ലൂക്കോസു 21 - സാമി സേദിമ്ണ്ടേസി കാണിക്കെ 1 ഏസ്സ് സുറ്റുമു നോഡുഗാട്ടി സാമിബീ്ഡ്‌ല ഉണ്ടിഗേക്ക് പണഗാറാര് കാണിക്കെ ഇക്കുവാദ്‌ന കണ്ടാന്. 2 പ്‌റ ഒന്റു ഏ്ളെ മ്‌ണ്ടേസി റാഡ് ഒട്ടിപണ ഇക്കുവാദ്‌നാമ് കണ്ടാന്. 3 <<ഈ ഏ്ളെ മ്‌ണ്ടേസി എല്ലാര്‌ന ബ്‌ഡ മൊത്തന പണ ഇക്കിര്‌ന്റാള് എന്റ് നാന് സത്ത്യമായി നിമാക്ക് സൊന്റെ. 4 ആള്‌ഗാളൊട്ടുക്കു തമ്മ് സൊത്തുലിന്ത്‌ത്തെ കാണിക്കെ ഇക്ക്‌നാര്. ആന ഈ ഏ്ളെ മ്‌ണ്ടേസി ഒന്റുമില്ലത്തവാളായിന്ത് ഗുഡി തനാക്ക് ഇര്‌ക്കുവാദ്‌ന ഒട്ടുക്കു ഇക്കിര്‌ന്റാള്. തനാക്ക് പെ്ളേക്ക്യ ഇര്‌ക്കുവാദ്‌ന പൂരാമ് ഇക്കിര്‌ന്റാള്>> എന്റ് സൊന്നാന്. സാമിബീ്ഡ് ഇ്ഡിന്ത് തള്ളുവാദ്‌ന പറ്റി മുദാല് താനെ സൊന്റാന് 5 അയാള് സൊല്ലുപഡി നഡാക്ക്‌ന്റവാര്‌ല് ലേസ ആള്‌ഗാള് ഈ സാമിബീ്ഡ് അളഗളാഗ മാഡിര്‌ക്കുവ കല്ല്‌ഗാള്‌ന ബെത്ത്‌മ് കാണിക്കെ കെ്ഡേത്താദ്‌ന ബെത്ത്‌മ് എത്ത്‌റ അളഗളാഗ കെ്ട്ടിര്‌ക്ക്‌ന്റാര് എന്റ് സൊന്നാര്. 6 അദുക്കുള ഏസ്സ്: <<നിമ്മ കാണുവ ഈ കെ്ട്ടിര്‌ക്കുവ കല്ല്‌ഗാള് കല്ല് കുദ്ദാക്ക് ഒന്റു കല്ല് ബീസാക്ക് നില്ലാദെ ഇ്ഡിന്ത് തള്ളുവ കാല ബര്‌മ്>> എന്റ് സൊന്നാന്. കജട്ടഗാള്‌മ് കൊഡിമെഗാള്‌മ് 7 അദുക്കുള അവാര് ഏസ്സ്‌ന: <<ഗുരുവെ, ഈ കാര്യഗാളെല്ല എന്നാല്‌ക്ക് നഡാക്ക്‌മ്? ഈ കാര്യഗാളെല്ല നഡാക്കുവാദ്‌ക്കുള്ള അഡ്യാളഗാള് എന്തെല്ല>> എന്റ് കേ്ട്ടാര്. 8 അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<ആര്‌മ് നിമാന ഏമാത്താദിര്‌ക്ക്യ സൂസാരിത്തിര്‌ന്. എഞ്ചോ ആള്‌ഗാള് <നാന്‌ത്തെ ക്‌റ്‌സ്‌ത്ത്> എന്റ്‌മ് <സമ്യ ബന്ത്‌ദ്> എന്റ്‌മ് സൊല്ലികൊണ്ടു എന്ന് പേരെ്ഡ്‌ത്ത് ബരുവാര്. അവാര് സൊല്ലുവാദ്‌ന കേ്ട്ട് അവാര് പിന്ന്‌മേലെ പോഗാദേന്. 9 നിമ്മ ജുദ്ദഗാള്‌നാമ് കലമ്പാല്‌ഗാള്‌നാമ് പറ്റി കേ്ള്‌ക്കുവുറു. അദുക്കുള നിമ്മ അഞ്ചദേന്. അദ് മുദാലെ നഡാക്കുഡൊ. ആന അദ് മുഡിവല്ല.>> 10 ഏസ്സ് പിന്നേമ് ഇത്തെ സൊല്ലി കൊണ്ടിന്താന്: <<ഒന്റൊന്റു ജാദിഗാള് ആങ്കീങ്ക് ജുദ്ദ ഗേവാര്. ഒന്റൊന്റു നാഡ്‌ഗാള് ആങ്കീങ്ക് ജുദ്ദ ഗേവാര്. 11 ഒന്റൊന്റു എ്ഡേക്ക്‌റാഗ ബൂമികുലുക്കാമ്, പഞ്ചാമ്, ദൊഡ്ഡുദൊഡ്ഡ നോയിനൊറിഗാള്‌മ് ഉണ്ടാമ്. ബാന്‌ല് അഞ്ചിക്കെപ്‌ഡ്‌സുവാദ്‌മ് അദിസ്യ പഡുസുവാദ്‌മാന ദൊഡ്ഡുദൊഡ്ഡ അഡ്യാളഗാള്‌മ് കാട്ട്‌മ്. 12 ഇദ്‌ഗാളെല്ല നഡാക്കുവാദ്‌ക്ക് മുദാല് എനാന നമ്പുവാദ്‌നാലെ അവാര് നിമാന പ്‌ഡിത്ത് കൊഡിമെപഡിസിമ്, എഗുദാര് പരേസുവ ബീ്ഡ് അദിഗാരിഗാള് കയിക്ക് കൊഡുത്തു ജെയില്‌ക്ക്‌മ് അഡേക്കുവാര്. അദല്ലാദെ നിമാന രാജാവുഗാള് കയിക്ക്‌മ് നാഡ് തലെവാര്‌ഗാള് കയിക്ക്‌മ് കൊഡുക്കുവാര്. 13 അദുക്കുള നിമ്മ അദ്‌ല് എനാന പറ്റി സൊല്ലുവുറു. 14 ആന നിമ്മ എത്തെ ബദ്‌ല് സൊല്ലുഡൊ എന്നുവാദ്‌ന പറ്റി മുദാല് താനെ നെനേത്ത് കൊണ്ടു അര്‌ക്കപഡാദിര്‌ക്കുഡൊ. 15 എന്ത്‌ക്കെന്റ് സൊന്ന നിമ്മ് പോട്ടിഗാറാര് ആര്‌ക്ക്‌മ് മുട്ട്യാമ് തിരിക്കി സൊല്ല്യാമ് മുഡ്യാത്ത ദിന്‌സ്‌ല് സൊല്ല്യ മുഡിവ നായഗാള്‌മ് ബുദ്ദിമ് നാന് നിമാക്ക് തരുവെ. 16 നിമ്മ് അവ്വ്യപ്പനാമ്‌മ്, അണ്ണാര്‌തമ്പ്യാര്‌മ്, കുഡുമഗാറാര്‌മ്, എ്ണേവുഗാറാര്‌മ് നിമാന അദിഗാരിഗാള് കയിക്ക് പ്‌ഡിത്ത് കൊഡുക്കുവാര്. നിമ്മ് കൂട്ടാത്ത്‌ല ലേസ ആള്‌ഗാള്‌ന അവാര് കൊല്ലുവാര്. 17 നിമ്മ എനാന പറ്റി സൊല്ലുവാദ്‌നാലെ ആള്‌ഗാളൊട്ടുക്കു നിമാന തൊറേന്ത് തള്ളുവാര്. 18 ആന നിമ്മ് തലേല ഒന്റു തലെമൂരു ബീസാക്ക് കെ്ട്ട് പോഗമാട്ട. 19 എന്റാല്‌മ് ഇദ്‌നെല്ല താങ്കി നിന്റദാന നിമ്മ് ഉജുരുന കെ്ഡേസുവുറു.>> എര്‌സലേമ് അളിവാദ്‌ന പറ്റി സൊന്റാന് 20 <<പട്ടളഗാറാര് എര്‌സലേമ്‌ന സുറ്റീല് ബളേന്ത്‌റക്കുവാദ്‌ന നിമ്മ കാണ്‌ഗാട്ടി അദ് അളിന്ത് പോവ കാല നെര്‌ങ്ക്‌റ്റെന്റ് നിമ്മ തെരിന്ത്‌റ്‌ന്. 21 അദുക്കുള എഗുദ നാഡ്‌ലിര്‌ക്ക്‌ന്റവാര് മലെഗാള് സാരി ഓഡി പോഡൊ. പട്ടണഗാള്‌ക്ക്‌റാഗ ഇര്‌ക്ക്‌ന്റവാര് ബെ്ളിഗെ ഓഡി പോഡൊ. പട്ടണഗാള്‌ക്ക് ബെ്ളിഗെ ഇര്‌ക്ക്‌ന്റവാര് പട്ടണഗാള് കുളാക്ക് പോഗ ബേ്ഡ. 22 സാമി ബൊക്കുലു എ്ള്‌ദിര്‌ക്കുവാദെല്ല നഡാക്ക്യ ബേ്ണ്ടി അയി കാല പള്യെ്ഡ്‌ക്കുവ കാല ആയിര്‌ക്ക്‌മ്. 23 ബേ്റ്‌ഗാറാര്‌ക്ക്‌മ് പച്ചെപ്‌ള്ളെഗാറാര്‌ക്ക്‌മ് അയി കാല അപ്പാര കജട്ടാത്തെ. അയി കാലാക്ക് അയി നാഡ്‌ക്ക് ദൊഡ്ഡ ബുദ്ദിമുട്ടു ബര്‌മ്. അയി കാലാക്ക് അയി നാഡ്‌ല ആള്‌ഗാള്‌ന സാമി ദൊഡ്ഡാദ്‌ക്ക് മൊനെപഡുവാന്. 24 അവാര്‌ല് ലേസ ആള്‌ഗാള്‌ന ബാള്‌ല് ബെ്ട്ടി കൊല്ലുവാര്. ലേസ ആള്‌ഗാള്‌ന പ്‌ഡിത്ത് ബേ്റെ നാഡ്‌ക്ക് എ്ഡ്‌ത്ത് പോവാര്. എഗുദാരല്ലാത്ത ജാദിഗാള് ആളുവ കാല മുഡ്യാമാട്ട്‌ക്ക് അയി ജാദിഗാള് എര്‌സലേമ്‌ന മെ്ട്ടിതൊഗേത്ത് തള്ളുവാര്.>> മന്‌സാനായി പ്‌റാന്തവാന് ബരാവു 25 <<നേരാല്‌മ്, നിലാവുലുമു, ബെ്ള്ളിഗാള്‌ല്‌മ് അഞ്ചിക്കെപ്‌ഡ്‌സുവ അഡ്യാളഗാള് കാട്ട്‌മ്. കഡാല് തെരെ അഡിത്ത് ദൊഡ്ഡാദ്‌ക്ക് ആലാത്ത് ബരുവ ജദ്ദന കേ്ട്ട് ഉലഗാത്ത്‌ല എല്ലാ ആള്‌ഗാള്‌മ് അഞ്ചിക്കേക്ക് സദ്‌റബെ്ട്ടി അന്തബ്‌ട്ട്‌തള്ളുവാര്. 26 ബാന്‌ല് ഇര്‌ക്കുവാദ് ഒട്ടുക്കു അദ്‌റുവാദ്‌നാലെ ഉലഗാത്ത്‌ല് എന്ത് നഡാക്ക്യ പോന്റൊ എന്റ് അഞ്ചിക്കെപട്ട് നോഡികൊണ്ടു ആള്‌ഗാള് മരതട്ടി തള്ളുവാര്. 27 അദുക്കുള മന്‌സാനായി പ്‌റാന്തവാന് സക്‌ത്യോഡാമ് അദിഗരത്തോഡാമ് നോഡ്യ മുഡ്യാത്ത ബെ്ഡിപ്പോഡാമ് മഞ്ച്‌ല് ബരുവാദ്‌ന അവാര് കാണുവാര്. 28 ഇദ്‌ഗാളെല്ല നഡാക്ക്യ പ്‌ഡിക്കാട്ടി നിമ്മ ഇ്ളാഗി അണ്ണാന്ത് നോഡുനു. എന്ത്‌ക്കെന്റ് സൊന്ന സാമി നിമാന കാപാറ്റുവ കാല നെര്‌ങ്ക്‌റ്റ്.>> അത്തി മര പഡുസുവ അര്‌ത്ത 29 ഏസ്സ് അവാര്‌ക്ക് ഒന്റു കദേമ് സൊന്നാന്: <<അത്തി മരനാഗ, അദേപാസെ ഇര്‌ക്കുവ ബേ്റെ മരഗാള്‌നെല്ല നോഡുനു. 30 അയി മരഗാള് തള്‌ക്കാട്ടി ബേസഗെ കാല പ്‌റാക്ക്യ ആറ്റ് എന്റ് നിമാക്ക് താനെ തെരിന്റല്ല. 31 ഇദേപാസെ നാന് സൊന്ന കാര്യഗാള് നഡാക്കുവാദ്‌ന നിമ്മ കാണ്‌ഗാട്ടി സാമി ആളുവാദ് അഡ്‌ത്ത്‌ദ് എന്റ് തെരിന്ത്‌റ്‌ന്. 32 ഈ കാര്യഗാളെല്ല നഡാന്ത് തീര മാട്ട്‌ക്ക് ഈ കാലാത്ത്‌ലവാര് ഇല്ലാദാഗമാട്ടാര് എന്റ് നാന് സത്ത്യമായി നിമാക്ക് സൊന്റെ. 33 ബാന്‌മ് ബൂമിമ് അളിന്ത് പോമു, ആന നാന് സൊന്ന സൊല്ലുസുലാക്കഗാളൊ അളിന്ത് പോഗമാട്ട.>> സൂസാരിത്ത് ഇര്‌ക്കുവാദ്‌ക്കുള്ള കാര്യ 34 <<ഈ ഉലഗാത്ത്‌ല് നിമ്മ തിന്റ്‌കുഡിത്ത് ബോദേ്റി നഡാക്കുവ നെനേവോഡഗേ ഇര്‌ക്കാദേന്. എത്തെ പെ്ളേത്ത് പോല എന്റ് അര്‌ക്കപട്ട് നഡാക്കുവ നെനേവോഡാമ് ഇര്‌ക്കാദേന്. എന്ത്‌ക്കെന്റ് സൊന്ന അയി നാള് സദിപെ്ട്ട്‌ല് ബര്‌മ്. അദ്‌നാലെ നിമ്മ സൂസാരിത്തിര്‌ന്. 35 ബൂമില് പെ്ളേത്ത്‌റ്‌ക്കുവ എല്ലാ ആള്‌ഗാള്‌മ് അയി നാള്‌ന കാണുവാര്. 36 അദ്‌നാലെ നഡാക്ക്യ പോവ ഈ കാര്യഗാള്‌ലിന്ത് തപ്പിസി കഡാക്ക്യാമ് മന്‌സാനായി പ്‌റാന്തവാന് മുന്നുക്കു നില്ല്യ തഗ്‌ദ്യുള്ളവാര് ആയ ബേ്ണ്ടിമ് നിമ്മ ഏദ്‌ഗളിഗേമ് പരേസികൊണ്ടു സൂസാരിത്തിര്‌ന്.>> 37 ഏസ്സ് നാള്‌ക്ക്‌മ് സാമിബീ്ഡ്‌ക്ക് പോയി ആള്‌ഗാള്‌ന പഡിസികൊണ്ടിന്താന്. ജാമാക്ക് ഒലിവു മലേക്ക് പോയി തങ്കിന്താന്. 38 ആള്‌ഗാളൊട്ടുക്കു ഏസ്സ് സൊല്ലുവ നായന കേ്ള്‌ക്ക്യ ബെ്ഡ്യാകാലാത്ത്‌ല് താനെ സാമിബീ്ഡ്‌ല് അയാള് പട്ട്‌ക്ക് പോവാര്. |
New Life Computer Institute