റോമഗാറാര് 15 - സാമി സേദിക്റ്സ്ത്ത് പെ്ളേത്ത പാസെ പെ്ളേന് 1 നമ്പിക്കേല് നല്ല ഒറേപ്പുള്ളവാര് ആയിര്‌ക്കുവ നമ്മ നമ്പിക്കേല് ഒറേപ്പില്ലാദെ പെ്ളേക്ക്‌ന്റവാര്‌ന കയിതാങ്കുഡൊ. നമാക്ക് പിര്യ ബരുസ്സുവ കാര്യഗാള്‌ന താനെ ഗേഗാദേന്. 2 നമ്മ് കൂട്ടാത്ത്‌ല് ഒന്റൊന്റാള്‌മ് ആങ്കീങ്ക് നല്ലാദ് കെ്ഡേക്കുവ കാര്യഗാള് ഗേയ നോഡികൊണ്ടു അവാര്‌ന പിര്യപഡുസുഡൊ. അത്തെ നിമ്മ അവാര്‌ന നമ്പിക്കേല് ഒറേപ്പുള്ളവാര് മാഡുഡൊ. 3 ക്‌റ്‌സ്‌ത്ത് ഗുഡി തനാന പിര്യപഡുസുവ കാര്യഗാളല്ല ഗേയ നോഡുനാദ്. സാമി സൊല്ലുസുലാക്കാത്ത്‌ല് ഇത്തേമ് എ്ള്‌ദിര്‌ക്ക്‌ന്റല്ല: <<നിമാന മാനഗെ്ഡ്‌സ്‌നവാര് എനാനത്തെ മാനഗെ്ഡ്‌സ്‌നാദ്.>> 4 മുന്നുക്കു താനെ എ്ള്‌ദിര്‌ക്കുവ സാമി സൊല്ലുസുലാക്കഗാള് ഒട്ടുക്കുമു നമാന ബുദ്ദി പഡിസ്യ ബേ്ണ്ടിത്തെ എ്ള്‌ദി ബെത്ത്‌റ്‌ക്കുവാദ്. അദ്‌ന പഡിക്കാട്ടി നമ്മ എല്ലാദ്‌നാമ് പൊറുക്ക്യ മുഡിന്റവാര്‌മ് ദയിര ഉള്ളവാര്‌മ് ആയി നെഞ്ചഡോഡ നമ്മ കാത്ത്‌റ്‌ക്ക്‌ല. 5 ആന ക്‌റ്‌സ്‌ത്ത് ഏസ്സ് പെ്ളേത്ത പാസെ പെ്ളേക്ക്യ നോഡുവ നിമ്മ ഒട്ടുക്കു ഒത്തിമോഡ പെ്ളേക്ക്യ ബേ്ണ്ടി എല്ലാദ്‌നാമ് പൊറുക്ക്യ മുഡിന്റവാര്‌മ് ദയിര ഉള്ളവാര്‌മ് മാഡുവ സാമി നിമാന കയിതാങ്കുഡൊ. 6 അത്തെ നമ്മ് ആണ്ടവാന് ഏസ്സ് ക്‌റ്‌സ്‌ത്ത് അപ്പാനാന സാമിന നിമ്മ ഒന്റേ മനേസ്സോഡ ഒന്റേ ജൊത്തില് ദൊഡ്ഡവാന് മാഡുവുറു. 7 അദ്‌നാലെ സാമിക്ക് മദ്‌പ്പ് കെ്ഡേക്ക്യ ബേ്ണ്ടി ക്‌റ്‌സ്‌ത്ത് നിമാന സേത്തി ബെത്ത പാസെ നിമ്മാമ് ആങ്കീങ്ക് സേത്തി ബെക്കുഡൊ. 8 ക്‌റ്‌സ്‌ത്ത് എഗുദാര് ജാദിഗാള്‌ക്ക് ഗിലാസഗാറാന് ആയി ബന്താദ് അവാര് പാട്ടനാമ്‌ക്ക് സാമി താന് കൊഡുത്ത ബാക്ക്‌ന തവാറ്‌സത്തവാന് എന്റ്‌മ് അയി ബാക്ക് സത്ത്യ എന്റ് കാട്ട്യ ബേ്ണ്ടിമ്‌ത്തെ എന്നുവാദ്‌ന മറാക്കദേന്. 9 സാമി എഗുദാരല്ലാത്ത ജാദിഗാള്‌നാമ് ഗവപട്ട് അവാര്‌മ് സാമിക്ക് മദ്‌പ്പ് കൊഡുക്ക്യ ബേ്ണ്ടിത്തെ ക്‌റ്‌സ്‌ത്ത് ബന്താദ്. സാമി സൊല്ലുസുലക്കാത്ത്‌ല്: <<അദ്‌നാലെ എഗുദാരല്ലാത്ത ജാദിഗാള് പട്ട്‌ല് നാന് നിനാന ദൊഡ്ഡവാന് എന്റ് സൊല്ലുവെ, നാന് നിനാന പറ്റി പാട്ട് പാഡുവെ>> എന്റ് എ്ള്‌ദിര്‌ക്കുവ പാസെത്തെ. 10 സാമി സൊല്ലുസുലാക്കാത്ത്‌ല് പിന്നേമ്: <<എഗുദാരല്ലാത്ത ജാദിഗാളെ, സാമിക്ക് പട്ട ആള്‌ഗാളോഡ നിമ്മാമ് പിര്യപൊങ്കുന്>> എന്റ് എ്ള്‌ദിര്‌ക്ക്‌ന്റ്. 11 സാമി സൊല്ലുസുലാക്കാത്ത്‌ല് ബേ്റൊന്റു പട്ട്‌ല്‌മ്: <<എഗുദാരല്ലാത്ത എല്ലാ ജാദിഗാളെ, ആണ്ടവാന്‌ക്ക് മദ്‌പ്പ് കൊഡുത്തു നണ്ണി സൊല്ലുനു, എല്ലാ ആള്‌ഗാള്‌മെ അയാള്‌ക്ക് മദ്‌പ്പ് കൊഡുത്തു നണ്ണി സൊല്ലുനു>> എന്റ് എ്ള്‌ദിര്‌ക്ക്‌ന്റ്. 12 <<എഗുദാരല്ലാത്ത ജാദിഗാള്‌ന ആള്യ ബേ്ണ്ടി, ഇസ്സായി കാല്‌ലിന്ത് പ്‌റാക്കുവ ഒരുത്താന്‌ന എ്ഡ്‌ത്ത് ബെക്കുവാന്. അവാര് അയാള്‌ന നെഞ്ചഡെ ബെക്കുവാര്>> എന്റ് ഏസ്സയ്യ സാമിദാസ് സൊല്ലിര്‌ക്ക്‌ന്റാന്. 13 നമ്മ സാമിന നമ്പുവാദ്‌നാലെ സാമി നമാക്ക് നിമ്മ്‌ദ്യാന പെ്ളേപ്പ്‌മ് പിര്യരിമുള്ള പെ്ളേപ്പ്‌മ് തര്‌ഡൊ. എന്ത്‌ക്കെന്റ് സൊന്ന അയി സാമിനത്തെ നമ്മ നെഞ്ചഡെ ബെത്ത്‌റ്‌ന്റാമ്. അത്തെ സാമി തന്ന് നിഗാല് സക്‌തിനാലെ നിമ്മ് നെഞ്ചഡെന സേത്തി സേത്തി ബരുസുഡൊ. പവുലോസു ഗേവ കാര്യഗാള് 14 ഏസ്സ്‌ഗാറാരെ, നിമ്മ നല്ലവാര് എന്റ്‌മ് നിമാക്ക് ഗേയ ഇര്‌ക്കുവ എല്ലാ കാര്യന പറ്റി അറുവു ഇര്‌ക്ക്‌ന്റവാര് എന്റ്‌മ് ആങ്കീങ്ക് പഡിസ്യ മുഡിന്റവാര് എന്റ്‌മ് എനാക്ക് നലമായി തെരിമ്. 15 നിമാക്ക് നെനേവു ബര്‌സ്സ്യ ബേ്ണ്ടി ഈ എ്ള്‌ത്ത്‌ല് ലേസ കാര്യഗാള്‌ന ദയിരത്തോഡ എ്ള്‌ദിര്‌ക്ക്‌ന്റെ. എന്ത്‌ക്കെന്റ് സൊന്ന സാമിക്ക് എനാന ബേ്റ്‌വായിവെന്താദ്‌നാലെത്തെ അത്തെ ദയിര കാട്ട്‌നാദ്. 16 അത്തെ സാമിക്ക് ബേ്റ്‌വെന്താദ്‌നാലെത്തെ എഗുദാരല്ലാത്ത ജാദിഗാള് പട്ട്‌ല് സാമിന പറ്റി സൊല്ലുവ നല്ല സേദിന സൊല്ല്യ ബേ്ണ്ടി സാമി എനാന ക്‌റ്‌സ്‌ത്ത് ഏസ്സ്‌ക്ക് ഗിലാസഗാറാന് മാഡ്‌നാദ്‌. സാമിനിഗാല് സുത്താപ്പ് മാഡ്‌നാദ്‌മ് സാമിക്ക് മെച്ച്‌പ്‌ഡിത്താദ്‌മ് ആന നേര്‌സെ മാഡി അവാര്‌ന സാമി പട്ട്‌ക്ക് എ്ഡ്‌ത്ത് പോയാത്തെ നാന് പൂസാരിന പാസെ ഈ ഗിലാസ ഗേന്ത് കൊണ്ട്‌റ്ക്കുവാദ്. 17 ക്‌റ്‌സ്‌ത്ത് ഏസ്സോഡ ഒന്റായിര്‌ക്കുവാദ്‌നാലെ സാമിക്ക് ബേ്ണ്ടി നാന് ഗേവ കാര്യാത്ത്‌ല് എനാക്ക് പെരിമെപഡ്യ മുഡിമ്. 18 എഗുദാരല്ലാത്ത ജാദിഗാള്‌ന സാമി സൊല്ലുപഡിക്ക് നഡാക്ക്‌ന്റവാര് മാഡ്യ ബേ്ണ്ടി ക്‌റ്‌സ്‌ത്ത് ഏസ്സ് എനാന ബെത്ത് ഗേസ്‌ന കാര്യഗാള്‌നാമ് സൊന്ന കാര്യഗാള്‌നാമ് അല്ലാദെ ബേ്റൊന്റുനാമ് പറ്റി നാന് സൊല്ല്യ തുണിവാദില്ലെ. 19 സാമിനിഗാല് സക്‌തില് ദൊഡ്ഡുദൊഡ്ഡ അദിസ്യഗാള്‌മ് അഡ്യാളഗാള്‌മ് ഗേയ ക്‌റ്‌സ്‌ത്ത് എനാന കയിതാങ്ക്‌നാന്. അത്തെ നാന് ക്‌റ്‌സ്‌ത്ത്‌ന പറ്റി സൊല്ലുവ നല്ല സേദിന എര്‌സലേമ്‌ലിന്ത് ഇല്ലൂറിയ ദേസമാട്ട്‌ക്ക് പോയി സൊല്ലി മുഡിത്ത്‌റ്‌ന്റെ. 20 ആരാറ്റ ക്‌റ്‌സ്‌ത്ത്‌ന പറ്റി സൊന്ന പട്ട്‌ക്ക് പോയി ക്‌റ്‌സ്‌ത്ത്‌ന പറ്റി സൊല്ല്യ എനാക്ക് പിര്യ ഇല്ലെ. ക്‌റ്‌സ്‌ത്ത്‌ന പറ്റി കേ്ള്‌ക്കാദിര്‌ക്കുവ പട്ട്‌ക്ക് പോയി സൊല്ല്യത്തെ എന്നാസെ. 21 <<അയാള്‌ന പറ്റ്യുള്ള അറുവു കെ്ഡേക്കാത്തവാര് അയാള്‌ന കാണുവാര്, അയാള്‌ന പറ്റി കേ്ള്‌ക്കാദിന്തവാര് അയാള്‌ന നെപ്പ് കെ്ഡേസുവാര്>> എന്റ്‌ത്തെ സാമി സൊല്ലുസുലക്കാത്ത്‌ല് എ്ള്‌ദിര്‌ക്കുവാദ്. പവുലോസു റോമ നാഡ്‌ക്ക് പോയ ആസെപഡ്‌ന്റാന് 22 അദ്‌നാലെത്തെ നിമ്മ് പട്ട്‌ക്ക് ബര്യ എനാക്ക് എ്ഡെക്കെ്ഡേക്ക് തഡേസഗാള് ബന്താദ്. 23 ആന ഇന്നി ഈ എ്ഡേക്ക്‌റാഗ നല്ല സേദിന സൊല്ല്യ എ്ഡെ ഇല്ലത്താദ്‌നാലേമ്, നിമാന ബന്ത് കാണ്യ നാന് എഞ്ചോ ബര്‌സ്സ ആസെപഡുവാദ്‌നാലേമ് നാന് നിമ്മ് പട്ട്‌ക്ക് ബന്റെ. 24 അദ്‌നാലെ പെയിന്‌ക്ക് പോഗാട്ടി നിമ്മ് പട്ട്‌ക്ക് ബരുവെ. അത്തെ ബന്ത് നിമാന കാണുവെ എന്റ്‌മ് നിമ്മോഡൊപ്പ ലേസ നാള് ഇര്‌ക്കുവെ എന്റ്‌മ് അദ്‌ലിന്ത് പോഗാട്ടി പോവാദ്‌ക്ക് ബേ്ഡ്‌മാനാദെല്ല തന്ത് കയി താങ്കുവുറു എന്റ്‌മ് നാന് നെനേക്ക്‌ന്റെ. 25 ആന നാന് ഇന്നാല് എര്‌സലേമ്‌ല സാമിക്ക് പട്ടവാര്‌ക്ക് കൊഡുക്ക്യ തന്ത ദാനന അവാര്‌ക്ക് കൊഡുക്ക്യ ബേ്ണ്ടി എര്‌സലേമ്‌ക്ക് പോന്റെ. 26 എന്ത്‌ക്കെന്റ് സൊന്ന എര്‌സലേമ്‌ല സാമിക്ക് പട്ടവാര്‌ല് ഏ്ളെഗാള് ആയിര്‌ക്ക്‌ന്റവാര്‌ക്ക് ലേസ ദാനഗാള് ഗേഡൊ എന്റ് മക്കെദോന്യഗാറാര്‌മ് അഗായലവാര്‌മ് പിര്യപിര്യാത്ത് മുഡിവു മാഡിര്‌ക്ക്‌ന്റാര്. 27 അവാര്‌ക്ക് അത്തെ ഗേയ മനേസ്സ് ബന്താദ് താനേമല്ല, അവാര് അത്തെ ഗേയ കഡാമെ പട്ടവാര്‌മ്‌ത്തെ. എന്ത്‌ക്കെന്റ് സൊന്ന എഗുദാരല്ലാത്ത ജാദിഗാള് എഗുദാര്‌ക്ക് കെ്ഡേത്ത സാമി ബാക്ക്‌വരഗാള്‌ക്ക് പങ്ക്‌ഗാറാര് ആനാദ്‌നാലെ അവാര് ഈ ലോഗാത്ത്‌ല് തമാക്കിര്‌ക്കുവ സൊത്തുസുഗാത്ത്‌ലിന്ത് എഗുദാര്‌ക്ക് പങ്ക് കൊഡുക്ക്യ കഡാമെ പട്ടവാര്‌ത്തെ. 28 എര്‌സലേമ്‌ല ഏ്ളെഗാള്‌ക്ക് കൊഡിക്ക്യ തന്ത ദാനന നാന് അവാര് കയിക്ക് കൊഡുത്തു ഒറേപ്പ് മാഡ്‌ന പ്‌റ നാന് പെയിന്‌ക്ക് പോവെ. അത്തെ പോഗാട്ടി നിമ്മ് പട്ട്‌ക്ക് ബരുവെ. 29 നാന് നിമ്മ് പട്ട്‌ക്ക് ബര്‌ഗാട്ടി ക്‌റ്‌സ്‌ത്ത്‌ലിന്ത് കെ്ഡേക്കുവ എഞ്ചോ ബാക്ക്‌വരഗാള് നിമ്മ് പെ്ളേപ്പ്‌ല് കെ്ഡേക്ക്‌മ് എന്റ് എനാക്ക് തെരിന്റ്. 30 ഏസ്സ്‌ഗാറാരെ, നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌നാമ് സാമിനിഗാല് തന്ത സീവാന്‌നാമ് നെനേത്ത് നാന് നിമാന ബേ്ണ്ടികൊള്ളുവാദ് എന്തെന്റ് സൊന്ന, നിമ്മ എനാക്ക് ബേ്ണ്ടി എന്നോഡ എ്ണേന്ത് ഇത്തെ പരേസ്‌ന്. 31 എഗുദാലിര്‌ക്കുവ ഏസ്സ്‌ന നമ്പാത്തവാര് കയിലിന്ത് സാമി എനാന കാപാറ്റ്യ ബേ്ണ്ടിമ് നാന് എര്‌സലേമ്‌ല സാമിക്ക് പട്ടവാര്‌ക്ക് എ്ഡ്‌ത്ത് പോവ ദാന അവാര്‌ന പിര്യപ്‌ഡിസ്യ ബേ്ണ്ടിമ് സാമിക്ക് പരേസ്‌ന്. 32 അത്തെ സാമിക്ക് മനേസ്സിന്തദാന നാന് പിര്യപിര്യത്തോഡ നിമ്മ് പട്ട്‌ക്ക് ബരുവെ. അന്നാപ്പ്‌ത്തെ നിമ്മൊപ്പ എന്ന് മനേസ്സ്‌മ് ദ്‌ഡ്‌ക്കനാവു. 33 നമാക്ക് നിമ്മ്‌ദി തരുവ സാമി നിമ്മ എല്ലവാരോഡാമ് ഇര്‌ക്കുഡൊ. ആമേന്. |
New Life Computer Institute