റോമഗാറാര് 11 - സാമി സേദിസാമി എഗുദാര്‌ന ഒന്റേപെ്ട്ട് തള്ളമാട്ടാന് 1 ആന സാമി തന്ന് സൊന്ത ജനഗാള്‌ന തള്ള്‌നാന എന്റ് നാന് കേ്ള്‌ക്ക്‌ന്റെ. ഇല്ലെഗേ ഇല്ലെ. നാന്‌മ് ഒന്റു ഇസ്‌റവേല്‌ഗാറാന്‌ത്തെ, അവുറഗാമ് കാല്‌ക്ക് പട്ട ബെന്ന്യമീന് കുലാത്ത്‌ല് പ്‌റാന്തവാന്‌ത്തെ. 2 സാമി മുന്നുക്കെ തെരിന്തിന്ത തന്ന് ജനഗാള്‌ന തെ്റ്യാലെ. സാമി സൊല്ലുസുലാക്കാത്ത്‌ല് ഏല്യാവുന പറ്റി സൊല്ലിര്‌ക്കുവാദ് എന്തെന്റ് നിമാക്ക് തെരിവാദില്ലേഗ? ഏല്യാവു ഇസ്‌റവേല്‌ഗാറാര്‌ക്ക് ബണങ്കാത്തവാനയി സാമിക്ക് സൊന്നാദ്: 3 <<ആണ്ടവാനെ, അവാര് നിന്ന് സാമിദാസ്‌ഗാള്‌ന കൊന്റാര്, അവാര് നിനാക്ക് പലി കൊഡുക്കുവ മദ്‌ല്‌ന പിര്‌ങ്ക്‌നാര്, നാന് താന്‌ത്തെ മിച്ചാനാദ്, അവാര് എനാനാമ് കൊല്ല്യ നോഡുന്റാര്>> എന്റ് സാമ്യോഡ ബാദാഡ്‌ഗാട്ടി 4 സാമി അദ്‌ക്ക് സൊന്ന ബദ്‌ല് എന്ത്? <<ബാല് എന്നുവ സെലെന കുമ്മുഡാത്ത ഏ്ളായിര ആള്‌ഗാള്‌ന നാന് എനാക്ക് ബേ്ണ്ടി പേ്ണിസി ബെത്ത്‌റ്‌ന്റെ>> എന്റ്‌ത്തെ. 5 അദേപാസെത്തെ ഈ കാലാത്ത്‌ല്‌മ് തന്ന് പ്‌ണ്ണ്യാത്ത്‌ല് സാമി തെരിന്തെ്ഡ്‌ത്ത സ്‌ന്ന ഒന്റു കൂട്ട ആള്‌ഗാള് മിച്ചായിര്‌ക്ക്‌ന്റാര്. 6 ആന അവാര് ഗേവ കാര്യാത്ത്‌ലല്ല സാമി തന്ന് പ്‌ണ്ണ്യാത്ത്‌ല്‌ത്തെ അവാര്‌ന തെരിന്തെ്ഡ്‌ത്തിര്‌ക്കുവാദ്. അവാര് ഗേന്ത കാര്യഗാള്‌ന ബെത്ത് തെരിന്തെ്ഡ്‌ത്തിന്തദാന സാമി പ്‌ണ്ണ്യ പ്‌ണ്ണ്യ അല്ല. 7 അദ്‌നാലെ എന്താറ്റ്? ഇസ്‌റവേല്‌ഗാറാര് നേര്‌മെഗാറാര് ആയ ഓരാഡി നോഡുനാര്, അവാര്‌ക്ക് മുഡ്യാലെ. ആന സാമി തെരിന്തെ്ഡ്‌ത്തവാര്‌ക്ക് അദ് കെ്ഡേത്ത്‌ദ്. മിച്ച ഇന്തവാര് മരനെഞ്ച്‌ഗാറാര് ആനാര്. 8 സാമി സൊല്ലുസുലാക്കാത്ത്‌ല്: <<ഇന്നാവരിദിക്ക് സാമി അവാര് നെഞ്ച്‌ന ഉണാവില്ലാത്ത നെഞ്ച്‌മ്, കണ്ടാല്‌മ് അദ് എന്തെന്റ് തെര്യാത്ത കണ്ണ്‌മ്, കേ്ട്ടാല്‌മ് അദ് എന്തെന്റ് നെപ്പ് കെ്ഡേക്കാത്ത കാദ്‌മ് മാഡി ബെത്ത്‌റ്‌ന്റാന്>> എന്റ് എ്ള്‌ദിര്‌ക്ക്‌ന്റല്ല. 9 <<അവാര് അഡുവ ബിര്‌ന്ത് അവാര് താനെ സദിക്ക് സിക്ക്‌സുവാദ്‌മ്, കണ്ണിക്ക് പഡുസുവാദ്‌മ് ആഡൊ. അവാര് അദ്‌ക്ക് സിക്കി അദുക്കുള്ള ദെ്ണ്ടണെ അവാര്‌ക്ക് താനെ കെ്ഡേക്കുഡൊ. 10 അവാര് കണ്ണ് ഇ്റ്‌ട്ടൂറി കണ്ണ് കെ്ട്ട് തള്ളുഡൊ, കജട്ട പഡുവ പാഡ്‌നാലെ അവാര് ഇ്ഡ്‌പ്പ് മുറുന്ത് തള്ള്‌ഡൊ>> എന്റ് ദാവീദ്‌മ് സൊന്റാനല്ല. 11 അന്നാപ്പ് അവാര് കാല് തട്ട്‌നാദ് ഒന്റേപെ്ട്ട് ബീ്യത്തേഗ? എന്റ് നാന് കേ്ള്‌ക്ക്‌ന്റെ, ഇല്ലെഗേ ഇല്ലെ. അവാര്‌ക്ക് തപ്പ് ബന്താദ്‌നാലെ സാമി എഗുദാരല്ലാത്ത ജാദിഗാള്‌ന കാപാറ്റ്‌നാന് എന്റ്‌ത്തെ. അവാര്‌ക്ക് കണ്ണ്‌കഡി ബര്‌സ്സ്യ ബേ്ണ്ടിത്തെ സാമി അത്തെ ഗേന്താദ്. 12 അവാര് തപ്പി പോനാദ്‌മ് അവാര്‌ക്ക് ബന്ത നജ്‌ട്ടാമ് ഉലഗാത്ത്‌ല ജനഗാള്‌ക്ക്‌മ് എഗുദാരല്ലാത്ത ജാദിഗാള്‌ക്ക്‌മ് നല്ലാദ് ബര്യ ബെത്ത്‌ദ്. അന്നാപ്പ് ഇസ്‌റവേല്‌ഗാറാര് ഒട്ടുക്കു സാമിക്ക് ബേ്ണ്ടി നിന്റിന്തദാന ഉലഗാക്ക് എത്ത്‌റാഗോ നല്ലാദ് ബന്ത്‌റ്‌ക്ക്‌മ്? 13 ആന എഗുദാരല്ലാത്ത ജാദിഗാളായിര്‌ക്കുവ നിമാക്ക് ഇന്നാല് ഇത്തെ സൊന്റെ. നിമാക്ക് അപ്പോസുത്തലാനായി ഗിലാസ ഗേവാദ്‌ന പറ്റി നാന് പെരിമെപഡ്‌ന്റെ. 14 എന്ത്‌ക്കെന്റ് സൊന്ന, ഇത്തെ ഗേവാദ്‌നാലെ എഗുദാര് ജാദിഗാള്‌ക്ക് കണ്ണ്‌കഡി ബരിസ്സി അവാര്‌ല് ലേസ ആള്‌ഗാള്‌ന കാപാറ്റുഡൊ എന്റ് നാന് നെനേക്ക്‌ന്റെ. 15 അവാര്‌ന തള്ള്‌നാദ്‌നാലെ ഉലഗാത്ത്‌ല ജനഗാള്‌ക്ക്‌മ് സാമിക്ക്‌മ് രാജി കൂഡ്യ മുഡിന്ത്‌ദ്. അത്ത്യായിന്ത സാമി ഇസ്‌റവേല്‌ഗാറാര്‌ന ഇന്നി സേത്തി ബെത്തദാന അദ് സത്തവാര് ഉജുര്‌ളാഗുവാദ്‌ക്ക് സമ എന്റല്ലാദെ ബേ്റെന്തെന്റ് സൊല്ല്യാമ്? 16 തലെബാഗ സാമിക്കുള്ളാദ് ആയിന്തദാന മിച്ച ഇര്‌ക്കുവാദ് ഒട്ടുക്കുമു സാമിക്കുള്ളാദ്‌ത്തെ. ഒന്റു മരാത്ത്‌ല ബേര് സാമിക്കുള്ളാദ് ആയിന്തദാന അയി മര താറ്‌ഗാള് ഒട്ടുക്കുമു സാമിക്കുള്ളാദ്‌ത്തെ. 17 എഗുദാര് നാട്ടി ബളാത്ത്‌ന ഒലിവു മരാക്ക് സമ, എഗുദാരല്ലത്തവാര് ആയിര്‌ക്കുവ നിമ്മ സോലെല ഒലിവു മരാക്ക് സമ. അത്തെ ഇര്‌ക്കാട്ടി നാട്ടി ബളാത്ത്‌ന ഒലിവു മരാത്ത്‌ല താറ്‌ഗാള്‌ല് ലേസ താറ്‌ഗാള് ബെ്ട്ടി തള്ളി സോലെല ഒലിവു മര താറ്‌ന പാസെ ഇന്ത നിനാന അയി നാട്ടി ബളാത്ത്‌ന ഒലിവു മരാത്ത്‌ല സത്ത്‌ക്ക് പങ്ക്‌ഗാറാനായ ബേ്ണ്ടി അദ്‌ക്ക് ഒട്ടുസുനാന്. 18 അത്ത്യാനദാന ബെ്ട്ടി തള്ള്‌ന താറ്‌ഗാള്‌ക്ക് നിനാന എ്ണേത്ത് നോഡി നിനാന താനെ പെരിമെപഡാദെ. നീ പെരിമെപഡുവദാന നീ ഒന്റു കാര്യ നെനേക്കുഡൊ, നീയല്ല ബേര്‌ന സുമാക്കുവാദ്, ബേര്‌ത്തെ നിനാന സുമാക്കുവാദ് എന്റ്. 19 ആന <<എനാന ഒട്ടുസ്യ ബേ്ണ്ടിത്തെ അയി താറ്‌ഗാള്‌ന ബെ്ട്ടി തള്ള്‌നാദ് എന്റ് സിലപ്പ നീ സൊല്ലുവായി.>> 20 അദ് സെരിത്തെ. അവാര് നമ്പാത്താദ്‌നാലെ അവാര്‌ന ബെ്ട്ടി തള്ള്‌നാന്. നിമ്മ നമ്പ്‌നാദ്‌നാലെത്തെ അയി മര താറ്‌ഗാളായി നിമ്മ ഇന്നാല്‌മ് ഇര്‌ക്കുവാദ്. അദ്‌നാലെ പെരിമെപഡാദെ അഞ്ചിക്കോഡ ഇര്. 21 നാട്ടി ബളാത്ത്‌ന ഒലിവു താറ്‌ഗാള്‌നഗെ ബെ്റ്‌ദെ ബിഡാത്ത സാമി നിനാനാമ് ബെ്റ്‌ദെ ബ്‌ഡുവാന് എന്റ് നെനേക്കാദെ. 22 അദ്‌നാലെ സാമി എത്ത്‌റ ഗവഗാറാനെന്റ്‌മ് എത്ത്‌റ കഡ്‌പ്പുള്ളവാന് എന്റ്‌മ് ഇദ്‌ന ബെത്ത് കാണ്‌ല. തപ്പി പോനവാര്‌ക്ക് സാമി കഡ്‌പ്പുള്ളവാന്‌ത്തെ. ആന സാമി പഡുവ ഗവന നമ്പികൊണ്ടു ഇര്‌ക്ക്‌ന്റവാര്‌ന സാമി ഗവപഡ്‌ന്റാന്. അത്തെ ഇര്‌ക്കാദെ പോന സാമി നിനാനാമ് ബെ്ട്ടി തള്ളുവാന്. 23 അവാര് നമ്പിക്കില്ലാത്ത മനേസ്സ്‌ന ബ്‌ട്ട് മറിസിമ് സാമിന നമ്പ്‌ന സാമി അവാര്‌നാമ് ഒട്ടുസുവാന്. അവാര്‌ന മറിസിമ് ഒട്ടുസ്യ സാമി സക്‌ത്യുള്ളവാന്‌ത്തെ. 24 സോലേല് കൊഡിത്ത് ബളാന്ത സോലെ ഒലിവു മരാത്ത്‌ലിന്ത് നിനാന ബെ്ട്ടി എ്ഡ്‌ത്ത് നാട്ടി ബളാത്ത്‌ന ഒലിവു മരാക്ക് ഒട്ടുസിന്തദാന നാട്ടി ബളാത്ത്‌ന ഒലിവു മര താറ്‌ഗാളാനവാര്‌ന അദേ ഒലിവു മരാക്ക് ഒട്ടുസ്യ സാമി എത്ത്‌റാഗോ മനേസ്സുള്ളവാന്‌ത്തെ. 25 ഏസ്സ്‌ഗാറാരെ, നിമ്മ ബുദ്ദിസാലിഗാളെന്റ് നിമാന പറ്റി നെനേക്കാദിര്‌ക്ക്യ ഈ കാര്യന തെര്യാദെ ഇര്‌ക്കദേന് എന്റ് നാന് ആസെപഡ്‌ന്റെ. എഗുദാരല്ലാത്ത ജാദിഗാള്‌ലിന്ത് സാമിസാരി ബന്റവാര് കണാക്ക് തെഗേഗ മാട്ട്‌ക്ക് ഇസ്‌റവേല്‌ഗാറാര്‌ല് ലേസ ആള്‌ഗാള് മരനെഞ്ച്‌ഗാറാര് ആയിര്‌ക്ക്‌ന്റാര്. 26 അത്തെ കണാക്ക് തെഗേഗാട്ടി എല്ലാ ഇസ്‌റവേല്‌ഗാറാര്‌മ് തപ്പിസി കഡാക്കുവാര്. <<കാപാറ്റ്‌ന്റവാന് സീയോനുലിന്ത് ബരുവാന്. ആക്കോവു കാല്‌കെ്ളേല് സാമി ആസെപഡി നഡാക്കാദെ പെ്ളേക്കുവ പെ്ളേപ്പ്‌ന ഇല്ലദെ മാഡി സാമി ആസെപഡി നഡാക്കുവ പെ്ളേപ്പ് പെ്ളേക്ക്‌ന്റവാര് മാഡുവാന്. 27 ഇദ്‌ത്തെ നാന് അവാര് പാവഗാള്‌ന ഇല്ലാദെ മാഡ്‌ഗാട്ടി നാന് അവാരോഡ ബെക്കുവ ഒപ്പന്ത>> എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റല്ല. 28 എഗുദാര് നല്ല സേദിന നമ്പാദെ ബേ്ഡ എന്റ് ബെത്താര്. ആന നിമാക്ക് അദ് ഉവഗരപട്ട്‌ദ്. അത്തെ നിമ്മ അയി സേദിന നമ്പ്‌ന്‌റ്. അത്തെ അവാര് സാമിക്ക് പോട്ടിഗാറാര് ആനാര്. ആന സാമി അവാര് പാട്ടാനാമ്‌നാമ് അവാര്‌നാമ് തെരിന്തെ്ഡ്‌ത്താദ്‌നാലെ അവാര് സാമിക്ക് മെച്ച്‌പ്‌ഡിത്തവാര്‌ത്തെ. 29 എന്ത്‌ക്കെന്റ് സൊന്ന, താന് തെരിന്തെ്ഡ്‌ത്തവാര്‌നാമ് അവാര്‌ക്ക് കൊഡുത്ത ബാക്ക്‌വരഗാള്‌നാമ് മാറ്റ്യ സാമി മനേസ്സ് ബെക്കുവാദില്ലെ. 30 മുന്നുക്കു നിമ്മ സാമി സൊല്ലുപഡിക്ക് നഡാക്കാദിന്ത്‌റ്. ആന എഗുദാര് സാമി സൊല്ലുപഡിക്ക് നഡാക്കാത്താദ്‌നാലെ സാമി നിമാന ഇന്നാല് ഗവപട്ടാന്. 31 അത്തെ സാമി നിമാന ഗവ പട്ട പാസെ അവാര്‌നാമ് ഗവപഡ്യ ബേ്ണ്ടി അവാര്‌മ് ഇന്നാല് സാമി സൊല്ലുപഡിക്ക് നഡാക്കാത്തവാര് ആയിര്‌ക്ക്‌ന്റാര്. 32 അത്തെ എഗുദാര്‌നാമ് എഗുദാരല്ലത്തവാര്‌നാമ് ഒട്ടുക്കു സാമി സൊല്ലുപഡി നഡാക്കാത്തവാരായ സാമി ബ്‌ട്ടാന്. എന്ത്‌ക്കന്റ് സൊന്ന, സാമിക്ക് എല്ലാ ആള്‌ഗാള്‌നാമ് ഗവപഡ്യ മുഡിമ്. 33 അവ്വോ, സാമിക്കിര്‌ക്കുവ ഗവനാമ് അറുവുനാമ് ബുദ്ദിനാമ് ആര്‌ക്ക് കണാക്ക് മാഡ്യ മുഡിമ്? സാമി ബിദിക്കുവ ബിദിന ആര്‌ക്ക് സൊക്കാന സൊല്ല്യ മുഡിമ്? അയാള് എന്ത് ഗേന്റാന് എന്റ്‌മ് എത്തെ ഗേന്റാനെന്റ്‌മ് ആര്‌ക്ക് നെപ്പ്‌കെ്ഡേസ്യ മുഡിമ്? 34 സാമി ബൊക്കുലു സൊല്ലിര്‌ക്കുവ പാസെ: <<ആണ്ടവാന് മനേസ്സ്‌ല് ഇര്‌ക്കുവാദ് എന്തെന്റ് ആര്‌ക്ക്‌മ് തെര്യാമാട്ട. അയാള്‌ക്ക് ബുദ്ദി സൊല്ലി കൊഡുക്ക്യ ആര്‌ക്ക്‌മ് മുഡ്യാമാട്ട.>> 35 <<തിരിക്കി ബാങ്ക്യ എന്റ് നെനേത്ത് അയാള്‌ക്ക് എന്താറ്റ കൊഡുത്തവാന് ഇര്‌ക്ക്‌ന്റാന?>> 36 എല്ലാദ്‌മ് സാമിലിന്ത് ഉണ്ടാറ്റ്. അയാള്‌മേലെ അയാള്‌ക്ക് ബേ്ണ്ടിത്തെ ഉണ്ടാനാദ്. അയാള്‌ക്ക് പേര്‌പെരിമെ എന്നാല്‌ക്ക്‌മ് ഇര്‌ക്കുഡൊ, ആമേന്. |
New Life Computer Institute