ബെ്ളിപട്ട കാര്യ 4 - സാമി സേദിഓഗന്നാന് മേലോഗന കാണ്‌ന്റാന് 1 അദ്‌ക്ക് പ്‌റ നാന് നോഡുഗാട്ടി, മേലോഗാത്ത്‌ല് ഒന്റു ബാസ ത്‌റാന്ത്‌റ്‌ക്കുവാദ്‌ന നാന് കണ്ടെ. കൊമ്പൂദുവ ജദ്ദന പാസെ മുദാല് എന്നോഡ നായ നൊഡിന്ത ജദ്ദ എനാക്ക് ഇത്തെ സൊല്ലുവാദ്‌ന നാന് കേ്ട്ടെ: <<ഇദ്‌ക്ക് ബാ, ഇന്നി നഡാക്ക്യ പോവാദ് എന്ത് എന്റ് നാന് നിനാക്ക് കാട്ടി തന്റെ.>> 2 അന്നാല് താനെ സാമിനിഗാല് നഡാത്തുവാദ്‌ക്ക് നാന് ഒന്റേപെ്ട്ട് കെ്ട്ട്‌പട്ട് ഇന്തേന്. കുറിഞ്ചിനാമ് അദ്‌ല് ഒന്റാള് കുക്കാന്ത്‌റ്‌ക്കുവാദ്‌നാമ് മേലോഗാത്ത്‌ല് നാന് കണ്ടെ. 3 അദ്‌ല് കുക്കാന്തിന്തവാന് സൂര്യഗാന്ത കല്ല്‌ന പാസേമ് പത്ത്‌മറാഗ കല്ല്‌ന പാസേമ് കുറിഞ്ചിക്ക് സുറ്റുമു കാട്ട്‌റ്റ്. കുറുഞ്ചിക്ക് സുറ്റുമു മരദഗ കല്ല്‌ന പാസെ കാട്ടുവ കാമ ബില്ല്‌മ് ഇന്ത്‌ദ്. 4 അയി കുറിഞ്ചിക്ക് സുറ്റുമു ബേ്റെ ഇരുവത്തിനാല് കുറുഞ്ചിഗാള്‌മ് ഇന്ത്‌ദ്. ബെ്ള്ളെ ഉഡുപ്പുഗാള് ഇക്കിമ് പൊന്നു ഗിര്യാഡന ഇക്കിമ് ഇര്‌ക്കുവ ഇരുവത്തിനാല് മൂപ്പനാമ് അദ്‌ല് കുക്കാന്തിന്താര്. 5 അയി കുറിഞ്ചിലിന്ത് മിച്ചുവ ബെ്ള്‌സഗാള്‌മ്, ഓസെഗാള്‌മ്, ഇ്ഡി ബെ്ട്ടുവ ജദ്ദഗാള്‌മ് ബന്ത് കൊണ്ടു ഇന്ത്‌ദ്. അയി കുറുഞ്ചിക്ക് മുന്നുക്കു ഏ്ള് സൂട്ടെ തീഗാള് കത്തി എരേന്ത് കൊണ്ടു ഇന്ത്‌ദ്. അദ്‌ഗാള് സാമിത്ത് ഏ്ള് നിഗാല്‌ഗാള് ആയിന്ത്‌ദ്. 6 അയി കുറിഞ്ചി മുന്നുക്കു കന്നാഡിന പാസെ ഉള്ള കഡാല്‌മ് ഇന്ത്‌ദ്. അദ് പള്‌ങ്ക്‌ന പാസെ തെങ്ക്‌തെങ്ക ഇന്ത്‌ദ്. അദ്‌ല് നഡ്‌ക്കെ, അയി കുറുഞ്ചിക്ക് സുറ്റുമു നാക്ക് ഉജുരുകെ്ളെഗാള് ഇന്ത്‌ദ്. അദ്‌ഗാള്‌ക്ക് മുന്നുക്കുമു പിന്ന്‌ക്ക്‌മ് മൊത്തന കണ്ണ്‌ഗാള് ഇന്ത്‌ദ്. 7 മുദാല്‌ല ഉജുരുകെ്ളെ സിങ്കന പാസേമ് റണ്ടാവാദ് ഉജുരുകെ്ളെ ഓരി മാഡ്‌ന പാസേമ് ആയിന്ത്‌ദ്. മൂണാവാദ് ഉജുരുകെ്ളെ മൂഞ്ചി മന്‌സാന് മൂഞ്ചിന പാസെ ആയിന്ത്‌ദ്. നാലാവാദ് ഉജുരുകെ്ളെ പറാക്കുവ ഒന്റു പാറ്‌ന പാസേമ് ആയിന്ത്‌ദ്. 8 നാക്ക് ഉജുരുകെ്ളെഗാള്‌ക്ക്‌മ് ആറാറ് ഇ്റാക്കെഗാള് ഇന്ത്‌ദ്. അദ്‌ഗാള്‌ക്ക് ഉള്ളുക്കുമു ബെ്ളിഗേമ് കണ്ണ്‌ഗാള് തുമ്പിന്ത്‌ദ്. ഇന്തിന്തവാന്‌മ് ഇന്നാല് ഇര്‌ക്ക്‌ന്റവാന്‌മ് ഇന്നി ബര്യ ഇര്‌ക്ക്‌ന്റവാന്‌മ് ആന എല്ലാ ബിലാമ് ഇര്‌ക്കുവ ആണ്ടവാനാന സാമി മ്‌ഗ്‌ന്ത സുത്താപ്പുള്ളവാന്, മ്‌ഗ്‌ന്ത സുത്താപ്പുള്ളവാന്, മ്‌ഗ്‌ന്ത സുത്താപ്പുള്ളവാന് എന്റ് അദ്‌ഗാള് റാവുപഗാല് എ്ളേക്കാദെ സൊല്ലി കൊണ്ടേ ഇന്ത്‌ദ്. 9 അയി കുറിഞ്ചില് ഇര്‌ക്ക്‌ന്റവാനാന എന്നാല്‌ക്ക്‌മ് പെ്ളേക്ക്‌ന്റവാന്‌ക്ക് അയി ഉജുരുകെ്ളെഗാള് മാനാമ്, മദ്‌പ്പ്‌മ് കൊഡുത്തു കൊണ്ടു നണ്ണിമ് സൊല്ലുന്റു. അത്തെ ഗേഗാട്ട്യെല്ല, 10 ഇരുവത്തിനാല് മൂപ്പനാമ്‌ഗാള്‌മ് അയി കുറിഞ്ചില് കുക്കാന്ത് ഇര്‌ക്ക്‌ന്റവാന്‌ക്ക് മുന്നുക്കു സഡങ്ക ബ്‌ന്ത്, എന്നാല്‌ക്ക്‌മ് പെ്ളേത്ത്‌റ്‌ക്ക്‌ന്റവാന് ആന അയാള്‌ന കുമ്മുഡുനാര്. അയി കുറുഞ്ചിക്ക് മുന്നുക്കു തമ്മ് ഗിര്യാഡഗാള്‌ന ബെത്ത് കൊണ്ടു ഇത്തെ സൊന്നാര്: 11 എമ്മ് ആണ്ടവാന്‌മ് സാമിമ് ആയിര്‌ന്റവാനെ, മാനാമ്, മദ്‌പ്പ്‌മ്, കെ്ഡേക്ക്യ നീ തഗ്‌ദ്യുള്ളവാന്‌ത്തെ. സക്‌തി ഇര്‌ക്ക്‌ന്റവാന്‌മ് നീത്തെ. എന്ത്‌ക്കെന്റ് സൊന്ന നീ എല്ലാദ്‌നാമ് ദ്‌ട്ട്‌സ്‌നായി. നിന്ന് പിര്യനാലെ അദ്‌ഗാള് ഉണ്ടായിമ് ബന്ത്‌ദ്, നീ അദ്‌ഗാള്‌ന ദ്‌ട്ടിസിമ് ഇര്‌ക്ക്‌ന്റായി. |
New Life Computer Institute