ബെ്ളിപട്ട കാര്യ 12 - സാമി സേദിപെ്ണ്ണ്പ്ളേമ് ദൊഡ്ഡ പാമ്പ്‌മ് 1 മേലോഗാത്ത്‌ല് ദൊഡ്ഡൊന്റു അദിസ്യമാന അഡ്യാള കാട്ട്‌റ്റ്. നേരന ഉഡുപ്പു മാഡി ഇക്കിമ് നിലാവുന കാല്‌കഡിമ് ബെത്ത്‌റ്‌ക്കുവ ഒന്റു പെ്ണ്ണ്‌പ്‌ളെ പന്നന്റ് ബെ്ള്ളിഗാള്‌ന തലേക്ക് ഗിര്യാഡായി ബെത്തിന്ത. 2 അവാള് ബേ്റായിന്താള്. അവാള്‌ക്ക് സീവാന് മിഞ്ചുവ ഉറുസ്സു ഇ്ളാഗ്‌നാദ്‌നാലെ അവാള് ബിജാക്ക് അഗാറ്‌ന്റാള്. 3 മേലോഗാത്ത്‌ല് ബേ്റൊന്റു അഡ്യാള ഗുഡി കാട്ട്‌റ്റ്. ഏ്ള് തലേമ് പത്ത് കൊമ്പുമു ഇര്‌ക്കുവ തീന പാസെ സോരെസോര്യ ഇര്‌ക്കുവ ദൊഡ്ഡ ഒന്റു പാമ്പ്. ഒന്റൊന്റു തലേല് ഒന്റൊന്റു ഗിര്യാഡാമ് ഇന്ത്‌ദ്. 4 അയി പാമ്പ് തന്ന് ബാല്‌ല് ബാന്‌ല ബെ്ള്ളിഗാള്‌ല് മൂറുലു ഒന്റു ബാഗന ഒഡുക്കി എ്ഡ്‌ത്ത് ബൂമിക്ക് എ്റിന്ത്‌ദ്. അയി പെ്ണ്ണ്‌പ്‌ളെ പ്‌ള്ളെ്ഡ്‌ക്കുവ ഗളിഗേല് താനെ പ്‌ള്ളെന നുങ്ക്യ ബേ്ണ്ടി അയി പാമ്പ് അവാള് മുന്നുക്കു നിന്റിന്ത്‌ദ്. 5 ബൂമില എല്ലാ ആള്‌ഗാള്‌നാമ് ഇര്‌മ്പ് ബഡി എ്ഡ്‌ത്ത് ആള്യ ഉള്ള ഒന്റു ഗണ്ട് മഗാന അവാള് എ്ഡ്‌ത്താള്. ആന അവാള് മഗാന സാമി പട്ട്‌ക്ക്‌മ് അയാള് കുറിഞ്ചി പട്ട്‌ക്ക്‌മ് സട്ടന എ്ഡ്‌ത്താന്. 6 അയി പെ്ണ്ണ്‌പ്‌ളെ ബെ്ട്ടെകാഡ്‌ക്ക് ഓഡി പോനാള്. ആയിരത്തി ഇരുനൂറ്റി അറുവദ് നാള് അവാള്‌ന നോഡ്യ ബേ്ണ്ടി സാമി അദ്‌ല് അവാള്‌ക്ക് ഒന്റു എ്ഡെ ഒരിക്കി ബെത്തിന്താന്. 7 പ്‌റ മേലോഗാത്ത്‌ല് ജുദ്ദ ഉണ്ടാറ്റ്. മിഗായേല്‌മ് അയാള് ദൂദനാമ്‌മ് ദൊഡ്ഡ പാമ്പോഡ ജുദ്ദ ഗേന്താര്. ദൊഡ്ഡ പാമ്പ് തന്ന് ദൂദനാമോഡൊപ്പ അവാരോഡ ജുദ്ദ ഗേന്താന്. 8 എന്റാല്‌മ് ദൊഡ്ഡ പാമ്പ്‌ക്ക് ഗെലിസി കഡാക്ക്യ മുഡ്യാലെ. പ്‌റ മേലോഗാത്ത്‌ല് അവാര്‌ക്ക് എ്ഡേമ് കെ്ഡേക്കാലെ. 9 പിജാദ് എന്റ്‌മ് സെയിത്താന് എന്റ്‌മ് സൊല്ലുവ ബൂമില് ഇര്‌ക്കുവ എല്ലാ ആള്‌ഗാള്‌ന ഏമാത്തുവ അയി ദൊഡ്ഡ പാമ്പ് പള്യ പാമ്പ്‌ത്തെ. അയാള്‌നാമ് അയാളോഡൊപ്പ അയാള് ദൂദാര്‌നാമ് അഡി ബൂമിക്ക് എ്റിന്ത് തള്ള്‌നാര്. 10 മേലോഗാത്ത്‌ലിന്ത് ദൊഡ്ഡ ഒന്റു ജദ്ദ നാന് കേ്ട്ടെ, <<ഇന്നാല് സാമി തന്ന് ജനഗാള്‌ന കാപാറ്റിര്‌ന്റാന്, സാമി തന്ന് സക്‌തിന രാജാവായി ആണ്ട് കൊണ്ടു കാട്ടിര്‌ക്ക്‌ന്റാന്, അയാള് ക്‌റ്‌സ്‌ത്ത് തന്ന് അദിഗരാന കാട്ടിര്‌ക്ക്‌ന്റാന്. എന്ത്‌ക്കെന്റ് സൊന്ന, ഏസ്സ്‌ഗാറാര് ആയിര്‌ക്കുവ നമ്മ് ആള്‌ഗാള്‌ന പറ്റി ഇ്റ്‌ട്ട്‌പഗാല് സാമി മുന്നുക്കു കുറ്റ സൊല്ലിന്തവാന്‌ന മേലോഗാത്ത്‌ലിന്ത് അഡി ഉന്തി ബീ്ക്ക്‌നാര്. 11 കൊറ്യാഡ് കുട്ടി സോരെനാലേമ് തമ്മ സൊന്ന സത്ത്യ സേദിനാലേമ് അവാര് അയി പാമ്പ്‌ന സോലുസുനാര്. തമ്മ് ഉജുരുന ദൊഡ്ഡാദ് എന്റ് നോഡാദെ സായ ഗുഡി അവാര് ഒരിങ്കിന്താര്. 12 അദ്‌നാലെ മേലോഗാത്ത്‌ല് ഇര്‌ക്ക്‌ന്റവാരെ, പിര്യപൊങ്കുന്! ആന ബൂമിക്ക്‌മ് കഡാല്‌ക്ക്‌മ് കജട്ട കജട്ടാത്തെ! എന്ത്‌ക്കെന്റ് സൊന്ന തനാക്ക് ഇര്‌ക്കുവ നേര കമ്മിത്തെ എന്റ് തെരിന്ത് സെയിത്താന്‌ക്ക് ദൊഡ്ഡ മൊനെ ബന്ത് അഡി നിമ്മ് പട്ട്‌ക്ക് ഇ്റാഗി ബന്ത്‌റ്‌ക്ക്‌ന്റാന്.>> 13 തനാന ബൂമിക്ക് ഉന്തി ബീ്ക്ക്‌നാര് എന്റ് തെരിന്ത അയി ദൊഡ്ഡ പാമ്പ് ഗണ്ട് മഗാന സീവാന്‌മിഞ്ച്‌നവാള്‌ന കൊഡിമെപഡിസ്യ പ്‌ഡിത്ത്‌ദ്. 14 അദുക്കുള അവാള് ബെ്ട്ടെകാഡ്‌ല് തനാക്ക് ഒരിക്കി ബെത്ത എ്ഡേക്ക് പറാന്ത് പോയ ബേ്ണ്ടി ദൊഡ്ഡ പാറ്‌ക്ക് ഇര്‌ക്കുവ റാഡ് ഇ്റാക്കെഗാള് അവാള്‌ക്ക് കെ്ഡേത്ത്‌ദ്. അദ്‌ല് അവാള്‌ന മൂണരെ ബര്‌സ്സ കാല അയി ദൊഡ്ഡ പാമ്പ് കണ്ണ്‌ക്ക്‌പഡാദെ പാദ്‌ഗാത്ത് ബെക്കുവാര്. 15 അവാള്‌ന നീര്‌മേലെ ഒളുക്കി ബ്‌ഡ്യ ബേ്ണ്ടി ദൊഡ്ഡ പാമ്പ് തന്ന് ബായിലിന്ത് ബാനിന പാസെ ഇര്‌ക്കുവ ദൊഡ്ഡ നീര്‌ന അവാള് പിന്ന്‌ക്ക് ഒളുക്കി ബ്‌ട്ട്‌ദ്. 16 ആന ബൂമി അവാള്‌ക്ക് തൊണെ ഇന്ത്‌ദ്. ദൊഡ്ഡ പാമ്പ് ബായിലിന്ത് ഒളിക്കി ബ്‌ട്ട ബാനിന പാസെ ഇര്‌ക്കുവ ദൊഡ്ഡ നീര്‌ന ബൂമി ബായി ത്‌റാന്ത് കുഡിത്ത്‌ദ്. 17 അദുക്കുള പാമ്പ്‌ക്ക് അവാളോഡ നല്ല മൊനെ ബന്ത്‌ദ്. സാമി സട്ടാന കേ്ട്ട് നഡാക്ക്‌ന്റവാര്‌മ് ഏസ്സ്‌ന പറ്റി സൊല്ലി നഡാക്ക്‌ന്റവാര്‌മ് ആന അവാള് കാല്‌കെ്ളേല് മിച്ച ഇര്‌ക്ക്‌ന്റവാരോഡ ജുദ്ദ ഗേയ ദൊഡ്ഡ പാമ്പ് പോറ്റു. 18 ദൊഡ്ഡ പാമ്പ് കഡാല് ഓരാത്ത്‌ല് നിന്റിന്ത്‌ദ്. |
New Life Computer Institute