ബെ്ളിപട്ട കാര്യ 18 - സാമി സേദിബാവിലോണു അളിവു 1 അദ്‌ക്ക് പ്‌റ ബേ്റെ ഒന്റു ദൂദാന് മേലോഗാത്ത്‌ലിന്ത് ഇ്റാഗി ബരുവാദ്‌ന നാന് കണ്ടെ. അയാള്‌ക്ക് ദൊഡ്ഡ അദിഗര ഇന്ത്‌ദ്. ദഗദഗാത്ത് എരേവ അയി ദൂദാന് ബെ്ള്‌സ ബൂമിക്ക് ഒട്ടുക്കു അഡിത്ത്‌ദ്. 2 അയാള് ദൊഡ്ഡാദ്‌ക്ക് ആലാത്ത് കൊണ്ടു, <<മ്‌ഗ്‌ന്ത പട്ടണ ആന ബാവിലോണു അളിന്ത് തള്ള്‌ട്ട്, അളിന്ത് തള്ള്‌ട്ട് അദ് പിജാദ്‌ഗാള് തങ്കുവ ബീ്ഡായി മുഡിന്ത്‌ദ്, അദ് കെ്ട്ടജാദിഗാള് ഒളിവ പട്ട്‌മ് ആയി മുഡിന്ത്‌ദ്, അയിത്ത്യാമ് സാത്ത്‌റാമ് പഡുവ പക്കിഗാള് ഒളിവ പട്ട്‌മ് ആയി മുഡിന്ത്‌ദ്. 3 എന്ത്‌ക്കെന്റ് സൊന്ന ഊറബെത്ത മുന്തിരി സാര ബൂമില് ഇര്‌ക്കുവ എല്ലാ ആള്‌ഗാള്‌മ് കുഡിത്താര്. അവാള് കാമാക്ക് കണ്ണില്ലാദെ കണ്ടപഡി നഡാക്കുവാദ്‌ത്തെ അയി ഊറബെത്ത മുന്തിരി സാര. ബൂമില് ഇര്‌ക്കുവ രാജാവുഗാള് അവാളോഡ ബേസ്യാഡ്‌നാര്. അഡാക്ക്യ മുഡ്യാത്ത കാമാക്ക് അഡിമെപട്ട് നഡാന്താദ്‌നാലെ ബൂമില് ഇര്‌ക്കുവ ഏവാരിഗാള് ദൊഡ്ഡ പണഗാറാരായി മുഡിന്താര്>> എന്റ് സൊന്നാന്. 4 അദ്‌ക്ക് പ്‌റ മേലോഗാത്ത്‌ലിന്ത് ഇത്തെ ബേ്റൊന്റു ജദ്ദന ഗുഡി നാന് കേ്ട്ടേന്: <<എന്ന് ആള്‌ഗാളെ, അയി പട്ടണന ബ്‌ട്ട് ബെ്ളിഗെ ബാന്, അത്തെ അവാള് ഗേവ പാവഗാള്‌ക്ക് നിമ്മ പങ്ക്‌ഗാറാര് ആഗമാട്ട്‌റ്, അവാള്‌ക്ക് ബന്ത്‌റ്‌ക്കുവ ദൊഡ്ഡ ദെ്ണ്ടണെഗാള് നിമാക്ക് ബരാമ്‌മാട്ട. 5 എന്ത്‌ക്കെന്റ് സൊന്ന അവാള് ഗേവ പാവ ബാന് മാട്ട്‌ക്ക് ഗുഡ്ഡു കൂഡിര്‌ക്ക്‌ന്റ്, അവാള് ഗേവ കെ്ട്ട കാര്യഗാള്‌ന സാമി നെനേത്ത്‌റ്‌ക്ക്‌ന്റാന്. 6 അവാള് നിമാക്ക് ഗേന്താദ്‌ന പാസെ നിമ്മാമ് അവാള്‌ക്ക് ഗേന്. അവാള് നിമാക്ക് ഗേന്താദ്‌ന താനെ നിമ്മ അവാള്‌ക്ക് റാഡ് ജമ്പ് ഗേന്. അവാള് ബേ്റെ ആള്‌ഗാള്‌ക്ക് ഊട്ടുസുന ഊറബെത്ത മുന്തിരി സാര നിമ്മ അവാള്‌ക്ക് റാഡ് ജമ്പ് ഊട്ടുസുനു. 7 അവാള് തനാന താനെ പെരിമെപഡിസികൊണ്ടു എത്ത്‌റ സമ്പോത്ത പെ്ളേപ്പ് പെ്ളേത്താളൊ, അത്ത്‌റ താനെ അവാള്‌ന കൊഡിമേമ് സങ്കഡാമ് പഡ്‌സ്‌ന്. <നാന് റാണ്യായി മദ്‌പ്പോഡ ആള്യ കുക്കാന്ത് ഇര്‌ക്ക്‌ന്റെ, നാന് ഒന്റു മ്‌ണ്ടേസ്യല്ല, നാന് ഒന്റു നാള്‌മ് ദുക്കാന കാണമാട്ടെ> എന്റ് അവാള് തന്ന് മനേസ്സ്‌ല് താനെ നെനേത്ത്‌റ്‌ന്റാള്. 8 അദ്‌നാലെ സാവു, ദുക്ക, പഞ്ച ഇത്തെ ദൊഡ്ഡ ദെ്ണ്ടണെഗാള് ഒന്റേ നാള് താനെ അവാള്‌ക്ക് ബര്‌മ്. അവാള്‌ന തീയിക്ക് ഇക്കി സുട്ടു തള്ളുവാര്. എന്ത്‌ക്കെന്റ് സൊന്ന അവാള്‌ന ദെ്ണ്ടണെ ബിദിത്ത ആണ്ടവാനാന സാമി എല്ലാ ബിലാമ് ഇര്‌ക്ക്‌ന്റവാന്‌ത്തെ. 9 അവാളോഡ ബേസ്യാഡി നഡാന്ത്‌മ് അവാള്‌ക്ക് ഇന്ത സമ്പോത്ത പെ്ളേപ്പ്‌ല് പങ്ക്‌ഗാറാര്‌മ് ആന ബൂമില് ഇര്‌ക്കുവ എല്ലാ രാജാവുഗാള്‌മ് അവാള്‌ന സുഡുവ പൊഗെന കാണുവാര്. അദ്‌ന കണ്ട് അവാള് സത്താദ്‌ക്ക് അവാര് നെഞ്ച്‌നമാര്‌ന അഡിത്ത് കേ്യിവാര്. 10 അവാള്‌ക്ക് കെ്ഡേത്ത കൊഡിമേന കണ്ട് അഞ്ചിക്കെപട്ട് ദൂരാത്ത്‌ല് നിന്റ് കൊണ്ടു, <മ്‌ഗ്‌ന്ത പട്ടണന ആന ബാവിലോണെ, നല്ല ഒറേപ്പിര്‌ക്കുവ പട്ടണാഗേ, നിനാക്ക് കജട്ട കജട്ട, ഒന്റു മണിക്കൂറു കൊണ്ടു നിന്ന് ദെ്ണ്ടണെ മുഡിന്ത്‌ദല്ല?> എന്റ് സൊല്ലി കേ്യിവാര്. 11 ബൂമില് ഇര്‌ക്കുവ ഏവാരിഗാള് അവാള്‌ന നെനേത്ത് കേ്യിവാര്, ദുക്കാമ് പഡുവാര്. എന്ത്‌ക്കെന്റ് സൊന്ന ഇന്നാല് അവാര് സാമനഗാള്‌ന ബാങ്ക്യ ആര്‌മ് ഇല്ലെ. 12 പൊന്നു, ബെ്ള്ളി, ബെലെപെറ്റ കല്ല്, മുത്തു, ബെ്ള്ളെബെ്ള്ള്യ ഇര്‌ക്കുവ സീലെ, നീല ന്‌റാമ് സോരെ ന്‌റാമ് കലാന്ത്‌റ്‌ക്കുവ സീലെ, പട്ട് സീലെ, സോരെസോര്യ ഇര്‌ക്കുവ സീലെ, നല്ല ബാഡെ അഡിക്കുവ എല്ലാ ദിന്‌സ് മരഗാള്, ആനെ കൊമ്പുലുമു ബെലെപെറ്റ മരാത്ത്‌ല്‌മ് ഉണ്ടാക്ക്‌ന എല്ലാ ദിന്‌സ് സാമനഗാള്, ബെ്ങ്കലാത്ത്‌ല്‌മ് ഇര്‌മ്പ്‌ല്‌മ് മാറ്‌ബ്‌ള് കല്ല്‌ല്‌മ് ഉണ്ടാക്ക്‌ന എല്ലാ ദിന്‌സ് സാമനഗാള്, 13 ലവാങ്കെ, ഏല, ബാഡെ കോലുഗാള്, മൂരു, തുമ്മ, ഊറബെത്ത മുന്തിരി സാര, എ്ണ്ണെ, നല്ല മാവു, ഗോദിമ്പെ, മാഡ്‌ഗാള്, കൊറ്യാഡ്‌ഗാള്, കുദുറെഗാള്, കുദുറെ ബണ്ടിഗാള്, അഡിമെഗാള് എന്റ് സൊന്ന ഉജുരുള്ള മന്‌സാര്‌ഗാള് എന്നുവാദ്‌ഗാളെല്ലത്തെ അവാര് സാമനഗാള്. 14 <നീ ആസെപട്ട നല്ല സാമനഗാളെല്ല നിനാന ബ്‌ട്ട് പോറ്റു. നിനാന അളാഗ് മാഡി ബെത്തിന്ത കാര്യഗാള്‌മ് നിന്ന് സൊത്തുന കാട്ടുവ കാര്യഗാള്‌മ് നിനാക്ക് ഇല്ലാദാറ്റ്. നീ ഇന്നി അദ്‌ഗാള്‌ന എന്നാല്‌ക്ക്‌മ് കാണമാട്ടായി> എന്റ് അവാര് സൊല്ലുവാര്. 15 ഈ സാമനഗാള്‌ന ബെത്ത് ഏവാര ഗേന്ത് പണഗാറാരാന ഏവാരിഗാള് അവാള്‌ക്ക് ബന്ത ഈ കൊഡിമേന കണ്ട് അഞ്ചി ദൂരാത്ത്‌ല് നിന്റിന്താര്. അവാര് ദുക്കപട്ട് കേ്യിന്ത്‌കൊണ്ടു 16 <മ്‌ഗ്‌ന്ത പട്ടണന ആന ബാവിലോണെ, നിനാക്ക് കജട്ട കജട്ട, ബെ്ള്ളെബെ്ള്ള്യ ഇര്‌ക്കുവ സീലേമ്, നീല ന്‌റാമ് സോരെ ന്‌റാമ് കലാന്ത്‌റ്‌ക്കുവ സീലേമ്, സോരെസോര്യ ഇര്‌ക്കുവ സീലേമ് കെ്ട്ടി, പൊന്നുലുമു, ബെലെപെറ്റ കല്ല്‌ല്‌മ്, മുത്തുലുമു തൊനേന്ത്‌മ് ഇര്‌ക്ക്‌ന്റവാളെ, 17 ഇത്ത്‌റ ദൊഡ്ഡ സൊത്തുഗാള് ഒന്റു മണിക്കൂറു കൊണ്ടു ഇല്ലാദായി പോറ്റല്ല?> എന്റ് സൊല്ലുവാര്. കപ്പാല് ഓട്ടുന്റവാര് ഒട്ടുക്കുമു, കഡാല് മേലെ ആങ്കീങ്ക് പോന്റവാര് ഒട്ടുക്കുമു, കപ്പാല്‌ല് ഗിലാസ ഗേന്റവാര്‌മ്, കഡാല്‌ല് ഗിലാസ ഗേന്ത് പെ്ളേക്ക്‌ന്റവാര് ഒട്ടുക്കുമു എമ്മട്ടോ ദൂരാത്ത്‌ലിന്ത്, 18 അവാള്‌ന സുഡുവ പൊഗെ കഡാക്കുവാദ്‌ന കണ്ടാര്. <ഈ മ്‌ഗ്‌ന്ത പട്ടണന പാസെ ഇര്‌ക്കുവ പട്ടണ ബേ്റെ ഏദ്‌ല് ഇര്‌ക്ക്‌ന്റ്?> എന്റ് ദൊഡ്ഡാദ്‌ക്ക് സൊല്ലി കേ്യ്‌ന്റാര്. 19 അവാര് മണ്ണ്‌ന ബാരി തലേക്ക് അട്ടി കൊണ്ടു, <മ്‌ഗ്‌ന്ത പട്ടണ ആന ബാവിലോണെ, നിനാക്ക് കജട്ട, കജട്ട. അവാള്‌ക്ക് ഇര്‌ക്കുവ ദൊഡ്ഡ സൊത്തുന ബെത്ത് കൊണ്ടു കഡാല്‌ല് കപ്പാല് ഇര്‌ക്ക്‌ന്റവാര് ഒട്ടുക്കു പണഗാറാര് ആനാര്. ഒന്റു മണിക്കൂറു നേര കൊണ്ടു എല്ലാദ്‌മ് ഇല്ലാദായി പോറ്റല്ല?> എന്റ് ദുക്കപട്ട് കേ്യിന്ത്‌കൊണ്ടു സൊല്ലുവാര്. 20 <മേലോഗഗാറാരെ, ഇത്തെ അവാള്‌ക്ക് അളിവു ബന്താദ്‌നാലെ പിര്യപൊങ്കുനു, സാമിഗാറാര്‌മ് അപ്പോസുത്തലാര്‌മ്, സാമിദാസ്‌ഗാള്‌മ് ആനവാരെ പിര്യപൊങ്കുന്, എന്ത്‌ക്കെന്റ് സൊന്ന അവാള് നിമാന ഗേന്താദ്‌ക്ക് സാമി അവാള്‌ന ദെ്ണ്ടിത്താന്.> >> 21 അദ്‌ക്ക് പ്‌റ മ്‌ഗ്‌ന്ത ബില ഇര്‌ക്കുവ ഒന്റു ദൂദാന് ബീസ്‌ങ്കല്ല്‌ന പാസെ ഇര്‌ക്കുവ ദൊഡ്ഡൊന്റു കല്ല്‌ന എ്ഡ്‌ത്ത് കഡാല്‌ക്ക് എ്റിന്ത് ഇത്തെ സൊന്നാന്: <<ഇദേപാസെ മ്‌ഗ്‌ന്ത പട്ടണന ആന ബാവിലോണുന ബീസ്യെ്റിന്തെ തള്ളുവാന്. ഇന്നി ഒന്റു നാള്‌മ് അദ്‌ന കാണമാട്ട്‌റ്. 22 ബീ്ണെ പ്‌ഡിക്ക്‌ന്റവാര്‌മ്, പാട്ട്‌ഗാറാര്‌മ്, കുഗാല് പ്‌ഡിക്ക്‌ന്റവാര്‌മ്, കൊമ്പൂദുന്റവാര്‌മ് ഇന്നി നിന്ന് പട്ട്‌ല് ബീ്ണെ പ്‌ഡിക്കാമ് മാട്ടാര്, പാട്ട് പാഡാമ് മാട്ടാര്, കുഗാല് പ്‌ഡിക്കാമ് മാട്ടാര്. ഒന്റൊന്റു ദിന്‌സ് ഗിലാസത്ത്‌ല് മ്‌ഗ്‌ന്തവാര് ആന ഗിലാസഗാറാര്‌ന ഇന്നി നിന്ന് പട്ട്‌ല് കാണമാട്ടായി, ബീസ്‌ങ്കല്ല്‌ല് ബീസുവ ജദ്ദാമ് ഇന്നി നിന്ന് പട്ട്‌ല് കേ്ള്‌ക്കമാട്ടായി. 23 ബ്‌ളാക്ക് ബെ്ള്‌സാമ് ഇന്നി നിന്ന് പട്ട്‌ക്ക് അഡിക്കമാട്ട, കല്യണ പെ്ണ്ണ്‌ത്ത്‌മ് കല്യണ മാപ്‌ളേത്ത്‌മ് പിര്യ ഇര്‌ക്കുവ ജദ്ദ ഇന്നി നിന്ന് പട്ട്‌ല് കേ്ള്‌ക്കമാട്ടായി, നിന്ന് ഏവാരിഗാള് ബൂമില് മുഗാനിഗാള് ആയിന്താര്, ബൂമില് ഇര്‌ക്കുവ എല്ലാ ആള്‌ഗാള്‌നാമ് നീ മന്ത്‌റമായ ഗേന്ത് ഏമാത്തി തള്ള്‌നായി. 24 സാമിദാസ്‌ഗാള്‌ത്ത്‌മ്, സാമിഗാറാര്‌ത്ത്‌മ് അത്തെ ബൂമില് ബെത്ത് കൊലെ ഗേന്ത എല്ലാവാര്‌ത്ത്‌മ് സോരെ അയി പട്ടണാത്ത്‌ല്‌ത്തെ കണ്ടാദ്.>> |
New Life Computer Institute