ബെ്ളിപട്ട കാര്യ 2 - സാമി സേദിഎപെസോസുല ഏസ്സ്‌ഗാറാര് കൂട്ടാക്കുള്ള സേദി 1 എപസോസു പട്ടണാത്ത്‌ലിര്‌ക്കുവ ഏസ്സ്‌ഗാറാര് കൂട്ടാത്ത്‌ല ദൂദാന്‌ക്ക് എ്ള്‌ദ്‌ഡൊ: <<ബല കയില് ഏ്ള് ബെ്ള്ളിഗാള്‌ന പ്‌ഡിത്ത് ഏ്ള് പൊന്നു നിലബ്‌ളാക്ക്‌ഗാള്‌ക്ക് നഡ്‌ക്കെ നഡാക്ക്‌ന്റവാന് സൊല്ലുവാദ് ഇദ്‌ത്തെ: 2 നീ ഗേവ കാര്യഗാള്‌ന എനാക്ക് തെരിമ്. നീ നല്ല പാഡ്‌പട്ട് ഗേവാദ്‌മ് നീ പൊറിമോഡ ഇര്‌ക്കുവാദ്‌മ് എനാക്ക് തെരിമ്. കെ്ട്ടവാര്‌ന പൊറുക്ക്യ നിനാക്ക് മുഡ്യ എന്റ്‌മ് എനാക്ക് തെരിന്റ്. അപ്പോസുത്തലനാമ് അല്ലാദിന്ത് ഗുഡി, അപ്പോസുത്തലനാമ് എന്റ് നഡിക്ക്‌ന്റവാര്‌ന നീ സോദണെ ഗേന്ത് അവാര് പൊയി സൊന്റവാര് എന്റ് കണ്ട്‌പ്‌ഡിത്ത്‌റ്‌ന്റായി. 3 നിനാക്ക് പൊറിമോഡ താങ്ക്യ മുഡിന്റ്. എനാക്ക് ബേ്ണ്ടി കജട്ട പട്ട് ഗുഡി നീ സോറ്റു പോഗാദെ ഇര്‌ക്ക്‌ന്റായി എന്റ് എനാക്ക് തെരിമ്. 4 എന്റാല്‌മ് നിനാന പറ്റി ഈ കുറ്റ എനാക്ക് സൊല്ല്യ ഇര്‌ക്ക്‌ന്റ്, നീ എനാന മുദാല് സീവാന്‌ബെത്തിന്ത പാസെ ഇന്നാല് സീവാന് ബെക്കാലെ. 5 അദ്‌നാലെ നിനാക്ക് എന്നാലിന്ത് തപ്പ് ബന്ത്‌ദെന്റ് നെനേത്ത് നോഡി സാമി പട്ട്‌ക്ക് തിരിഗി ബന്ത് നീ മുദാല് ഗേന്തിന്ത അദേ കാര്യന താനെ ഗേഗ്. നീ അത്തെ ഗേഗാദെ പോന നാന് നിന്ന് പട്ട്‌ക്ക് ബന്ത് നിന്നോഡ ഇര്‌ക്കുവ നിലബ്‌ളാക്ക്‌ന അദ് ബെത്ത്‌റ്‌ക്കുവ പട്ട്‌ലിന്ത് എ്ഡ്‌ത്ത് തള്ളുവെ. 6 എന്റാല്‌മ് നിനാന പറ്റി ഒന്റു നല്ല കാര്യ സൊല്ല്യ ഇര്‌ക്ക്‌ന്റ്. നിക്കലോവ്യാര് ഗേവ കെ്ട്ട കാര്യഗാള് നിനാക്ക് പ്‌ഡിക്കാലെ. അദ് എനാക്ക്‌മ് പ്‌ഡിക്കാലെ. 7 സാമിനിഗാല് ഏസ്സ്‌ഗാറാര് കൂട്ടഗാള്‌ക്ക് സൊല്ലുവാദ് എന്തെന്റ് കേ്ള്‌ക്ക്യ മുഡിന്റവാര് കേ്ള്‌ക്കുഡൊ. ഗെലിസി കഡാക്ക്‌ന്റവാന്‌ന സാമി ദോട്ടാത്ത്‌ലിര്‌ക്കുവ ഉജുരു തരുവ മര പഗാന തിന്ന്യ നാന് ബ്‌ഡ്‌വെ.>> സിമ്‌റ്‌ന്നാല ഏസ്സ്‌ഗാറാര് കൂട്ടാക്കുള്ള സേദി 8 <<സിമ്‌റ്‌ന്ന പട്ടണാത്ത്‌ലിര്‌ക്കുവ ഏസ്സ്‌ഗാറാര് കൂട്ടാത്ത്‌ല ദൂദാന്‌ക്ക് എ്ള്‌ദ്‌ഡൊ: സത്തവാന്‌മ് ഉജുരു ഇ്ളാഗ്‌നവാന്‌മാന ആദിലവാന്‌മ് കഡേസിലവാന്‌മ് സൊല്ലുവാദ് ഇദ്‌ത്തെ: 9 നീ കജട്ട പട്ടാദ് എനാക്ക് തെരിമ്. നീ ഏ്ളെ എന്റ്‌മ് എനാക്ക് തെരിമ്. ആന സെരിക്ക്‌മ് നീ പണഗാറാന്‌ത്തെ. എഗുദാര് അല്ലാദിന്ത് ഗുഡി തമ്മ എഗുദാര് എന്റ് സൊല്ലുവ സെയിത്താന്‌ന പരേസുവ ബീ്ഡ്‌ഗാറാരായി ഇര്‌ക്ക്‌ന്റവാര് നിനാന പറ്റി കെ്ട്ട കാര്യ സൊല്ലുവാദ്‌മ് എനാക്ക് തെരിമ്. 10 നീ കജട്ടപഡ്യ പോവാദ്‌ന പറ്റി നീ അഞ്ചബേ്ഡ. നിമാന സോദണെ ഗേയ ബേ്ണ്ടി സെയിത്താന് നിമാത്ത്‌ല് പഗ്‌ദ്യാള്‌ന ജെയില്‌ക്ക് അഡേക്കുവാന്. പത്ത് നാള് നിമാക്ക് കജട്ട ഇര്‌ക്ക്‌മ്. നിമാന കൊല്ലുവദാനാല്‌മ് എനാന നമ്പുവാദ്‌ന തള്ളദേന്. എന്റദാന, നാന് നിമാക്ക് എന്നാല്‌ക്ക്‌മ് ഇര്‌ക്കുവ ഉജുരുന ഗിര്യാഡായി തരുവേന്. 11 സാമിനിഗാല് ഏസ്സ്‌ഗാറാര് കൂട്ടഗാള്‌ക്ക് സൊല്ലുവാദ് എന്തെന്റ് കേ്ള്‌ക്ക്യ മുഡിന്റവാര് കേ്ള്‌ക്കുഡൊ. ഗെലിസി കഡാക്ക്‌ന്റവാന് റണ്ടാവാദ് ബരുവ സാവുക്കു ആളാഗമാട്ടാന്.>> പെ്റ്‌ഗമോസുല ഏസ്സ്‌ഗാറാര് കൂട്ടാക്കുള്ള സേദി 12 <<പെറ്‌ഗമോസു പട്ടണാത്ത്‌ലിര്‌ക്കുവ ഏസ്സ്‌ഗാറാര് കൂട്ടാത്ത്‌ല ദൂദാന്‌ക്ക് എ്ള്‌ദ്‌ഡൊ: റാഡ് സാരിമ് നല്ല ഉരുക്കു ബാള് ഇര്‌ക്ക്‌ന്റവാന് സൊല്ലുവാദ് ഇദ്‌ത്തെ: 13 നീ ഏദ്‌ല് ഇര്‌ക്ക്‌ന്റായി എന്റ്‌മ് അദ് സെയിത്താന് കുറിഞ്ചി എന്റ്‌മ് എനാക്ക് തെരിമ്. നീ എനാന കയി ബ്‌ഡാഗേ ഇല്ലെ. സെയിത്താന് ആളുവ നിമ്മ് പട്ട്‌ല് ബെത്ത് അന്തിപാസ്‌ന കൊന്റ കാലാത്ത്‌ല് ഗുഡി നിമ്മ് നമ്പിക്കേന തള്ളാഗേ ഇല്ലെ. നമ്പ്യ മുഡിന്റവാനാന അന്തിപാസ് എനാന പറ്റി സൊല്ലിന്തവാന്‌ത്തെ. 14 എന്റാല്‌മ് നിനാന പറ്റി ലേസ കുറ്റ എനാക്ക് സൊല്ല്യ ഇര്‌ക്ക്‌ന്റ്. ഇസ്‌റവേല്‌ഗാറാര്‌ന സെലെഗാള്‌ക്ക് മേല്‌സ ബെത്താദ്‌ന തിന്ന്യ ബ്‌ട്ട് കൊണ്ടുമു കണ്ടപഡിക്ക് നഡാന്ത് ബേസ്യാഡ്യ ബ്‌ട്ട് കൊണ്ടുമു അവാര്‌ന എത്തെ പാവ ഗേയ ബെക്കുഡൊ എന്റ് ബാലാക്ക്‌ക്ക് ബുദ്ദി സൊല്ലി കൊഡുത്തവാന്‌ത്തെ ബിലെയാമ്. അയി ബിലെയാമ് പഡ്‌സ്‌നാദ്‌ക്ക് കെ്ട്ട്‌പട്ട് നഡാക്കുവ ലേസ ആള്‌ഗാള് നിമ്മ് പട്ട്‌ല് ഇര്‌ന്റാര്. 15 അദേപാസെ താനെ നിക്കലോവ്യാര് പഡ്‌സ്‌നാദ്‌ക്ക് കെ്ട്ട്‌പട്ട് നഡാക്ക്‌ന്റവാര്‌മ് നിമ്മ് പട്ട്‌ല്‌മ് ഇര്‌ക്ക്‌ന്റാര്. 16 അദ്‌നാലെ നിമ്മ് പാവഗാള്‌ന ബ്‌ട്ട്‌തള്ളി സാമിസാരി തിരിഗി ബാന്. അല്ലാദെ പോന, നാന് സട്ടന നിമ്മ് പട്ട്‌ക്ക് ബന്ത് എന്ന് ബായിലിന്ത് കഡാക്കുവ ബാള്‌ല് അവാരോഡ ജുദ്ദ ഗേവേന്. 17 സാമിനിഗാല് ഏസ്സ്‌ഗാറാര് കൂട്ടഗാള്‌ക്ക് സൊല്ലുവാദ് എന്തെന്റ് കേ്ള്‌ക്ക്യ മുഡിന്റവാര് കേ്ള്‌ക്കുഡൊ. ഗെലിസി കഡാക്ക്‌ന്റവാന്‌ക്ക് മറേന്ത്‌റ്‌ക്കുവ മന്നാല് ലേസ നാന് കൊഡുക്കുവേന്. നാന് അവാന്‌ക്ക് ഒന്റു ബെ്ള്ളെ കല്ല്‌മ് കൊഡുക്കുവേന്. അദ്‌ല് ഒന്റു പുദ്യ പേര്‌മ് എ്ള്‌ദിര്‌ക്ക്‌മ്. അദ് കെ്ഡേക്ക്‌ന്റവാന്‌ക്കല്ലാദെ ബേ്റെ ആര്‌ക്ക്‌മ് അദ്‌ല് എ്ള്‌ദിര്‌ക്കുവാദ് തെര്യ മാട്ട.>> തയിതിര്യാല ഏസ്സ്‌ഗാറാര് കൂട്ടാക്കുള്ള സേദി 18 <<തയിതിര്യ പട്ടണാത്ത്‌ലിര്‌ക്കുവ ഏസ്സ്‌ഗാറാര് കൂട്ടാത്ത്‌ല ദൂദാന്‌ക്ക് എ്ള്‌ദ്‌ഡൊ: കത്തി എരേവ തീന പാസെ കണ്ണ്‌ഗാള്‌മ് സൂളേല് സുട്ടു പഗ്‌സ്‌ന ബെ്ങ്കലാന പാസെ കാല്‌ഗാള്‌മ് ഇര്‌ക്കുവ സാമിമഗാന് സൊല്ലുവാദ് ഇദ്‌ത്തെ: 19 നീ ഗേവ കാര്യഗാള്‌നാമ്, നീ സീവാന്‌പഡുവാദ്‌നാമ്, നിന്ന് നമ്പിക്കെനാമ്, അഡ്‌ത്തവാര്‌ന നീ കയിതാങ്കുവാദ്‌നാമ്, നീ പൊറിമോഡ താങ്കുവാദ്‌നാമ് എനാക്ക് തെരിമ്. നീ മുദാല് ഗേന്താദ്‌ന ബ്‌ഡ ഇന്നാല് അദിഗ ഗേന്റായി എന്റ്‌മ് എനാക്ക് തെരിമ്. 20 എന്റാല്‌മ് നിനാന പറ്റി ഈ കുറ്റ എനാക്ക് സൊല്ല്യ ഇര്‌ക്ക്‌ന്റ്. താനൊന്റു സാമിദാസി എന്റ് താന്‌താനെ സൊല്ലികൊണ്ടു എന്ന് ഗിലാസഗാറാര്‌ന കണ്ടപഡിക്ക് നഡാന്ത് ബേസ്യാഡ്യാമ് സെലെഗാള്‌ക്ക് മേല്‌സ ബെത്താദ്‌ന തിന്ന്യാമ് ബുദ്ദി സൊല്ലി കൊഡുത്തു ഏമാത്തി തള്ളുവ ഈസവേല് എന്നുവ പെ്ണ്ണ്‌പ്‌ളെന നീ അത്തേഗേ ഗേയ ബ്‌ട്ട്‌റ്‌ക്ക്‌ന്റായി. 21 കണ്ടപഡിക്ക് നഡാന്ത് ബേസ്യാഡുവാദ്‌ന ബ്‌ട്ട്‌തള്ളി സാമിസാരി തിരിഗ്യ നാന് അവാള്‌ക്ക് സമ്യ കൊഡുത്തിന്തിന്തെ. ആന അവാള് അത്തെ ഗേയ ആസെപഡാലെ. 22 അദ്‌നാലെ നാന് അവാള്‌ന നോയി മാഡി കെ്ഡെമേലെ ബെക്കുവേന്. അവാളോഡ കണ്ടപഡിക്ക് ബേസ്യാഡി നഡാക്ക്‌ന്റവാര് അത്തെ നഡാക്കുവാദ്‌ന ബ്‌ട്ട് സാമിസാരി തിര്‌ഗാദിന്ത നാന് അവാര്‌ക്ക് ദൊഡ്ഡ കജട്ടന കൊഡുക്കുവെ. 23 നാന് അവാള് സൊല്ലുക്കു കെ്ട്ട്‌പട്ട് നഡാക്ക്‌ന്റവാര്‌നാമ് കൊന്റു തള്ളുവെ. അദുക്കുള എല്ലാവാര് മനേസ്സ്‌നാമ് നെഞ്ച്‌നാമ് സോദണെ ഗേന്റവാന്‌ത്തെ നാന് എന്റ് എല്ലാ ഏസ്സ്‌ഗാറാര് കൂട്ടഗാള്‌ക്ക്‌മ് തെരിമ്. നിമ്മ ഒന്റൊന്റാള്‌ക്ക്‌മ് നിമ്മ ഗേവാദ്‌ക്ക് തഗ്‌ന്ത പാസെ നാന് നിമാക്ക് കൂലി തരുവേന്. 24 ആന അവാള് ബുദ്ദിനായന കേ്ള്‌ക്കാദേമ് <ആര്‌ക്ക്‌മ് തെര്യാദെ മറേസി ബെത്ത്‌റ്‌ക്കുവ സെയിത്താന്‌ത്ത് മ്‌ഗ്‌ന്ത കാര്യഗാള്> എന്റ് ലേസ ആള്‌ഗാള് സൊല്ലുവാദ്‌ഗാള്‌ന പഡിക്കാദേമ് ഇര്‌ക്കുവ തയിതിര്യാല ബാക്കി ആള്‌ഗാള്‌ക്ക് നാന് സൊല്ലുവാദ്: നിമാക്ക് സുമാക്ക്യ മുഡ്യാത്താദ് ഒന്റുനാമ് നാന് നിമ്മ് തലേക്ക് ഏ്റ്‌സുവാദില്ലെ. 25 എന്റാല്‌മ് നിമാക്ക് ഇന്നാല് ഇര്‌ക്കുവാദ്‌ന നാന് ബരമാട്ട്‌ക്ക് കയി ബ്‌ഡാദെ ബെയിന്. 26-28 ഗെല്‌സ്‌ന്റവാര്‌മ് നാന് ആസെപഡുവാദ്‌ന കഡേസി മാട്ട് ഗേന്റവാര്‌മ് ആന എല്ലാവാര്‌ക്ക്‌മ്, എന്ന് അപ്പാന് എനാക്ക് തന്ത പാസെ, എഗുദാരല്ലാത്ത ജാദിഗാള്‌ന ആള്യ നാന് അദിഗര കൊഡുക്കുവെ. <അയാള് അവാര്‌ന ഇര്‌മ്പ് ബഡി എ്ഡ്‌ത്ത് മേസുവാന്. കുജവാന് മണ്ണ് സട്ടിന ഒഡേത്ത് തള്ളുവ പാസെ അയാള് അവാര്‌ന ഒഡേക്കുവാന്.> അയാള് ഗെ്ല്‌സ്‌നാന് എന്റ് കാട്ട്യ നാന് അയാള്‌ക്ക് ബെ്ഡിബെ്ള്ളിനാമ് കൊഡുക്കുവേന്. 29 സാമിനിഗാല് ഏസ്സ്‌ഗാറാര് കൂട്ടഗാള്‌ക്ക് സൊല്ലുവാദ് എന്തെന്റ് കേ്ള്‌ക്ക്യ മുഡിന്റവാര് കേ്ള്‌ക്കുഡൊ.>> |
New Life Computer Institute