ബെ്ളിപട്ട കാര്യ 14 - സാമി സേദികൊറ്യാഡ് കുട്ടിമ് അയാള് ആള്‌ഗാള്‌മ് 1 പ്‌റ നാന് നോഡുഗാട്ടി സീയോനു മലേല് കൊറ്യാഡ് കുട്ടി നിന്റ്‌റ്‌ക്കുവാദ്‌ന നാന് കണ്ടെ. നെറ്റില് അയാള്‌ത്ത്‌മ് അയാള് അപ്പാന്‌ത്ത്‌മ് പേര് എ്ള്‌ദിര്‌ക്കുവ നൂറ്റി നാപത്തി നാലായിര ആള്‌ഗാള്‌മ് അയി കൊറ്യാഡ് കുട്ട്യൊപ്പ നിന്റിന്താര്. 2 ദൊഡ്ഡ നീര് ഒളുഗുവ ജദ്ദന പാസേമ് ദൊഡ്ഡ ഇ്ഡി ബെ്ട്ടുവ ജദ്ദന പാസേമ് മേലോഗാത്ത്‌ലിന്ത് ഒന്റു ദൊഡ്ഡ ജദ്ദന നാന് കേ്ട്ടേന്. നാന് കേ്ട്ട അയി ദൊഡ്ഡ ജദ്ദ ബീ്ണെഗാറാര് ബീ്ണെ പ്‌ഡിക്കുവ പാസെ ഇന്ത്‌ദ്. 3 കുറിഞ്ചിക്ക്‌മ്, നാക്ക് ഉജുരുകെ്ളെഗാള്‌ക്ക്‌മ്, മൂപ്പനാമ് മുന്നുക്കുമു നിന്റ് അവാര് ഒന്റു പുദ്യ പാട്ട് പാഡ്‌നാര്. ബൂമിലിന്ത് ബെലേക്ക് ബാങ്ക്‌ന നൂറ്റി നാപത്തി നാലായിര ആള്‌ഗാള്‌ക്കല്ലാദെ അയി പാട്ട് ആര്‌ക്ക്‌മ് പഡിക്ക്യ മുഡ്യാലെ. 4 ഇവാര് പെ്ണ്ണ്‌മക്കാളോഡ ഉറാങ്കി തമാന കെ്ഡ്‌സാദെ കന്നി പെ്ണ്ണ്‌ഗാള്‌ന പാസെ ഇന്താര്. അവാര് കൊറ്യാഡ് കുട്ടി പിന്ന്‌മേലെ അദ് പോവ സാര്യെല്ല പോന്റാര്. മന്‌സാര്‌ഗാള്‌ലിന്ത് ബെലേക്ക് ബാങ്ക്‌നവാര്‌മ് അറ്‌ക്കാട്ടി മുദാല് കെ്ഡേക്കുവ ബെ്ള്ളാമെന സാമിക്ക് കൊഡുക്കുവ പാസെ സാമിക്ക്‌മ് കൊറ്യാഡ് കുട്ടിക്ക്‌മ് കൊഡുത്തവാര്‌മ്‌ത്തെ ഇവാര്. 5 അവാര് എന്നാല്‌ക്ക്‌മ് പൊയി സൊല്ലാത്തവാര്‌മ് കുറ്റകൊറേവു ഇല്ലത്തവാര്‌മ് ആയിന്താര്. മൂറു ദൂദാര് 6 പ്‌റ നാന് നോഡുഗാട്ടി എത്ത്‌റാഗോ ഉജരാത്ത്‌ല് ബേ്റൊന്റു ദൂദാന് ബാന്‌ല് പറാക്കുവാദ്‌ന നാന് കണ്ടെ. എല്ലാ ജാദിഗാള്‌ക്ക്‌മ്, എല്ലാ കുലഗാള്‌ക്ക്‌മ്, എല്ലാ നായഗാറാര്‌ക്ക്‌മ്, എല്ലാ ബമ്മേസഗാറാര്‌ക്ക്‌മ് അത്തെ ബൂമില് ഇര്‌ക്കുവ എല്ലാ ആള്‌ഗാള്‌ക്ക്‌മ് എന്നാല്‌ക്ക്‌മ് ഇര്‌ക്കുവ നല്ല സേദിന അയാള്‌ക്ക് സൊല്ല്യ ഇന്ത്‌ദ്. 7 ദൂദാന് ദൊഡ്ഡാദ്‌ക്ക്, <<സാമിക്ക് അഞ്ചി നഡാന്, അയാള്‌ക്ക് മദ്‌പ്പ് കൊഡുനു. എന്ത്‌ക്കെന്റ് സൊന്ന അയാള് എല്ലാ ആള്‌ഗാള്‌നാമ് ദെ്ണ്ടിക്കുവ നാള് ബന്ത്‌റ്‌ക്ക്‌ന്റ്. ബാന്‌നാമ്, ബൂമിനാമ് കഡാല്‌നാമ്, നീര് ജെനിക്കുവ പണ്ണിഗാള്‌നാമ് ദ്‌ട്ട്‌സ്‌നവാന്‌ന കുമ്മുഡുനു>> എന്റ് സൊന്നാന്. 8 റണ്ടാവാദ് ഒന്റു ദൂദാന് മുദാല്‌ല ദൂദാന് പിന്ന്‌മേലെ ബന്ത് <<ഊറബെത്ത മുന്തിരി സാര ബൂമില് ഇര്‌ക്കുവ എല്ലാ ആള്‌ഗാള്‌ക്ക്‌മ് ഊട്ടുസുന മ്‌ഗ്‌ന്ത പട്ടണ ആന ബാവിലോണു അളിന്ത് തള്ള്‌ട്ട്, അളിന്ത് തള്ള്‌ട്ട്, അവാള് കാമാക്ക് കണ്ണില്ലാദെ കണ്ടപഡി നഡാക്കുവാദ്‌ത്തെ അയി ഊറബെത്ത മുന്തിരി സാര>> എന്റ് സൊന്നാന്. 9 മൂറാവാദ് ഒന്റു ദൂദാന് അവാര് പിന്ന്‌ക്ക് ബന്ത് ദൊഡ്ഡാദ്‌ക്ക് <<ബേ്ണ്ട്‌നാഗൊ അയി ബേ്ണ്ട് സെലെനാഗൊ കുമ്മുഡിമ് നെറ്റിലൊ കയിലൊ അഡ്യാള ബെത്ത്‌മ് ഇര്‌ക്ക്‌ന്റവാന് 10 സാമിക്ക് ഇര്‌ക്കുവ മ്‌ഗ്‌ന്ത മൊനെ എന്നുവ ഊറബെത്ത മുന്തിരി സാര കുഡിക്കുവാന്. നല്ല മപ്പ് ഏ്റുവ അയി മുന്തിരി സാര സാമി മൊനെ എന്നുവ സട്ടിക്ക് ഊറ്റി ബെത്ത്‌റ്‌ന്റാന് ഇര്‌ക്ക്‌ന്റാന്. സുത്താപ്പിര്‌ക്കുവ ദൂദനാമ്‌ക്ക്‌മ് കൊറ്യാഡ് കുട്ടിക്ക്‌മ് മുന്നുക്കു ബെത്ത് അയാള്‌ന തീയില്‌മ് ഗെന്തഗാത്ത്‌ല്‌മ് കൊഡിമെപഡുസുവാന്. 11 അവാര്‌ന കൊഡിമെ പഡുസുവ തീ പൊഗെ എന്നാല്‌ക്ക്‌മ് പൊഗേന്ത് കൊണ്ടു ഇര്‌ക്ക്‌മ്. ബേ്ണ്ട്‌നാമ് അയി ബേ്ണ്ട് സെലെനാമ് കുമ്മുഡുന്റവാര്‌ക്ക്‌മ്, അയാള് പേര്‌ന കാട്ടുവ എ്ണ്ണ അഡ്യാള ബെത്ത് ഇര്‌ക്ക്‌ന്റവാര്‌ക്ക്‌മ് റാവുപഗാല് നിമ്മ്‌ദ്യേ ഇര്‌ക്കമാട്ട.>> 12 ഏസ്സ്‌ന നമ്പി നഡാക്ക്‌ന്റവാര്‌മ് സാമി സട്ടപഡി നഡാക്ക്‌ന്റവാര്‌മ് ആന സാമിഗാറാര് പൊറിമോഡ താങ്ക്‌ന്റവാര് ആയിര്‌ക്കുഡൊ എന്റ്‌ത്തെ ഇദ് അര്‌ത്ത മാഡുവാദ്. 13 പ്‌റ നാന് മേലോഗാത്ത്‌ലിന്ത്: <<ഇദ്‌ന എ്ള്‌ദ്, ആണ്ടവാനോഡ ഒന്റായിന്ത് കൊണ്ടു ഇന്റ് മുദാല് സാന്റവാര് ബാഗ്യകേ്ട്ടവാര്>> എന്റ് സൊല്ലുവ ജദ്ദന കേ്ട്ടേന്. <<സത്ത്യമായിമ് തമ്മ മുക്കിമുക്കി പാഡ്‌പഡുവാദ്‌ന മുഡിത്ത് അവാര് എ്ളേക്കുവാര്. അവാര് ഗിലാസ ഗേന്താദ്‌ക്കുള്ള കണാക്ക് അവാര് ഒപ്പ പോന്റു>> എന്റ് സാമിനിഗാല് സൊല്ലുന്റു. ബൂമില ബെ്ള്ളാമെ അറുക്കുവാദ് 14 പ്‌റ നാന് നോഡുഗാട്ടി ബെ്ള്ളെ മഞ്ച്‌ന നാന് കണ്ടെ. അയി മഞ്ച് കുദ്ദാക്ക് <<മന്‌സാനായി പ്‌റാന്തവാന്‌ന പാസെ>> ഇര്‌ക്കുവ ഒരുത്താന് തലേല് പൊന്നു ഗിര്യാഡന ഇക്കിമ്, ഉരുക്കിര്‌ക്കുവ അരിവാള് കത്തിന കയില് പ്‌ഡിത്ത്‌മ് കുക്കാന്ത് ഇന്താന്. 15 ബേ്റൊന്റു ദൂദാന് സാമിബീ്ഡ്‌ലിന്ത് ബെ്ളിഗെ ബന്ത് മഞ്ച് കുദ്ദാക്ക് കുക്കാന്ത് ഇര്‌ക്ക്‌ന്റവാന്‌ക്ക് <<അറെ ഗളിഗെ ബന്ത്‌റ്‌ക്ക്‌ന്റ്, ബൂമില ബെ്ള്ളാമെ ബെ്ളേന്ത് അറ്‌ക്ക്യ ആയിര്‌ക്ക്‌ന്റ്. അദ്‌നാലെ നിന്ന് അരിവാള് കത്തിന എ്ഡ്‌ത്ത് അറുക്കുഡൊ>> എന്റ് ദൊഡ്ഡാദ്‌ക്ക് സൊന്നാന്. 16 അദുക്കുള മഞ്ച് കുദ്ദാക്ക് കുക്കാന്ത് ഇര്‌ക്ക്‌ന്റവാന് അരിവാള് കത്തിന ബൂമിക്ക് ബീസി ബൂമില ബെ്ള്ളാമെന അറ്‌ത്തെഡ്‌ത്താന്. 17 ബേ്റൊന്റു ദൂദാന് മേലോഗാത്ത്‌ല സാമിബീ്ഡ്‌ലിന്ത് ബെ്ളിഗെ ബന്താന്, അയാള്‌മ് ഉരുക്കിര്‌ക്കുവ അരിവാള് കത്തിന കയില് പ്‌ഡിത്തിന്താന്. 18 തീ കാര്യന നോഡുവ ബേ്റൊന്റു ദൂദാന് മദ്‌ല്‌ലിന്ത് ഇ്റാഗി ബന്ത് ഉരുക്കിര്‌ക്കുവ അരിവാള് കത്ത്യോഡ നിന്റിന്ത ദൂദാന്‌ക്ക്, <<ബൂമില മുന്തിരി പഗ്‌ത്ത്‌റ്‌ക്ക്‌ന്റ്. അദ്‌നാലെ നിന്ന് അരിവാള്‌ന എ്ഡ്‌ത്ത് മുന്തിരി കൊഡിലിന്ത് മുന്തിരി പഗ സുട്ടിഗാള്‌ന അറ്‌ത്തെ്ഡ്>> എന്റ് ദൊഡ്ഡാദ്‌ക്ക് സൊന്നാന്. 19 അദുക്കുള അയി ദൂദാന് അരിവാള് കത്തിന ബൂമിക്ക് ബീസി മുന്തിരി കൊഡിലിന്ത് മുന്തിരി സുട്ടിഗാള്‌ന അറ്‌ത്ത് സാമി മൊനേന കാട്ടുവ മുന്തിരി സാര മെ്ട്ടി പെജേന്ത് എ്ഡ്‌ക്കുവ കുയിക്ക് എ്റിന്താന്. 20 പട്ടണാക്ക് ബെ്ളിഗെ ഇര്‌ക്കുവ അയി കുയിക്ക് മുന്തിരിന ഇക്കി മെ്ട്ടി പെജേന്താന്. അയി കുയിലിന്ത് ഒളുഗുന സോരെ കുദുറെ ബായി മാട്ട് ബരുവ ഗജാത്ത്‌ല് സുമാര് മുന്നൂറു കില മീറ്റ്‌റ് ദൂര മാട്ട് ഒളുഗുറ്റു. |
New Life Computer Institute