ബെ്ളിപട്ട കാര്യ 9 - സാമി സേദി1 അദ്‌ക്ക് പ്‌റ അഞ്ചാവാദ് ദൂദാന് കൊമ്പൂദുനാന്. അദുക്കുള ബാന്‌ലിന്ത് ബൂമിക്ക് ബ്‌ന്ത്‌റ്‌ക്കുവ ഒന്റു ബെ്ള്ളിന നാന് കണ്ടേന്. അഡി അറ്റ ഇല്ലാത്ത കുയി ത്‌റാപ്പ് കയി അയി ബെ്ള്ളിക്ക് കെ്ഡേത്തിന്ത്‌ദ്. 2 അഡി അറ്റ ഇല്ലാത്ത അയി കുയിന ത്‌റാക്കാട്ടി ദൊഡ്ഡ സൂളെ തീയിലിന്ത് പൊഗെ കഡാക്കുവ പാസെ അദ്‌ലിന്ത് പൊഗെ കഡാന്ത്‌ദ്. അയി കുയിലിന്ത് കഡാക്കുവ പൊഗേല് നേരാമ് ബാന്‌മ് ഇ്റ്‌ട്ട് കെ്ട്ടി തള്ള്‌ട്ട്. 3 അയി പൊഗേലിന്ത് മുട്ടിരിഗാള് ബൂമിക്ക് ബന്ത്‌ദ്. ബൂമിലിര്‌ക്കുവ കൊമ്പു തോളുഗാള്‌ക്ക് ഇര്‌ക്കുവ സക്‌തി അദ്‌ഗാള്‌ക്ക് കെ്ഡേത്ത്‌ദ്. 4 ബൂമില പുല്ലുഗാള്‌ക്കൊ, സെ്ഡികൊഡിഗാള്‌ക്കൊ, മരമട്ടെഗാള്‌ക്കൊ കേ്ഡ്‌പാഡ് ഒന്റുമു മാഡദേന് എന്റ്‌മ് നെറ്റിക്ക് സാമി മുദ്ദുറെ കുത്താത്ത മന്‌സാര്‌ഗാള്‌ന താനെത്തെ കൊഡിമെപഡുസുഡൊ എന്റ്‌മ് അദ്‌ഗാള്‌ക്ക് കല്‌പനെ കെ്ഡേത്ത്‌ദ്. 5 അവാര്‌ന കൊല്ല്യ അല്ല, അയിദ് മാസ അവാര്‌ന കൊഡിമെപഡിസ്യത്തെ അദ്‌ഗാള്‌ക്ക് അദിഗര കെ്ഡേത്താദ്. അയി മുട്ടിരിഗാള് അവാര്‌ന കൊഡിമെപഡ്‌സ്‌ഗാട്ടി കൊമ്പു തോളു കഡിക്കാട്ടി എ്ഡ്‌ക്കുവ ബിജന പാസെ അവാര്‌ക്ക് ബിജ എ്ഡ്‌ത്ത്‌ദ്. 6 അയി കാലാത്ത്‌ല് മന്‌സാര് സായ ഓരാഡി നഡാക്കുവാര്, ആന സായ മുഡ്യാമാട്ട. അവാര് സായ ആസെപഡുവാര്, ആന സാവു ബരാഗേ മാട്ട. 7 ഈ മുട്ടിരിഗാള്‌ന നോഡുഗാട്ടി ജുദ്ദാക്ക് ബ്‌ഡ്യ ഒരിക്കി ബെത്ത്‌റ്‌ക്കുവ കുദുറെഗാള്‌ന പാസെത്തെ ഇന്ത്‌ദ്. ഈ മുട്ടിരിഗാള് തലെഗാള്‌ല് പൊന്നു ഗിര്യാഡന പാസെ എന്തോ ജാദി ഇന്ത്‌ദ്. അദ്‌ഗാള് മൂഞ്ചി മന്‌സാര് മൂഞ്ചിന പാസെ ഇന്ത്‌ദ്. 8 അദ്‌ഗാള്‌ക്ക് പെ്ണ്ണ്‌മക്കാള് തലേന പാസെ ഇര്‌ക്കുവ ഉജാര തലേമ് സിങ്ക പല്ല്‌ന പാസെ ഇര്‌ക്കുവ പല്ല്‌മ് ഇന്ത്‌ദ്. 9 ഇര്‌മ്പ് മാര്‌കച്ചെ പാസെ ഇര്‌ക്കുവ മാര്‌കച്ചെഗാള്‌മ് അദ്‌ഗാള്‌ക്ക് ഇന്ത്‌ദ്. അദ്‌ഗാള് ഇ്റാക്കെ അഡിക്കുവ ജദ്ദ ജുദ്ദ ഗേവ പട്ട്‌ക്ക് ഓഡി പോയി എജ്ജുവ എ്ണ്ണ്‌സ്യ മുഡ്യാത്ത കുദുറെ ബണ്ടി മാഡുവ റെച്ചെന പാസെ ആയിന്ത്‌ദ്. 10 കൊമ്പു തോളുഗാള്‌ക്ക് ഇര്‌ക്കുവ പാസെ ബാല്‌ഗാള്‌മ് നഞ്ച് മുള്ളുഗാള്‌മ് അദ്‌ഗാള്‌ക്ക് ഇന്ത്‌ദ്. അഞ്ച് മാസ മന്‌സാര്‌ഗാള്‌ന കൊഡിമെപഡിസ്യുള്ള സക്‌തി അദ്‌ഗാള് ബാല്‌ക്ക് ഇന്ത്‌ദ്. 11 അഡി അറ്റ ഇല്ലാത്ത കുയി ദൂദാന് അയി മുട്ടിരിഗാള്‌ക്ക് രാജാവു ആയിന്താന്. എവുറായ നായാത്ത്‌ല് അവദോനു എന്റ്‌മ് എവന നായാത്ത്‌ല് അപ്പോലുവോനു എന്റ്‌മ്‌ത്തെ അയാള് പേര്. 12 മുദാല്‌ല കജട്ട തീന്ത്‌ദ്. ഇന്നി ഇദാ, റാഡ് കജട്ട ഗുഡി ബര്യ ഇര്‌ക്ക്‌ന്റ്. 13 പ്‌റ ആറാവാദ് ദൂദാന് കൊമ്പൂദുനാന്. അദുക്കുള സാമി മുന്നുക്കു ഇര്‌ക്കുവ പൊന്നുലു ഉണ്ടാക്ക്‌ന മദ്‌ല്‌ത്ത് നാക്ക് കൊമ്പുലിന്ത് ഒന്റു ജദ്ദ നാന് കേ്ട്ടേന്. 14 കൊമ്പൂദുവ ജാദിന പ്‌ഡിത്തിന്ത ആറാവാദ് ദൂദാന്‌ക്ക്, <<ഊപ്‌റട്ടീസ് എന്നുവ പെര്‌വാനില് കെ്ട്ടി ബെത്ത്‌റ്‌ക്കുവ നാക്ക് ദൂദനാമ്‌നാമ് ഉക്കി ബ്‌ഡ്‌ഡൊ>> എന്റ് സൊല്ലുവ ജദ്ദത്തെ ആയിന്ത്‌ദ് അദ്. 15 അദുക്കുള അയി ദൂദനാമ്‌ന ഉക്കി ബ്‌ട്ടാര്. മന്‌സാര്‌ഗാള്‌ല് മൂറുലു ഒന്റു ബാഗന കൊന്റു തള്ള്യ ഉള്ള അയി ഗളിഗേക്ക്‌മ്, അയി നാള്‌ക്ക്‌മ്, അയി മാസാക്ക്‌മ്, അയി ബര്‌സ്സാക്ക്‌മ് ബേ്ണ്ടി ഒരിക്കി ബെത്തിന്തവാര്‌ത്തെ അവാര്. 16 കുദുറെ പട്ടളഗാറാര് കണാക്ക് ഇരുവാദ് കോഡി എന്റ് നാന് കേ്ട്ടെ. 17 എന്ന് തോറ്റാത്ത്‌ല് കുദുറെഗാള്‌നാമ് അയി കുദുറെ കുദ്ദാക്ക് കുക്കാന്ത് ഇര്‌ക്ക്‌ന്റവാര്‌നാമ് നാന് കണ്ടെ. അയി കുദുറെ കുദ്ദാക്ക് ഇര്‌ക്ക്‌ന്റവാര് തീന പാസെ ഇര്‌ക്കുവ സെങ്ക ന്‌റാമ്, അപ്പര നീല ന്‌റാമ്, ഗെന്തഗന പാസെ ഇര്‌ക്കുവ മഞ്ച ന്‌റാമ് ഉള്ള മാര്‌കച്ചെഗാള് കെ്ട്ടിന്താര്. കുദുറെ തലെഗാള് സിങ്ക തലെഗാള്‌ന പാസെ ഇന്ത്‌ദ്. തീയിമ്, പൊഗേമ്, ഗെന്തഗാമ് അയി കുദുറെഗാള് ബായിലിന്ത് കഡാന്ത് കൊണ്ടിന്ത്‌ദ്. 18 അദ്‌ഗാള് ബായിലിന്ത് കഡാന്ത തീ, പൊഗെ, ഗെന്തഗ ഈ മൂറുമു മന്‌സാര്‌ഗാള്‌ക്ക് തട്ട്‌നാദ്‌നാലെ മന്‌സാര്‌ഗാള്‌ല് മൂറുലൊന്റു ബാഗ ആള്‌ഗാള് സത്ത് കൊട്ടുനാര്. 19 എന്ത്‌ക്കെന്റ് സൊന്ന കുദുറെഗാള് സക്‌തി കുദുറെഗാള് ബായില്‌മ് ബാല്‌ല്‌മ്‌ത്തെ ഇര്‌ക്കുവാദ്. കുദുറെ ബാല്‌ഗാള് തലെ ഇര്‌ക്കുവ പാമ്പ്‌ഗാള്‌ന പാസെത്തെ. അയി ബാല്‌ഗാള്‌ല്‌ത്തെ കുദുറെഗാള് ഗായ മാഡുവാദ്. 20 ഈ തീയിമ്, പൊഗേമ്, ഗെന്തഗാമ് തട്ടി സാഗാദെ മിച്ച ഇന്ത ആള്‌ഗാള് തമ്മ കയില് കുമ്മുഡുവ ജാദിഗാള് മാഡുവാദ്‌ന തള്ളി സാമിസാരി തിര്‌ഗാലെ. അദ്‌താനേമല്ല, പൊന്നുലുമു, ബെ്ള്ളില്‌മ്, ബെ്ങ്കലാല്‌മ്, കല്ല്‌ല്‌മ്, മരാത്ത്‌ല്‌മ് ഉണ്ടാക്ക്‌ന കാണ്യാമ് കേ്ള്‌ക്ക്യാമ് അലിങ്ക്യാമ് മുഡ്യാത്ത സെലെഗാള്‌ന കുമ്മുഡുവാദ്‌നാമ് കെ്ട്ടജാദിഗാള്‌ന കുമ്മുഡുവാദ്‌നാമ് അവാര് തള്ളാലെ. 21 തമ്മ കൊലെ ഗേന്താദ്‌നാമ്, പണ്ടിത്തപാഡ ഗേന്താദ്‌നാമ്, കണ്ടപഡിക്ക് നഡാന്ത് ബേസ്യാഡുവാദ്‌നാമ്, ത്‌റ്‌ഡ്‌നാദ്‌നാമ് തപ്പ് എന്റ് തെരിന്ത് അദ്‌ഗാള്‌ന തള്ളി അവാര് സാമിസാരി തിര്‌ഗാലെ. |
New Life Computer Institute