ബെ്ളിപട്ട കാര്യ 17 - സാമി സേദിപേര്കേ്ട്ട ബേസിമ് ബേ്ണ്ട്‌മ് 1 ഏ്ള് സട്ടിഗാള്‌ന കയില് എ്ഡ്‌ത്തിന്ത ഏ്ള് ദൂദനാമ്‌ല് ഒന്റൊരുത്താന് ബന്ത് എനാക്ക്, <<ബാ, പെര്‌വാനിക്ക് അര്‌ഗെ ഇര്‌ക്കുവ മ്‌ഗ്‌ന്ത പട്ടണ എന്നുവ പേര്‌കേ്ട്ട ബേസിക്ക് ബര്യ പോവ ദെ്ണ്ടണെന നാന് കാട്ടി തരുവെ. 2 ബൂമില രാജാവുഗാള് അവാളോഡ ബേസ്യാഡി നഡാന്താര്. അവാള് കാമാക്ക് കണ്ണില്ലാദെ കണ്ടപഡി നഡാക്കുവാദ് എന്നുവാദ് ഊറബെത്ത മുന്തിരി സാരത്തെ. ഈ ഊറബെത്ത മുന്തിരി സാര ബൂമില് ഇര്‌ക്കുവ എല്ലാ ആള്‌ഗാള്‌മ് കുഡിത്ത് ബോദേ്റി ഇര്‌ക്ക്‌ന്റാര്.>> എന്റ് സൊന്നാന്. 3 അദ്‌ക്ക് പ്‌റ സാമിനിഗാല് നഡാത്തുവാദ്‌ക്ക് നാന് ഒന്റേപെ്ട്ട് കെ്ട്ട്‌പട്ട് ഇര്‌ക്കാട്ടി അയി ദൂദാന് എനാന ബെ്ട്ടെകാഡ്‌ക്ക് കൂട്ടി പോനാന്. അദ്‌ല് ഒന്റു പെണ്ണ്‌പ്‌ളെ സോരെസോര്യ ഇര്‌ക്കുവ ഒന്റു ബേ്ണ്ട് കുദ്ദാക്ക് കുക്കാന്ത് ഇര്‌ക്കുവാദ്‌ന നാന് കണ്ടെ. അയി ബേ്ണ്ട് സരിഗലാത്ത്‌ല് ഒട്ടുക്കു സാമിന മാനഗെ്ഡ്‌സുവ പേര്‌ഗാള് ഇന്ത്‌ദ്. അയി ബേ്ണ്ട്‌ക്ക് ഏ്ള് തലെഗാള്‌മ് പത്ത് കൊമ്പുഗാള്‌മ് ഇന്ത്‌ദ്. 4 അയി പെ്ണ്ണ്‌പ്‌ളെ നീലാമ് സോരേമ് കലാന്ത ന്‌റാമ് സോരെ ന്‌റാമ് ഉള്ള ഉഡുപ്പുമ് ഇക്കിന്താള്. അവാള് പൊന്നുലുമു, ബെലെപെറ്റ കല്ല്‌ല്‌മ്, മുത്തുലുമു തൊനേന്തിന്താള്. അവാള് കയില് ഒന്റു പൊന്നു സെമ്പ്‌മ് ഇന്ത്‌ദ്. അവാള് ബേസ്യാഡികൊണ്ടു കണ്ടപഡി നഡാക്കുവ അയിത്ത്യുള്ള കാര്യഗാള്‌മ് സാത്ത്‌റ പ്‌ഡിക്കുവ കാര്യഗാള്‌മ് അയി സെമ്പ്‌ല് തുമ്പിന്ത്‌ദ്. 5 അവാള് നെറ്റില് അര്‌ത്ത എന്തെന്റ് ആര്‌ക്ക്‌മ് തെര്യാത്ത ഒന്റു പേര് എ്ള്‌ദിന്ത്‌ദ്. ബൂമില് ഇര്‌ക്കുവ ബേസിഗാള്‌ത്ത്‌മ് സാത്ത്‌റ പ്‌ഡിക്കുവ കാര്യഗാള് ഗേന്റവാര്‌ത്ത്‌മ് അവ്വെ ആന ബാവിലോണു എന്നുവ മ്‌ഗ്‌ന്ത പട്ടണ എന്റ്‌ത്തെ അദ്‌ക്ക് പേര്. 6 സാമിഗാറാര് സോരെനാമ് നമ്പ്യ മുഡിന്റവാരായി ഏസ്സ്‌ന പറ്റി സൊന്നവാര് സോരെനാമ് അവാള് കുഡിത്ത് ബോദേ്റിര്‌ക്കുവാദ്‌ന നാന് കണ്ടേന്. അവാള്‌ന കാണ്‌ഗാട്ടി, നാന് ഒന്റേപെ്ട്ട് അന്തബ്‌ട്ടേന്. 7 അദുക്കുള ദൂദാന് എനാക്ക്: <<നീ എന്ത്‌ക്ക് അന്തബ്‌ട്ട്‌റ്‌ക്കുവാദ്? ഈ പെ്ണ്ണ്‌പ്‌ളെന പറ്റിമ് ഏ്ള് തലേമ് പത്ത് കൊമ്പുമു ഇന്ത് അവാള്‌ന സുമാക്കുവ അയി ബേ്ണ്ട്‌ന പറ്റിമ്യുള്ള ആര്‌ക്ക്‌മ് തെര്യാത്ത അര്‌ത്തന നാന് നിനാക്ക് സൊല്ലി തന്റെ. 8 നീ കണ്ട ബേ്ണ്ട് എന്നുവാദൊ മുന്നുക്കു ഇന്താദ്‌മ് ആന ഇന്നാല് ഇല്ലാത്താദ്‌മ്‌ത്തെ. അഡി അറ്റ ഇല്ലാത്ത കുയിലിന്ത് ഇന്നി ഏ്റി ബന്ത് അള്യ പോവാദ്‌മ്‌ത്തെ. എന്നാല്‌ക്ക്‌മ് പെ്ളേക്ക്‌ന്റവാര് പേര് എ്ള്‌ദിര്‌ക്കുവ ബൊക്കുലു ഉലഗാന ഉണ്ടാക്കുവാദ്‌ക്ക് മുദാല് താനെ പേര് എ്ള്‌ദാത്ത ബൂമില് ഇര്‌ക്കുവ ആള്‌ഗാള് മുദാല് ഇന്താദ്‌മ് ഇന്നാല് ഇല്ലത്താദ്‌മ് ഇന്നി ബര്യ പോവാദ്‌മ് ആന അയി ബേ്ണ്ട്‌ന കണ്ട് അദിസ്യപഡുവാര്. 9 ഈ കാര്യാത്ത്‌ല്‌ത്തെ അറുവുമു ബുദ്ദിമ് ഇര്‌ക്കുവ മനേസ്സ് തേവെപഡുവാദ്. ഏ്ള് തലെ എന്നുവാദ് പെ്ണ്ണ്‌പ്‌ളെ കുക്കാന്ത് ഇര്‌ക്കുവ ഏ്ള് മലെഗാള്‌ത്തെ. 10 അദ്‌താനേമല്ല, അദ് ഏ്ള് രാജാവുഗാള്‌മ്‌ത്തെ. അവാര്‌ല് അഞ്ച് രാജാവുഗാള് സത്ത് പോനാര്. ഒന്റാള് ഇന്നാല് ഇര്‌ക്ക്‌ന്റാന്, പിന്നെ ഒരുത്താന് ഇന്നിമ് ബരാലെ, അയാള് ബന്ത് ലേസ കാലത്തെ ആള്‌വാന്. 11 മുന്നുക്കു ഇന്താദ്‌മ് ഇന്നാല് ഇല്ലാത്താദ്‌മ് ആന അയി ബേ്ണ്ട് എ്ട്ടാവാദ് രാജാവുത്തെ. ആനാല്‌മ് അയാള് അയി ഏ്ള് രാജാവുഗാള്‌ല് പട്ടവാന്‌ത്തെ. അയാള് അള്യ പോന്റാന്. 12 നീ കണ്ട പത്ത് കൊമ്പുഗാള് പത്ത് രാജാവുഗാള്‌ത്തെ. അവാര് ഇന്നിമ് ആള്യ പ്‌ഡിക്കാലെ. എന്റാല്‌മ് ബേ്ണ്ടോഡൊപ്പ ഒന്റു മണിക്കൂറു നേര രാജാവുഗാളായി ആള്യ അദിഗര കെ്ഡേക്ക്യ ഉള്ളവാര്‌ത്തെ അവാര്. 13 ഇവാര് ഒന്റേ സൊല്ലുലു നഡാക്ക്‌ന്റവാര്‌ത്തെ, അവാര് തമ്മ് സക്‌തിനാമ് അദിഗരനാമ് ബേ്ണ്ട്‌ക്ക് ഒപ്പിസി കൊഡുക്കുന്റാര്. 14 അവാര് കൊറ്യാഡ് കുട്ട്യോഡ ജുദ്ദ ഗേവാര്. ആന കൊറ്യാഡ് കുട്ടി അവാര്‌ന സോലുസുവാന്. എന്ത്‌ക്കെന്റ് സൊന്ന അയാള് ആണ്ട്‌റ്‌ന്റവാര്‌ഗാള്‌ക്ക് ആണ്ടവാന്‌മ് രാജാവുഗാള്‌ക്ക് രാജാവുമുത്തെ. അയാളോഡ ഇര്‌ക്ക്‌ന്റവാര് സാമി ബ്‌ളിത്തവാര്‌മ് തെരിന്തെ്ഡ്‌ത്തവാര്‌മ് നമ്പ്യ മുഡിന്റവാര്‌മ്‌ത്തെ>> എന്റ് സൊന്നാന്. 15 അദ്‌ക്ക് പ്‌റ ദൂദാന് എനാക്ക്, <<ബേസി കുക്കാന്ത് ഇര്‌ക്കുവ പട്ട് എന്റ് നീ കണ്ട അയി നീര് എന്നുവാദ് എഞ്ചോ ബമ്മേസഗാള്‌മ്, എഞ്ചോ ജനഗാള്‌മ്, എഞ്ചോ ജാദിഗാള്‌മ്, എഞ്ചോ നായഗാറാര്‌മ്‌ത്തെ. 16 നീ കണ്ട പത്ത് കൊമ്പുഗാള്‌മ് ബേ്ണ്ട്‌മ് ബേസിന തൊറേന്ത് തള്ളുവാര്. അവാര് അവാള്‌ക്ക് ഇര്‌ക്കുവാദ്‌ന ഒട്ടുക്കു എ്ഡ്‌ത്ത് തള്ളി അവാള്‌ന ബെ്റ്‌ദെകറി മാഡുവാര്. അത്തെ അവാള് കറി സദേന അവാര് തിന്നുവാര്, അവാള്‌ന തീയിക്ക് ഇക്കി സുട്ടുമു തള്ളുവാര്. 17 സാമി സൊല്ലുസുലാക്കാത്ത്‌ല് സൊല്ലിര്‌ക്കുവാദ് അദേപഡി നഡാക്ക മാട്ട്‌ക്ക് താന് ആസെപഡുവാദ്‌ന ഗേയാമ്, അവാര് ഒന്റേ സൊല്ലുലു താനെ ഇന്ത് രാജാവായി ആള്‌വാദ്‌ക്കുള്ള തമ്മ് അദിഗരാന ബേ്ണ്ട്‌ക്ക് കൊഡുക്ക്യാമ് സാമി അവാര് മനേസ്സ്‌ക്ക് നെനേവു കൊഡുത്താന്. 18 നീ കണ്ട അയി പെ്ണ്ണ്‌പ്‌ളെ എന്നുവാദ് ബൂമില് ഇര്‌ക്കുവ രാജാവുഗാള്‌ന ആള്യ അദിഗര ഇര്‌ക്കുവ മ്‌ഗ്‌ന്ത പട്ടണാത്തെ.>> |
New Life Computer Institute