ബെ്ളിപട്ട കാര്യ 19 - സാമി സേദിമേലോഗാത്ത്ല പാട്ട് 1 ഈ കാര്യഗാളെല്ല തീന്ത പ്‌റ ദൊഡ്ഡ ഒന്റു ജനകൂട്ട ആലാക്കുവ ജദ്ദന പാസെ ഇര്‌ക്കുവ ദൊഡ്ഡ ഒന്റു ജദ്ദ നാന് മേലോഗാത്ത്‌ലിന്ത് കേ്ട്ടേന്: <<ആലേലൂയ! സാമി നമാന കാപാറ്റിര്‌ക്ക്‌ന്റാന്, മദ്‌പ്പോഡ ഇര്‌ക്ക്‌ന്റവാന്‌മ് സക്‌ത്യോഡ ഇര്‌ക്ക്‌ന്റവാന്‌മ് അയാള്‌ത്തെ. 2 എന്ത്‌ക്കെന്റ് സൊന്ന അയാള് ആള്‌ഗാള്‌ന നേര്‌മോഡാമ് സത്ത്യത്തോഡാമ് ബിദിക്ക്‌ന്റാന്. ബേസ്യാഡി നഡാന്ത് കൊണ്ടു ഉലഗാന കെ്ഡ്‌സ്‌ന പേര്‌കേ്ട്ട ബേസിക്ക് അയാള് ദെ്ണ്ടണെ ബിദിത്താന്, തന്ന് ഗിലാസഗാറാര്‌ന അവാള് കൊന്റാദ്‌ക്ക് സാമി അവാള്‌ന പള്യെ്ഡ്‌ത്ത്‌റ്‌ന്റാന്.>> 3 അവാര് പിന്നേമ്, <<അല്ലേലൂയ! അവാള്‌ന സുഡുവ പൊഗെ എന്നാല്‌ക്ക്‌മ് മേല് കഡാന്ത് കൊണ്ടേ ഇര്‌ക്ക്‌മ്>> എന്റ് ആലാത്താര്. 4 അദുക്കുള ഇരുവത്തിനാല് മൂപ്പനാമ്‌ഗാള്‌മ് നാക്ക് ഉജുരുകെ്ളെഗാള്‌മ്, <<ആമേന്, ആലേലൂയ>> എന്റ് സൊല്ലി കുറിഞ്ചില് കുക്കാന്ത്‌റ്‌ക്കുവ സാമിന സഡങ്ക ബ്‌ന്ത് കുമ്മുഡുനാര്. കൊറ്യാഡ് കുട്ടി കല്യണ ബിര്‌ന്ത് 5 അദ്‌ക്ക് പ്‌റ കുറിഞ്ചിലിന്ത് ഒന്റു ജദ്ദ, <<നമ്മ് സാമിക്ക് ഗിലാസഗാറാര് ആയി, അയാള്‌ക്ക് അഞ്ചി പെ്ളേക്കുവ, സ്‌ന്നവാര്‌മ് ദൊഡ്ഡവാര്‌മ് ആയിര്‌ന്റവാരെ, നിമ്മ ഒട്ടുക്കു സാമിക്ക് ഒഗെ ഇക്ക്‌ന്>> എന്റ് സൊല്ലുവാദ്‌ന നാന് കേ്ട്ടേന്. 6 പിന്നെ ദൊഡ്ഡ ഒന്റു കൂട്ട ആള്‌ഗാള് ആലാക്കുവ ജദ്ദന പാസേമ് ദൊഡ്ഡ നീര് ആലാത്ത് ബരുവ ജദ്ദന പാസേമ് സെര്യാന ഒന്റു ഇ്ഡി ബെ്ട്ടുവ ജദ്ദന പാസേമ് നാന് കേ്ട്ടേന്, <<ആലേലൂയ! എല്ലാ ബിലാമ് ഇര്‌ക്കുവ നമ്മ് ആണ്ടവാനാന സാമി ആള്‌ന്റാന്. 7 നമ്മ പിര്യപഡുഡൊ, മദിമറാന്ത് പിര്യപൊങ്കുഡൊ, അയാള്‌ക്ക് മദ്‌പ്പ്‌മ് കൊഡുക്കുഡൊ. എന്ത്‌ക്കെന്റ് സൊന്ന കൊറ്യാഡ് കുട്ടി കല്യണ നാള് ബന്ത്‌റ്‌ക്ക്‌ന്റ്, അയാള്‌ക്ക് സൊല്ലി ബെത്തിന്ത കല്യണ പെ്ണ്ണ് താന്‌താനെ ഒരിങ്കിമ് ഇര്‌ന്റാള്. 8 ദഗദഗാത്ത് മിന്നുവ ബെ്ള്ളെ ഉഡുപ്പു ഇക്ക്യ അവാള്‌ക്ക് കെ്ഡേത്ത്‌ദ്>> അയി ബെ്ള്ളെ ഉഡുപ്പു സാമിഗാറാര് ഗേവ നല്ല കാര്യഗാള്‌ന കാട്ട്‌ന്റ്. 9 അദ്‌ക്ക് പ്‌റ ദൂദാന്, <<കൊറ്യാഡ് കുട്ടി കല്യണ ബിര്‌ന്ത്‌ക്ക് സാമി ബ്‌ളിത്തവാര് ബാഗ്യകേ്ട്ടവാര് എന്റ് എ്ള്‌ദ്. സാമി സൊല്ലുവ ഈ നായ സത്ത്യത്തെ>> എന്റ് എനാക്ക് സൊന്നാന്. 10 അദുക്കുള നാന് അയാള്‌ന കുമ്മുഡ്യ അയാള് കാല്‌ക്ക് ബ്‌ന്തെ. ആന ദൂദാന് എനാക്ക് <<നീ അത്തെ ഗേഗാദെ, നിനാന പാസേമ് ഏസ്സ്‌ന പറ്റ്യുള്ള സത്ത്യന സൊല്ലുവ ബേ്റെ ഏസ്സ്‌ഗാറാര്‌ന പാസേമ് ഇര്‌ക്കുവ ഗിലാസഗാറാന്‌ത്തെ നാന്. സാമിന താനെത്തെ കുമ്മുഡുഡൊ. എന്ത്‌ക്കെന്റ് സൊന്ന ഏസ്സ്‌ന പറ്റ്യുള്ള സത്ത്യന ആള്‌ഗാള്‌ക്ക് സൊല്ല്യ ബെക്കുവാദ് സാമിനിഗാല്‌ത്തെ>> എന്റ് സൊന്നാന്. ബെ്ള്ളെ കുദുറെ കുദ്ദാക്ക് കുക്കാന്ത്‌റ്‌ന്റവാന് 11 അദ്‌ക്ക് പ്‌റ മേലോഗ ത്‌റാന്ത്‌റ്‌ക്കുവാദ്‌ന നാന് കണ്ടെ. നാന് നോഡുഗാട്ടി ഒന്റു ബെ്ള്ള കുദുറെന കണ്ടെ. അയി കുദുറെ കുദ്ദാക്ക് കുക്കാന്ത് ഇര്‌ന്റവാന്‌ന നമ്പ്യ മുഡിന്റവാന് എന്റ്‌മ് സത്ത്യമുള്ളവാന് എന്റ്‌മ്‌ത്തെ ബ്‌ളിത്തിന്താദ്. നേര്‌മോഡാത്തെ അയാള് ആള്‌ഗാള്‌ന ബിദിക്കുവാദ്‌മ് പോട്ടിഗാറാരോഡ ജുദ്ദ ഗേവാദ്‌മ്. 12 അയാള് കണ്ണ്‌ഗാള് കത്തി എരേവ തീന പാസെ ആയിന്ത്‌ദ്. അയാള് തലേല് മൊത്തന ഗിര്യാഡഗാള്‌മ് ഇന്ത്‌ദ്. എ്ള്‌ദി ബെത്ത്‌റ്‌ക്കുവ ഒന്റു പേര്‌മ് അയാള്‌ക്ക് ഇര്‌ക്ക്‌ന്റ്. അദ് അയാള്‌ക്കല്ലാദെ ബേ്റെ ആര്‌ക്ക്‌മ് തെര്യ മാട്ട. 13 അയാള് സോരേല് മുളുക്കിര്‌ക്കുവ ഒന്റു ഉഡുപ്പുമു ഇക്കിന്താന്. സാമി സൊല്ലുസുലാക്ക എന്റ്‌ത്തെ അയാള് പേര്. 14 മേലോഗാത്ത്‌ല പട്ടളഗാറാര് ദഗദഗാത്ത് മിന്നുവ ബെ്ള്ളെ ഉഡുപ്പു ഇക്കി ബെ്ള്ളെ കുദുറെഗാള് കുദ്ദാക്ക് ഏ്റി അയാള് പിന്ന്‌ക്ക് പോനാര്. 15 ബൂമില് ഇര്‌ക്കുവ എല്ലാ ആള്‌ഗാള്‌നാമ് സോലുസ്യ ബേ്ണ്ടി അയാള് ബായിലിന്ത് ഉരുക്കിര്‌ക്കുവ ബാള് ബെ്ളിഗെ കഡാക്ക്‌ന്റ്. <<അയാള് അവാര്‌ന ഇര്‌മ്പ് ബഡി എ്ഡ്‌ത്ത് ആളുവാന്.>> അയാള് മുന്തിരി സാര മെ്ട്ടി പെജേന്ത് എ്ഡ്‌ക്കുവ കുയിക്ക് മുന്തിരിന ഇക്കി മെ്ട്ടി പെജേവാന്. എല്ലാ ബിലാമ് ഇര്‌ക്കുവ സാമി മൊനേന കാട്ടുവാദ്‌ത്തെ അയി കുയി. 16 രാജാവുഗാള്‌ക്ക് രാജാവുമു ആണ്ട്‌റ്‌ന്റവാര്‌ഗാള്‌ക്ക് ആണ്ടവാന്‌മ് എന്നുവ പേര് അയാള് ഉഡുപ്പുലുമു തൊഡേല്‌മ് എ്ള്‌ദിര്‌ക്ക്‌ന്റ്. 17 പ്‌റ ഒന്റു ദൂദാന് നേരാല് നിന്റ്‌റ്‌ക്കുവാദ്‌ന നാന് കണ്ടേന്. എത്ത്‌റാഗോ ഉജരാത്ത്‌ല് ബാന്‌ല് പറാക്കുവ എല്ലാ പക്കിഗാള്‌ക്ക്‌മ് അയാള് ദൊഡ്ഡാദ്‌ക്ക്, <<സാമി അട്ട്‌റ്‌ക്കുവ ദൊഡ്ഡ ബിര്‌ന്ത്‌ക്ക് ബന്ത് ഒന്റായി കൂഡുനു. 18 രാജാവുഗാള്‌ത്ത്‌മ്, പട്ടള തലെവാര്‌ഗാള്‌ത്ത്‌മ്, ബീര്യഗാറാര് ആന പട്ടളഗാറാര്‌ത്ത്‌മ്, കുദുറെഗാള്‌ത്ത്‌മ്, കുദുറെഗാള് കുദ്ദാക്ക് കുക്കാന്ത് ഇര്‌ന്റവാര്‌ത്ത്‌മ്, അഡിമെഗാള്‌ത്ത്‌മ് അഡിമെഗാള് അല്ലാത്തവാര്‌ത്ത്‌മ്, സ്‌ന്നവാര്‌ത്ത്‌മ് ദൊഡ്ഡവാര്‌ത്ത്‌മ് അത്തെ എല്ലാവാര്‌മ്‌ത്തെ കറിന തിന്ന്യ ബാന്>> എന്റ് ബ്‌ളിത്ത് സൊന്നാന്. 19 പ്‌റ നാന് നോഡുഗാട്ടി കുദുറെ കുദ്ദാക്ക് ഇര്‌ക്ക്‌ന്റവാനോഡാമ് അയാള് പട്ടളഗാറാരോഡാമ് ജുദ്ദ ഗേയ ബേ്ണ്ടി ബൂമില് ഇര്‌ക്കുവ രാജാവുഗാള്‌മ് അവാര് പട്ടളഗാറാര്‌മ് ഒന്റായി ബന്ത് കൂഡിര്‌ക്കുവാദ്‌ന കണ്ടെ. 20 ആന ബേ്ണ്ട്‌ന പ്‌ഡിത്ത് കെ്ട്ട്‌നാന്. സാമി സൊന്റു എന്റ് സൊല്ലി ഉറുട്ടു സൊല്ലുവ സാമിദാസ് അയി ബേ്ണ്ട് മുന്നുക്കു ബെത്ത് അദിസ്യഗാള് ഗേന്ത് കാട്ടി മന്‌സാര്‌ഗാള്‌ന ഏമാത്തിന്താന്. അത്തെ മന്‌സാര് ബേ്ണ്ട് പേര്‌ന കാട്ടുവ അഡ്യാളനാമ് ബെത്തിന്താര്. ബേ്ണ്ട് സെലെനാമ് കുമ്മുഡിന്താര്. അയി സാമിദാസ്‌നാമ് ബേ്ണ്ടോഡൊപ്പ പ്‌ഡിത്ത് കെ്ട്ടി ഗെന്തഗ കത്തി എരേവ തീ കഡാല്‌ക്ക് ഉജുരോഡ എ്റിന്ത് ബ്‌ട്ടാന്. 21 മിച്ച ഇന്തവാര്‌ന കുദുറെ കുദ്ദാക്ക് കുക്കാന്തിന്തവാന് ബായിലിന്ത് കഡാന്ത ബാള്‌ല് ബെ്ട്ടി കൊന്റാന്. അത്തെ അവാര് കറിഗാള്‌ന പക്കിഗാള് ബേ്റ്‌തുമ്പ തിന്റ്‌ദ്. |
New Life Computer Institute