റോമഗാറാര് 1 - സാമി സേദിപവുലോസുമ് നല്ല സേദിമ് 1 സാമി തന്ന് മഗാന്‌മ് നമ്മ് ആണ്ടവാന്‌മാന ഏസ്സ് ക്‌റ്‌സ്‌ത്ത്‌ന പറ്റി മുന്തെ കാലാത്ത്‌ലെ ആള്‌ഗാള്‌ക്ക് ബാക്ക് കൊഡുത്തിന്ത നല്ല സേദിന സാമി സൊല്ലുസുലാക്കാത്ത്‌ല് സാമി സാമിദാസ്‌ഗാള് എ്ള്‌ദി ബെത്ത്‌റ്‌ന്റാര്. 2 അയി നല്ല സേദിന സൊല്ല്യ ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റവാന്‌മ് അപ്പോസുത്തലാനായി ബ്‌ളിത്ത്‌റ്‌ന്റവാന്‌മ് ക്‌റ്‌സ്‌ത്ത് ഏസ്സ് ഗിലാസഗാറാന്‌മാന പവുലോസു എന്നുവ നാന്, 3 റോമ പട്ടണാത്ത്‌ല് സാമിക്ക് മെച്ച്‌പ്‌ഡിത്തവാര്‌മ്, സാമി ബ്‌ളിത്ത്‌റ്‌ന്റവാര്‌മ്, സാമിക്ക് പട്ടവാര്‌മ് ആയിര്‌ക്കുവ ആള്‌ഗാള്‌ക്കൊട്ടുക്കു എ്ള്‌ദുവ എ്ള്‌ത്ത്. 4 നമ്മ് അപ്പാന് സാമിമ് നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌മ് നിമാക്ക് പ്‌ണ്ണ്യാമ് ഗേഡൊ, നിമാന നിമ്മ്‌ദ്യായിമ് ബെക്കുഡൊ. 5 മന്‌സാന് പ്‌റാവിന ബെത്ത് നോഡുന ഏസ്സ് ക്‌റ്‌സ്‌ത്ത് ദാവീദ് കാല്‌ക്ക് പട്ടവാനായി പ്‌റാന്താന്. സത്തിന്ത് ഉജുര്‌ളാഗ്‌നാദ്‌നാലെ സുത്താപ്പുള്ള നിഗാലുള്ളവാനായി ഇര്‌ക്കുവാദ്‌ന ബെത്ത് നോഡുന അയാള് സാമിമഗാന് എന്നുവ സക്‌തിന കാട്ട്‌ന്റാന്. 6 എല്ലാ ജാദിഗാള്‌ക്ക് പട്ടവാര്‌മ് അയാള്‌ന നമ്പി അയാള് സൊല്ലുപഡിക്ക് നഡാക്കുഡൊ. അദ്‌നാലെ ക്‌റ്‌സ്‌ത്ത്‌ക്ക് ബേ്ണ്ടി അയി കാര്യ ഗേയാത്തെ എമാന സാമി പ്‌ണ്ണ്യാത്ത്‌ല് അപ്പോസുത്തലാര് മാഡ്‌നാദ്. 7 അയി കൂട്ടാത്ത്‌ല് ഏസ്സ് ക്‌റ്‌സ്‌ത്ത്‌ക്ക് ബേ്ണ്ടി സാമി ബ്‌ളിത്ത്‌റ്‌ക്കുവ നിമ്മാമ് എ്ണേന്ത്‌റ്‌ന്റ്‌റ്. 8 നിമ്മ് നമ്പിക്കേന പറ്റി ഉലഗാത്ത്‌ലവാര് ഒട്ടുക്കു കേ്ട്ട്‌റ്‌ക്കുവാദ്‌നാലെ ഏസ്സ് ക്‌റ്‌സ്‌ത്ത് പേര്‌ല് നിമ്മ എല്ലാവാര്‌ക്ക്‌മ് ബേ്ണ്ടി മുദാല് താനെ നാന് എന്ന് സാമിക്ക് നണ്ണി സൊന്റെ. 9 നാന് നിമാന ഒപ്പ നെനേത്ത് കൊണ്ടു പരേസ്‌ന്റെ. ഈ കാര്യ നാന് സാമി മഗാന്‌ന പറ്റ്യുള്ള നല്ല സേദിന സൊല്ലികൊണ്ടു നാന് മനേസ്സാറ കുമ്മുഡി നഡാക്കുവ എന്ന് സാമിക്ക് തെരിമ്. 10 സാമി ആസെപഡുവ ഗളിഗേക്ക് നിമാന ബന്ത് കാണ്യ ബേ്ണ്ടി നാന് ഒപ്പ സാമിന ബേ്ണ്ട്‌ന്റെ. 11 ക്‌റ്‌സ്‌ത്തോഡ ബെത്ത്‌റ്‌ക്കുവ നമ്പിക്കേല് നിമാന ഒറേപ്പ് മാഡ്യ എന്താറ്റ ബരഗാള് നിമാക്ക് തര്യ ബേ്ണ്ടി നാന് നിമാന കാണ്യ ആസെപഡ്‌ന്റെ. 12 എന്റ് സൊന്ന എന്ന് നമ്പിക്കെനാലെ നിമാക്ക്‌മ് നിമ്മ് നമ്പിക്കെനാലെ എനാക്ക്‌മ് അത്തെ നമ്മ റാഡ് കൂട്ടാര്‌മ് ദ്‌ഡ്‌ക്കന ഇര്‌ക്ക്യ ബേ്ണ്ടിത്തെ നാന് നിമാന കാണ്യ ആസെപഡുവാദ്. 13 ആന ഏസ്സ്‌ഗാറാരെ, നാന് ഗേന്ത കാര്യാത്ത്‌ല് എഗുദാരല്ലാത്ത ജാദിഗാള്‌ലിന്ത് ക്‌റ്‌സ്‌ത്ത്‌ക്ക് ആള്‌ഗാള്‌ന കെ്ഡേത്ത പാസെ നിമ്മ് പട്ട്‌ല്‌മ് ലേസ ആള്‌ഗാള്‌ന കെ്ഡേസ്യ ബേ്ണ്ടി എഞ്ചോ ജമ്പ് നിമ്മ് പട്ട്‌ക്ക് ബര്യ നെനേത്തെ. ആന ഇന്നാവരിദിക്ക് അദ്‌ക്ക് തഡേസ ബന്ത്‌ദ് എന്നുവാദ്‌ന നിമ്മ തെരിന്ത്‌റ്‌ക്കുഡൊ എന്റ് നാന് ആസെപഡ്‌ന്റെ. 14 അറുവിര്‌ക്കുവ എവനഗാറാര്‌ക്ക്‌മ് അറുവില്ലാത്ത ബറ്‌ബറ ജാദിഗാറാര്‌ക്ക്‌മ് പഡിപ്പുള്ളവാര്‌ക്കമ് പഡിപ്പില്ലത്തവാര്‌ക്ക്‌മ് നല്ല സേദിന സൊല്ല്യ നാന് കഡാമെ പട്ടവാന്‌ത്തെ. 15 അദ്‌നാലെ റോമ പട്ടണാത്ത്‌ലിര്‌ക്കുവ നിമാക്ക്‌മ് നല്ല സേദിന സൊല്ല്യ നാന് എനാക്ക് മുഡിന്തളാവുക്കു ഒരിങ്കിര്‌ക്ക്‌ന്റെ. 16 നല്ല സേദിന പറ്റി നാന് നാണപഡുവാദില്ലെ, പെരിമെത്തെ പഡ്‌ന്റെ. എന്ത്‌ക്കെന്റ് സൊന്ന നല്ല സേദിന നമ്പുവ ഏവാര്‌ക്ക്‌മ് ആദ്യ എഗുദാര്‌ക്ക് പ്‌റ എഗുദാര് അല്ലാത്ത ജാദിഗാള്‌ക്ക്‌മ് തപ്പിസി കഡാക്കുവാദ്‌ക്കുള്ള സാമി സക്‌തി അദ്‌ലിര്‌ക്ക്‌ന്റ്. 17 ബേ്റൊന്റുനാലെമല്ലാദെ നമ്പിക്കെനാലെ താനെത്തെ ആള്‌ഗാള്‌ന സാമി തന്ന് കണ്ണ്‌ക്ക് നേര്‌മെഗാറാര് മാഡ്‌ന്റാന് എന്റ് ഈ നല്ല സേദില് കാട്ടി തന്ത്‌റ്‌ന്റാന്. <<സാമി കണ്ണ്‌ക്ക് നേര്‌മെഗാറാന് ആയിര്‌ക്ക്‌ന്റവാന് നമ്പിക്കെനാലെ പെ്ളേക്കുവാന്.>> എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റല്ല. മന്‌സാന് പാവാമ് അദുക്കുള്ള ദെ്ണ്ടണേമ് 18 മന്‌സാര് ഗേവ എല്ലാ കെ്ട്ട കാര്യഗാള്‌നാമ് പാവഗാള്‌നാമ് നോഡി സാമി പഡുവ മൊനെ മേലോഗാത്ത്‌ലിന്ത് ബെ്ളിപഡ്‌ന്റ്. എന്ത്‌ക്കെന്റ് സൊന്ന അവാര് കെ്ട്ട കാര്യഗാള് ഗേന്ത് ആള്‌ഗാള് സാമിന പറ്റ്യുള്ള സത്ത്യ തെരിവാദ്‌ന മുഡാക്ക്‌ന്റാരല്ല? 19 എന്ത്‌ക്കെന്റ് സൊന്ന സാമിന പറ്റി തെരിവ കാര്യഗാളെല്ല അവാര്‌ക്ക് ബെ്ളിപട്ട്‌റ്‌ന്റ്. സാമി താനെത്തെ അദ്‌ന അവാര്‌ക്ക് അദ്‌ന ബെ്ളിപഡിസി കൊഡുത്താനല്ല. 20 ഉലഗ ഉണ്ടാന നാള്‌ലിന്തേ സാമി ദ്‌ട്ടിസി ബെത്ത്‌റ്‌ക്കുവാദ്‌ന നോഡുന സത്ത്യമുള്ള ഒന്റു സാമി ഇര്‌ക്ക്‌ന്റാനെന്റ്‌മ് അയി സാമിക്കിര്‌ക്കുവ സക്‌തി തീന്ത് പോഗാത്താദെന്റ്‌മ് സൊക്കാന ബെ്ളിപട്ട്‌റ്‌ന്റ്. അദ്‌നാലെ ആര്‌ക്ക്‌മ് തറ്‌ക്ക്യ മുഡ്യാമാട്ട. 21 അവാര് സാമിന തെരിന്ത് ഗുഡി സാമിക്ക് സാമ്യെന്നുവ മദ്‌പ്പ് കൊഡുക്കാദേമ് നണ്ണി സൊല്ലാദേമ് ഇന്താര്. അല്ലാദെ താനെ അവാര് ബുദ്ദിബോദ ഇല്ലാത്ത നെനേവുഗാറാര്‌മ് നല്ലാദ് കെ്ട്ടാദ് എന്തെന്റ് തെര്യാത്ത മനേസ്സ്‌ഗാറാര്‌മ് ആയി തള്ള്‌നാര്. 22 തമ്മ അറിവാളിഗാളെന്റ് അവാര് സൊല്ലി നഡാക്ക്‌ന്റാര്. ആന അവാര് ബുദ്ദില്ലത്തവാര് ആനാര്. 23 അളിവില്ലാത്ത സാമിക്ക് മദ്‌പ്പ് കൊഡുക്കാദെ അവാര് അളിന്ത് പോവ മന്‌സാന്, പക്കി, ബേ്ണ്ട്‌വ്‌റാവു, ഊരുന്ത് നഡാക്കുവ ഉജുരുകെ്ളെഗാള് സെലെഗാള്‌ക്ക് മദ്‌പ്പ് കൊഡുത്താര്. 24 അദ്‌നാലെ സാമി അവാര്‌ന തമ്മ് നെഞ്ച്‌ലിര്‌ക്കുവ കെ്ട്ട ആസെഗാള്‌ന ബെത്ത് അവനവാന് സരിഗലന ആങ്കീങ്ക് മാനഗെ്ഡിസ്യ ബേ്ണ്ടി മാനതാന ഇല്ലാത്ത കാര്യഗാള് ഗേയ ഒപ്പ്‌സി കൊഡുത്താന്. 25 അവാര് സാമിന പറ്റ്യുള്ള സത്ത്യന നമ്പാദെ ഉറുട്ടു മാഡിതള്ള്‌നാര്. ദ്‌ട്ട്‌സ്‌നവാന്‌ന കുമ്മുഡുവാദ്‌ന തള്ളി സാമി ദ്‌ട്ട്‌സ്‌നാദ്‌ന പൂസെക്കി അദ്‌ന അവാര് കുമ്മുഡുനാര്. ആന സാമി എന്നാല്‌ക്ക്‌മ് ദൊഡ്ഡവാന്‌ത്തെ, ആമേന്. 26 അവാര് അത്തെ ഗേന്താദ്‌നാലെ അവാര്‌ക്കിര്‌ക്കുവ കാമ ആസെഗാള്‌ല് മാനതാന ഇല്ലാത്ത കാര്യഗാള് ഗേയ സാമി അവാര്‌ന ബ്‌ട്ട് കൊഡുത്താന്. അവാര് പെ്ണ്ണ്‌മക്കാള് ഗണ്ടാളോഡ ഉറാങ്കുവാദ്‌ന തള്ളി പെ്ണ്ണ്‌മക്കാള് പെ്ണ്ണ്‌മക്കാളോഡ താനെ ഉറാങ്കി ആഗാത്ത കാര്യ ഗേന്താര്. 27 അദേപാസെ താനെ ഗണ്ടാള്‌ഗാള്‌മ് പെ്ണ്ണ്‌മക്കാളോഡ ഉറാങ്കുവാദ്‌ന തള്ളി ആങ്കീങ്ക് ഗൊഡ്ഡുക്കിക്കി ഗണ്ടാളോഡ താനെ ഉറാങ്കി നാണഗെ്ട്ട കാര്യ ഗേന്താര്. ഇത്തെ അവാര് ഗേന്ത കെ്ട്ട കാര്യഗാള്‌ക്കുള്ള ദെ്ണ്ടണെ അവാര് താനെ കെ്ഡേസ്‌നാര്. 28 സാമിന പറ്റ്യുള്ള അറുവു കെ്ഡേസി നഡാക്കുവാദ്‌ല് ദൊഡ്ഡ കാര്യ ഒന്റുമില്ലെ എന്റ് നെനേക്കുവാദ്‌നാലെ ഗേയ പാങ്കില്ലാത്ത കാര്യഗാള് ഗേയ ബേ്ണ്ടി സാമി അവാര്‌ന കെ്ട്ട ബുദ്ദിഗാറാരായി പെ്ളേക്ക്യ ബ്‌ട്ടാന്. 29 അവാര് എല്ലാ ദിന്‌സ്‌ല നേര്‌മല്ലാത്ത കാര്യഗാള്‌മ് കെ്ട്ട കാര്യഗാള്‌മ് പേരാസെപട്ട് ഗേവ കാര്യഗാള്‌മ് ആങ്കീങ്ക് ഗേവ മോസ കാര്യഗാള്‌മ് ഗേന്റവാര്‌ത്തെ. അവാര് കണ്ണ്‌കഡി നെനേവുലേ നഡാക്ക്‌ന്റവാര്‌മ്, കൊലെ ഗേയ ആസെപഡുവ നെനേവുലേ നഡാക്ക്‌ന്റവാര്‌മ്, മല്ല്‌പ്‌ഡിക്ക്‌ന്റവാര്‌മ്, സദിക്കുവ നെനേവു ബെത്ത് കൊണ്ടു നഡാക്ക്‌ന്റവാര്‌മ്, പഗേത്ത് നഡാക്ക്‌ന്റവാര്‌മ്, നൊണ്ടു സൊല്ലി നഡാക്ക്‌ന്റവാര്‌മ്‌ത്തെ. 30 അവാര് അഡ്‌ത്തവാര്‌ന കുറ്റ സൊല്ലി നഡാക്ക്‌ന്റവാര്‌മ്, സാമിന തൊറേന്ത് നഡാക്ക്‌ന്റവാര്‌മ്, അട്ടുളി ഗേന്റവാര്‌മ്, തമ്മാത്തെ ദൊഡ്ഡവാര് എന്റ് നെനേക്ക്‌ന്റവാര്‌മ്, എമാക്ക് എല്ലാമ് ഗേയ മുഡിമ് എന്റ് നെനേക്ക്‌ന്റവാര്‌മ്, കെ്ട്ട ഓസണെഗാറാര്‌മ്, അവ്വ്യപ്പാന് സൊല്ലുപഡി നഡാക്കാത്തവാര്‌മ്‌ത്തെ. 31 ബോദ ഇല്ലത്തവാര്‌മ്, നമ്പ്യ മുഡ്യാത്തവാര്‌മ്, സീവാനില്ലത്തവാര്‌മ്, ഗവ ഇല്ലത്തവാര്‌മ്‌ത്തെ. 32 ഇത്തവ കാര്യഗാള് ഗേവ ഇത്തവാള്‌ഗാള് സാവുക്കു തഗ്‌ദ്യുള്ളവാര്‌ത്തെ എന്നുവ സാമിസട്ടന തെരിന്തിന്ത് ഗുഡി അവാര് ഇത്തവ കാര്യഗാള്‌ന ഗേവാദ് താനേമല്ല, ഇത്തവ കാര്യഗാള് ഗേന്റവാര്‌ന പിര്യാമ് പഡ്‌ന്റാര്. |
New Life Computer Institute