എവുറായാര് 3 - സാമി സേദിഏസ്സ് മോസെന ബ്‌ഡ ദൊഡ്ഡവാന് 1 അദ്‌നാലെ സാമി ബ്‌ളിത്ത്‌റ്‌ക്ക്‌ന്റവാര്‌മ് സാമിക്ക് പട്ടവാര്‌മ് ആന ഏസ്സ്‌ഗാറാരെ, സാമി സൊല്ലി ബ്‌ട്ടവാന് എന്റ്‌മ് ദൊഡ്ഡ പൂസാരി എന്റ്‌മ് നമ്മ സൊല്ലുവ ഏസ്സ്‌ന പറ്റി നെനേത്ത് നോഡുനു. 2 സാമിബീ്ഡ്‌ന നോഡിനഡാത്തുവ കാര്യഗാള്‌ല് ഒട്ടുക്കു മോസെ നമ്പ്യ മുഡിന്റവാന് ആയിന്ത പാസെ ഏസ്സ്‌മ് തനാന എ്ഡ്‌ത്ത് ബെത്ത സാമിക്ക് നമ്പ്യ മുഡിന്റവാന്‌ത്തെ. 3 ബീ്ഡ്‌ന ബ്‌ഡ ബീ്ഡ്‌ന കെ്ട്ട്‌നവാന്‌ക്ക്‌ത്തെ അദിഗ മദ്‌പ്പ് ഇര്‌ക്കുവ പാസെ ഏസ്സ്‌മ് മോസെന ബ്‌ഡ അദിഗ മദ്‌പ്പ്‌ക്ക് തഗ്‌ദ്യുള്ളവാന്‌ത്തെ. 4 ഏദ് ബീ്ഡ്‌മ് കെ്ട്ട്യ ഒന്റാള് ബേ്ഡ്‌മ്. ആന എല്ലാദ്‌നാമ് ഉണ്ടാക്ക്‌നാദ് സാമി താനെത്തെ. 5 സാമിബീ്ഡ്‌ന നോഡിനഡാത്തുവ കാര്യഗാള്‌ല് ഒട്ടുക്കു മോസെ ഒന്റു ഗിലാസഗാറാര്‌ന പാസെ നമ്പ്യ മുഡിന്റവാന് ആയിന്താന്. അദ് ഇന്ന്യുള്ള കാലാത്ത്‌ല് സാമിക്ക് സൊല്ല്യ ഇര്‌ക്കുവാദ്‌ന ആള്‌ഗാള്‌ക്ക് സൊല്ല്യ ബേ്ണ്ടിത്തെ. 6 ആന ക്‌റ്‌സ്‌ത്ത് സാമിബീ്ഡ്‌ന നോഡിനഡാത്തുവ കാര്യാത്ത്‌ല് ഒന്റു മഗാന്‌ന പാസെ നമ്പ്യ മുഡിന്റവാന് ആയിര്‌ക്ക്‌ന്റാന്. നമ്മ നമ്പിക്കേല് ദയിര ഉള്ളവാര്‌മ് നമ്മ നെഞ്ചഡെ ബെത്ത്‌റ്‌ക്കുവാദ്‌ല് പെരിമെ ഇര്‌ക്ക്‌ന്റവാര്‌മ് ആയിന്തദാന നമ്മാത്തെ അയാള് ബീ്ഡ്. സാമിഗാറാര്‌ക്കുള്ള എ്ളേപ്പ് 7 അദ്‌നാലെ സാമിനിഗാല് സൊല്ലുവ പാസെ: <<ഇന്റ് നിമ്മ അയാള് ജദ്ദന കേ്ള്‌ക്കുവദായിന്തദാന, 8 നിമ്മ് പാട്ടനാമ് ബെ്ട്ടെകാഡ്‌ല് സാമിന സോദിത്ത ഗളിഗേല് സാമി സൊല്ലുവാദ്‌ന കേ്ള്‌ക്ക്യ മനേസ്സ് ബെക്കാദിര്‌ക്കാട്ടി തമ്മ് നെഞ്ച്‌ന മര നെഞ്ച് മാഡ്‌ന പാസെ നിമ്മ് നെഞ്ച്‌നാമ് മര നെഞ്ച് മാഡാദേന്. 9 അദ്‌ല് ബെത്ത് നിമ്മ് പാട്ടനാമ് എനാന സോദണെ ഗേന്താര്, നാപ്പദ് ബര്‌സ്സ നാന് ഗേന്താദ്‌ന കണ്ട് ഗുഡി അവാര് എനാന സോദിത്താര്. 10 അദ്‌നാലെ എനാക്ക് അയി തലെകെ്ട്ട്‌ഗാളോഡ മൊനെ ബന്ത് <അവാര് എന്നാല്‌ക്ക്‌മ് എനാന ബ്‌ട്ട് ദൂര പോന്റവാര്‌മ് എന്ന് കല്‌പനെ പഡി നഡാക്കുവാദ്‌ന തള്ള്‌ന്റവാര്‌മ്> എന്റ് നാന് സൊന്നെ. 11 അത്തെ <നാന് അവാര്‌ന എ്ളേക്ക്യ ബെക്കുവ പട്ട്‌ക്ക് അവാര് എന്നാല്‌ക്ക്‌മ് എജ്ജമാട്ടാര്> എന്റ് നാന് മൊനേക്ക് തെ്ട്ടി സത്ത്യ ഗേന്തെ.>> 12 അദ്‌നാലെ ഏസ്സ്‌ഗാറാരെ, നിമ്മ് കൂട്ടാത്ത്‌ല് ആര് നെഞ്ച്‌മ് കീ്ട്ട്‌ഗ ഇര്‌ക്കുവാദ്‌മ് നമ്പിക്കെ ഇല്ലാദെ ഇര്‌ക്കുവാദ്‌മ് ആഗാദിര്‌ക്ക്യ നിമ്മ നോഡുനു. അത്തെ ആഗാദിന്ത നിമ്മ ഉജുരുള്ള സാമിന തള്ളമാട്ട്‌റ്. 13 ആന നിമ്മ ആര്‌മ് പാവ ഗേന്ത് സദിക്ക് സിക്കാദിര്‌ക്ക്യ ബേ്ണ്ടിമ് മരനെഞ്ച്‌ഗാറാര് ആഗാദിര്‌ക്ക്യ ബേ്ണ്ടിമ് <<ഇന്റ്>> എന്റ് സൊല്ലുവ നാള് ഇര്‌ക്കുവ മാട്ട്‌ക്ക് നാള്‌ക്ക്‌മ് ആങ്കീങ്ക് ബുദ്ദി സൊല്ലി നഡാന്. 14 എന്ത്‌ക്കെന്റ് സൊന്ന നമാക്ക് മുദാലിന്ത അദേ നമ്പിക്കേന കഡേസി മാട്ട്‌മ് ബ്‌ഡാദിന്തദാന നമ്മ ക്‌റ്‌സ്‌ത്തോഡ പങ്ക്‌ഗാറാര് ആല. 15 സാമി സൊല്ലുസുലാക്കാത്ത്‌ല് ഇത്തെ സൊല്ലിര്‌ക്ക്‌ന്റ്: <<ഇന്റ് നിമ്മ അയാള് ജദ്ദന കേ്ള്‌ക്കുവദായിന്തദാന, സാമി സൊല്ലുവാദ്‌ന കേ്ള്‌ക്ക്യ മനേസ്സ് ബെക്കാദിര്‌ക്കാട്ടി നിമ്മ് പാട്ടനാമ് തമ്മ് നെഞ്ച്‌ന മര നെഞ്ച് മാഡ്‌ന പാസെ നിമ്മ് നെഞ്ച്‌നാമ് മര നെഞ്ച് മാഡാദേന്.>> 16 സാമി സൊന്നാദ്‌ന കേ്ട്ടിന്ത് ഗുഡി കേ്ള്‌ക്ക്യ മനേസ്സ് ബെക്കാദിന്തവാര് ആര്? മിസ്‌റേമ്‌ലിന്ത് മോസെ കൂട്ടി ബന്ത അദേ ആള്‌ഗാള്‌ത്തെ. 17 സാമി ആരോഡ നാപ്പദ് ബര്‌സ്സ മൊനെപട്ടിന്താന്? പാവ ഗേന്ത അദേ ആള്‌ഗാളോഡാത്തെ. അവാരെല്ല ബെ്ട്ടെകാഡ്‌ല് സത്ത് കുദുങ്കുനാര്. 18 നാന് അവാര്‌ന എ്ളേക്ക്യ ബെക്കുവ പട്ട്‌ക്ക് അവാര് എന്നാല്‌ക്ക്‌മ് എജ്ജമാട്ടാര് എന്റ് മൊനേക്ക് തെ്ട്ടി സത്ത്യ ഗേന്താദ് ആരോഡ? സാമി സൊല്ലുവാദ്‌ന കേ്ള്‌ക്കത്തവാരോഡത്തെ. 19 അത്തെ അവാര്‌ക്ക് നമ്പിക്കെ ഇല്ലത്താദ്‌നാലെ അയി എ്ഡേക്ക് എജ്ജ്യ അവാര്‌ക്ക് മുഡ്യാലെ എന്റ് നമാക്ക് തെരിന്റ്. |
New Life Computer Institute