ബെ്ളിപട്ട കാര്യ 6 - സാമി സേദിമുദ്ദുറെഗാള് 1 അദുക്കുള കൊറ്യാഡ് കുട്ടി ഏ്ള് മുദ്ദുറെഗാള്‌ല് ഒന്റുന ത്‌റാക്കുവാദ്‌ന നാന് കണ്ടേന്. അദുക്കുള അയി നാക്ക് ഉജുരുകെ്ളെഗാള്‌ല് ഒന്റു ഇ്ഡി ജദ്ദന പാസെ <<ബാ>> എന്റ് സൊല്ലുവാദ്‌ന നാന് കേ്ട്ടെ. 2 നാന് നോഡുഗാട്ടി ഒന്റു ബെ്ള്ളെ കുദുറെന കണ്ടെ. കുദുറെ കുദ്ദാക്ക് ഇര്‌ക്ക്‌ന്റവാന് കയില് ഒന്റു ബില്ല് ഇന്ത്‌ദ്. അയാള്‌ക്ക് ഒന്റു ഗിര്യാഡാമ് കെ്ഡേത്ത്‌ദ്. അയാള് ഗെല്‌സ്‌വാന് ആയിമ് ഗെലിസ്യാമ് ബേ്ണ്ടിമ് പോനാന്. 3 കൊറ്യാഡ് കുട്ടി റണ്ടാവാദ് മുദ്ദുറെന ത്‌റാക്ക്‌ഗാട്ടി റണ്ടാവാദ് ഉജുരുകെ്ളെ <<ബാ>> എന്റ് സൊല്ലുവാദ്‌ന നാന് കേ്ട്ടെ. 4 അദുക്കുള സോരെസോര്യ ദിന്‌സ്‌ല് ബേ്റൊന്റു കുദുറെ ബെ്ളിഗെ ഏ്റി ബന്ത്‌ദ്. ബൂമിലിന്ത് നിമ്മ്‌ദിന എ്ഡ്‌ത്ത് തള്ളുവ അദിഗര കുദുറെ കുദ്ദാക്ക് ഇര്‌ക്ക്‌ന്റവാന്‌ക്ക് കെ്ഡേത്ത്‌ദ്. അദ്‌നാലെ ആള്‌ഗാള് ആങ്കീങ്ക് കൊല്ലുവാര്. അയാള്‌ക്ക് ദൊഡ്ഡൊന്റു ബാള്‌മ് കെ്ഡേത്ത്‌ദ്. 5 കൊറ്യാഡ് കുട്ടി മൂണാവാദ് മുദ്ദുറെന ത്‌റാക്കാട്ടി മൂണാവാദ് ഉജുരുകെ്ളെ <<ബാ>> എന്റ് സൊല്ലുവാദ്‌ന നാന് കേ്ട്ടെ. നാന് നോഡുഗാട്ടി ഒന്റു കറ്‌ത്ത കുദുറെന കണ്ടെ. അയി കുദുറെ കുദ്ദാക്ക് ഇര്‌ക്ക്‌ന്റവാന് കയില് ഒന്റു തരാസ് ഇന്ത്‌ദ്. 6 അദുക്കുള അയി നാക്ക് ഉജുരുകെ്ളെഗാള്‌ക്ക്‌മ് നഡ്‌ക്കെ ഇന്ത് ഒന്റു ജദ്ദന പാസെ നാന് കേ്ട്ടെ: <<ഒന്റു ദിനാറ്‌ക്ക് ഒന്റുപഡി ഗോദിമ്പെ, ഒന്റു ദിനാറ്‌ക്ക് മൂറു പഡി ബാറ്‌ലി. ആന എ്ണ്ണെനാമ് ഊറബെത്ത മുന്തിരി സാരനാമ് കെ്ഡ്‌സ ബേ്ഡ.>> 7 കൊറ്യാഡ് കുട്ടി നാലാവാദ് മുദ്ദുറെന ത്‌റാക്കാട്ടി നാലാവാദ് ഉജുരുകെ്ളെ <<ബാ>> എന്റ് സൊല്ലുവ ജദ്ദന നാന് കേ്ട്ടെ. 8 അദുക്കുള നാന് നോഡുഗാട്ടി ബെ്ള്ളാഡി തട്ടിര്‌ക്കുവ ഒന്റു കുദുറെന കണ്ടെ. അയി കുദുറെ കുദ്ദാക്ക് കുക്കാന്ത്‌റ്‌ന്റവാന് പേര് സാവു എന്റ്‌ത്തെ ആയിന്ത്‌ദ്. സത്തവാര് ഇര്‌ക്കുവ എ്ഡെ എന്റ് സൊല്ലുന്റവാന്‌മ് അയാള് പിന്ന്‌മേലെ പോനാന്. ബാള്‌നാലേമ് പഞ്ചനാലേമ് നോയിനാലേമ് സോലെ ബേ്ണ്ട്‌ഗാള്‌നാലേമ് ബൂമില് നാക്ക്‌ല് ഒന്റു ബാഗ ആള്‌ഗാള്‌ന കൊന്റു തള്ള്യ അവാര്‌ക്ക് അദിഗര കെ്ഡേത്ത്‌ദ്. 9 കൊറ്യാഡ് കുട്ടി അയിദാവാദ് മുദ്ദുറെന ത്‌റാക്കാട്ടി ആള്‌ഗാള് കൊന്റു തള്ള്‌നവാര് നിഗാല്‌ഗാള്‌ന പലി കൊഡുക്കുവ മദ്‌ല്‌ക്കഡി നാന് കണ്ടെ. സാമി സൊല്ലുസുലാക്ക സൊന്നാദ്‌നാലേമ്, തമാക്ക് സൊല്ല്യ കെ്ഡേത്താദ്‌ന സൊന്നാദ്‌നാലേമ്‌ത്തെ ആള്‌ഗാള് അവാര്‌ന കൊന്റു തള്ള്‌നാദ്. 10 <<എല്ലാ ബിലാമ് ഇര്‌ക്കുവ ആണ്ടവാനെ, സുത്താപ്പുള്ളവാന്‌മ് സത്ത്യമുള്ളവാന്‌മ് ആനവാനെ, ബൂമില് ഇര്‌ക്ക്‌ന്റവാര്‌ന ബിദിക്ക്യാമ് എമാന കൊന്റാദ്‌ക്ക് പള്യെ്ഡിക്ക്യാമ് ഇന്നി എഞ്ച് നാളാമ്?>> എന്റ് ദൊഡ്ഡാദ്‌ക്ക് ബ്‌ളിത്ത് സൊന്നാര്. 11 അദുക്കുള അവാര് ഒന്റൊന്റാള്‌ക്ക്‌മ് ബെ്ള്ളെ അങ്കി കെ്ഡേത്ത്‌ദ്. തമാന കൊന്റാദ്‌ന പാസെ ഇന്നിമ് കൊല്ല്യ ഇര്‌ക്കുവ ഏസ്സ്‌ഗാറാര്‌ത്ത്‌മ് എ്ണ്ണ തെഗേഗ മാട്ട് ലേസ ഗളിഗെ ഗുഡി കാത്ത്‌റ്‌ക്ക്യ അവാര്‌ക്ക് സൊന്നാന്. 12 കൊറ്യാഡ് കുട്ടി ആറാവാദ് മുദ്ദുറെന ത്‌റാക്കാട്ടി ദൊഡ്ഡൊന്റു ബൂമി കുലുക്ക ഉണ്ടാറ്റ്. നേര കറ്‌ത്ത കമ്പ്‌ളി പാസെ കറ്‌ത്ത കറ്‌ത്താമ് നിലാവു സോരെ സോര്യാമ് ആറ്റ്. 13 മുനി കാറ്റ് അഡിക്കാട്ടി ആങ്കീങ്ക് ആഡുവ അത്തി മരാത്ത്‌ലിന്ത് പിഞ്ച് കായിഗാള് കൊട്ടുവ പാസെ ബെ്ള്ളിഗാള് ബൂമിക്ക് കൊട്ടുറ്റു. 14 ഒന്റു ബൊക്കുന സുറുട്ടി ബെക്കുവ പാസെ ബാന് കാണദ്യായി പോറ്റു. എല്ലാ മലെഗാള്‌നാമ് സുറ്റുമു നീര് ഇര്‌ക്കുവ എ്ഡെഗാള്‌നാമ് അദ് ഇന്ത പട്ട്‌ലിന്ത് എ്ഡ്‌ത്ത് തള്ള്‌നാന്. 15 ബൂമില രാജാവുഗാള്‌മ്, തലെവാര്‌ഗാള്‌മ്, പട്ടള തലെവാര്‌ഗാള്‌മ്, പണഗാറാര്‌മ്, മുക്ക്യമാന ആള്‌ഗാള്‌മ്, എല്ലാ അഡിമെഗാള്‌മ്, അഡിമെഗാള് അല്ലാത്ത എല്ലാവാര്‌മ് അളെഗാള്‌ല്‌മ് മലേക്ക്‌റാഗ ഇര്‌ക്കുവ കല്ല് ബായിക്ക്‌റഗാമ് ഒളിന്താര്. 16 അവാര് മലെഗാള്‌നാമ് കല്ല് കുഡുമ്പുഗാള്‌നാമ് ഇത്തെ ബേ്ണ്ട്‌നാര്: <<കുറിഞ്ചില് കുക്കാന്ത്‌റ്‌ക്ക്‌ന്റവാന് കണ്ണ്‌ലിന്ത്‌മ് കൊറ്യാഡ് കുട്ടി മൊനേലിന്ത്‌മ് എമാന ഒളുസ്യ എമ്മ് കുദ്ദാക്ക് ബീ്ഡോമെ. 17 എന്ത്‌ക്കെന്റ് സൊന്ന അവാര് ദെ്ണ്ടിക്കുവ കഡ്‌പ്പുള്ള നാള് ബന്ത്‌റ്‌ക്ക്‌ന്റ്. അദ്‌ന താങ്ക്യ ആര്‌ക്ക് മുഡിമ്?>> എന്റ് ബേ്ണ്ട്‌നാര്. |
New Life Computer Institute