റോമഗാറാര് 13 - സാമി സേദിഅദിഗാരിഗാള്ക്ക് അഞ്ചുഡൊ 1 എല്ലാ ആള്‌ഗാള്‌മ് അദിഗരഗാള്‌ക്ക് കെ്ട്ട്‌പട്ട് ഇര്‌ക്കുഡൊ. എന്ത്‌ക്കെന്റ് സൊന്ന, സാമി ബെക്കാത്ത ഒന്റു അദിഗരാമില്ലെ. ഇന്നാല് കണ്ട് ബരുവ അദിഗരഗാളെല്ല സാമി ബെത്ത അദിഗരഗാള്‌ത്തെ. 2 അദ്‌നാലെ അദിഗരാക്ക് ബണങ്കാത്തവാന് സാമി ബെത്ത അദിഗരാക്ക്ത്തെ ബണങ്കാദിര്‌ന്റാന്. അത്തെ ബണങ്കാത്തവാര് ദെ്ണ്ടണെ കെ്ഡേസുവാര്. 3 നല്ല കാര്യഗാള് ഗേന്റവാര്‌ക്ക് ആള്‌ന്റവാര്‌ന അഞ്ചുവ തേവില്ലെ. ആന കെ്ട്ട കാര്യഗാള് ഗേന്റവാര് ആള്‌ന്റവാന്‌ന അഞ്ചുഡൊ. ആള്‌ന്റവാര്‌ക്ക് അഞ്ചാദിര്‌ക്ക്യ ആസെപഡ്‌ന്റായ? അത്ത്യാന നല്ല കാര്യഗാള് ഗേഗ്, അന്നാപ്പ് അയാള് നിനാന പിര്യപഡുവാന്. 4 എന്ത്‌ക്കെന്റ് സൊന്ന നിനാക്ക് നല്ലാദ് ബര്യ ബേ്ണ്ടിത്തെ അയാള് സാമിക്ക് ഗിലാസഗാറാന് ആയിര്‌ക്കുവാദ്. ആന നീ കെ്ട്ടാദ് ഗേവദാന ആള്‌ന്റവാന്‌ന അഞ്ചുഡൊ. ദെ്ണ്ടിക്കുവാദ്‌ക്കുള്ള അദിഗര അയാള്‌ക്ക് ഇര്‌ക്ക്‌ന്റ് എന്നുവാദ് ബെ്റ്‌ദ്യല്ല, അദ് നേര്‌ത്തെ. കെ്ട്ടാദ് ഗേന്റവാര്‌ക്ക് ദെ്ണ്ടണെ ബിദിക്ക്യ ബേ്ണ്ടി പള്യെ്ഡ്‌ക്കുവ സാമി ഗിലാസഗാറാന്‌ത്തെ അയാള്. 5 അദ്‌നാലെ കെ്ഡേക്കുവ ദെ്ണ്ടണെന നെനേത്ത് താനേമല്ല, അത്തെ ഗേഡൊ എന്റ് മനേസ്സ് സൊല്ലുവാദ്‌നാലേമ് ആള്‌ന്റവാര്‌ക്ക് കെ്ട്ട്‌പട്ട് നഡാക്കുഡൊ എന്നുവാദ് ബേ്ഡ്‌മാന കാര്യത്തെ. 6 അദ്‌നാലെത്തെ നിമ്മ കന്ത്യ കെ്ട്ടുവാദ്. അദിഗാരിഗാള്‌മ് സാമി ഗിലാസഗാറാരായി അവാര് ഗേവ ഗിലാസാക്ക് ബേ്ണ്ടി തമാന താനെ ഒപ്പിസി കൊഡുത്ത്‌റ്ക്ക്‌ന്റാര്. 7 എല്ലാവാര്‌ക്ക്‌മ് കൊഡുക്ക്യ ഉള്ളാദ്‌ന കൊഡുക്കുഡൊ. കന്ത്യ കൊഡുക്ക്യുള്ളവാന്‌ക്ക് കന്ത്യനാമ് ബരിപണ കൊഡുക്ക്യുള്ളവാന്‌ക്ക് ബരിപണാമ് മദ്‌പ്പ് കൊഡുക്കുന്റവാന്‌ക്ക് മദ്‌പ്പ്‌മ് കൊഡുക്കുഡൊ. മാന കാട്ട്‌ന്റവാന്‌ക്ക് മാനാമ് കാട്ടുഡൊ. സീവാന്‌പഡ്യ നമ്മ കഡാമെ പട്ടവാര്‌ത്തെ 8 ആങ്കീങ്ക് സീവാന്‌ബെത്ത് നഡാക്കുവ കഡാമെ നിമാക്കിര്‌ക്ക്ന്റ്. അദല്ലാദെ ബേ്റൊന്റുക്കുമു കഡാമെപട്ട്‌റ്‌ക്കാദേന്. അഡ്‌ത്തവാരോഡ സീവാന്‌ബെത്ത് നഡാക്ക്‌ന്റവാന് മോസെ ബെത്ത സാമി സട്ടപഡി നഡാന്ത്‌റ്‌ന്റാന്. 9 <<ബേസ്യാഡ ബേ്ഡ, കൊലെഗേഗ ബേ്ഡ, ത്‌റ്‌ഡ ബേ്ഡ, കെ്ട്ടാദ്‌ക്ക് ആസെ ബെക്കബേ്ഡ>> എന്നുവ കല്‌പനെഗാള്‌മ് ബേ്റെ എല്ലാ കല്‌പനെഗാള്‌മ് <<നിനാന പാസെ താനെ അഡ്‌ത്തവാര്‌നാമ് സീവാന്‌ബെത്ത് നഡാക്കുഡൊ>> എന്നുവ കല്‌പനേല് അഡാങ്കിര്‌ക്ക്‌ന്റ്. 10 അഡ്‌ത്തവാര്‌ന സീവാന്‌ബെത്ത് നഡാന്ത നീ അവാര്‌ക്ക് കെ്ട്ടാദ് ഗേഗമാട്ടായി. അദ്‌നാലെ സീവാന്‌ബെത്ത് നഡാക്ക്‌ന്റവാന് സാമി സട്ടപഡി നഡാന്ത്‌റ്‌ക്ക്‌ന്റാന്. 11 നിമ്മ നല്ല സേദിന നമ്പ്‌ന സമ്യന ബെത്ത് നോഡുന നമ്മ തപ്പിസി കഡാക്കുവ നേര ഇന്നാല് ഒന്റേപെ്ട്ട് അഡ്‌ത്ത്‌റ്‌ക്കുവാദ്‌നാലെ ഇന്നാല് ഇദെല്ല ഗേന്. എന്ത്‌ക്കെന്റ് സൊന്ന നിമാക്ക് ഉറാങ്ക്യളാഗുവ നേര ബന്ത്‌ദ്. 12 ഇ്റ്‌ട്ട് ബെ്ഡ്യ പക്ക ആയിര്‌ക്ക്‌ന്റ്. അദ്‌നാലെ ഇ്റ്‌ട്ട്‌ക്ക് എ്ണേന്ത കാര്യഗാള് ഗേവാദ്‌ന തള്ളി ബെ്ള്‌സാക്ക് എ്ണേന്ത കാര്യഗാള്‌ന ഗേന്. 13 പഗാല് നഡാക്കുവ ആള്‌ഗാള്‌ന പാസെ നമ്മ മര്യാദുള്ളവാര് ആയി നഡാന്. തിന്റ്‌കുഡിത്ത് ബോദേ്റി നഡാക്കുവാദ്‌നാമ്, കുഡിത്ത് നഡാക്കുവാദ്‌നാമ്, കാമാക്ക് കണ്ണില്ലാദെ കണ്ടപഡിക്ക് നഡാക്കുവാദ്‌നാമ്, ബെത്ത് നഡാക്കുവാദ്‌നാമ്, പഗേക്കുവാദ്‌നാമ്, കണ്ണ്‌കഡി ബെക്കുവാദ്‌നാമ് തള്ളി 14 ആണ്ടവാന് ഏസ്സ് ക്‌റ്‌സ്‌ത്ത്‌ക്ക് ഇര്‌ക്കുവ ഗുണഗാള് താനെ ഉള്ളവാരായി നഡാന്. സരിഗല ആസെപഡുവ കെ്ട്ട ആസെഗാള്‌ന ഗേയ ബേ്ണ്ടി അദ്‌ക്കായി നെനേക്കാദേന്. |
New Life Computer Institute