ബെ്ളിപട്ട കാര്യ 16 - സാമി സേദിസാമി മൊനെ എന്നുവ ഏ്ള് സട്ടിഗാള് 1 <<നിമ്മ പോയി ഏ്ള് സട്ടില് തുമ്പിര്‌ക്കുവ സാമി മൊനേന ബൂമിക്ക് ഊറ്റി തള്ള്‌ന്>> എന്റ് ഏ്ള് ദൂദനാമ്‌ക്ക്‌മ് സൊല്ലുവ ദൊഡ്ഡ ഒന്റു ജദ്ദന സാമിബീ്ഡ്‌ലിന്ത് നാന് കേ്ട്ടേന്. 2 ഒണ്ണാവാദ് ദൂദാന് പോയി തന്ന് സട്ടിന ബൂമിക്ക് ഊറ്റുനാന്. അദുക്കുള ബേ്ണ്ട്‌ത്ത് അഡ്യാള ബെത്ത്‌റ്‌ന്റവാര്‌മ് അയി ബേ്ണ്ട് സെലെന കുമ്മുഡുന്റവാര്‌മ് ആന മന്‌സാര്‌ഗാള്‌ക്ക് അഞ്ചിക്കെപ്‌ഡ്‌സുവാദ്‌മ് നല്ല ബിജ എ്ഡ്‌ക്കുവാദ്‌മ് ആന പുണ്ണുഗാള് ആറ്റ്. 3 റണ്ടാവാദ് ദൂദാന് തന്ന് സട്ടിന കഡാല്‌ക്ക് ഊറ്റുനാന്. അദുക്കുള അദ് സത്ത മന്‌സാന് സോരെന പാസെ ആറ്റ്. കഡാല്‌ല ഉജുരുകെ്ളെഗാള് ഒട്ടുക്കു സത്ത് തള്ള്‌ട്ട്. 4 മൂണാവാദ് ദൂദാന് തന്ന് സട്ടിന ബാനിഗാള്‌ക്ക്‌മ് നീര് ജെനിക്കുവ പണ്ണിഗാള്‌ക്ക്‌മ് ഊറ്റുനാന്. അദ് സോരെ ആയി തീന്ത്‌ദ്. 5 അദുക്കുള നീര് കാര്യന നോഡുവ ദൂദാന്, <<ഇന്നാല് ഇര്‌ക്ക്‌ന്റവാന്‌മ്, ഇന്തിന്തവാന്‌മ്, സുത്താപ്പുള്ളവാന്‌മ് ആനവാനെ, നീ നേര്‌മുള്ളവാന്‌ത്തെ. എന്ത്‌ക്കെന്റ് സൊന്ന നീ നേര്‌മോഡ ബിദിത്ത്‌റ്‌ന്റായി. 6 സാമിഗാറാര്‌നാമ്, സാമിദാസ്‌ഗാള്‌നാമ് അവാര് കൊന്റാദ്‌നാലെ നീ അവാര്‌ക്ക് സോരെന ഊട്ടുസുനായി. അവാര്‌ക്ക് തഗ്‌ന്താദ്‌ത്തെ കെ്ഡേത്ത്‌ദ്.>> 7 അദേപാസെ മദ്‌ല്‌മ്, <<സെരിത്തെ, എല്ലാ ബിലാമ് ഇര്‌ക്കുവ ആണ്ടവാനാന സാമ്യെ, നീ ആള്‌ഗാള്‌ന നേര്‌മോഡാമ് സത്ത്യത്തോഡാമ് ബിദിക്ക്‌ന്റായി>> എന്റ് സൊല്ലുവാദ്‌ന നാന് കേ്ട്ടേന്. 8 നാലാവാദ് ദൂദാന് തന്ന് സട്ടിന നേരാക്ക് ഊറ്റുനാന്. അദുക്കുള നേരാക്ക് ഇര്‌ക്കുവ മ്‌ഗ്‌ന്ത സൂഡുലു മന്‌സാര്‌ഗാള്‌ന സുട്ടു തള്ള്യ നേരാക്ക് അദിഗര കെ്ഡേത്ത്‌ദ്. 9 മ്‌ഗ്‌ന്ത സൂഡുനാലെ മന്‌സാര് ബെന്ത് തള്ള്‌നാര്. എന്റാല്‌മ് ഈ ദൊഡ്ഡ ദെ്ണ്ടണെഗാള് കൊഡുക്ക്യ അദിഗര ഇര്‌ക്കുവ സാമിക്ക് അവാര് സാപ്പ ഇക്ക്‌നാര്. അവാര് ഗേവാദ് തപ്പ് എന്റ് തെരിന്ത് സാമിസാരി തിര്‌ഗാമില്ലെ, സാമിക്ക് മദ്‌പ്പ് കൊഡുക്കാമില്ലെ. 10 അയിദാവാദ് ദൂദാന് തന്ന് സട്ടിന ബേ്ണ്ട്‌ത്ത് കുറിഞ്ചി പട്ട്‌ക്ക് ഊറ്റുനാന്. അദുക്കുള അയി ബേ്ണ്ട് രാജ്യ ഒട്ടുക്കു ഇ്റ്‌ട്ട് കെ്ട്ടി തള്ള്‌ട്ട്. അദ്‌നാലെ താങ്ക്യ മുഡ്യാത്ത ബിജാക്ക് ആള്‌ഗാള് തമ്മ് നാലങ്കെഗാള്‌ന കഡിത്താര്. 11 അവാര്‌ക്ക് പുണ്ണു ആനാദ്‌നാലേമ് ബിജ എ്ഡ്‌ക്കുവാദ്‌നാലേമ് മേലോഗാത്ത്‌ല സാമിക്ക് അവാര് സാപ്പ ഇക്ക്‌നാര്. അവാര് ഗേവാദ് കെ്ട്ട കാര്യ എന്റ് തെരിന്ത് സാമിസാരി തിര്‌ഗാമില്ലെ. 12 ആറാവാദ് ദൂദാന് തന്ന് സട്ടിന ഊപ്‌റട്ടീസ് എന്നുവ പെര്‌വാനിക്ക് ഊറ്റുനാന്. അദുക്കുള ക്‌ളാക്കിന്ത് ബരുവ രാജാവുഗാള്‌ക്ക് ബട്ടെ മാഡ്യ അദ്‌ല നീര് ബറ്റി തള്ള്‌ട്ട്. 13 അദുക്കുള ദൊഡ്ഡ പാമ്പ് ബായിലിന്ത്‌മ്, ബേ്ണ്ട് ബായിലിന്ത്‌മ്, സാമി സൊന്റാന് എന്റ് ഉറുട്ടു സൊല്ലുവ സാമിദാസ് ബായിലിന്ത്‌മ് കപ്പെഗാള്‌ന പാസെ മൂറു കെ്ട്ടജാദിഗാള് ബെ്ളിഗെ ബരുവാദ്‌ന നാന് കണ്ടെ. 14 അദിസ്യമാന അഡ്യാളഗാള് ഗേന്ത് കാട്ടുവ സെയിത്താന് നിഗാല്‌ഗാള്‌ത്തെ ഇദ്‌ഗാള്. എല്ലാ ബിലാമ് ഇര്‌ക്കുവ സാമിത്ത് മ്‌ഗ്‌ന്ത നാള്‌ല് ജുദ്ദ ഗേയ ബേ്ണ്ടി അയി നിഗാല്‌ഗാള് ബൂമിലിര്‌ക്കുവ രാജാവുഗാള്‌ന ഒട്ടുക്കുമു ഒന്റായി സേത്ത്യ അവാര് പട്ട്‌ക്ക് പോന്റാര്. 15 <<നോഡുനു, ഒന്റു ത്‌റ്‌ട്ടാന് ബരുവ പാസെ നാന് ബരുവെ. ബെ്റ്‌ദെകറി നഡാന്ത് അഡ്‌ത്തവാര് നാണഗെ്ഡ്‌സാദെ ഇര്‌ക്ക്യ ബേ്ണ്ടി തന്ന് സീലെസിലാപ്പ്‌ഗാള്‌ന സൊക്കാന സൂസാരിത്ത്‌മ് ഉറാങ്കാദേമ് ഇര്‌ക്ക്‌ന്റവാന് ബാഗ്യകേ്ട്ടവാന്.>> 16 അയി നിഗാല്‌ഗാള് എവുറായാര് നായാത്ത്‌ല് അറ്‌മ്മഗെദോനു എന്റ് സൊല്ലുവ എ്ഡേക്ക് അയി രാജാവുഗാള്‌ന ഒന്റായി കൂട്ടി ബര്‌സ്സ്‌റ്റ്. 17 ഏ്ളാവാദ് ദൂദാന് തന്ന് സട്ടിന എ്ഡ്‌ത്ത് ബാന്‌ക്ക് ഊറ്റുനാന്. അദുക്കുള <<എല്ലാദ്‌മ് നഡാന്ത് മുഡിന്ത്‌ദ്>> എന്റ് സൊല്ലുവ ദൊഡ്ഡ ഒന്റു ജദ്ദ സാമിബീ്ഡ്‌ല കുറിഞ്ചി പട്ട്‌ലിന്ത് ബന്ത്‌ദ്. 18 അദുക്കുള മിച്ചുവ ബെ്ള്‌സഗാള്‌മ്, ഓസെഗാള്‌മ്, ഇ്ഡി ബെ്ട്ടുവ ജദ്ദഗാള്‌മ് ബന്ത്‌ദ്. എത്ത്‌റാഗോ ദൊഡ്ഡാദ്‌ക്ക് ബൂമിമ് കുലുങ്കുറ്റു. ബൂമില് മന്‌സാര് ഉണ്ടാന കാലാത്ത്‌ലിന്ത് ഇന്നമാട്ട്‌ക്ക് ഇത്ത്‌റ ദൊഡ്ഡാദ്‌ക്ക് ബൂമി കുലുങ്കാലെ. 19 മ്‌ഗ്‌ന്ത പട്ടണ മൂറു ബാഗായി ഒഡേന്ത്‌ദ്. ബൂമില് ഇര്‌ക്കുവ എല്ലാ പട്ടണഗാള്‌മ് അളിന്ത് തള്ള്‌ട്ട്. മ്‌ഗ്‌ന്ത പട്ടണ ആന ബാവിലോണുന സാമി നെനേത്താന്. അദ്‌നാലെ സാമി തന്ന് മ്‌ഗ്‌ന്ത മൊനെ എന്നുവ ഊറബെത്ത മുന്തിരി സാര തുമ്പിസി ബെത്ത്‌റ്‌ക്കുവ സട്ടിലിന്ത് അദ്‌ക്ക് ഊട്ടുസുനാന്. 20 സുറ്റുമു നീര് ഇര്‌ക്കുവ എല്ലാ എ്ഡെഗാള്‌മ് കാണദ്യാറ്റ്. എല്ലാ മലെഗാള്‌മ് ഇല്ലാദാറ്റ്. 21 ബാന്‌ലിന്ത് മന്‌സാര് കുദ്ദാക്ക് ദൊഡ്ഡ കല്ല് മഗെ അഡിത്ത്‌ദ്. ഒന്റൊന്റു കല്ല്‌മ് ഒപ്പതപ്പ മുപ്പാദ് കില ഇന്ത്‌ദ്. അവാര്‌ക്ക് ഈ ദൊഡ്ഡ കല്ല് മഗെ ദെ്ണ്ടണെ അത്ത്‌റാമ് കഡ്‌പ്പ ആയിന്താദ്‌നാലെ ആള്‌ഗാള് സാമിക്ക് സാപ്പ ഇക്ക്‌നാര്. |
New Life Computer Institute