എവുറായാര് 7 - സാമി സേദിമല്ക്കിസേദേക്ക് പൂസാരി 1 മല്‌ക്കിസേദേക്ക് സാലേമ് പട്ടണ രാജാവുമു എല്ലാദ്‌ക്ക്‌മ് ബ്‌ഡ മ്‌ഗ്‌ന്ത ബില ഇര്‌ക്കുവ സാമിത്ത് പൂസാരിമ് ആയിന്താന്. ജുദ്ദ ഗേന്ത് രാജാവുഗാള്‌ന സോലുസി അവുറഗാമ് തിരിഗി ബര്‌ഗാട്ടി മല്‌ക്കിസേദേക്ക് അയാള്‌ന കണ്ട് ബാക്ക്‌വര കൊഡുത്താന്. 2 അവുറഗാമ് ജുദ്ദ ഗേന്ത് കെ്ഡേസ്‌ന എല്ലാദ്‌ലിന്ത്‌മ് പത്ത്‌ല് ഒന്റു പങ്ക് മല്‌ക്കിസേദേക്ക്‌ക്ക് കൊഡുത്താന്. മല്‌ക്കിസേദേക്ക് എന്റ് സൊന്ന <<നേര്‌മെ ഉള്ള രാജാവു>> എന്റ്‌ത്തെ അര്‌ത്ത. <<സാലേമ് രാജാവു>> ആനാദ്‌നാലെ <<നിമ്മ്‌ദ്യാന രാജാവു>> എന്റ്‌മ് അര്‌ത്ത ഇര്‌ക്ക്‌ന്റ്. 3 അയാള് അപ്പാന് ആരെന്റൊ, അവ്വെ ആരെന്റൊ, അയാള് പാട്ടനാമ് ആരെന്റൊ, എന്നാല് പ്‌റാന്താനെന്റൊ, എന്നാല് സത്താനെന്റൊ ആര്‌ക്ക്‌മ് തെര്യ. അയാള് സാമി മഗാന്‌ന പാസെ എന്നാല്‌ക്ക്‌മ് പൂസാരിമ് ആയിര്‌ക്ക്‌ന്റാന്. 4 മല്‌ക്കിസേദേക്ക് എത്ത്‌റ ദൊഡ്ഡവാന് എന്റ് നോഡുനു! നമ്മ് പാട്ടാന് അവുറഗാമ് താന് ജുദ്ദ ഗേന്ത് കെ്ഡേസ്‌ന സൊത്തുലിന്ത് പത്ത്‌ല് ഒന്റു പങ്ക്‌ന മല്‌ക്കിസേദേക്ക്‌ക്ക് കൊഡുത്താനല്ല? 5 പൂസാരിഗാള് ആന്റവാരാന ലേവി കുലാക്ക് പട്ടവാര്‌ക്ക്, തമ്മ് ആള്‌ഗാള് ആന അവുറഗാമ് കാല്‌കെ്ളേക്ക് പട്ട ഇസ്‌റവേല്‌ഗാറാര് താനെ, പത്ത്‌ല് ഒന്റു പങ്ക് കൊഡുക്ക്യ മോസെ ബെത്ത സാമി സട്ടാത്ത്‌ല് സൊല്ലിര്‌ക്ക്‌ന്റ്. 6 ആന ലേവി കുലാക്ക് പഡാത്തവാന് ആന മല്‌ക്കിസേദേക്ക്, അവുറഗാമോഡ താനെ പത്ത്‌ല് ഒന്റു പങ്ക് ബാങ്കിമ് സാമി ബാക്ക് കൊഡുത്ത അയാള്‌ക്ക് ബാക്ക്‌വര കൊഡുത്തുമു ഇര്‌ക്ക്‌ന്റാന്. 7 ബാക്ക്‌വര കൊഡുക്കുന്റവാന് ബാക്ക്‌വര കെ്ഡേസ്‌ന്റവാന്‌ന ബ്‌ഡ ദൊഡ്ഡവാന്‌ത്തെ എന്റ് എല്ലാവാര്‌ക്ക്‌മ് തെരിമല്ല. 8 പത്ത്‌ല് ഒന്റു പങ്ക് കെ്ഡേസുവ പൂസാരിഗാള് സത്ത് പോവ മന്‌സാര്‌ഗാള്‌ത്തെ. ആന അവുറഗാമ്‌ലിന്ത് പത്ത്‌ല് ഒന്റു പങ്ക് ബാങ്ക്‌ന മല്‌ക്കിസേദേക്ക് പെ്ളേക്ക്‌ന്റാന് എന്റ് സാമി സൊല്ലുസുലാക്ക താനെ സൊല്ലുന്റു. 9 അവുറഗാമ് പത്ത്‌ല് ഒന്റു പങ്ക് മല്‌ക്കിസേദേക്ക്‌ക്ക് കൊഡുക്കാട്ടി പത്ത്‌ല് ഒന്റു പങ്ക് ബാങ്കുവ ലേവ്യാര്‌മ് മല്‌ക്കിസേദേക്ക്‌ക്ക് കൊഡുത്താര് എന്റ്‌മ് ബേ്ഡ്‌മാന സൊല്ലുല. 10 എന്ത്‌ക്കെന്റ് സൊന്ന മല്‌ക്കിസേദേക്ക് അവാര് പാട്ടാന് അവുറഗാമ്‌ന കാണ്‌ഗാട്ടി ലേവ്യാര് അവുറഗാമ് സോരേല് ഇന്ത്‌റ്‌ന്റാരല്ല? 11 ലേവി കുലാക്ക് പട്ട പൂസാരിഗാള് പദാവിപട്ടാക്ക് എ്ണേത്ത്‌ത്തെ ഇസ്‌റവേല്‌ഗാറാര്‌ക്ക് മോസെ ബെത്ത സാമിസട്ട കെ്ഡേത്താദ്. ലേവി കുലാക്ക് പട്ട പൂസാരിഗാള് ഗേവ കാര്യഗാള്‌നാലെ സാമി ആസെപട്ടാദ് ഒട്ടുക്കു ഒന്റേപെ്ട്ട് നഡാന്ത് മുഡിന്തിന്തദാന അഗരോനുന പൂസാരി മാഡ്‌ന ദിന്‌സ്‌ല് അല്ലാദെ മല്‌ക്കിസേദേക്ക്‌ന പൂസാരി മാഡ്‌ന ദിന്‌സ്‌ല് ബേ്റെ ഒന്റു പൂസാരി ബരുവ തേവി എന്ത്‌ക്ക്? 12 എന്ത്‌ക്കെന്റ് സൊന്ന പൂസാരി പദാവിപട്ടാക്ക് മാറ്റ ബര്‌ഗാട്ടി മോസെ ബെത്ത സാമി സട്ടാക്ക്‌മ് മാറ്റ ബന്ത്‌റ്‌ക്കുഡൊ. 13 ഇദ്‌ല് സൊല്ലി ബരുവ പൂസാരി ബേ്റൊന്റു കുലാക്ക് പട്ടവാന്‌ത്തെ. അയാള് കുലാക്ക് പട്ടവാര് ആര്‌മ് പൂസാരി ഗിലാസ ഗേഗാലെ. 14 നമ്മ് ആണ്ടവാന് എഗുദ കുലാക്ക് പട്ടവാന്‌ത്തെ എന്നുവാദ് എല്ലാവാര്‌ക്ക്‌മ് നലമായി തെരിമ്. അദ്‌താനേമല്ല അയി കുലാക്ക് പട്ടവാര് പൂസാരിഗാള് ആവാര് എന്റ് മോസെ സൊല്ലാമില്ലെ. മല്‌ക്കിസേദേക്ക്‌ന പാസെത്തെ ഏസ്സ് 15 മല്‌ക്കിസേദേക്ക്‌ന പാസെ ഉള്ള ബേ്റെ ഒന്റു പൂസാരി ബന്റാന് എന്റ്‌ത്തെ ഈ കാര്യഗാള് ഒട്ടുക്കു സെരിക്ക്‌മ് സൊക്കാന കാട്ടി തരുവാദ്. 16 ഏദ് കുലാത്ത്‌ലവാര് പൂസാരി ആഡൊ എന്റ് മന്‌സാന് ബെത്ത സട്ടപഡ്യല്ല അയാള് പൂസാരി ആനാദ്, അദ്‌ക്ക് ബദ്‌ല അളിക്ക്യ മുഡ്യാത്ത തന്ന് ഉജുരുക്കു ഇര്‌ക്കുവ സക്‌തിനാലെത്തെ അയാള് പൂസാരി ആനാദ്. 17 എന്ത്‌ക്കെന്റ് സൊന്ന സാമി സൊല്ലുസുലാക്കാത്ത്‌ല്, <<മല്‌ക്കിസേദേക്ക്‌ന പൂസാരി മാഡ്‌ന ദിന്‌സ്‌ല് നീ എന്നാല്‌ക്ക്‌മ് പൂസാരി ആയിര്‌ക്ക്‌ന്റായി>> എന്റ്‌ത്ത്യല്ല അയാള്‌ന പറ്റി എ്ള്‌ദിര്‌ക്കുവാദ്. 18 പൂസാരി പദാവിപട്ടന പറ്റ്യുള്ള പള്യ സട്ട ഒറേപ്പില്ലാത്താദ്‌മ് ഒന്റുക്കുമു ആഗാത്താദ്‌മ് ആനാദ്‌നാലെ അദ്‌ന തള്ള്‌നാന്. 19 എന്ത്‌ക്കെന്റ് സൊന്ന സാമി ആസെപട്ടാദ്‌ന ഒട്ടുക്കു നഡാത്തി മുഡിക്ക്യ മോസെ ബെത്ത സാമി സട്ടാക്ക് മുഡ്യാലെ. ആന അദ്‌ന ബ്‌ഡ മ്‌ഗ്‌ന്ത നെഞ്ചഡെ ഇന്നാല് നമാക്ക് കെ്ഡേത്ത്‌റ്‌ക്ക്‌ന്റ്. അയി നെഞ്ചഡെനാലെ നമ്മ സാമി പട്ട്‌ക്ക് പോന്റാമ്. 20 സാമി സത്ത്യ ഗേന്ത്‌ത്തെ ഈ പൂസാരിന എ്ഡ്‌ത്ത് ബെത്താദ്. സത്ത്യ ഗേഗാദെത്തെ ബേ്റെ ആള്‌ഗാള് പൂസാരിഗാള് ആനാദ്. 21 ആന സാമി സത്ത്യ ഗേന്ത്‌ത്തെ ഏസ്സ് പൂസാരി ആനാദ്. സാമി അയാള്‌ക്ക്: << <നീ എന്നാല്‌ക്ക്‌മ് പൂസാരി ആയിര്‌ക്ക്‌ന്റായി> എന്റ് ആണ്ടവാന് സത്ത്യ ഗേന്താന്, അയാള് തന്ന് മനേസ്സ്‌ന മാറ്റമാട്ടാന്>> എന്റ് സൊന്നാന്. 22 ഇത്തെ സത്ത്യ ഗേന്താദ്‌നാലെ സാമി മന്‌സാരോഡ ബെത്ത്‌റ്‌ക്കുവ ഒന്റേപെ്ട്ട് മ്‌ഗ്‌ന്ത ഒപ്പന്ത നഡാക്ക്‌മ് എന്നുവാദ്‌ക്കുള്ള ഒറേപ്പ്‌ത്തെ ഏസ്സ്. 23 അദ്‌താനേമല്ല, പൂസാരിഗാള് ബേ്റെ ആള്‌ഗാള്‌ന പാസെ മന്‌സാര് ആയിര്‌ക്കുവാദ്‌നാലെ അവാര് സത്ത് പോന്റാര്. അത്തെ ഒന്റാള് സാഗാട്ടി അയാള്‌ക്ക് ബദ്‌ല് ബേ്റെ ഒന്റാള് പൂസാരി ആന്റാന്. അദ്‌നാലെ അദ്‌ല് എഞ്ചോ പൂസാരിഗാള് ഇന്ത്‌റ്‌ന്റാര്. 24 ആന ഏസ്സ് എന്നാല്‌ക്ക്‌മ് പെ്ളേക്കുവാദ്‌നാലെ അയാള് പൂസാരി പദാവിപട്ട ബേ്റെ ആള്‌ക്ക് കയിമാറാദെ എന്നാല്‌ക്ക്‌മ് ഇര്‌ക്ക്‌ന്റ്. 25 അത്തെ ഏസ്സ്‌നാലെ സാമി പട്ട്‌ക്ക് ബന്റവാര്‌ന എന്നാല്‌ക്ക്‌മ് കാപാറ്റ്യ തനാക്ക് മുഡിമ്. എന്ത്‌ക്കെന്റ് സൊന്ന അവാര്‌ക്ക് ബേ്ണ്ടി സാമ്യോഡ ഉദാവി കേ്ള്‌ക്ക്യ അയാള് എന്നാല്‌ക്ക്‌മ് പെ്ളേക്ക്‌ന്റാന്. 26 ഇത്തെ ഒന്റു ദൊഡ്ഡ പൂസാരിത്തെ നമാക്ക് ബേ്ഡ്‌മ്. അയാള് സാമിക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റവാന്‌മ്, കുറ്റ ഒന്റുമു സൊല്ല്യ ഇല്ലത്തവാന്‌മ്, പാവ ഇല്ലത്തവാന്‌മ്, പാവ ഗേന്റവാര്‌ലിന്ത് അലാക്ക പ്‌റ്‌ത്ത് ബെത്ത്‌റ്‌ന്റവാന്‌മ്‌ത്തെ. അയാള്‌ക്ക് മേലോഗാത്ത്‌ല് ഉജാന്ത പദാവിപട്ട കെ്ഡേത്ത്‌ദ്. 27 എഗുദാര് ദൊഡ്ഡ പൂസാരിഗാള്‌ല് ബേ്റെ ആള്‌ഗാള്‌ന പാസെ മുദാല് തന്ന് പാവഗാള്‌ക്ക് ബേ്ണ്ടിമ് പ്‌റ അഡ്‌ത്തവാര് പാവഗാള്‌ക്ക് ബേ്ണ്ടിമ് ഒപ്പ പലി കൊഡുക്കുവ തേവി ഏസ്സ്‌ക്ക് ഇല്ലാദിന്ത്‌ദ്. ഏസ്സ് ഒന്റേ ജമ്പ് താനെ ഒന്റു പലി ആയി തനാന സാമിക്ക് ഒപ്പിസി കൊഡുത്താന്. 28 മോസെ ബെത്ത സാമിസട്ട കുറ്റകൊറേവു ഉള്ള മന്‌സാര്‌ഗാള്‌ന എഗുദാര് ദൊഡ്ഡ പൂസാരി ആയി എ്ഡ്‌ത്ത് ബെക്ക്‌ന്റ്. ആന അയി സട്ട കെ്ഡേത്ത പ്‌റ സാമി സത്ത്യഗേന്ത് കൊഡുത്ത ബാക്ക്‌ന ബെത്ത് തന്ന് മഗാന്‌ന ദൊഡ്ഡ പൂസാരി മാഡ്‌നാന്. അയി മഗാന് സാമി ആസെപട്ടാദ്‌ന ഒട്ടുക്കു ഒന്റേപെ്ട്ട് എല്ലാ കാലാക്ക് ബേ്ണ്ടി നഡാത്തി മുഡിത്താന്. |
New Life Computer Institute