ബെ്ളിപട്ട കാര്യ 11 - സാമി സേദിസാമി സൊല്ലി ബ്‌ട്ട റാഡാള് 1 പ്‌റ ബഡിന പാസെ ഇര്‌ക്കുവ ഒന്റു അളാവു കോലുന എനാക്ക് തന്തിന്ത് ഇത്തെ സൊന്നാന്. <<നീ പോയി സാമിബീ്ഡ്‌നാമ് പലി കൊഡുക്കുവ മദ്‌ല്‌നാമ് അള, അദ്‌ല് കുമ്മുഡുന്റവാര്‌നാമ് എ്ണ്ണ്‌സ്. 2 ആന സാമിബീ്ഡ്‌ക്ക് ബെ്ളിഗെ ഇര്‌ക്കുവ കളാന അളാക്കദെ. എന്ത്‌ക്കെന്റ് സൊന്ന അദ്‌ന എഗുദാരല്ലാത്ത ജാദിഗാള്‌ക്ക്‌ത്തെ കൊഡുത്ത്‌റ്‌ക്കുവാദ്. അവാര് സാമി പട്ടണന നാപത്തിരണ്ട് മാസ മെ്ട്ടുവാര്. 3 നാന് സൊല്ല്യ സൊന്ന നായഗാള്‌ന സൊല്ല്യ എനാന പറ്റി സൊല്ലുവ റാഡാള്‌ക്ക് അയി നാള് അദിഗര കൊഡുക്കുവെ. അവാര് സാക്ക്‌ല് മാഡ്‌ന ഉഡുപ്പുന ഇക്കി ആയിരത്തി ഇര്‌നൂറ്റി അറുവദ് നാള് എനാക്ക് സൊല്ല്യ ഇര്‌ക്കുവാദ്‌ന സൊല്ലുവാര്.>> 4 ബൂമിക്ക് ആണ്ടവാന് ആയിര്‌ക്ക്‌ന്റവാന് മുന്നുക്കു നിന്റ്‌റ്‌ക്കുവ റാഡ് ഒലിവു മരഗാള്‌മ് റാഡ് നിലബ്‌ളാക്ക്‌ഗാള്‌മ്‌ത്തെ അവാര്. 5 ആരാറ്റ അവാര്‌ന കൊഡിമെപഡിസ്യ നോഡുന അവാര് ബായിലിന്ത് തീ കഡാന്ത് പോട്ടിഗാറാര്‌ന സുട്ടു തള്ള്‌മ്. അവാര്‌ന കൊഡിമെപഡിസ്യ ആസെപഡ്‌ന്റവാര് ഈ ദിന്‌സ്‌ല് സാവാര്. 6 എനാക്ക് സൊല്ല്യ ഇര്‌ക്കുവാദ്‌ന അവാര് സൊല്ലുവ കാലാത്ത്‌ല് മഗെ അഡിക്കാദിര്‌ക്ക്യ ബേ്ണ്ടി ബാന്‌ന അഡേക്ക്യ അവാര്‌ക്ക് അദിഗര ഇര്‌ക്ക്‌ന്റ്. നീര്‌ന സോരെ മാഡ്യാമ്, തമ്മ ആസെപഡ്‌ഗാട്ട്യെല്ല എല്ലാ ദിന്‌സ് കജട്ടഗാള്‌ന ബരിസ്സി ബൂമിന ദെ്ണ്ടിക്ക്യാമ് അവാര്‌ക്ക് അദിഗര ഇര്‌ക്ക്‌ന്റ്. 7 തമാക്ക് സൊല്ല്യ സൊന്നാദ്‌ന അവാര് സൊല്ലി മുഡിക്കാട്ടി അഡി അറ്റ ഇല്ലാത്ത കുയിലിന്ത് ഏ്റി ബരുവ ബേ്ണ്ട് അവാരോഡ ജുദ്ദ ഗേന്ത് അവാര്‌ന സോലുസി കൊന്റു തള്ള്‌മ്. 8 തമ്മ് ആണ്ടവാന്‌ന കുരുസുക്കു സേത്തി ആണി അഡിത്ത് കൊന്റ മ്‌ഗ്‌ന്ത പട്ടണ ബീദില് അവാര് സാവുഗാള് ഇര്‌ക്ക്‌മ്. ഈ പട്ടണ സോദോമു പട്ടണനാമ് മിസ്‌റേമ് നാഡ്‌നാമ്‌ത്തെ കാട്ടി തരുവാദ് എന്റ് ആള്‌ഗാള് സൊന്റാര്. 9 എല്ലാ ബമ്മേസാത്ത്‌ലവാര്‌മ്, എല്ലാ കുലാത്ത്‌ല്‌വാര്‌മ്, എല്ലാ നായഗാറാര്‌ലവാര്‌മ്, എല്ലാ ജാദിഗാള്‌ലവാര്‌മ് അവാര് സാവുന മൂണരെ നാള് നോഡിര്‌ക്കുവാര്. അയി സാവുഗാള്‌ന പാത്ത്യ ആര്‌നാമ് ബ്‌ഡമാട്ടാര്. 10 ബൂമില് ഇര്‌ക്കുവ ആള്‌ഗാള് അവാര് സത്താദ്‌ക്ക് പിര്യപൊങ്കി ആങ്കീങ്ക് സമ്മാനഗാള്‌മ് കൊഡുക്കുവാര്. എന്ത്‌ക്കെന്റ് സൊന്ന ഈ റാഡാള് ബൂമില് പെ്ളേത്തിന്തവാര്‌ന കൊഡിമെ പഡിസിന്താര്. 11 മൂണരെ നാള് കളിന്ത പ്‌റ ഉജുരു കൊഡുക്കുവ മൂസു സാമിലിന്ത് അവാര്‌ക്ക് ബന്ത്‌ദ്. അദുക്കുള അവാര് ഇ്ളാഗി നിന്റാര്. അവാര്‌ന കണ്ടവാര് അഞ്ചിക്കെപട്ടാര്. 12 അദുക്കുള മേലോഗാത്ത്‌ലിന്ത് ദൊഡ്ഡ ഒന്റു ജദ്ദ <<ഈങ്ക് ഏ്റി ബാന്>> എന്റ് സൊല്ലുവാദ്‌ന അവാര് കേ്ട്ടാര്. അവാര് പോട്ടിഗാറാര് നോഡിര്‌ക്കാട്ടി താനെ മഞ്ച്‌ല് അവാര് മേലോഗാക്ക് ഏ്റി പോനാര്. 13 അയി ഗളിഗേല് താനെ ദൊഡ്ഡൊദ്‌ക്ക് ബൂമി കുലുങ്കുറ്റു. പട്ടണാത്ത്‌ല് പത്ത്‌ല് ഒന്റു ബാഗ ഇ്ഡിന്ത് ബ്‌ന്ത്‌ദ്, ഏ്ളായിര ആള്‌ഗാള് സത്ത് തള്ള്‌നാര്. മിച്ച ഇന്തവാര് അഞ്ചിക്കെപട്ട് മേലോഗ സാമിക്ക് മദ്‌പ്പ് കൊഡുത്താര്. 14 റണ്ടാവാദ് കജട്ട തീന്ത്‌ദ്. ഇദാഗെ, മൂറാവാദ് കജട്ട ബര്യ പക്കായിര്‌ക്ക്‌ന്റ്. ഏ്ളാവാദ് ദൂദാന് കൊമ്പൂദുന്റാന് 15 ഏ്ളാവദ് ദൂദാന് കൊമ്പൂദുഗാട്ടി മേലോഗത്ത്‌ലിന്ത് ദൊഡ്ഡ ജദ്ദഗാള് ഉണ്ടാറ്റ്. <<നമ്മ് ആണ്ടവാന്‌ക്ക്‌മ് അയാള് ക്‌റ്‌സ്‌ത്ത്‌ക്ക്‌മ് ഉലഗ രാജ്യന ഒട്ടുക്കു ആള്‌വാദ്‌ക്കുള്ള അദിഗര ഇര്‌ക്ക്‌ന്റ്. അയാള് എന്നാല്‌ക്ക്‌മ് ആളുവാന്.>> 16 അദുക്കുള സാമി മുന്നുക്കു ഇര്‌ക്കുവ കുറിഞ്ചിഗാള്‌ല് കുക്കാന്ത് ഇര്‌ക്കുവ ഇരുവത്തിനാല് മൂപ്പനാമ്‌ഗാള്‌മ് സഡങ്ക ബ്‌ന്ത് സാമിന കുമ്മുഡുനാര്. 17 എല്ലാ ബിലാമ് ഇര്‌ക്കുവ ആണ്ടവാനാന സാമ്യെ, ഇന്നാല് ഇര്‌ക്ക്‌ന്റവാന്‌മ് ഇന്തിന്തവാന്‌മ് ആനവാനെ, നിനാക്ക് ഇര്‌ക്കുവ മ്‌ഗ്‌ന്ത സക്‌തിന ബെത്ത് കൊണ്ടു ആള്യ പ്‌ഡിത്താദ്‌നാലെ എമ്മ നിനാക്ക് ഒഗെ ഇക്ക്‌ന്റേമ്. 18 ബൂമില് ഇര്‌ക്കുവ എല്ലാ ജാദിഗാള്‌മ് മൊനേക്ക്‌പട്ടാര്. ആന നീ മൊനേക്ക്‌പഡുവ ഗളിഗേമ് ബന്തെജ്ജ്‌റ്റ്. സത്തവാര്‌ന ബിദിക്കുവാദ്‌ക്കുള്ള ഗളിഗേമ്, നിന്ന് ഗിലാസഗാറാരാന സാമിദാസ്‌ഗാള്‌ക്ക്‌മ്, സാമിഗാറാര്‌ക്ക്‌മ്, നിനാക്ക് അഞ്ചി നഡാക്കുവ ദൊഡ്ഡവാര്‌മ് സ്‌ന്നവാര്‌മ് ആന എല്ലാവാര്‌ക്ക്‌മ് കൂലി കൊഡുക്കുവാദ്‌ക്കുള്ള ഗളിഗേമ് ബൂമിന കെ്ഡ്‌സ്‌ന്റവാര്‌ന അളിക്കുവാദ്‌ക്കുള്ള ഗളിഗേമ് ബന്ത്‌റ്‌ക്ക്‌ന്റ്. 19 പ്‌റ മേലോഗാത്ത്‌ല സാമിബീ്ഡ് ത്‌റാന്ത്‌ദ്. സാമി ബെത്ത ഒപ്പന്തന കാട്ടുവ പെ്ട്ടി അദ്‌ല് കാട്ട്‌റ്റ്. അദുക്കുള മിച്ചുവ ബെ്ള്‌സഗാള്‌മ്, ഓസെഗാള്‌മ്, ഇ്ഡി ബെ്ട്ടുവ ജദ്ദഗാള്‌മ്, കല്ല് മഗേമ് ബന്ത്‌ദ്, ബൂമിമ് കുലുങ്കുറ്റു. |
New Life Computer Institute