ബെ്ളിപട്ട കാര്യ 13 - സാമി സേദിറാഡ് ബേ്ണ്ട്‌ഗാള് 1 പ്‌റ കഡാല്‌ലിന്ത് ഒന്റു ബേ്ണ്ട് ഏ്റി ബരുവാദ്‌ന നാന് കണ്ടേന്. അദ്‌ക്ക് പത്ത് കൊമ്പുഗാള്‌മ്, ഏ്ള് തലെഗാള്‌മ്, ഒന്റൊന്റു കൊമ്പുഗാള്‌ല് ഒന്റൊന്റു ഗിര്യാഡാമ്, തലെഗാള്‌ല് സാമിന മാനഗെ്ഡ്‌സുവ ഒന്റൊന്റു പേര്‌ഗാള്‌മ് ഇന്ത്‌ദ്. 2 നാന് കണ്ട അയി ബേ്ണ്ട് പുലിന പാസേമ്, അയി ബേ്ണ്ട് കാല്‌ഗാള് കറാഡി കാല്‌ന പാസേമ്, ബായി സിങ്ക ബായിന പാസേമ് ഇന്ത്‌ദ്. ദൊഡ്ഡ പാമ്പ് തന്ന് സക്‌തിനാമ്, തന്ന് കുറിഞ്ചിനാമ്, തനാക്ക് ഇര്‌ക്കുവ മ്‌ഗ്‌ന്ത അദിഗരനാമ് അയി ബേ്ണ്ട്‌ക്ക് കൊഡുത്തുദു. 3 അയി ബേ്ണ്ട് തലെഗാള്‌ല് ഒന്റുക്കു സത്ത് പോവാദ്‌ക്ക് തഗ്‌ന്ത ഒന്റു ഈ്ഡ് പട്ടിന്താദ്‌ന നാന് കണ്ടെ. അയി ഈ്ഡ് ആറിന്ത്‌ദ്. ഉലഗാത്ത്‌ലവാര് ഒട്ടുക്കു അദിസ്യപട്ട് അയി ബേ്ണ്ട് പിന്ന്‌മേലെ പോനാര്. 4 ദൊഡ്ഡ പാമ്പ് തന്ന് അദിഗരാന ബേ്ണ്ട്‌ക്ക് കൊഡുത്തിന്താദ്‌നാലെ അയി മന്‌സാര് ഒട്ടുക്കു പാമ്പ്‌ന കുമ്മുഡുനാര്. <<ഈ ബേ്ണ്ട്‌ന പാസെ ആര് ഇര്‌ക്ക്‌ന്റാര്? അയി ബേ്ണ്ടോഡ ജുദ്ദ ഗേയ ആര്‌ക്ക് മുഡിമ്?>> എന്റ് സൊല്ലി അവാര് അയി ബേ്ണ്ട്‌നാമ് കുമ്മുഡുനാര്. 5 പെരിമെനായ സൊല്ല്യാമ് സാമിന കുറ്റ സൊല്ല്യാമ് അയി ബേ്ണ്ട്‌ന ബ്‌ട്ടാന്. നാപത്തിരണ്ട് മാസ അദിഗരത്തോഡ ആള്യാമ് അദ്‌ന ബ്‌ട്ടാന്. 6 അയി ബേ്ണ്ട് കെ്ട്ട നായാത്ത്‌ല് സാമിന പറ്റി കുറ്റ സൊല്ല്യ പ്‌ഡിത്ത്‌ദ്. സാമി പേര്‌നാമ്, സാമി ഇര്‌ക്കുവ പട്ട്‌നാമ്, മേലോഗാത്ത്‌ല് ഇര്‌ന്റവാര്‌നാമ് പറ്റി അദ് കുറ്റ സൊല്ലുറ്റു. 7 സാമിഗാറാരോഡ ജുദ്ദ ഗേന്ത് അവാര്‌ന സോലുസി ഗെലിസി കഡാക്ക്യ അദ്‌ക്ക് അദിഗര കെ്ഡേത്ത്‌ദ്. എല്ലാ കുലഗാറാര്‌നാമ്, എല്ലാ ബമ്മേസഗാറാര്‌നാമ്, എല്ലാ നായഗാറാര്‌നാമ്, എല്ലാ ജാദിഗാള്‌നാമ് ആള്‌വാദ്‌ക്കുള്ള അദിഗരാമ് അദ്‌ക്ക് കെ്ഡേത്ത്‌ദ്. 8 എന്നാല്‌ക്ക്‌മ് പെ്ളേക്ക്‌ന്റവാര് പേര് എ്ള്‌ദിര്‌ക്കുവ ബൊക്കുലു ഉലഗാന ഉണ്ടാക്കുവാദ്‌ക്ക് മുദാല് താനെ പേര് എ്ള്‌ദാത്ത ബൂമില് ഇര്‌ക്കുവ ആള്‌ഗാള് ഒട്ടുക്കു അദ്‌ന കുമ്മുഡുവാര്. അറ്‌ത്ത് കൊന്റ കൊറ്യാഡ് കുട്ടിത്ത്‌ത്തെ അയി ബൊക്കു. 9 കേ്ള്‌ക്ക്യ മുഡിന്റവാര് കേ്ള്‌ക്കുഡൊ. 10 ജെയില്‌ക്ക് അഡേക്ക്യ ഉള്ളവാന്‌ന ജെയില്‌ക്ക് താനെ അഡേക്കുവാര്. ബാള്‌ല് കൊല്ല്യ ഉള്ളവാന്‌ന ബാള്‌ല് താനെ കൊല്ലുവാര്. സാമിഗാറാര് പൊറിമോഡ താങ്ക്‌ന്റവാര്‌മ് നമ്പിക്കെ ഉള്ളവാര്‌മ് ആയിര്‌ക്കുഡൊ എന്റ്‌ത്തെ ഇദ് അര്‌ത്ത മാഡുവാദ്. 11 പ്‌റ ബൂമിലിന്ത് ഏ്റി ബന്ത ബേ്റൊന്റു ബേ്ണ്ട്‌ന നാന് കണ്ടേന്. കൊറ്യാഡ് കുട്ടിക്ക് ഇര്‌ക്കുവ പാസെ റാഡ് കൊമ്പു അദ്‌ക്ക് ഇന്ത്‌ദ്. അദ് ദൊഡ്ഡ ഒന്റു പാമ്പ്‌ന പാസെ നായ നൊഡിന്ത്‌ദ്. 12 മുദാല്‌ല ബേ്ണ്ട്‌ക്ക് ഇര്‌ക്കുവ അദിഗരാന ബെത്ത് അയി ബേ്ണ്ട് മുദാല്‌ല ബേ്ണ്ട്‌ക്ക് ബേ്ണ്ടി എല്ലാദ്‌നാമ് ഗേന്ത്‌ദ്. സത്ത് പോവാദ്‌ക്ക് തഗ്‌ന്ത ഈ്ഡ് പട്ട് ആറ്‌ന അയി മുദാല്‌ല ബേ്ണ്ട്‌ന കുമ്മുഡ്യ ബൂമില് ഇര്‌ക്ക്‌ന്റവാര്‌ന ഒട്ടുക്കു ഈ ബേ്ണ്ട് നത്ത്‌റ്റ്. 13 റണ്ടാവാദ് ബേ്ണ്ട് ദൊഡ്ഡുദൊഡ്ഡ അദിസ്യമാന അഡ്യാളഗാള് ഗേന്ത്‌ദ്. മന്‌സാര് നോഡിര്‌ക്കാട്ടി താനെ ബാന്‌ലിന്ത് ബൂമിക്ക് തീനാമ് ബര്‌സ്സ്‌റ്റ്. 14 മുദാല്‌ല ബേ്ണ്ട് മുന്നുക്കു ബെത്ത് തനാന ഗേയ ബ്‌ട്ട അദിസ്യളഗാള് ഗേന്ത് കാട്ടി റണ്ടാവാദ് ബേ്ണ്ട് ബൂമില് ഇര്‌ക്കുവ ആള്‌ഗാള്‌ന ഒട്ടുക്കു ഏമാത്ത്‌റ്റ്. ബാള്‌ല് ബെ്ട്ട് കെ്ഡേസിമ് പെ്ളേക്കുവ ബേ്ണ്ട്‌ക്ക് ബേ്ണ്ടി ഒന്റു സെലെ ഉണ്ടാക്ക്യ ബൂമില ജനഗാള്‌ക്ക് സൊല്ലിമ് ഇര്‌ക്ക്‌ന്റ്. 15 അയി ബേ്ണ്ട് സെലേക്ക് ഉജുരു കൊഡുക്കുവ മൂസുന കൊഡുക്ക്യാമ് റണ്ടാവാദ് ബേ്ണ്ട്‌ക്ക് അദിഗര കെ്ഡേത്ത്‌ദ്. അത്തെ അയി സെലെന നായ നൊഡിസ്യാമ് അയി സെലെന കുമ്മുഡത്തവാര്‌ന കൊല്ല്യാമ് അയി ബേ്ണ്ട്‌ക്ക് മുഡിന്ത്‌ദ്. 16 സ്‌ന്നവാര്‌മ് ദൊഡ്ഡവാര്‌മ്, പണഗാറാര്‌മ് ഏ്ളെഗാള്‌മ്, അഡിമെഗാള്‌മ് അഡിമെ അല്ലത്തവാര്‌മ് ആന എല്ലാവാര്‌മ് ബല കയിക്കൊ നെറ്റിക്കൊ അഡ്യാള ബെക്ക്യ അയി റണ്ടാവാദ് ബേ്ണ്ട് നത്ത്‌റ്റ്. 17 ഈ അഡ്യാള ഇല്ലാദെ ആര്‌ക്ക്‌മ് എന്തൊന്റു ബാങ്ക്യാഗൊ എന്തൊന്റു മാറ്യാഗൊ മുഡ്യാമാട്ട. ബേ്ണ്ട് പേരൊ, അയി പേര്‌ന കാട്ടുവ എ്ണ്ണാഗോത്തെ അയി അഡ്യാള. 18 ഈ കാര്യാത്ത്‌ല്‌ത്തെ അറുവുമു ബുദ്ദിമ് തേവെപഡുവാദ്. ബുദ്ദ്യുള്ളവാന് അയി ബേ്ണ്ട് എ്ണ്ണാക്ക് ഇര്‌ക്കുവ അര്‌ത്ത എന്തെന്റ് കണ്ട്‌പ്‌ഡിക്കുഡൊ. എന്ത്‌ക്കെന്റ് സൊന്ന അയി എ്ണ്ണ ഒന്റു മന്‌സാന് പേര്‌ന കാട്ട്‌ന്റ്. അയി എ്ണ്ണ എന്നുവാദ് അറുനൂറ്റി അറുവത്താറ്‌ത്തെ. |
New Life Computer Institute