ബെ്ളിപട്ട കാര്യ 1 - സാമി സേദിഈ ബൊക്കുന പറ്റി ഓഗന്നാന് സൊല്ലുവാദ് 1 സട്ടന നഡാക്ക്യ പോവ കാര്യഗാള്‌ന തന്ന് ഗിലാസഗാറാര്‌ക്ക് ബെ്ളിപഡിസ്യ ബേ്ണ്ടി സാമി ഏസ്സ് ക്‌റ്‌സ്‌ത്ത്‌ക്ക് ബെ്ളിപഡിസി കൊഡുത്ത കാര്യഗാള്. അദ് അയാള് തന്ന് ദൂദാന്‌ന സൊല്ലി ബ്‌ട്ട് തന്ന് ഗിലാസഗാറാന് ഓഗന്നാന്‌ക്ക് ബെ്ളിപഡ്‌സ്‌നാന്. 2 താന് കണ്ടാദെനല്ല ഓഗന്നാന് സൊന്നാന്. അദെല്ല സാമി സൊല്ലുസുലാക്കാമ് ഏസ്സ് ക്‌റ്‌സ്‌ത്ത് ബെ്ളിപഡിസി കൊഡുത്ത സത്ത്യാമ്‌ത്തെ ആയിന്ത്‌ദ്. 3 സാമിലിന്ത് നേരെ കേ്ട്ട് സൊല്ലുവ ഈ നായഗാള്‌ന പഡിക്ക്‌ന്റവാന്‌മ് അദ്‌ന കേ്ള്‌ക്ക്‌ന്റവാന്‌മ് അദ്‌ല് എ്ള്‌ദിര്‌ക്കുവ പാസെ നഡാക്ക്‌ന്റവാന്‌മ് ബാഗ്യകേ്ട്ടവാന്. എന്ത്‌ക്കെന്റ് സൊന്ന ഇദ് നഡാക്ക്യുള്ള സമ്യ അഡ്‌ത്ത്‌റ്‌ക്ക്‌ന്റ്. ഏസ്സ്‌ഗാറാര് ഏ്ള് കൂട്ടഗാള്‌ന ഓഗന്നാന് ബിനാത്ത്‌ന്റാന് 4-5 ആസ്യ നാഡ്‌ല ഏസ്സ്‌ഗാറാര് ഏ്ള് കൂട്ടാക്ക് ഓഗന്നാന് എ്ള്‌ദുവ എ്ള്‌ത്ത്. ഇന്നാല് ഇര്‌ക്ക്‌ന്റവാന്‌മ് ഇന്തിന്തവാന്‌മ് ഇന്നി ബര്യ ഇര്‌ക്ക്‌ന്റവാന്‌മ് ആന സാമിമ്, അയാള് കുറിഞ്ചി മുന്നുക്കു നില്ലുവ ഏ്ള് നിഗാല്‌ഗാള്‌മ്, താന് സൊല്ലുവാദ് സത്ത്യത്തെ എന്റ് നമ്പ്യ മുഡിന്റവാന്‌മ്, സത്തവാര് പട്ട്‌ലിന്ത് മുദാല് ഉജുര്‌ളാഗ്‌നവാന്‌മ് ഉലഗാത്ത്‌ല രാജാവുഗാള്‌ന ആള്‌ന്റവാന്‌മ് ആന ഏസ്സ് ക്‌റ്‌സ്‌ത്ത്‌മ് നിമാക്ക് പ്‌ണ്ണ്യാമ് ഗേഡൊ, നിമാന നിമ്മ്‌ദ്യായിമ് ബെക്കുഡൊ. അയാള് നമാന സീവാന്‌പട്ട്‌മ് താന് സൂസുന സോരെനാലെ നമ്മ് പാവഗാള്‌ന തീത്ത് ബ്‌ഡിസിമ് ഇര്‌ക്ക്‌ന്റാന്. 6 അയാള് നമാന സാമി ആളുവ ആള്‌ഗാള് മാഡിമ് തന്ന് അപ്പാനാന സാമിക്ക് നമാന പൂസാരിഗാള് മാഡിമ് ബെത്ത്‌റ്‌ന്റാന്. അയി ഏസ്സ് ക്‌റ്‌സ്‌ത്ത്‌ക്ക് പേര്‌പെരിമേമ് എല്ലാദ്‌നാമ് ആളുവ അദിഗരാമ് എന്നാല്‌ക്ക്‌മ് ഇര്‌ക്കുഡൊ. ആമേന്. 7 ഇദാ നോഡുനു, അയാള് മഞ്ച്‌ല് ബന്റാന്, എല്ലാവാര്‌മ് അയാള്‌ന കാണുവാര്, അയാള്‌ന കുത്തുനവാര് ഗുഡി അയാള്‌ന കാണുവാര്, ബൂമിലിര്‌ക്കുവ എല്ലാ ആള്‌ഗാള്‌മ് അയാള്‌ന സൊല്ലി ദൊഡ്ഡാദ്‌ക്ക് അഗാറുവാര്. അദ് അത്തെ താനെ നഡാക്കുഡൊ. ആമേന്. 8 <<നാന് ആദിലവാന്‌മ് കഡേസിലവാന്‌മ്‌ത്തെ>> എന്റ് ഇന്നാല് ഇര്‌ക്ക്‌ന്റവാന്‌മ് ഇന്തിന്തവാന്‌മ് ഇന്നി ബര്യ ഇര്‌ക്ക്‌ന്റവാന്‌മ് ആന എല്ലാ ബിലാമ് ഇര്‌ക്കുവ ആണ്ടവാനാന സാമി സൊന്നാന്. തോറ്റാത്ത്‌ല് ക്‌റ്‌സ്‌ത്ത്‌ന പറ്റി കണ്ടാദ് 9 നാന് ഏസ്സ്‌ഗാറാന് ആയിര്‌ക്കുവ നിമ്മ് ഓഗന്നാന്‌ത്തെ. ഏസ്സ് പിന്ന്‌മേലെ പോന്റവാനായി നാന് നിമ്മൊപ്പ കജട്ട പട്ട്‌മ് നിമ്മൊപ്പ സാമി ആളുവ കാലാക്ക് പട്ടവാനായിമ് നിമ്മൊപ്പ പൊറിമോഡ താങ്കിമ് ഇര്‌ക്ക്‌ന്റേന്. സാമി സൊല്ലുസുലാക്കാന സൊന്നാദ്‌നാലേമ് ഏസ്സ്‌ന പറ്റി സൊന്നാദ്‌നാലേമ് സുറ്റുമു നീര് ഇര്‌ക്കുവ പത്ത്‌മോസു എന്നുവ എ്ഡേല് നാന് ഇന്തിന്തേന്. 10 ആണ്ടവാന്‌ന കുമ്മുഡുവ നാള് സാമിനിഗാല് നഡാത്തുവാദ്‌ക്ക് നാന് ഒന്റേപെ്ട്ട് കെ്ട്ട്‌പട്ട് ഇന്തേന്. അദുക്കുള എന്ന് പിന്ന് സാരി കൊമ്പൂദുവ ജദ്ദന പാസെ ദൊഡ്ഡൊന്റു ജദ്ദന നാന് കേ്ട്ടേന്. 11 അദ്‌ല്: <<നീ കാണുവാദ്‌ന ഒന്റു ബൊക്കുക്കു എ്ള്‌ദ്. എപസോസു, സിമ്‌റ്‌ന്ന, പെ്റ്‌ഗമോസു, തയിതിര്യ, സറ്‌ദീസ്, പിലദല്‌പ്യ, ലവുദിക്ക്യ എന്നുവ പട്ടണഗാള്‌ല് ഇര്‌ക്കുവ ഏസ്സ്‌ഗാറാര്‌ത്ത് ഏ്ള് കൂട്ടഗാള്‌ക്ക് അദ്‌ന സൊല്ലു>> എന്റ് സൊല്ലുവാദ്‌ന നാന് കേ്ട്ടേന്. 12 എന്നോഡ നായനൊഡിവാദ് ആരെന്റ് കാണ്യ നാന് തിരിഗി നോഡുനേന്. അദുക്കുള പൊന്നുലു ഉണ്ടാക്ക്‌ന ഏ്ള് നിലബ്‌ളാക്ക്‌ഗാള്‌ന നാന് കണ്ടേന്. 13 അയി നിലബ്‌ളാക്ക്‌ഗാള്‌ക്ക് നഡ്‌ക്കെ <<മന്‌സാനായി പ്‌റാന്തവാന്‌ന പാസെ>> ഒന്റാള്, ഉജാരാക്ക് ജൊഗെ ഇക്കിമ് മാര്‌ക്ക് തങ്ക കച്ചെനാമ് കെ്ട്ടി നിന്റ്‌റ്‌ക്കുവാദ്‌ന നാന് കണ്ടേന്. 14 അയാള് തലേമ് തലെമൂരുമു ബെള്ളെബെള്ള്യ ഇര്‌ക്കുവ പഞ്ചിന പാസേമ് ബെ്ള്ളെബെ്ള്ള്യ ഇര്‌ക്കുവ മഞ്ച്‌ന പാസേമ് ബൂവെന്റിന്ത്‌ദ്. അയാള് കണ്ണ്‌ഗാള് കത്തി എരേവ തീന പാസേമ് ആയിന്ത്‌ദ്. 15 അയാള് കാല്‌ഗാള് സൂളേല് സുട്ടു പഗ്‌സ്‌ന ബെ്ങ്കലാന പാസേമ് അയാള് ജദ്ദ ആലാത്ത് ബരുവ ദൊഡ്ഡ നീര്‌ന പാസേമ് ആയിന്ത്‌ദ്. 16 അയാള് ബല കയില് ഏ്ള് ബെ്ള്ളിഗാള് ഇന്ത്‌ദ്. അയാള് ബായിലിന്ത് റാഡ് സാരിമ് നല്ല ഉരുക്കിര്‌ക്കുവ ബാള് ബെ്ളിഗെ കഡാന്ത്‌ദ്. അയാള് മൂഞ്ചി നല്ല ബെ്ള്‌സഡിക്കുവ നേരന പാസെ ആയിന്ത്‌ദ്. 17 നാന് അയാള്‌ന കണ്ടാദ്‌മ് ഉജുരുപോന പാസെ ആയി അയാള് കാല്‌ക്ക് ബ്‌ന്തെ. അദുക്കുള അയാള് ബല കയിന എന്ന് കുദ്ദാക്ക് ബെത്ത് ഇത്തെ സൊന്നാന്: <<അഞ്ചബേ്ഡ, നാന്‌ത്തെ ആദിലവാന്‌മ് കഡേസിലവാന്‌മ്. 18 നാന് ഉജുരോഡ ഇന്തവാന്‌ത്തെ. നാന് സത്തേന്, ആന ഇന്നാല് നാന് കാലകാല ഉജുരോഡ പെ്ളേത്ത്‌റ്‌ന്റേന്. സാവുന ആള്യാമ് നരഗ ലോഗന ആള്യാമ് എനാക്ക് അദിഗര ഇര്‌ക്ക്‌ന്റ്. 19 അദ്‌നാലെ നീ കണ്ടാദ്‌നാമ് ഇന്നാല് ഇര്‌ക്കുവാദ്‌നാമ് നഡാക്ക്യ പോവാദ്‌നാമ് പറ്റി നീ എ്ള്‌ദുഡൊ. 20 എന്ന് ബല കയില് നീ കണ്ട ഏ്ള് ബെ്ള്ളിഗാള്‌ത്ത്‌മ് ഏ്ള് പൊന്നു നിലബ്‌ളാക്ക്‌ഗാള്‌ത്ത്‌മ് ബെ്ളിപഡാത്ത പൊറുളു എന്നുവാദ് ഇദ്‌ത്തെ. ഏ്ള് ബെ്ള്ളിഗാള് എന്നുവാദ് ഏസ്സ്‌ഗാറാര്‌ത്ത് ഏ്ള് കൂട്ടാത്ത്‌ല ദൂദാര്‌ത്തെ. ഏ്ള് പൊന്നു നിലബ്‌ളാക്ക്‌ഗാള് എന്നുവാദ് ഏസ്സ്‌ഗാറാര്‌ത്ത് ഏ്ള് കൂട്ടഗാള്‌ത്തെ.>> |
New Life Computer Institute