ബെ്ളിപട്ട കാര്യ 21 - സാമി സേദിപുദ്യ ബാന്‌മ് പുദ്യ ബൂമിമ് 1 അദ്‌ക്ക് പ്‌റ പുദ്യ ബാന്‌നാമ് പുദ്യ ബൂമിനാമ് നാന് കണ്ടേന്. എന്ത്‌ക്കെന്റ് സൊന്ന മുദാല് ഇന്ത ബാന്‌മ് ബൂമി കാണദ്യാറ്റ്. കഡാല്‌മ് ഇന്നി ഇര്‌ക്കമാട്ട. 2 കല്യണ മാപ്‌ളേക്ക് ബേ്ണ്ടി തൊനേസി ഒരുക്കുന കല്യണ പെ്ണ്ണ്‌ന പാസെ പുദ്യ എര്‌സലേമ് എന്നുവ സാമിക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ക്കുവ പട്ടണ മേലോഗാത്ത്‌ലിന്ത്, സാമി പട്ട്‌ല്‌ന്ത് താനെ ഇ്റാഗി ബരുവാദ്‌ന നാന് കണ്ടെ. 3 കുറിഞ്ചിലിന്ത് ദൊഡ്ഡ ഒന്റു ജദ്ദ ഇത്തെ സൊല്ലുവാദ്‌ന നാന് കേ്ട്ടെ, <<ഇദാ, മന്‌സാരോഡ സാമി ഒന്റായി തങ്കുവ എ്ഡെ, അയാള് അവാരോഡ ഒന്റായി ഇര്‌ക്കുവാന്, അവാര് അയാള് ജനഗാള് ആയിര്‌ക്കുവാര്, സാമി താന്‌താനെ അവാരോഡൊപ്പ ഇന്ത് അവാര് സാമിമ് ആയിര്‌ക്കുവാന്. 4 അവാര് കണ്ണ്‌ല കണ്ണ നീര്‌നെല്ല സാമി തെനേക്കുവാന്. ഇന്നി സാവോ, ദുക്കാഗൊ, കേ്സ്യൊ, ബിജാഗൊ, ഇര്‌ക്കമാട്ട. എന്ത്‌ക്കെന്റ് സൊന്ന മുദാല് ഇന്താദ് ഒട്ടുക്കു കാണദ്യാറ്റ്.>> 5 കുറിഞ്ചില് കുക്കാന്ത്‌റ്‌ന്റവാന്, <<ഇദാ, നാന് എല്ലാദ്‌നാമ് പുദ്യാദ് മാഡ്‌ന്റെ>> എന്റ് സൊന്നാന്. പിന്നേമ് അയാള്, <<ഇദ്‌ന എ്ള്‌ദ്, എന്ത്‌ക്കെന്റ് സൊന്ന ഈ നായഗാള് സത്ത്യാമ് നമ്പ്യ മുഡിവാദ്‌മ്‌ത്തെ>> എന്റ് സൊന്നാന്. 6 പ്‌റ അയാള്, <<എല്ലാദ്‌മ് നഡാന്ത് മുഡിന്ത്‌ദ്. നാന് ആദിലവാന്‌മ് കഡേസിലവാന്‌മ്‌ത്തെ, മുദാല്‌ലവാന്‌മ് പിന്ന്‌ക്ക്‌ലവാന്‌മ്‌ത്തെ. നീരറാക്കെ എ്ഡ്‌ക്ക്‌ന്റവാന്‌ക്ക് ഉജുരു കൊഡുക്കുവ നീര് ജെനിക്കുവ പട്ട്‌ലിന്ത് നീര്‌ന നാന് ബെ്റ്‌ദെ കുഡിക്ക്യ കൊഡുക്കുവെ. 7 ഗെലിസി കഡാക്കുവ ഏവാന്‌ക്ക്‌മ് നാന് ഇദ്‌ന കൊഡുക്കുവെ. നാന് അയാള്‌ക്ക് സാമിമ് അയാള് എനാക്ക് മഗാന്‌മ് ആയിര്‌ക്കുവാന്. 8 ആന ദയിര ഇല്ലത്തവാര്‌ക്ക്‌മ്, നമ്പിക്കെ ഇല്ലത്തവാര്‌ക്ക്‌മ് സാത്ത്‌റ പ്‌ഡിക്കുവ കാര്യഗാള് ഗേന്റവാര്‌ക്ക്‌മ്, കൊലെ ഗേന്റവാര്‌ക്ക്‌മ് കണ്ടപഡി നഡാക്ക്‌ന്റവാര്‌ക്ക്‌മ്, മന്ത്‌റമായ ഗേന്റവാര്‌ക്ക്‌മ്, സെലെന കുമ്മുഡുന്റവാര്‌ക്ക്‌മ്, പൊയി സൊല്ലുവ എല്ലാവാര്‌ക്ക്‌മ് കെ്ഡേക്കുവ എ്ഡെ എന്നുവാദ് ഗെന്തഗ കത്തി എരേവ തീ കഡാല് ആയിര്‌ക്കുവു. ഇദ്‌ത്തെ റണ്ടാവാദ് സാവു>> എന്റ് സൊന്നാന്. പുദ്യ എര്‌സലേമ് 9 കഡേസി കൊഡുക്കുവ ഏ്ള് ദൊഡ്ഡ ദെ്ണ്ടണെഗാള്‌ന തുമ്പിസിന്ത ഏ്ള് സട്ടിഗാള്‌ന പ്‌ഡിത്തിന്ത ഏ്ള് ദൂദനാമ്‌ല് ഒരുത്താന് എന്ന് പട്ട്‌ക്ക് ബന്ത് എനാക്ക്, <<ബാ, കൊറ്യാഡ് കുട്ടി പെ്ണ്ട് ആയ പോവ കല്യണ പെ്ണ്ണ്‌ന കാട്ടി തന്റെ>> എന്റ് സൊന്നാന്. 10 സാമിനിഗാല് നഡാത്തുവാദ്‌ക്ക് നാന് ഒന്റേപെ്ട്ട് കെ്ട്ട്‌പട്ട് ഇര്‌ക്കാട്ടി അയി ദൂദാന് എനാന ഉജാന്ത്‌റ്‌ക്കുവ ദൊഡ്ഡ ഒന്റു മലേക്ക് എ്ഡ്‌ത്ത് പോനാന്. എര്‌സലേമ് എന്നുവ സാമി പട്ടണ മേലോഗാത്ത്‌ലിന്ത്, സാമി പട്ട്‌ലിന്ത് താനെ ഇ്റാഗി ബരുവാദ്‌ന എനാക്ക് കാട്ടി തന്താന്. 11 സാമി മദ്‌പ്പ്‌ക്ക് ഇര്‌ക്കുവ ബെ്ഡിപ്പ് ബെ്ള്‌സാത്ത്‌ല് അയി പട്ടണ ബെ്ഡിന്ത് തള്ള്‌ട്ട്. അയി പട്ടണ സൂര്യഗാന്ത കല്ല്‌ന പാസെ ഇര്‌ക്കുവ ബെലെപെറ്റ കല്ല് ദഗദഗാത്ത് എരേവ പാസെ എരേന്ത് കൊണ്ടുമു പള്‌ങ്ക്‌ന പാസെ തെങ്ക്‌തെങ്കാമ് ഇന്ത്‌ദ്. 12 അയി പട്ടണാക്ക് ഉജാന്ത്‌റ്‌ക്കുവ ദൊഡ്ഡ ഒന്റു സിവാര് ഇന്ത്‌ദ്. അയി സിവാര്‌ല് പന്നന്റ് ബാസഗാള്‌മ് ഒന്റൊന്റു ബാസാത്ത്‌ല്‌മ് ഒന്റൊന്റു ദൂദനാമ്‌മ് ഇന്താര്. അയി ബാസഗാള്‌ല് ഇസ്‌റവേല്‌ല പന്നന്റ് കുല പേര്‌ഗാള്‌മ് എ്ള്‌ദി ബെത്തിന്താര്. 13 ക്‌ളാക്ക് സാരി മൂറു ബാസഗാള്‌മ്, ബഡാക്ക് സാരി മൂറു ബാസഗാള്‌മ്, തെക്ക് സാരി മൂറു ബാസഗാള്‌മ്, മേക്ക് സാരി മൂറു ബാസഗാള്‌മ് ഇന്ത്‌ദ്. 14 അയി പട്ടണ സിവാര് പന്നന്റ് കല്ല് കുദ്ദാക്ക്‌ത്തെ കെ്ട്ടിര്‌ക്കുവാദ്. കൊറ്യാഡ് കുട്ടിത്ത് പന്നന്റ് അപ്പോസുത്തലാര് പേര്‌ഗാള്‌മ് അയി കല്ല്‌ഗാള്‌ല് എ്ള്‌ദിന്ത്‌ദ്. 15 എന്നോഡ നായ നൊഡിന്ത ദൂദാനോഡ അയി പട്ടണനാമ് അയി പട്ടണ ബാസഗാള്‌നാമ് അയി പട്ടണ സിവാര്‌നാമ് അളാക്ക്യ ഒന്റു പൊന്നുലു ഉണ്ടാക്ക്‌ന കോലുമു ഇന്ത്‌ദ്. 16 നാക്ക് സാരി ഒന്റേ സമ ഇര്‌ക്കുവ പട്ടണത്തെ അദ്. ബീദിമ് നീ്ളാമ് ഒന്റേ അളാവുത്തെ. അളാക്കുവ കോലുലു അയാള് അയി പട്ടണന അളാന്താന്. അദുക്കുള ഒപ്പതപ്പ റണ്ടായിരത്തി നാനൂറു കില മീറ്റ്‌റ് നീ്ള ഇന്ത്‌ദ്. അയി പട്ടണ നീ്ളാമ് ബീദിമ് ഉജാരാമ് ഒന്റേ സമാത്തെ. 17 അയി ദൂദാന് അയി സിവാര്‌നാമ് അളാന്താന്. അദുക്കുള മന്‌സാന് അളാക്കുവ അളാവു കണാക്ക്‌ല് ഉജാര നൂറ്റി നാപത്തിനാല് മുള ഇന്ത്‌ദ്. 18 സൂര്യഗാന്ത കല്ല്‌ഗാള്‌ന ബെത്ത്‌ത്തെ അയി സിവാര്‌ന കെ്ട്ടിന്താദ്. തെങ്ക്‌തെങ്ക കന്നാഡിന പാസെ ഇര്‌ക്കുവ കലാപ്പില്ലാത്ത തങ്കാത്ത്‌ല്‌ത്തെ അയി പട്ടണന കെ്ട്ടിന്താദ്. 19 തൊനേസി ബെത്ത്‌റ്‌ക്കുവ എല്ലാ ദിന്‌സ് ബെലെപെറ്റ കല്ല്‌ഗാള് കുദ്ദാക്ക്‌ത്തെ അയി പട്ടണ സിവാര് കെ്ട്ടിന്താദ്. മുദാല്‌ലാദ് സൂര്യഗാന്ത കല്ല്, റണ്ടാവാദ് നീലക്കല്ല്, മൂണാവാദ് മാണിക്ക കല്ല്, നാലാവാദ് മരദഗ കല്ല്, 20 അഞ്ചാവാദ് ഒയിര് ന്‌റ കല്ല്, ആറാവാദ് സോരെ കല്ല്, ഏ്ളാവാദ് മഞ്ച കല്ല്, എ്ട്ടാവാദ് ഗോമേദഗ കല്ല്, ഒമ്പദാവാദ് പുസ്യരാഗ കല്ല്, പത്താവാദ് ബയിദൂര്യ കല്ല്, പദിനൊണ്ണാവാദ് പത്ത്‌മറാഗ കല്ല്, പന്നന്റാവാദ് നീല ന്‌റാമ് സോരെ ന്‌റാമ് കലാന്ത കല്ല്. 21 പന്നന്റ് ബാസഗാള്‌മ് പന്നന്റ് ബെലെപെറ്റ മുത്തുഗാള് ആയിന്ത്‌ദ്, ഒന്റൊന്റു ബാസാമ് ഒന്റൊന്റു ബെലെപെറ്റ മുത്തുലുത്തെ ഉണ്ടാക്കിന്താദ്. തെങ്ക്‌തെങ്ക കന്നാഡിന പാസെ ഇര്‌ക്കുവ കലാപ്പില്ലാത്ത തങ്കാത്ത്‌ല്‌ത്തെ പട്ടണാത്ത്‌ല മുക്ക്യമാന തെരുവു മാഡിന്താദ്. 22 പട്ടണാത്ത്‌ല് സാമിബീ്ഡ് ഒന്റുനാമ് നാന് കാണാലെ. എന്ത്‌ക്കെന്റ് സൊന്ന എല്ലാ ബിലാമ് ഇര്‌ക്കുവ ആണ്ടവാനാന സാമിമ്, കൊറ്യാഡ് കുട്ടിമ്‌ത്തെ അയി പട്ടണാത്ത്‌ല സാമിബീ്ഡ്. 23 പട്ടണാക്ക് ബെ്ള്‌സഡിക്ക്യ നേരാഗൊ നിലാവൊ ബേ്ഡ. എന്ത്‌ക്കെന്റ് സൊന്ന സാമി മദ്‌പ്പ്‌ക്ക് ഇര്‌ക്കുവ ബെ്ഡിപ്പ് ബെ്ള്‌സായി പട്ടണാക്ക് അഡിത്തിന്ത്‌ദ്. കൊറ്യാഡ് കുട്ടി അയി പട്ടണാക്ക് ബ്‌ളാക്ക്‌മ്‌ത്തെ. 24 ബൂമില് ഇര്‌ക്കുവ ആള്‌ഗാള് ഒട്ടുക്കു അയി ബെ്ള്‌സാത്ത്‌ല് നഡാക്കുവാര്. ബൂമില രാജാവുഗാള് തമ്മ് മ്‌ഗ്‌ന്ത സൊത്തു മുദാല്‌ഗാള്‌ന അദ്‌ക്ക് എ്ഡ്‌ത്ത് ബരുവാര്. 25 അയി പട്ടണാത്ത്‌ല ബാസഗാള് പഗാല് ഗളിഗേക്ക് അഡേക്കാഗേ മാട്ട, എന്ത്‌ക്കെന്റ് സൊന്ന ജാമ എന്നുവാദ് അദ്‌ല് ഇല്ല്യല്ല. 26 ബൂമില് ഇര്‌ക്കുവ ആള്‌ഗാള് ഒട്ടുക്കു തമ്മ് സൊത്തുഗാള്‌നാമ് മുദാല്‌മുമ്പുഗാള്‌നാമ് അദ്‌ക്ക് എ്ഡ്‌ത്ത് ബരുവാര്. 27 എന്നാല്‌ക്ക്‌മ് പെ്ളേക്ക്‌ന്റവാര് പേര് എ്ള്‌ദിര്‌ക്കുവ കൊറ്യാഡ് കുട്ടി ബൊക്കുലു പേര് ഇര്‌ക്ക്‌ന്റവാര്‌ക്ക് താനെത്തെ അദ്‌ക്ക് കഡാക്ക്യ മുഡിമ്. അയിത്ത്യുള്ളാദ് ഒന്റുമു അദ്‌ക്ക് കഡാക്ക്യ മുഡ്യാമാട്ട. നാണഗെ്ട്ട കാര്യഗാള് ഗേന്തൊ, പൊയി സൊല്ല്യൊ നഡാക്കുവ ആര്‌മ് അദ്‌ക്ക് കഡാക്കമാട്ടാര്. |
New Life Computer Institute