ബെ്ളിപട്ട കാര്യ 20 - സാമി സേദിക്റ്സ്ത്ത് ആയിര ബര്‌സ്സ ആളുവാന് 1 അദ്‌ക്ക് പ്‌റ ഒന്റു ദൂദാന് അഡി അറ്റ ഇല്ലാത്ത കുയി ത്‌റാപ്പ് കയിമ് ദൊഡ്ഡൊന്റു സങ്കിലിമ് പ്‌ഡിത്ത്‌കൊണ്ടു മേലോഗാത്ത്‌ലിന്ത് ഇ്റാഗി ബരുവാദ്‌ന നാന് കണ്ടെ. 2 പിജാദ് എന്റ്‌മ് സെയിത്താന് എന്റ്‌മ് സൊല്ലുവ അയി പള്യ ദൊഡ്ഡ പാമ്പ്‌ന അയി ദൂദാന് പ്‌ഡിത്ത് ആയിര ബര്‌സ്സാക്ക് സങ്കിലിക്ക് കെ്ട്ടി ബെത്താന്. 3 ആയിര ബര്‌സ്സ കള്യ മാട്ട്‌ക്ക് ബൂമില് ഇര്‌ക്കുവ ആള്‌ഗാള്‌ന ഏമാത്താദിര്‌ക്ക്യ ബേ്ണ്ടി അയി പാമ്പ്‌ന അഡി അറ്റ ഇല്ലാത്ത കുയിക്ക് അലേത്ത് ബ്‌ട്ടാന്. അദ്‌ക്ക് പ്‌റ അദ്‌ന അഡേത്ത് പൂട്ടി ആര്‌മ് ത്‌റാക്കാദിര്‌ക്ക്യ ബേ്ണ്ടി മുദ്ദുറെ കുത്തി ബെത്താന്. ആയിര ബര്‌സ്സ കളിന്ത പ്‌റ അയി പാമ്പ്‌ന ലേസ ഗളിഗെ ഉക്കി ബ്‌ഡുവാന്. 4 അദ്‌ക്ക് പ്‌റ കുറിഞ്ചിഗാള്‌നാമ് ബിദി സൊല്ല്യ അദിഗര കെ്ഡേത്തവാര് അയി കുറിഞ്ചിഗാള്‌ല് കുക്കാന്ത് ഇര്‌ക്കുവാദ്‌നാമ് നാന് കണ്ടെ. ഏസ്സ്‌ന പറ്റ്യുള്ള സത്ത്യന സൊന്നാദ്‌നാലേമ് സാമി സൊല്ലുസുലാക്കാന സൊന്നാദ്‌നാലേമ് ആള്‌ഗാള് തലെനെ ബെ്ട്ടി കൊന്റവാര് നിഗാല്‌ഗാള്‌നാമ് നാന് കണ്ടെ. അവാര് ബേ്ണ്ട്‌നാഗൊ അയി ബേ്ണ്ട് സെലെനാഗൊ കുമ്മുഡത്തവാര്‌മ് നെറ്റിക്കൊ കയിക്കൊ മുദ്ദുറെ കുത്താത്തവാര്‌മ് ആയിന്താര്. അവാര് ഉജുരു കെ്ഡേസി ക്‌റ്‌സ്‌ത്തോഡൊപ്പ ആയിര ബര്‌സ്സ പെ്ളേത്താര്. 5 പ്‌റ സത്തവാര്‌ല് മിച്ച ഇര്‌ക്ക്‌ന്റവാര്‌ക്ക് ആയിര ബര്‌സ്സ കള്യ മാട്ട്‌ക്ക് ഉജുരു കെ്ഡേക്കാലെ. ഇദ്‌ത്തെ മുദാല് ഉജുര്‌ളാഗുവാദ്. 6 മുദാല് സാമി ഉജുര്‌ളാക്കാട്ടി ഉജുര്‌ളാഗ്‌നവാര് ബാഗ്യകേ്ട്ടവാര്‌മ് സാമിക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റവാര്‌മ്‌ത്തെ. അത്തവാള്‌ഗാള് റണ്ടാവാദ് ബരുവ സാവുക്കു ആളാഗമാട്ടാര്. അവാര് സാമിക്ക്‌മ് ക്‌റ്‌സ്‌ത്ത്‌ക്ക്‌മ് പൂസാരിഗാളായി ക്‌റ്‌സ്‌ത്തോഡൊപ്പ ആയിര ബര്‌സ്സ ആളുവാര്. സെയിത്താന് അളിവു 7 ആയിര ബര്‌സ്സ കളിന്ത പ്‌റ സെയിത്താന്‌ന കെ്ട്ടി ബെത്ത്‌റ്‌ക്കുവ പട്ട്‌ലിന്ത് ഉക്കി ബ്‌ഡുവാന്. 8 അദുക്കുള ഈ സെയിത്താന് ബൂമിക്ക് നാക്ക സാരി ഇര്‌ക്കുവ ഗോഗു, മാഗോഗു എന്റ് സൊല്ലുവ എല്ലാ ആള്‌ഗാള്‌നാമ് ഏമാത്ത്യ പോവാന്. കഡാലോരാത്ത്‌ല മണാല്‌ഗാള്‌ന പാസെ എ്ണ്ണ്‌സ്യ മുഡ്യാത്തളാവുക്കു ഇര്‌ക്കുവ അവാര്‌ന ജുദ്ദ ഗേയ ബേ്ണ്ടി ഒന്റായി കൂട്ടി ബരുസ്സുവാന്. 9 അവാര് ബൂമില് എല്ലാ സാരിമ് പോയി സാമിഗാറാര് തങ്കുവ പട്ട്‌ക്ക്‌മ് സാമിക്ക് മെച്ച്‌പ്‌ഡിത്ത പട്ടണാക്ക്‌മ് സുറ്റു കൂഡുവാര്. ആന ബാന്‌ലിന്ത് തീ ബന്ത് അവാര്‌ന സുട്ടു തള്ളുവു. 10 ബേ്ണ്ട്‌നാമ് സാമി സൊന്റു എന്റ് സൊല്ലി ഉറുട്ടു സൊല്ലുവ സാമിദാസ്‌നാമ് എ്റിന്ത് ബ്‌ട്ട്‌റ്‌ക്കുവ ഗെന്തഗ കത്തി എരേവ തീ കഡാല്‌ക്ക് അവാര്‌ന ഏമാത്തിന്ത സെയിത്താന്‌ന എ്റിന്ത് ബ്‌ഡുവാന്. റാവുപഗാല് അദ്‌ലിന്ത് കൊണ്ടു അവാര് എന്നാല്‌ക്ക്‌മ് ദെ്ണ്ടണെപഡുവാര്. കഡേസി സൊല്ലുവ ബിദി 11 അദ്‌ക്ക് പ്‌റ ബെ്ള്ളെബെ്ള്ള്യ ഇര്‌ക്കുവ ദൊഡ്ഡ ഒന്റു കുറിഞ്ചിനാമ് അദ്‌ല് കുക്കാന്ത് ഇര്‌ക്ക്‌ന്റവാന്‌നാമ് നാന് കണ്ടെ. അയാള് പട്ട്‌ലിന്ത് ബൂമിമ് ബാന്‌മ് ഓഡി പോറ്റു. പിന്നെ അദ്‌ഗാള്‌ന കാണാഗേ ഇല്ലെ. 12 ദൊഡ്ഡവാര്‌മ് സ്‌ന്നവാര്‌മ് ആയി അത്തെ സത്തവാര് ഒട്ടുക്കു കുറിഞ്ചി മുന്നുക്കു നിന്റ്‌റ്‌ക്കുവാദ്‌നാമ് നാന് കണ്ടെ. ബൊക്കുഗാള്‌ന ത്‌റാന്താന്. എന്നാല്‌ക്ക്‌മ് പെ്ളേക്ക്‌ന്റവാര് പേര് എ്ള്‌ദിര്‌ക്കുവ ബൊക്കു എന്നുവ ബേ്റെ ഒന്റു ബൊക്കുനാമ് ത്‌റാന്താന്. ബൊക്കുഗാള്‌ല് എ്ള്‌ദിര്‌ക്കുവ പാസെ തമ്മ ഗേന്താദ്‌ക്ക് തഗ്‌ന്ത ദിന്‌സ്‌ല് സത്തവാര്‌ക്കുള്ള ബിദി സൊന്നാന്. 13 കഡാല്‌ല് സത്തവാര്‌ന കഡാല് ബ്‌ട്ട് കൊഡുത്തുദു. ആള്‌ഗാള് സത്ത എ്ഡേമ് സത്തവാര് ഇര്‌ക്കുവ എ്ഡേമ് അദ്‌ലിന്തവാര്‌ഗാള്‌ന ബ്‌ട്ട് കൊഡുത്തുദു. അത്തെ അവാര് ഒന്റൊന്റാള്‌ക്ക് തമ്മ ഗേന്താദ്‌ക്ക് തഗ്‌ന്ത ദിന്‌സ്‌ല് ബിദി കെ്ഡേത്ത്‌ദ്. 14 അദ്‌ക്ക് പ്‌റ സാവുനാമ് സത്തവാര് ഇര്‌ക്കുവ എ്ഡെനാമ് ഗെന്തഗ കത്തി എരേവ തീ കഡാല്‌ക്ക് ഒന്റേപെ്ട്ട് എ്റിന്ത് ബ്‌ഡുവാന്. ഈ തീ കഡാല്‌ത്തെ റണ്ടാവാദ് സാവു. 15 എന്നാല്‌ക്ക്‌മ് പെ്ളേക്ക്‌ന്റവാര് പേര് എ്ള്‌ദിര്‌ക്കുവ ബൊക്കുലു പേര് എ്ള്‌ദാത്ത എല്ലാവാര്‌നാമ് അയി ഗെന്തഗ കത്തി എരേവ തീ കഡാല്‌ക്ക് എ്റിന്ത് ബ്‌ഡുവാന്. |
New Life Computer Institute