മര്‌ക്കോസു 16 - സാമി സേദിഏസ്സ് ഉജുര്‌ളാഗ്‌ന്റാന് 1 ഒയിവു നാള് തീന്ത പ്‌റ മദ്ദള പട്ടണഗാറിസി മറിയാമ്, ആക്കോവു അവ്വേസി മറിയാമ്, സലോമിമ് ഏസ്സ് സാവുക്കു പൂസ്യ ബാഡെ അഡിക്കുവ ജാദിഗാള് ബാങ്ക്‌നാര്. 2 അവാര് നാത്തിക്‌ളാമെ റാവെ താനെ നേര കഡാക്കാട്ട്യെല്ല കല്ലളേക്ക് പോനാര്. 3 <<കല്ലളെ ബായിക്ക് അഡേത്ത് ബെത്ത്‌റ്‌ക്കുവ കല്ല്‌ന നമാക്ക് ആര് ഉറുട്ടി ജറേത്ത് തരുവാര്?>> എന്റ് അവാര് തമാക്ക് തമാക്ക് സൊന്നാര്. 4 ആന അവാര് സൊക്കാന നോഡുഗാട്ടി കല്ല്‌ന ഉറുട്ടി ജറേത്തിര്‌ക്കുവാദ്‌ന കണ്ടാര്. അയി കല്ല് എത്ത്‌റാഗോ ദൊഡ്ഡ കല്ല് ആയിന്ത്‌ദ്. 5 അവാര് കല്ലളെ കുളാക്ക് നൊഗേഗാട്ടി ബെ്ള്ളെ ഉഡുപ്പു ഇക്കിര്‌ക്കുവ ഒന്റു ബാലിവെഗാറാന് ബല സാരി ഇര്‌ക്കുവാദ്‌ന കണ്ട് അവാര് അഞ്ച്‌നാര്. 6 <<അഞ്ചദേന്, കുരുസുക്കു സേത്തി ആണി അഡിത്ത് കൊന്റ നസറേത്ത്‌ഗാറാന് ഏസ്സ്‌നാത്തെ നിമ്മ പരാക്ക്‌ന്റ്‌റ് എന്റ് എനാക്ക് തെരിന്റ്. അയാള് ഇദ്‌ലില്ലെ, അയാള് ഉജുര്‌ളാഗ്‌നാന്. നിമ്മ ബന്ത് അയാള്‌ന ബെത്ത എ്ഡേന നോഡുനു. 7 ആന നിമ്മ പോയി അയാള് സൊല്ലുപഡി നഡാക്ക്‌ന്റവാര്‌ക്ക്‌മ് മുക്ക്യമായി പത്ത്‌റോസുക്കുമു <ഏസ്സ് നിമാക്ക് സൊല്ലിന്ത പാസെ അയാള് നിമാക്ക് മുദാല് ഗലീലാക്ക് പോന്റാന്. അദ്‌ല് ബെത്ത് നിമ്മ അയാള്‌ന കാണുവുറു> എന്റ് സൊല്ലുനു>> എന്റ് അയാള് സൊന്നാന്. 8 അയി പെ്ണ്ണ്‌മക്കാള് കയികാല് ബരാദെ സദ്‌റബെ്ട്ടികൊണ്ടു കല്ലളേലിന്ത് ഇ്റാഗി ഓഡുനാര്. അവാര്‌ക്ക് അഞ്ചിക്കെ പ്‌ഡിത്താദ്‌നാലെ ആരോഡാമ് ഒന്റുമു മ്‌ണ്ടാലെ. മദ്ദള പട്ടണഗാറിസി മറിയാക്ക് ഏസ്സ് ബെ്ളിപഡ്‌ന്റാന് 9 [ഏസ്സ് നാത്തിക്‌ളാമെ നാള് റാവെ താനെ ഉജുര്‌ളാഗ്‌ന പ്‌റ മുദാല് മദ്ദള പട്ടണഗാറിസി മറിയ കണ്ണ്‌ക്ക് കാട്ട്‌നാന്. ഇവാള്‌ല് ഇന്ത്‌ത്തെ തട്ടിന്ത ഏ്ള് കെ്ട്ടജാദിന ഏസ്സ് ഇ്റാക്കി ബ്‌ട്ടിന്താദ്. 10 ഏസ്സ് ഉജുര്‌ളാഗ്‌ന സേദിന മറിയ പോയി അയാളോഡൊപ്പ ഇന്തവാര്‌ക്ക് സൊന്നാള്. അദുക്കുള അവാര് അര്‌ക്കപട്ട് കേ്യിന്ത്‌ബ്‌ന്ത്‌കൊണ്ടു ഇന്താര്. 11 ഏസ്സ് ഉജുരോഡ ഇര്‌ക്ക്‌ന്റാന് എന്റ്‌മ് മറിയ അയാള്‌ന കണ്ടാള് എന്റ്‌മ് അവാള് സൊന്നാദ്‌ന കേ്ട്ട് അവാര് അദ്‌ന നമ്പാലെ. ഏസ്സ് റാഡ് സൊല്ലുപഡി നഡാക്ക്‌ന്റവാരോഡ നായനൊഡിന്റാന് 12 അദ്‌ക്ക് പ്‌റ റാഡ് സൊല്ലുപഡി നഡാക്ക്‌ന്റവാര് ഊരുക്കു പോയി കൊണ്ട്‌റ്‌ക്കാട്ടി ഏസ്സ് അവാര് കണ്ണ്‌ക്ക് കാട്ട്‌നാന്. ആന മുദാല്‌ല പാസെ കാട്ടാലെ. 13 അയി സൊല്ലുപഡി നഡാക്ക്‌ന്റവാര് തിരിഗി പോയി ബാക്കി സൊല്ലുപഡി നഡാക്ക്‌ന്റവാര്‌ക്ക് ഈ സേദിന സൊന്നാര്. ആന അവാര് അദ്‌നാമ് നമ്പാലെ. ഏസ്സ് സൊല്ലുപഡി നഡാക്കുവ പദ്‌നൊണ്ണു ആള്‌ഗാള്‌ക്ക് ബെ്ളിപഡ്‌ന്റാന് 14 കഡേഗല പദ്‌നൊണ്ണു സൊല്ലുപഡി നഡാക്ക്‌ന്റവാര്‌മ് തീനി തിന്റ്‌കൊണ്ടു ഇര്‌ക്കാട്ടി ഏസ്സ് അവാര് കണ്ണ്‌ക്ക് കാട്ട്‌നാന്. താന് ഉജുര്‌ളാഗ്‌ന പ്‌റ തനാന കണ്ണാറ കണ്ടവാര് സൊന്നാദ്‌ന അവാര് നമ്പാത്താദ്‌ക്ക്‌മ് അവാര്‌ക്ക് ഇര്‌ക്കുവ മരനെഞ്ച്‌ന കണ്ട്‌മ് ഏസ്സ് അവാര്‌ന നൊഡിന്താന്. 15 അദ്‌ക്ക് പ്‌റ അയാള് അവാര്‌ക്ക് ഇത്തെ സൊന്നാന്. <<നിമ്മ ഉലഗാക്ക് ഒട്ടുക്കു പോയി ആള്‌ഗാള്‌ക്ക് പൂര ഈ നല്ല സേദിന സൊല്ലുഡൊ. 16 അയി സേദിന നമ്പി നീര്‌ക്ക് മുളിഗി ഇ്ളാഗ്‌ന്റവാര് ദെ്ണ്ടണേല് ഇന്ത് തപ്പിസി കഡാക്കുവാര്. നമ്പാത്തവാര്‌ക്ക് ദെ്ണ്ടണെ കെ്ഡേക്കുവു. 17 നമ്പ്‌ന്റവാര്‌ക്ക് അദിസ്യഗാള് ഗേവാദ്‌ക്കുള്ള അദിഗര കെ്ഡേക്കുവു. അവാര് എന്ന് പേര്‌ന സൊല്ലി തട്ടിരിക്കുവ കെ്ട്ടജാദിഗാള്‌ന ഇ്റാക്കി ബ്‌ഡുവാര്. ബേ്റെബേ്റെ നായഗാള് നൊഡിവാര്. 18 അവാര് പാമ്പ്‌ഗാള്‌ന കയില് പ്‌ഡിത്ത് എ്ഡ്‌ത്താല്‌മ് മര്‌ന്ത്‌ഗാള്‌ന കുഡിത്താല്‌മ് അവാര്‌ക്ക് ഒന്റുമു തട്ടമാട്ട. അവാര് നോയിഗാറാര്‌ക്ക് കയി ബെത്തദാന നോയി തെ്ളിവാര്.>> ഏസ്സ് മേലോഗാക്ക് പോന്റാന് 19 ഇത്തെ സൊന്ന പ്‌റ ആണ്ടവാന് ഏസ്സ്‌ന സാമി മേലോഗാക്ക് എ്ഡ്‌ത്താന്. സാമ്യോഡൊപ്പ ആള്യ സാമി ബല സാരി ഏസ്സ് കുക്കാന്താന്. 20 സൊല്ലുപഡി നഡാക്ക്‌ന്റവാര് എല്ലാ എ്ഡെഗാള്‌ക്ക്‌മ് പോയി നല്ല സേദിന സൊന്നാര്. ആണ്ടവാന് അവാര്‌ക്ക് തൊണെ ഇന്താന്. അദ്‌നാലെ അവാര് സൊന്ന നല്ല സേദി സത്ത്യ എന്റ് കാട്ടി കൊഡുക്ക്യ ബേ്ണ്ടി അദിസ്യഗാള് ഗേന്ത് പോന്റാര്.] |
New Life Computer Institute