ആക്കോവു 3 - സാമി സേദിബായിന അഡാക്കി ബെക്കുഡൊ 1 ഏസ്സ്‌ഗാറാരെ, സാമി സട്ടാന പഡിസി കൊഡുക്കുവ നമാനാത്തെ സാമി സേത്തി കുറ്റ ബിദിക്കുവാന് എന്റ് നിമ്മ തെരിന്ത്‌റ്‌ക്കുഡൊ. അദ്‌നാലെ നിമ്മ് കൂട്ടാത്ത്‌ല് ഇര്‌ന്റവാര്‌ല് മൊത്തന ആള്‌ഗാള് സാമി സട്ടാന പഡ്‌സ്‌ന്റവാരായ പാങ്കില്ലെ. 2 എന്ത്‌ക്കെന്റ് സൊന്ന സാമിസട്ടന പറ്റി നമ്മ മൊത്തനാക്ക് സൊല്ലി നഡാക്ക്‌ല. ആന അദേപാസെ നമ്മ ഗേവാദില്ലെ. നമ്മ സൊല്ലി നഡാക്കുവ പാസെ ഗേന്ത് സാമി സട്ടാന പഡിസി കൊഡുക്കുന്റവാന് ദെ്ണ്ടണേക്ക് സിക്കാദെ ഗെലിസി കഡാക്ക്‌ന്റാന്. 3 ഒന്റു കുദുറെന നമാക്ക് നെനേത്ത സാര്യെല്ല തിരിക്ക്യ നമ്മ കുദുറെ ബായിക്ക് കണ്ണി കെ്ട്ട്‌ന്റാമ്. അത്തെ ഗേന്തദാന അദ്‌ന നമ്മ ഏദ് സാരി ബേ്ഡ്‌മാനാല് തിര്‌ക്ക്‌ല. 4 കപ്പാല് എത്ത്‌റ ദൊഡ്ഡാദാനാല്‌മ് മുനി കാറ്റഡിത്ത് ഓഡുവദാനാല്‌മ് കപ്പാല്‌ന ഓട്ടുന്റവാന് സ്‌ന്ന മൊളേല് താനെ തനാക്ക് നെനേത്ത സാര്യെല്ല ഓട്ടി പോന്റാന്. 5 അദേപാസെ നാവു സരിഗലാത്ത്‌ല് സ്‌ന്നാദാനാല്‌മ് നാവുലിന്ത് ബരുവ നായ നമാന നലമായി പെ്ളേക്ക്യ ബെക്ക്‌ന്റ്. ആന ഒന്റു സ്‌ന്ന തീകെ്ഡി ദൊഡ്ഡ സോലെഗാള്‌ന ബേസി തള്ളുവ പാസെ നമ്മ് നാവുലിന്ത് ബരുവ പെരിമെനായാമ് നമ്മ് പെ്ളേപ്പ്‌ന കെ്ഡിസി തള്ള്‌ന്റ്. 6 നമ്മ സൊല്ലുവ നായാമ് തീന പാസെത്തെ. അത്തെ തീന പാസെ സൊല്ലുവ നായഗാള് നമാന കുറ്റ കൊറേവിര്‌ക്ക്‌ന്റവാന് മാഡ്‌ന്റ്. നരഗാത്ത്‌ലിന്ത് ബന്ത് ഒന്റു തീ അളിത്ത് തള്ളുവ പാസെ അത്തവ നായഗാള് നമ്മ് പെ്ളേപ്പ്‌നഗേ കെ്ഡിസി തള്ള്‌ന്റ്. 7 സോലെല ബേ്ണ്ട്‌വ്‌റാവുഗാള്‌നാമ്, ആഡ്‌മാഡ്‌ഗാള്‌നാമ്, പക്കിപാറ്‌ഗാള്‌നാമ്, ഊരുന്ത് നഡാക്കുവ ഉജുരുകെ്ളെഗാള്‌നാമ്, നീര്‌ല് ഇര്‌ക്കുവ ഉജുരുകെ്ളെഗാള്‌നാമ് പളാക്കി മന്‌സാന് തന്ന് സൊല്ലുപഡിക്ക് മാഡ്‌ന്റാന്. 8 ആന നാവുലിന്ത് സൊല്ലുവ നായന അഡാക്കി ബെക്കുവാദ് അപ്പാര കഡ്‌പ്പാത്തെ. എന്ത്‌ക്കെന്റ് സൊന്ന നഞ്ച് ഒന്റു മന്‌സാന്‌ന അളിക്കുവ പാസെ നാവുലിന്ത് സൊല്ലുവ കെ്ട്ട നായാമ് ഒന്റു മന്‌സാന് പെ്ളേപ്പ്‌നഗേ അളിത്ത് തള്ള്‌ന്റ്. 9 അയി ഒന്റേ ബായില് നമ്മ അപ്പാന്‌മ് ആണ്ടവാന്‌മ് ആയിര്‌ക്കുവ നമ്മ് സാമിക്ക് നണ്ണിമ് സൊന്റാമ്, സാമി തനാന പാസെ ദ്‌ട്ട്‌സ്‌ന മന്‌സാര്‌ഗാള്‌ക്ക് സാപ്പാമ് ഇക്ക്‌ന്റാമ്. ഇത്തെ ഗേവാദ് സെര്യ? 10 ഏസ്സ്‌ഗാറാരെ, ഒന്റേ ബായില് താനെ നമ്മ നണ്ണി സൊല്ലുവാദ്‌മ് സാപ്പ ഇക്കുവാദ്‌മ് നല്ലാദല്ല. 11 ഒന്റേ ഉറാത്തേലിന്ത് നല്ല നീര്‌മ് ഉപ്പു നീര്‌മ് ബര്‌മ? 12 ഏസ്സ്‌ഗാറാരെ, ഉലുമാന് മരാത്ത്‌ലിന്ത് മവു പഗാമ് സീഗെ കൊഡിലിന്ത് ഉലുമാന് പഗാമ് കെ്ഡേക്ക്‌മ? ഉപ്പുനീര് ബരുവ പട്ട്‌ലിന്ത് നല്ല നീര് എത്തെ ബര്‌മ് ? സാമി തരുവ ബുദ്ദി 13 നിമ്മ് പട്ട്‌ല് ബുദ്ദിസാലിഗാള് ആയിര്‌ക്ക്‌ന്റവാര് ആര്? അവാര് തണിന്ത് നഡാന്ത് നല്ല കാര്യഗാള് ഗേന്ത് തമ്മ ബുദ്ദിസാലിഗാളെന്റ് കാട്ടി കൊഡുക്കുഡൊ. 14 ആന നിമ്മ ദൊഡ്ഡവാരായ ആസെപട്ട് മനേസ്സ്‌കുളാക്ക് കണ്ണ്‌കഡി ബെത്ത്‌മ് ബയിര ബെത്ത്‌മ് സൊല്ലുവ നായഗാളെല്ല പെരിമെനായത്തെ. അയി നായ നേരല്ല. 15 ഇത്തെ പെരിമനായ സൊല്ല്യ കെ്ഡേക്കുവ അറുവു മേലോഗാത്ത്‌ലിന്ത്‌മല്ല സാമിലിന്ത്‌മല്ല കെ്ഡേക്കുവാദ്. ഉലഗാത്ത്‌ലിന്ത്‌മ് മന്‌സാര്‌ഗാള്‌ലിന്ത്‌മ് സെയിത്താനോഡിന്ത്‌മ്‌ത്തെ അയി അറുവു കെ്ഡേക്കുവാദ്. 16 എന്ത്‌ക്കെന്റ് സൊന്ന കണ്ണ്‌കഡിമ് ദൊഡ്ഡവാനാവ ആസേമ് ഏദ്‌ലെല്ല ഇര്‌ക്ക്‌ന്റൊ അദ്‌ലെല്ല മല്ല്‌സള്ളേമ് എല്ലാ കെ്ട്ട കാര്യാമ് ഇര്‌ക്ക്‌മ്. 17 ആന സാമിലിന്ത് കെ്ഡേക്കുവ അറുവു കവാഡില്ലാത്താദ്‌ത്തെ. അയി അറുവിര്‌ക്ക്‌ന്റവാര് അഡ്‌ത്തവാരോഡ സീവാന്‌ബെത്ത് നിമ്മ്‌ദ്യോഡ ഇര്‌ക്കുവാര്, അഡ്‌ത്തവാന് മനേസ്സ്‌ലിര്‌ക്കുവാദ്‌ന തെരിന്ത് തണിന്ത് കൊഡുത്തു പെ്ളേക്കുവാര്, അവാര് മനേസ്സാറ ഗവപട്ട് അഡ്‌ത്തവാര്‌ക്ക് നല്ലാദ് ഗേവാര്, അവാര് ദൊഡ്ഡവാര് സ്‌ന്നവാര് എന്റ് പ്‌റ്‌ത്ത് നോഡമാട്ടാര്. അവാര് ബക്‌തിഗാറാരെന്റ് നഡിക്കമാട്ടാര്. 18 രാജി കൂഡുസി നിമ്മ്‌ദി മാഡി കൊഡുക്കുന്റവാന്‌ക്ക് കുറ്റകൊറേവില്ലത്തവാന് എന്റ് പേര്‌മ് കെ്ഡേക്ക്‌മ്. |
New Life Computer Institute