എവുറായാര് 6 - സാമി സേദി1 അദ്‌നാലെ ക്‌റ്‌സ്‌ത്ത്‌ന പറ്റി സാമി സൊല്ലുസുലാക്കാത്ത്‌ലിന്ത് മുദാല് പഡിത്ത കാര്യഗാള്‌ന മറിസി മറിസി പഡിക്കുവാദ്‌ന തള്ളി നിമാന നമ്പിക്കേല് മ്‌ഗ്‌ന്തവാര് മാഡുവ കാര്യഗാള്‌ന പഡിക്ക്യ നോഡുനു. സാവുക്കു ആളാക്കുവ കാര്യഗാള്‌ന തെ്റിന്ത് സാമിസാരി തിര്‌ഗുവാദ്, സാമിന നമ്പുവാദ്, 2 നീര്‌ക്ക് മുളുഗുസുവാദ്, തലേക്ക് കയി ബെത്ത് പരേസുവാദ്, സത്തവാര് ഉജുര്‌ളാഗുവാദ്, മുഡിവില്ലാത്ത ദെ്ണ്ടണെ എന്നുവാദ്‌ഗാള്‌ന പറ്റി പിന്നേമ് പഡിക്ക്യ പ്‌ഡിക്കാദേന്. 3 സാമിക്ക് പിര്യ ഇന്തദാന നമാന മ്‌ഗ്‌ന്തവാര് മാഡുവ കാര്യഗാള്‌ന പറ്റി നമ്മ പഡിക്ക്യാമ്. 4-6 ഒന്റു ഗളിഗേല് സത്ത്യന കണ്ട് മേലോഗാത്ത്‌ലിന്ത് കെ്ഡേക്കുവ ബരഗാള് കെ്ഡേസി പെ്ളേത്തവാര്‌മ് സാമിനിഗാല്‌ന ഒന്റു പങ്കായി കെ്ഡേസ്‌നവാര്‌മ് ആനവാര് നമ്പിക്കേന ബ്‌ട്ട് തള്ള്‌നദാന അവാര്‌ന പിന്നെ എത്തെ മറിസി സാമിസാരി തിരിക്ക്യ മുഡിമ്? അവാര് സാമി സൊല്ലുസുലാക്ക എത്ത്‌റ നല്ലാദ് എന്റ്‌മ് ബര്യ ഇര്‌ക്കുവ ഉലഗാക്ക് ഇര്‌ക്കുവ സക്‌തി എത്ത്‌റ ദൊഡ്ഡാദ് എന്റ്‌മ് തെരിന്തവാര്‌ത്തെ. എന്റിന്ത് ഗുഡി തമ്മ് നമ്പിക്കേന ബ്‌ട്ട്‌റ്‌ക്കുവ അവാര്‌ന മറിസിമ് സാമിസാരി തിരിക്ക്യ മുഡ്യാമാട്ട. എന്ത്‌ക്കെന്റ് സൊന്ന അവാര് സാമി മഗാന്‌ന പിന്നേമ് കുരുസുക്കു സേത്തി ആണി അഡിത്ത്‌മ് എല്ലാര്‌ക്ക് എദ്‌ക്ക അയാള്‌ന മാനാമ് ഗെ്ഡ്‌സ്‌ന്റാര്. 7 എ്ഡെക്കെ്ഡേക്ക് അഡിത്ത മഗെന മണ്ണ് കുഡിത്ത് കാഡ്‌ഗാറാര്‌ക്ക് ഉവഗര ഉള്ള സെ്ഡികൊഡിഗാള്‌ന മൊളേസി ബളാത്ത്‌നദാന സാമി അയി മണ്ണ്‌ന നല്ലാദ് മാഡ്‌ന്റാന്. 8 ആന അയി കാഡ് മുള്ളുഗാള്‌നാമ് മുള്ളു സെ്ഡിഗാള്‌നാമ് മൊളേസി ബളാത്ത്‌നദാന അദ് ഉവഗര ഇല്ലത്താദ്‌മ് സാപ്പ പ്‌ഡിത്താദ്‌മ്‌ത്തെ. കഡേഗല അദ് സുട്ടു തള്ള്യാത്തെ ഉവഗരപഡ്‌മ്. 9 ആന എമാക്ക് മെച്ച്‌പ്‌ഡിത്തവാരെ, എമ്മ ഈ ദിന്‌സ്‌ല് നിമാക്ക് സൊന്നാല്‌മ് സാമി നിമാന കാപാറ്റ്‌നാദ്‌നാലെ കെ്ഡേത്ത്‌റ്‌ക്കുവ മ്‌ഗ്‌ന്ത കാര്യഗാള് നിമാക്ക് ഇര്‌ക്ക്‌ന്റ് എന്റ് എമാക്ക് ഒറേപ്പിര്‌ക്ക്‌ന്റ്. 10 നിമ്മ ഗേന്ത കാര്യഗാള്‌നാമ് സാമ്യോഡ നിമ്മ ബെത്ത സീവാന്‌നാമ് മറാന്ത് തള്ള്യ സാമി നേര്‌മല്ലത്തവാന് അല്ല. സാമ്യോഡ സീവാന്‌ബെത്താദ്‌നാലെ സാമിക്ക് പട്ടവാര്‌ന നിമ്മ കയി താങ്കിര്‌ക്ക്‌ന്റ്‌റ്. ഇന്നാല്‌മ് അവാര്‌ന കയിതാങ്കി കൊണ്ടു ഇര്‌ക്ക്‌ന്റ്‌റ്. 11 ഇദ്‌ഗാളെല്ല ഗേയ ബേ്ണ്ടി നിമ്മ കാട്ടുവ അദേ സുറുസുറുപ്പു നിമ്മ നെഞ്ചഡെ ബെത്ത്‌റ്‌ക്കുവ കാര്യ കെ്ഡേക്ക്യ ബേ്ണ്ടി നിമ്മ ഒന്റൊന്റാള്‌മ് പെ്ളേക്കുവ കാല മാട്ട്‌ക്ക്‌മ് കാട്ടുഡൊ എന്നുവാദ്‌ത്തെ എമ്മ് മ്‌ഗ്‌ന്ത ആസെ. 12 അത്തെ നിമ്മ കള്ള ബീ്ഗാത്തവാര് ആഗാദെ നമ്പിക്കെനാലേമ് പൊറിമെനാലേമ് സാമി തന്റെ എന്റ് സൊല്ലി ബാക്ക് തന്ത്‌റ്‌ക്കുവാദ്‌ന കെ്ഡേസ്‌ന്റവാര്‌ന പാസെ ആഡൊ എന്റ്‌ത്തെ എമ്മ് ആസെ. സാമി ഒറേപ്പായിമ് തന്റെ എന്റ് സൊല്ലിര്‌ക്കുവ ബാക്ക് 13 സാമി അവുറഗാമ്‌ക്ക് ബാക്ക് കൊഡുക്കാട്ടി തനാന ബ്‌ഡ ദൊഡ്ഡവാന്‌ന ബെത്ത് സത്ത്യ ഗേയ ബേ്റെ ആളില്ലാത്താദ്‌നാലെ തന്ന് പേര്‌ന താനെ സൊല്ലി സത്ത്യ ഗേന്താന്. 14 അദ്‌നാലെത്തെ <<നാന് നിനാക്ക് നല്ലാദ് ഗേന്ത് തരുവെ, നിന്ന് കാല്‌കെ്ളെന മൊത്തനാക്ക് പെര്‌ക്കുവെ>> എന്റ് സാമി അവുറഗാമ്‌ക്ക് സൊന്നാദ്. 15 അത്തെ അവുറഗാമ് പൊറിമോഡ കാത്തിന്ത് സാമി ബാക്ക് കൊഡുത്താദ്‌ന കെ്ഡേസ്‌നാന്. 16 ആള്‌ഗാള് സത്ത്യ ഗേഗാട്ടി തമാന ബ്‌ഡ ദൊഡ്ഡവാന് ആയിര്‌ക്കുവ ഒന്റാള് പേര്‌ല്‌ത്തെ സത്ത്യ ഗേന്റാര്. അത്തെ സത്ത്യ ഗേവാദ്‌നാലെ സൊല്ലുവാദെല്ല നേര്‌മ് ആന്റ്, എല്ലാ തറ്‌ക്കഗാള്‌ക്ക് മുഡിവുമു ആന്റ്. 17 താന് ബാക്ക് കൊഡുത്താദ്‌ന എന്നാല്‌ക്ക്‌മ് തവാറ്‌സമാട്ടെ എന്റ് ബാക്ക് കൊഡുത്ത കാര്യഗാള് കെ്ഡേക്ക്‌ന്റവാര്‌ക്ക് കാട്ടി കൊഡുക്ക്യ ബേ്ണ്ടി സാമി ബാക്ക് കൊഡുത്താദ്‌ന സത്ത്യഗേന്ത് ഒറേപ്പ് മാഡ്‌നാന്. 18 സാമി ബാക്ക് കൊഡുത്താദ്‌മ് സത്ത്യ ഗേന്താദ്‌മ് മാറ്റ്യ മുഡ്യാത്ത റാഡ് കാര്യഗാള്‌ത്തെ. എന്ത്‌ക്കെന്റ് സൊന്ന സാമിക്ക് പൊയി സൊല്ല്യ മുഡ്യാമാട്ട. അദ്‌നാലെ പാദ്‌ഗാപ്പ്‌ക്ക് ബേ്ണ്ടി സാമി പട്ട്‌ക്ക് പോവ നമാക്ക് ഈ റാഡ് കാര്യഗാള് നമ്മ ബെത്ത്‌റ്‌ക്കുവ നെഞ്ചഡേല് ഒറേത്ത് നില്ല്യ ദയിരപഡ്‌സ്‌ന്റ്. 19 ഒറേപ്പ് ഉള്ളാദ്‌മ് ബിലാഗി പോഗാത്താദ്‌മ് ആന നമാക്കിര്‌ക്കുവ ഈ നെഞ്ചഡെ കപ്പാല്‌ന ഒന്റു പട്ട്‌ല് താനെ നില്ലിസി ബെക്കുവ ഒന്റു നങ്കൂരന പാസെത്തെ. അയി നെഞ്ചഡെ മേലോഗാത്ത്‌ല സാമിബീ്ഡ്‌ല തെരെസീലെ മേലെ നമാന അരാങ്ക കുച്ചുക്കു എ്ഡ്‌ത്ത് പോന്റു. 20 മല്‌ക്കിസേദേക്ക്‌ന പൂസാരി മാഡ്‌ന ദിന്‌സ്‌ല് ഏസ്സ് എന്നാല്‌ക്ക്‌മ് ദൊഡ്ഡ പൂസാര്യായി മുദാല് താനെ നമാക്ക് ബേ്ണ്ടി അദ്‌ക്ക് എജ്ജിര്‌ക്ക്‌ന്റാന്. |
New Life Computer Institute