ആക്കോവു 4 - സാമി സേദിസാമി കണ്ണ്ക്ക് താന്ത്‌റ്‌ക്കുഡൊ 1 നിമാക്ക് മല്ല്‌മ് തറ്‌ക്കാമ് ബരുവാദ് എത്തെ? അവനവാന് നെനേത്ത പാസെ പെ്ളേക്ക്യ നിമ്മ ആസെപഡുവാദ്‌നാലെത്തെ നിമാക്ക് മല്ല്‌മ് തറ്‌ക്കാമ് ബരുവാദ്. 2 നിമ്മ മല്ല് കെ്ട്ടി തറ്‌ക്കി ഒന്റാള്‌ന കൊന്റാല് ഗുഡി നിമ്മ ആസെപട്ടാദ് നിമാക്ക് കെ്ഡേക്കുവാദില്ലെ. എന്ത്‌ക്കെന്റ് സൊന്ന നിമ്മ ആസെപഡുവ കാര്യഗാളെല്ല നിമ്മ സാമിന കേ്ള്‌ക്കത്താദ്‌നാലെത്തെ നിമാക്ക് അദ് കെ്ഡേക്കത്താദ്. 3 നിമ്മ കേ്ട്ടാല്‌മ് സാമ്യോഡിന്ത് അദ് കെ്ഡേക്കമാട്ട. അദ് എന്ത്‌ക്കെന്റ് സൊന്ന നിമ്മ ആസെപഡുവ പാസെ പെ്ളേക്ക്യ ബേ്ണ്ടി ആഗാത്ത കാര്യഗാള്‌ന കേ്ള്‌ക്ക്‌ന്റ്‌റ്. 4 ഈ ഉലഗാത്ത്‌ല് പെ്ളേക്കുവ പെ്ളേപ്പ്‌ക്ക് ആസെപഡ്‌ന്റവാര് ബേസ്യാഡ്‌ന്റവാര്‌ന പാസെത്തെന്റ് നിമാക്ക് തെരിവാദില്ലേഗ? അദ്‌നാലെ ഉലഗാത്ത്‌ല പെ്ളേപ്പ്‌ക്ക് ആസെപഡ്‌ന്റവാര് സാമ്യോഡ പോട്ടിപ്‌ഡിക്ക്‌ന്റവാര് ആന്റാര്. 5 അല്ല പോന നിമ്മ സാമി സൊല്ലുസുലാക്കാത്ത്‌ല് സൊല്ലിര്‌ക്കുവാദ് ബെ്റ്‌ദേത്തെന്റ് നെനേക്ക്‌ന്റ്‌റ? അദ് ഇത്തേത്തെ: <<സാമി നമാക്ക് തന്ന് നിഗാല്‌ന തന്ത്‌റ്‌ക്ക്‌ന്റാന്. അയി നിഗാല് നമ്മ സാമിന ബ്‌ട്ട് പ്‌റ്‌ന്ത് പോഗാഗേ ബേ്ഡ എന്റ് ആസെപഡ്‌ന്റ്.>> 6 അദ്‌നാലെ സാമിന ബ്‌ട്ട് പ്‌റ്‌ന്ത് പോഗാദിര്‌ക്ക്യ ആസെപഡ്‌ന്റവാര്‌ന സാമി അപ്പാര ഗവപഡ്‌ന്റാന്. എന്ത്‌ക്കെന്റ് സൊന്ന <<പെരിമെനായ സൊല്ലിനഡാക്ക്‌ന്റവാര്‌ന സാമി പോട്ടിഗാറാരായി കണാക്ക് മാഡ്‌ന്റാന്. സാമി കണ്ണ്ക്ക് തണിന്ത് പെ്ളേക്ക്‌ന്റവാര്‌ന സാമി അപ്പാര ഗവപഡ്‌ന്റാന്>> എന്റ് സാമി ബൊക്കുലു എ്ള്‌ദിര്‌ക്കുവാദ്‌നാലെത്തെ. 7 അദ്‌നാലെ നിമ്മ സാമിന ബ്‌ട്ട് പ്‌റ്‌ന്ത് പോഗാദെ സെയിത്താനോഡ പോട്ടിപ്‌ഡിത്തദാന അയാള് നിമാന ബ്‌ട്ട് ഓഡി പോവാന്. 8 സാമിന ബ്‌ട്ട് പ്‌റ്‌ന്ത് പോഗാദിര്‌ക്കുഡൊ എന്റ്‌മ് ഉലഗാത്ത്‌ല പെ്ളേപ്പ്‌ന പാസെ പെ്ളേക്കുഡൊ എന്റ്‌മ് ആസെപട്ടദാന നിമ്മ പാവ ഗേന്റവാര്‌ത്തെ. അദ്‌നാലെ നിമ്മ് മനേസ്സ്‌ല കവാഡ്‌നെല്ല ഇല്ലാദെമാഡി സാമിക്ക് ബേ്ണ്ടി പെ്ളേത്തദാന സാമി നിമാക്ക് ബേ്ഡ്‌മാനാദെല്ല ഗേന്ത് തരുവാന്. 9 ഉലഗാത്ത്‌ല പെ്ളേപ്പ്‌ന പിര്യപൊങ്കിന്താദ്‌ന നെനേത്ത് നിമ്മ സങ്കഡപട്ട് കേ്യിന്. 10 അത്തെ നിമ്മ ആണ്ടവാന്‌ക്കായി തണിന്ത് പെ്ളേത്ത ആണ്ടവാന് നിമാന ദൊഡ്ഡവാന് മാഡുവാന്. ആര്‌നാമ് കുറ്റ സൊല്ല്യ പാങ്കില്ലെ 11-12 ഏസ്സ്‌ഗാറാരെ, സാമി നമാക്ക് സട്ട ബെത്താദ് നമ്മ സാമി സട്ടപഡി പെ്ളേക്ക്യത്തെ. ആന അയി സട്ടാന ബെത്ത് നമ്മ അഡ്‌ത്തവാര്‌ന കുറ്റ ബിദിക്കുവദാന അയി സട്ടാന ബ്‌ഡ നമാന ദൊഡ്ഡവാന് മാഡ്‌ന്റാമ്. എന്ത്‌ക്കെന്റ് സൊന്ന സാമി ഒരുത്താന്‌ത്തെ സട്ട ബെത്ത്‌റ്‌ക്കുവാദ്‌മ് കുറ്റ ബിദിക്കുവാദ്‌മ്. സാമി ഒരുത്താന്‌ക്ക്‌ത്തെ ഒരുത്താന്‌ന കാപാറ്റ്യാമ് കൊല്ല്യാമ് അദിഗര ഇര്‌ക്കുവാദ്. അദ്‌നാലെ ആങ്കീങ്ക് കുറ്റ സൊല്ലി സാമി ഗേവ കാര്യന ഗേയ നീ ആര്? പെരിമെനായ സൊല്ല ബേ്ഡ 13-14 നാളേക്ക് നിമാക്ക് എന്തെല്ല ആന്റെന്റ് നിമാക്ക് തെരിവാദില്ല്യല്ല. എന്ത്‌ക്കെന്റ് സൊന്ന നിമ്മ് പെ്ളേപ്പ് സെറ്റെ നേര കണ്ണ്ക്ക് കാട്ടി സട്ടന മായിന്ത് തള്ളുവ മഞ്ച്‌ന പാസെത്തെ. അദ്‌നാലെ <<ഇന്റൊ നാളേക്കൊ എമ്മ ഒന്റു പട്ടണാക്ക് പോയി ഒന്റു ബര്‌സ്സ അദ്‌ലിന്ത് ഏവാരമാഡി പണ സമ്പാരിക്കുവേമ്>> എന്റ് സൊല്ലുവ നായ പെരിമെനായത്തെ. 15 അദ്‌നാലെ <<ആണ്ടവാന്‌ക്ക് ആസെ ഇന്തദാന എമ്മ ഉജുരോഡ ഇന്ത് ഇന്നിന്ന കാര്യഗാളെല്ല ഗേവേമ്>> എന്റ്‌ത്തെ നിമ്മ സൊല്ലുഡൊ. 16 ആന നിമ്മ, ആണ്ടവാന് ആസെപഡുവാദ് എന്തെന്റ് തെര്യാദെ അവനവാന് ആസെപഡുവ പാസെ അദ് ഗേവേമ് ഇദ് ഗേവേമ് എന്റ് സൊല്ലി പെരിമെപഡ്‌ന്റ്‌റ്. ഇത്തെ പെരിമെനായ സൊല്ലി നിമ്മ കുറ്റഗാറാര് ആന്റ്‌റ്. 17 അദ്‌നാലെ ഒരുത്താന്‌ക്ക് സാമി ആസെപഡുവ നല്ല കാര്യഗാള്‌ന തെരിന്തിന്ത്‌മ് അയി കാര്യഗാള്‌ന ഗേഗാദിന്തദാന അദ് സാമി കണ്ണ്ക്ക് കുറ്റാത്തെ. |
New Life Computer Institute