ആക്കോവു 5 - സാമി സേദിസൊത്തുന നമ്പി പെ്ളേക്ക്‌ന്റവാന് ഗെദി 1 സൊത്തുന നമ്പി പെ്ളേക്ക്‌ന്റവാരെ, നിമാക്ക് ബരുവ എഞ്ചോ കജട്ടഗാള്‌ന നെനേത്ത് നിമ്മ ബായി ബ്‌ട്ട് അഗാറ്‌ന്. 2 നിമ്മ എക്കസക്ക സേത്തി ബെത്ത്‌റ്‌ക്കുവ മുദാല്‌മുമ്പുഗാളെല്ല അളിന്ത് പോമു. നിമ്മ സേത്തി ബെത്താദ്‌നെല്ല മണ്ണ് തിന്റ് തള്ള്‌മ്. 3 നിമ്മ സേത്തി ബെത്ത സൊത്തുനെല്ല മണ്ണ് തിന്ന്‌ഗാട്ടി അദ്‌താനെ ബിദി സൊല്ലുവ നാള്‌ല് നിമാന കുറ്റഗാറാരെന്റ് കാട്ടി തര്‌മ്. നിമ്മ സേത്തി ബെത്ത്‌റ്‌ക്കുവ അയി സൊത്തു നിമാന കാപാറ്റ മാട്ട, അദ് നിമാന അളിത്ത് തള്ള്‌മ്. 4 നിമ്മ് പട്ട്‌ക്ക് ഗിലാസാക്ക് ബന്തവാര് കൂലിന തീത്ത് കൊഡുക്കത്താദ്‌നാലെ അവാര് ബായി ബ്‌ട്ട് അഗാറ്‌ന്റാര്. അവാര് ബായി ബ്‌ട്ട് അഗാറുവാദ്‌ന ദൊഡ്ഡ പഡേന ബെത്ത്‌റ്‌ക്കുവ ആണ്ടവാന് കേ്ട്ട്‌റ്‌ന്റാന്. അദ്‌ന കേ്ട്ട് ആണ്ടവാന് അവാര്‌ന ദെ്ണ്ടിക്ക്യ ഒരുങ്കിര്‌ന്റാന്. 5 അത്തെ തീത്ത് കൊഡുക്കാദെ സേത്തി ബെത്താദ്‌നെല്ല നിമ്മ തിന്റ്‌കുഡിത്ത് അദിഗളിത്ത് പെ്ളേക്ക്‌ന്റ്‌റ്. ആന നല്ല മിജ്‌മിജ ഇര്‌ക്കുവ ഒന്റാഡ്‌ന അറുക്കുവ പാസെ സാമി നിമാന ദെ്ണ്ടിക്ക്യ ഒരിങ്കിര്‌ന്റാന്. 6 എന്ത്‌ക്കെന്റ് സൊന്ന നിമ്മ് മുന്നുക്കു ഒന്റു നായാമ് എ്ഡ്‌ത്ത് സൊല്ല്യ മുഡ്യാത്തവാര്‌ന നിമ്മ കുറ്റ ബിദിത്ത് കൊന്റു കൊലെബാങ്ക്‌ന്ററ്. അവാര് ഒന്റു കുറ്റാമ് ഗേഗാത്തവാരായിന്ത്‌മ് നിമ്മ അവാര്‌ന അത്തെ ഗേന്ത്‌റ്. സാമിക്ക് ബേ്ണ്ടി കജട്ട പഡുവാദ്‌നാലെ കെ്ഡേക്കുവ പ്‌ണ്ണ്യ 7 ഏസ്സ്‌ഗാറാരെ, കാഡ്‌ഗാറാന് മഗേക്ക് കാത്തിന്ത് ബെ്ള്ളാമെ ബെ്ളേക്ക്യ പാഡ്‌പഡുവ പാസെ ആണ്ടവാന് ഏസ്സ് സാമി തിരിഗി ബരുവ മാട്ടക്ക് നിമ്മ കജട്ടന താങ്കി കാത്ത്‌റ്‌ക്കുഡൊ. 8 ആണ്ടവാന് ഏസ്സ് സാമി ബരുവാദ്‌ക്കുള്ള നേര അഡ്‌ത്ത്‌റ്‌ക്കുവാദ്‌നാലെ നിമ്മ ഒന്റേ മനേസ്സോഡ കജട്ടന താങ്കി കാത്ത്‌റ്‌ക്കുഡൊ. 9 ഏസ്സ്‌ഗാറാരെ, നമാക്ക് ബരുവ കജട്ടാക്ക് അഡ്‌ത്തവാര്‌ന കുറ്റ സൊല്ലാദേന്. അത്തെ കുറ്റ സൊന്നദാന അദ്‌ക്ക്‌മ് നിമാക്ക് ദെ്ണ്ടണെ കെ്ഡേക്ക്‌മ്. എന്ത്‌ക്കെന്റ് സൊന്ന ഇദ്‌നെല്ല കാണുവ ആണ്ടവാന് ഇദാ അര്‌ഗെ ബന്തെജ്ജിര്‌ന്റാന്. 10 ഏസ്സ്‌ഗാറാരെ, മുന്തെല കാലാത്ത്‌ല പാട്ടനാമ് ആണ്ടവാന്‌ന നമ്പി പെ്ളേത്തിന്തവാര്‌ക്ക് ബന്ത കജട്ടപാഡ്‌ന അവാര് എത്തെ താങ്ക്‌നാരെന്റ് സൊക്കാന നെനേത്ത് നോഡുനു. 11 എഞ്ചോ കജട്ടഗാള്‌ന താങ്ക്‌ന ഇയ്യോവുന പറ്റി നിമ്മ കേ്ട്ട്‌റ്‌ന്റ്‌റല്ല. അഞ്ചൊന്റു കജട്ടഗാള് താങ്ക്‌ന ഇയ്യോവുക്കു കഡേസി ബര കൊഡുത്തു നല്ല പെ്ളേപ്പ്‌ഗാറാന് മാഡ്‌നാനെന്റ്‌മ് നിമാക്ക് തെരിമ്. എന്ത്‌ക്കെന്റ് സൊന്ന കജട്ട പഡ്‌ന്റവാര്‌ന ആണ്ടവാന് അപ്പാര ഗവപഡ്‌ന്റാന്. അദ്‌നാലെത്തെ കജട്ടപാഡ്‌ഗാള് താങ്ക്‌നവാര്‌ന ബാഗ്യഗാറാരെന്റ് സൊല്ലുവാദ്. 12 ഏസ്സ്‌ഗാറാരെ, മുക്ക്യമായി നാന് സൊല്ലുവാദ് എന്തെന്റ് സൊന്ന, ഇര്‌ക്ക്‌ന്റ് എന്റ് സൊന്ന ഇര്‌ക്ക്‌ന്റ് എന്റ്‌മ് ഇല്ലെ എന്റ് സൊന്ന ഇല്ലാദേമ് ഇര്‌ക്കുഡൊ. അദ്‌ന തള്ളി നിമ്മ സൊല്ലുവാദ്‌ന അഡ്‌ത്തവാര് നമ്പുഡൊ എന്റ് സൊല്ലി സത്ത്യ ഗേയ പാങ്കില്ലെ. സാമിന സൊല്ല്യൊ അവ്വ്യപ്പാന്‌ന സൊല്ല്യൊ ബേ്റെന്തൊന്റുന സൊല്ല്യൊ സത്ത്യ ഗേഗാദേന്. ഇത്തെ സത്ത്യ ഗേന്തദാന ദെ്ണ്ടണേക്ക് സിക്കുവുറു. നോയിഗാറാര്‌ക്ക് ബേ്ണ്ടി പരേസ്‌ന് 13 നിമ്മ് കൂട്ടാത്ത്‌ല് ആരാറ്റ കജട്ട പഡുവദാന അയാള് സാമിക്ക് സൊല്ലി പരേസുഡൊ. നിമ്മ് കൂട്ടാത്ത്‌ല് പിര്യപിര്യാത്ത്‌റ്‌ക്ക്‌ന്റവാര് സാമിന ബാര്‌ദിക്കി കൊണ്ടു പാട്ട് പാഡുഡൊ. 14 നിമ്മ് കൂട്ടാത്ത്‌ല് ആരാറ്റ നോയായിന്തദാന അയാള് ഏസ്സ്‌ഗാറാര് കൂട്ട തലെവാര്‌ന ബരുസ്സുഡൊ. അവാര് ആണ്ടവാന് ഏസ്സ് ഗേന്ത ദൊഡ്ഡ കാര്യഗാള്‌ന സൊല്ലികൊണ്ട് അയാള് ഉരുവുക്കു എ്ണ്ണേന പൂസി പരേസുഡൊ. 15 ആണ്ടവാന് ഏസ്സ് ഗേന്ത ദൊഡ്ഡ കാര്യഗാള്‌ന നമ്പികൊണ്ടു പരേസ്‌ഗാട്ടി ഏസ്സ് സാമി അയാള് നോയിന തെ്ള്‌സ്‌ന്റാന്. അയാള് എന്താറ്റ കുറ്റ ഗേന്തിന്ത അദ്‌നാമ് ഏസ്സ് സാമി പൊറുത്തു കൊഡുക്കുവാന്. 16 അദ്‌നാലെ നിമ്മ് നോയി തീരുഡെന്റദാന മുദാല് നിമ്മ ഗേന്ത കുറ്റനെല്ല ആങ്കീങ്ക് സൊല്ലി തീത്ത് രാജി കൂഡുഡൊ. എന്റിന്ത് ഒരുത്താന് ഇന്ന്യൊന്റൊരുത്താന്‌ക്ക് ബേ്ണ്ടി പരേസുഡൊ. അന്നാപ്പ് സാമി നിമ്മ് നോയിന തെ്ള്‌സുവാന്. കുറ്റകൊറേവില്ലത്തവാന് മനേസ്സാറ പരേസുവ പരേസ നേര്‌മായി പലിക്ക്‌മ്. 17 ഏല്യാവു നമാന പാസെ ഇര്‌ക്കുവ ഒന്റു മന്‌സാന്‌ത്തെ ആയിന്താന്. അയാള് മഗെ അഡിക്ക ബേ്ഡെന്റ് പരേസ്‌നാന്. അദ്‌നാലെ മൂണരെ ബര്‌സ്സ ദേസാത്ത്‌ല് മഗെ അഡിക്കാലെ. 18 പ്‌റ അയാള് മഗെ അഡിക്ക്യ ബേ്ണ്ടി പരേസ്‌നാന്. അദുക്കുള ബാന്‌ലിന്ത് മഗെ അഡിത്ത്‌ദ്. ബൂമില് ബെ്ള്ളാമെ ബെ്ളേന്ത്‌ദ്. 19 ഏസ്സ്‌ഗാറാരെ, നിമ്മ് കൂട്ടാത്ത്‌ല് ഒന്റൊരുത്താന് കുറ്റ ഗേന്ത് സാമിന ബ്‌ട്ട് പ്‌റ്‌ന്ത് പോന അയാള് തിരിഗി സാമിസാരി ബര്യ നിമ്മ കയിതാങ്കുഡൊ. 20 അത്തെ നിമ്മ കയി താങ്ക്‌ഗാട്ടി അയാള് ഗേന്ത എല്ലാ കുറ്റ കൊറേവുനാമ് സാമി പൊറുത്തു കൊഡുക്കുവാന്. അദ്‌താനേമല്ല സാമി അയാള്‌ന നരഗാക്ക് ബ്‌ഡാദെ കാപാറ്റ്‌ന്റാന്. |
New Life Computer Institute