന്‌ക്ക് ബേ്ണ്ടി നല്ല പാഡ്‌പഡ്‌ന്റവാരാന തുറുപെസ എന്റവാള്‌നാമ് തുറുപോസു എന്റവാള്‌നാമ് നാന് കേ്ട്ടേനെന്റ് സൊല്ലു. ആണ്ടവാന്‌ക്ക് ബേ്ണ്ടി പാഡ്‌പട്ടവാളായി എനാക്ക് മെച്ച്‌പ്‌ഡിത്ത പെര്‌സീസ്‌നാമ് നാന് കേ്ട്ടേനെന്റ് സൊല്ലു. 13 ആണ്ടവാന്‌ക്ക് ഗിലാസ ഗേവാദ്‌ല് പേര്‌കേ്ട്ട രൂപാസ്‌നാമ് നാന് എന്ന് അവ്വേന പാസെ നെനേക്കുവ അവാന് അവ്വേസിനാമ് നാന് കേ്ട്ടേനെന്റ് സൊല്ലു. 14 അസികിരിതോസുനാമ്, പ്‌ളേഗോനാമ്, എര്‌മോസ്‌നാമ്, പത്ത്‌റൊവാസ്‌നാമ് ഗെര്‌മാസ്‌നാമ് അദേപാസെ അവാരൊപ്പ ഇര്‌ക്കുവ ഏസ്സ്‌ഗാറാര്‌നാമ് നാന് കേ്ട്ടേനെന്റ് സൊല്ലു. 15 പിലെലെഗോസുനാമ്, ജൂല്യനാമ്, നരെയോസുനാമ്, അയാള് തങ്കെനാമ്, ഒലുമ്പാസ്‌നാമ് അദേപാസെ അവാരൊപ്പ ഇര്‌ക്കുവ സാമിക്ക് പട്ടവാര്‌നാമ് എല്ലാ സാമി പ്‌ള്ളെഗാള്‌നാമ് കേ്ട്ടേനെന്റ് സൊല്ലു. 16 നിമ്മ ആങ്കീങ്ക് കയികൊഡുത്തു ബിനാത്ത്‌ന്. ക്‌റ്‌സ്‌ത്ത്‌ന നമ്പിര്‌ക്കുവ എല്ലാ ഏസ്സ്‌ഗാറാര് കൂട്ടഗാള്‌മ് നിമ്മ സൊക്കാന ഇര്ക്ക്ന്റ്റ എന്റ് കേ്ള്‌ക്ക്‌ന്റാര്. കഡേസി സൊല്ലുവ കാര്യഗാള് 17 ഏസ്സ്‌ഗാറാരെ, നാന് നിമാക്ക് സൊല്ലുവ ബുദ്ദിനായ എത്തെന്റ, നിമ്മ പഡിത്ത ബുദ്ദിനായാക്ക് എണേഗാത്ത കാര്യഗാള്‌ന പഡിസി നിമ്മ് കുള്ളുക്കു താനെ ബേ്റെബേ്റെ കച്ചി മാഡ്‌ന്റവാര്‌നാമ് നിമാക്കിര്‌ക്കുവ നമ്പിക്കേന ഇല്ലാദെ മാഡ്‌ന്റവാര്‌നാമ് നിമ്മ സൂസാരിത്ത് ഇര്‌ക്കുഡൊ. അത്തവാള്‌ഗാള്‌ക്ക് എ്ണേഗാദിര്‌ന്. 18 അവാര് നമ്മ് ആണ്ടവാന് ക്‌റ്‌സ്‌ത്ത്‌ക്ക് ബേ്ണ്ട്യല്ല ഗിലാസ ഗേവാദ്. അവനവാന് കാര്യഗാള് നഡാക്ക്യ ബേ്ണ്ടിത്തെ അവാര് ആസെപഡുവാദ്. അവാര് ആള്‌ഗാള്‌ന മയാക്കുവ നായഗാള്‌മ് പിര്യപഡുസുവ നായഗാള്‌മ് സൊല്ലികൊണ്ടു പച്ചെപാവഗാള്‌ന ഏമാത്ത്‌ന്റാര്. 19 നിമ്മ സാമിക്ക് കെ്പട്ട് നഡാക്ക്‌ന്റവാര് എന്റ് ഏസ്സ്‌ന നമ്പിര്‌ക്കുവ എല്ലാവാര്‌മ് കേ്ട്ട്‌റ്‌ക്ക്‌ന്റാര്. അദ്‌നാലെ നാന് നിമാന നെനേത്ത് പിര്യപഡ്‌ന്റെ. എന്റാല്‌മ് നിമ്മ നല്ല കാര്യഗാള്‌ന പറ്റി സൊക്കാന തെരിന്ത്‌റ്‌ക്കുഡൊ എന്റ്‌മ് കെ്ട്ട കാര്യഗാള്‌ന ഗേഗാദെ തങ്കമാന മനേസ്സ്‌ഗാറാര്‌മ് ആയിര്‌ക്കുഡൊ എന്റ്‌മ് നാന് ആസെപഡ്‌ന്റെ. 20 നിമ്മ്‌ദ്യായി പെ്ളേസുവ സാമി സെയിത്താന്‌ന സട്ടന സോലുസി നിമ്മ് കാല്‌കഡി മാഡുവാന്. നമ്മ് ആണ്ടവാന് ഏസ്സ് നിമാക്ക് പ്‌ണ്ണ്യ ഗേഡൊ. 21 എന്നോഡൊപ്പ എ്ണേന്ത് ഗിലാസ ഗേവ തിമിത്തോസുമു എന്ന് കൂട്ടാരാന ലൂക്ക്യോസുമു, ആസോനുമു, സോസിപത്ത്‌റോസുമു നിമ്മ സൊക്കന ഇര്ക്ക്ന്റ്റ എന്റ് കേ്ള്‌ക്ക്‌ന്റാര്. 22 പവുലോസുക്കു ബേ്ണ്ടി ഈ എ്ള്‌ത്ത് എ്ള്‌ദി കൊഡുത്ത തെര്‌തോസു എന്നുവ നാന്‌മ് ആണ്ടവാന് പേര്‌ല് നിമാന ബിനാത്ത്‌ന്റെ. 23 ഗായോസുമു നിമ്മ സൊക്കന ഇര്ക്ക്ന്റ്റ എന്റ് കേ്ള്‌ക്ക്‌ന്റാന്. എനനാമ് എല്ലാ ഏസ്സ്‌ഗാറാര് കൂട്ടനാമ് തങ്കാരിത്ത് നോഡിമാഡി ബ്‌ഡ്‌ന്റവാന്‌ത്തെ അയാള്. പട്ടണാത്ത്‌ല പണ കാര്യന നോഡിനഡാത്തുവ എരസ്‌തോസ്‌മ് നമാന പാസെ ഏസ്സ്‌ന നമ്പുവ കൊറുസ്‌ത്തോസുമു നിമ്മ സൊക്കന ഇര്ക്ക്ന്റ്റ എന്റ് കേ്ള്‌ക്ക്‌ന്റാര്. 24 നമ്മ് ആണ്ടവാന് ഏസ്സ് ക്‌റ്‌സ്‌ത്ത് പ്‌ണ്ണ്യ നിമ്മ എല്ലാവാരോഡൊപ്പ ഇര്‌ക്കുഡോമെ. ആമേന്. 25 ഏസ്സ് ക്‌റ്‌സ്‌ത്ത്‌ന പറ്റി നാന് സൊല്ലുവ നായന ബെത്ത്‌മ് നല്ല സേദിന ബെത്ത്‌മ് സാമിക്ക് നിമാന ഒറേപ്പ് മാഡ്യ മുഡിമ്. മുന്തെല കാലാത്ത്‌ല് ആള്‌ഗാള്‌ക്ക് ഈ നല്ല സേദി പൊറുളു മറേസി ബെത്തിന്താദ്‌ത്തെ. 26 ആന എന്നാല്‌ക്ക്‌മ് ഇര്‌ക്കുവ സാമി ഈ സത്ത്യന ബെ്ളിപഡിസ്യ കല്‌പനെ കൊഡുത്താദ്‌നാലെ സാമിദാസ്‌ഗാള് സാമി സൊല്ലുസുലാക്കാത്ത്‌ല് ഈ കാര്യന എ്ള്‌ദിര്‌ക്ക്‌ന്റാര്. സാമി അത്തെ ഗേന്താദ് എല്ലാ ജാദിഗാള്‌മ് അയി സത്ത്യന നമ്പി സാമി സൊല്ലുപഡി നഡാക്ക്യ ബേ്ണ്ടിത്തെ. 27 എല്ലാദ്‌ന പറ്റി അറുവുമിര്‌ക്കുവ അയി ഒന്റേ ഒന്റു സാമിക്ക് ഏസ്സ് ക്‌റ്‌സ്‌ത്ത്‌നാലെ എന്നാല്‌ക്ക്‌മ് മദ്‌പ്പ് ഉണ്ടാഡൊ. ആമേന്. |
New Life Computer Institute