എവുറായാര് 9 - സാമി സേദിബൂമില ഗുഡുസുലുമു മേലോഗല ഗുഡുസുലുമു 1 സാമി ഇസ്‌റവേല്‌ഗാറാരോഡ മുദാല് ബെത്ത ഒപ്പന്താത്ത്‌ല് കുമ്മുഡുവാദ്‌ക്കുള്ള സട്ടഗാള്‌മ് ബൂമില് കുമ്മുഡുവാദ്‌ക്കുള്ള ഒന്റു എ്ഡേമ് ഇന്ത്‌ദ്. 2 അദ്‌ക്ക് ബേ്ണ്ടി ഒന്റു ഗുഡുസുലു മാഡി അയി ഗുഡുസുലുല മുദാല് ബാഗാത്ത്‌ല് നിലബ്‌ളാക്ക്‌മ് സാമിക്ക് മേല്‌സ ബെത്ത അഡേമ് അദ്‌ന ബെക്കുവ ബെഞ്ചിമ് ഇന്ത്‌ദ്. അയി ബാഗാക്ക് നെലെ പട്ട് എന്റ്‌ത്തെ പേര്. 3 റണ്ടാവാദ് തെരെസീലേക്ക് പിന്ന്‌സാരില ബാഗാക്ക് അരാങ്ക കുച്ചു എന്റ്‌ത്തെ പേര്. 4 അയി ബാഗാത്ത്‌ല് തുമ്മ പൊഗേസ്യ ബേ്ണ്ടി പൊന്നുലു താനെ മാഡിര്‌ക്കുവ ഒന്റു മദ്‌ല്‌മ്, ഒപ്പന്തന കാട്ടുവ പെ്ട്ടിമ് ഇന്ത്‌ദ്. അയി പെ്ട്ടിന ഒട്ടുക്കു പൊന്നുലു തൊനേസിന്താര്. അയി പെ്ട്ടി കുള്ളുക്കു മന്ന ഇക്കി ബെത്ത്‌റ്‌ക്കുവ പൊന്നു സെമ്പ്‌മ്, അഗരോനുത്തു തള്‌ത്ത ബഡിമ്, പത്ത് സട്ടഗാള്‌ന എ്ള്‌ദി ബെത്ത്‌റ്‌ക്കുവ കല്ല് പലഗെഗാള്‌മ് ഇന്ത്‌ദ്. 5 പെ്ട്ടി കുദ്ദാക്ക് സാമി മദ്‌പ്പ്‌ന കാട്ടുവ കെരൂബുഗാള്‌മ് ഇന്ത്‌ദ്. ആള്‌ഗാള് പാവഗാള്‌ന സാമി പൊറുക്കുവ എ്ഡെ എന്റ് സൊല്ലുവ പട്ട്‌ന അയി കെരൂബുഗാള് തമ്മ് ഇ്റാക്കേല് മൂഡിന്ത്‌ദ്. ആന ഈ കാര്യഗാള്‌ന പറ്റി ഇന്നാല് ഒന്റൊന്റായി സൊല്ല്യ എമാക്ക് മുഡ്യാമാട്ട. 6 ഗുഡുസുലു കുളാക്ക് ഈ ദിന്‌സ്‌ല് എല്ലാമ് ഒരിക്കി ബെത്തിന്താര്. ഗുഡുസുലുല മുദാല്‌ല ബാഗാത്ത്‌ല് തമ്മ ഗേവ കാര്യഗാളെല്ല ഗേയ ബേ്ണ്ടി പൂസാരിഗാള് എല്ലാ നാള്‌മ് പോന്റാര്. 7 ആന അരാങ്ക കുച്ചുക്കു എഗുദാര് ദൊഡ്ഡ പൂസാരി താനെത്തെ ബര്‌സ്സാത്ത്‌ല് ഒന്റേ ഒന്റു നാള് പോന്റാന്. അദ് തന്ന് പാവഗാള്‌ക്ക്‌മ് ആള്‌ഗാള് പാവ എന്റ് തെര്യാദെ ഗേന്ത പാവഗാള്‌ക്ക്‌മ് ബേ്ണ്ടി സാമിക്ക് നേര്‌സെ ആയി കൊഡുക്ക്യ സോരെനാമ് എ്ഡ്‌ത്ത് കൊണ്ടുത്തെ പോവാദ്. 8 ബൂമിലിര്‌ക്കുവ ഗുഡുസുലുല മുദാല് ബാഗ ഇര്‌ക്കുവ മാട്ട്‌ക്ക് മേലോഗാത്ത്‌ല അരാങ്ക കുച്ചുക്കുള്ള ബട്ടെ ത്‌റാക്കാലെ എന്റ് ഈ കാര്യഗാള്‌ന ബെത്ത് സാമിനിഗാല് സൊക്കാന കാട്ടി തന്റ്. 9 ഗുഡുസുലുല മുദാല് ബാഗ ഇന്നാല്‌ല കാലാത്ത്‌ല് ഒന്റൊന്റുന പഡിസി തന്റ്. സാമിക്ക് നേര്‌സെഗാള് കൊഡുക്കുവാദ്‌നാലേമ് ബേ്ണ്ട്‌ഗാള്‌ന പലി കൊഡുക്കുവാദ്‌നാലേമ് തമ്മ് പാവഗാള്‌ക്ക് ഒന്റേപെ്ട്ട് പൊറിമെ കെ്ഡേത്ത്‌റ്‌ന്റ് എന്റ് ആള്‌ഗാള് മനേസ്സ്‌ല് ഒറേപ്പ് കെ്ഡേക്കുവാദില്ലെ എന്റ്‌ത്തെ അദ്. 10 ഇദ്‌ഗാളെല്ല തിന്നുവാദ്‌നാമ് കുഡിക്കുവാദ്‌നാമ് സട്ട്‌മെ്ട്ട്‌പഡി സുത്താപ്പ് മാഡുവാദ്‌ന പറ്റിമ് താനെത്തെ. സാമി ബെക്കുവ പുദ്യ ഒപ്പന്താത്ത്‌ല കാര്യഗാള് ഗേയ പ്‌ഡിക്കമാട്ട്‌ക്ക് ഗേയ ഉള്ള സരിഗലന പറ്റ്യുള്ള സട്ടഗാള് മാട്ട്‌ത്തെ ഇദ്‌ഗാള്. പുദ്യ ഒപ്പന്ത 11 ആന ഇന്നാല് നമാക്കിര്‌ക്കുവ നല്ല കാര്യഗാള്‌ക്ക് ദൊഡ്ഡ പൂസാര്യായി ക്‌റ്‌സ്‌ത്ത് ബന്ത്‌റ്‌ന്റാന്. മ്‌ഗ്‌ന്താദ്‌മ് ഒന്റു കൊറേവുമു ഇല്ലത്താദ്‌മാന ഗുഡുസുലുക്കു അയാള് നൊഗേന്ത്‌റ്‌ക്ക്‌ന്റാന്. അയി ഗുഡുസുലു കയില് താനെ മാഡാത്താദ്‌മ് എന്റ് സൊന്ന ഈ ബൂമില് ദ്‌ട്ടിസി ബെത്ത്‌റ്‌ക്കുവാദ്‌ല് പഡാത്താദ്‌മ്‌ത്തെ. 12 അയാള് ആഡ്‌ഗാള്‌ത്തൊ ഓരി കഡേസ്‌ഗാള്‌ത്തൊ സോരെന എ്ഡ്‌ത്ത് കൊണ്ടല്ല, തന്ന് സൊന്ത സോരെന എ്ഡ്‌ത്ത് കൊണ്ടുത്തെ ഒന്റേ ഒന്റു ജമ്പ് അരാങ്ക കുച്ചുക്കു കഡാന്താദ്. ഇത്തെ ഗേന്ത് നമ്മ് പാവാത്ത്‌ലിന്ത് അയാള് നമാന എന്നാല്‌ക്ക്‌മായി ബ്‌ഡ്‌സ്‌നാന്. 13 ആഡ്‌ഗാള്‌ത്തൊ ഓരി മാഡ്‌ഗാള്‌ത്തൊ സോരെനാമ് പെ്ട്ടെമാഡ് കന്റ്‌ന സുട്ട ബൂദിനാമ് സട്ടപഡി സുത്താപ്പില്ലാത്തവാര്‌ക്ക് തളിക്ക്‌ന്റാര്. അത്തെ അവാര് സരിഗല സുത്താപ്പാന്റ്. 14 അദ് സത്ത്യാനദാന ക്‌റ്‌സ്‌ത്ത് സോരെ നമാന എത്ത്‌റാഗോ അദിഗ സുത്താപ്പ് മാഡ്‌മ്. എന്ത്‌ക്കെന്റ് സൊന്ന എന്നാല്‌ക്ക്‌മ് ഇര്‌ക്കുവ സാമിനിഗാല്‌നാലെ അയാള് തനാന താനെ ഒന്റു കൊറേവുമു ഇല്ലാത്ത പലി ആയി സാമിക്ക് ഒപ്പുസുനാന്. അദ്‌നാലെ സട്ടാത്ത്‌ല് സൊല്ലിര്‌ക്കുവ ഉവഗര ഇല്ലാത്ത കാര്യഗാള്‌ന ഗേന്താദ്‌ക്ക് കുറ്റ ഗേന്തെ എന്റ് മനേസ്സ്‌ല് ഇര്‌ക്കുവ നെനേവുഗാള്‌ലിന്ത് നമ്മ് മനേസ്സ്‌ന അയാള് സുത്താപ്പ് മാഡ്‌ന്റാന്. അത്തെ ഉജുരുള്ള സാമിന നമ്മ കുമ്മുഡുല. 15 അദ്‌നാലെ ക്‌റ്‌സ്‌ത്ത് സാമിനാമ് ആള്‌ഗാള്‌നാമ് എ്ണേത്ത് ഒന്റു പുദ്യ ഒപ്പന്ത ബെക്ക്‌ന്റാന്. അത്തെ മുദാല് ബെത്ത ഒപ്പന്ത പഡി ഇര്‌ക്കാട്ടി ഗേന്ത കുറ്റഗാള്‌ക്കുള്ള ദെ്ണ്ടണേലിന്ത് ബ്‌ഡിസ്യ ബേ്ണ്ടി ക്‌റ്‌സ്‌ത്ത് സത്താദ്‌നാലെ സാമി തരുവെ എന്റ് ബാക്ക് തന്ത്‌റ്‌ക്കുവ എന്നാല്‌ക്ക്‌മ് ഇര്‌ക്കുവ ബാക്ക്‌വരഗാള് സാമി ബ്‌ളിത്തവാര്‌ക്ക് കെ്ഡേക്ക്‌ന്റ്. 16 ഒപ്പന്ത എന്നുവാദ് ഒരുത്താന് സാഗാട്ടി എ്ള്‌ദി ബെക്കുവ എ്ള്‌ത്ത്‌ക്ക് സമാത്തെ. ഈ കാര്യാത്ത്‌ല് എ്ള്‌ത്ത് എ്ള്‌ദി ബെത്തവാന് സത്താന് എന്റ് ഒറേപ്പ് മാഡുഡൊ. 17 എ്ള്‌ദി ബെത്തവാന് സത്ത പ്‌റാത്തെ അയി എ്ള്‌ത്ത്‌ല് സൊല്ലിര്‌ക്കുവ കാര്യഗാള്‌ന നഡാത്ത്യ മുഡിമ്. എ്ള്‌ദി ബെത്തവാന് പെ്ളേത്ത്‌റ്‌ക്കുവ മാട്ട്‌ക്ക് അദ്‌ല് എ്ള്‌ദി ബെത്ത്‌റ്‌ക്കുവ കാര്യഗാള്‌ന നഡാത്ത്യ മുഡ്യാമാട്ട. 18 അദ്‌നാലെത്തെ മുദാല് ബെത്ത ഒപ്പന്താത്ത്‌ല് സൊല്ലിര്‌ക്കുവ കാര്യഗാള്‌ന ഗുഡി സോരെന ബെത്ത് നഡാത്ത്യ പ്‌ഡിത്താദ്. 19 മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവ ഒന്റൊന്റു സട്ടഗാള്‌ന മോസെ മുദാല് ആള്‌ഗാള്‌ക്ക് സൊല്ലി കൊഡുത്താന്. അദ്‌ക്ക് പ്‌റ അയാള് ആഡ്‌ഗാള്‌ത്ത്‌മ് ഓരി കഡേസ്‌ഗാള്‌ത്ത്‌മ് സോരെന നീര്‌ക്ക് കലപാരിസി എ്ഡ്‌ത്ത് ആഡ്‌ത്ത് സോരെ ന്‌റ മാഡ്‌ന തുപ്പുഡുലുമു ഈസോപ്പു സെ്ഡി സപ്പാല്‌മ് സട്ടഗാള് എ്ള്‌ദി ബെത്ത്‌റ്‌ക്കുവ ബൊക്കുക്കുമു ആള്‌ഗാള്‌ക്ക്‌മ് തളിത്താന്. 20 പ്‌റ <<നിമ്മ കേ്ട്ട് നഡാക്ക്യ സാമി സൊല്ലിര്‌ക്കുവ കാര്യഗാള് ഇര്‌ക്കുവ ഒപ്പന്തന ഒറേപ്പ് മാഡ്യ ബേ്ണ്ടി ബെത്ത സോരെത്തെ ഇദ്>> എന്റ് മോസെ സൊന്നാന്. 21 അദേപാസെ മോസെ ഗുഡുസുലു കുദ്ദാക്ക്‌മ് കുമ്മുഡുഗാട്ടി ബെക്കുവ ജാദിഗാള്‌ക്ക്‌മ് സോരെന തളിത്താന്. 22 ഒപ്പതപ്പ എല്ലാദ്‌മ് സോരെനാലെ സുത്താപ്പ് ആഡൊ എന്റ്‌ത്തെ മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവാദ്. സോരെ സൂസാദെ പാവഗാള്‌ക്ക് പൊറിമെ കെ്ഡേക്കാമ് മാട്ട. ക്‌റ്‌സ്‌ത്ത് സാവു പാവഗാള്‌ന തീര്‌ക്ക്‌ന്റ് 23 അദ്‌നാലെ മേലോഗാത്ത്‌ല് ഇര്‌ക്കുവാദ്‌ന പാസെ ഉള്ള ഈ കാര്യഗാള്‌ന ഈ ദിന്‌സ്‌ല സോരെനാലെ സുത്താപ്പ് മാഡുഡൊ. ആന മേലോഗാത്ത്‌ല് ഇര്‌ക്കുവ കാര്യഗാള്‌ക്കൊ ഇദ്‌ന ബ്‌ഡ മ്‌ഗ്‌ന്ത പലിഗാള് ബേ്ഡ്‌മ്. 24 എന്ത്‌ക്കെന്റ് സൊന്ന മന്‌സാന് ഉണ്ടാക്ക്‌നാദ്‌മ് മേലോഗാത്ത്‌ല് ഇര്‌ക്കുവാദ്‌ന പാസെ ഉള്ളാദ്‌മാന നെലെ പട്ട്‌ക്കല്ല മേലോഗാക്ക്‌ത്തെ ക്‌റ്‌സ്‌ത്ത് പോയിര്‌ന്റാന്. അയാള് നമാന കയിതാങ്ക്യ ബേ്ണ്ടി ഇന്നാല് സാമി മുന്നുക്കു നിന്റ്‌റ്‌ക്ക്‌ന്റാന്. 25 എഗുദാര് ദൊഡ്ഡ പൂസാരി ബര്‌സ്സാക്ക് ഒന്റു നാള് അരാങ്ക കുച്ചുക്കു തന്ന് സൊന്ത സോരെ അല്ലാത്ത ബേ്ണ്ട് സോരെന എ്ഡ്‌ത്ത് പോന്റാന്. ആന ക്‌റ്‌സ്‌ത്ത് തനാന താനെ പിന്നേമ് പിന്നേമ് നേര്‌സെ കൊഡുക്ക്യ ബേ്ണ്ടി പോഗാലെ. 26 അത്തെ ആനദാന ഉലഗ ഉണ്ടാക്ക്‌ന മുദാലിന്ത് അയാള് എഞ്ചോ ജമ്പ് കജട്ട പട്ടിന്ത്‌റ്‌ക്കുഡൊ. ആന ഇന്നാല് കാല മുഡ്യ പക്കാഗാട്ടി അയാള് തനാന താനെ പലി കൊഡുത്തു എല്ലാ ആള്‌ഗാള് പാവഗാള്‌ന തീര്‌ക്ക്യ ബേ്ണ്ടി ഒന്റേ ഒന്റു ജമ്പ് ബന്താന്. 27 എല്ലാ ആള്‌ഗാള്‌മ് ഒന്റു നാള്‌ക്ക് സാഡൊ. അദ്‌ക്ക് പ്‌റ സാമി അവാര്‌ന ബിദിക്കുവാന്. 28 ഇദേപാസെ എഞ്ചോ ആള്‌ഗാള് പാവഗാള്‌ന തീര്‌ക്ക്യ ക്‌റ്‌സ്‌ത്ത് ഒന്റു ജമ്പ് തനാന താനെ പലി കൊഡുത്താന്. ജനഗാള് പാവാക്ക് ബേ്ണ്ടി അല്ല തനാന കാത്ത്‌റ്‌ക്കുവ ജനഗാള്‌ന കാപാറ്റ്യ ബേ്ണ്ടി ക്‌റ്‌സ്‌ത്ത് റണ്ടാവാദ് ബരുവാന്. |
New Life Computer Institute