എവുറായാര് 2 - സാമി സേദിസാമി കാപാറ്റുവാദ് മ്‌ഗ്‌ന്താദ്‌ത്തെ 1 അദ്‌നാലെ നമ്മ കേ്ട്ട സത്ത്യഗാള്‌ന അദിഗ ഗെവുനിക്കുഡൊ. അത്തെ ഗേന്ത കപ്പാല് ആങ്കീങ്ക് അലേന്ത് നഡാക്കുവ പാസെ നമ്മ അയി സത്ത്യഗാള്‌ന ബ്‌ട്ട് അലേന്ത് നഡാക്കമാട്ടാമ്. 2 ദൂദാര്‌ഗാള്‌ന ബെത്ത് സാമി സൊന്ന സേദി നേര് എന്റ് കാട്ടിര്‌ക്ക്‌ന്റ്. അയി സേദിന കേ്ള്‌ക്ക്യ നില്ലാദേമ് അയി സേദിന തള്ളിമ് നഡാന്തവാര്‌ക്ക് അദ്‌ക്ക് തഗ്‌ന്ത ദെ്ണ്ടണെ കെ്ഡേത്ത്‌ദ്. 3 അത്ത്യാന സാമി നമാന കാപാറ്റിര്‌ക്കുവ ദൊഡ്ഡ കാര്യന ഇന്നിമ് ദൊഡ്ഡ കാര്യല്ല എന്റ് ബെത്തദാന നമാക്ക് എത്തെ തപ്പിസി കഡാക്ക്യ മുഡിമ്? ആണ്ടവാന്‌ത്തെ നമാന കാപാറ്റുവാദ്‌ന പറ്റി മുദാല് സൊന്നാദ്. അദ്‌ന കേ്ട്ടവാര് ഇദ് സത്ത്യത്തെ എന്റ് നമാക്ക് കാട്ടി തന്ത്‌റ്‌ക്ക്‌ന്റാര്. 4 ഇദല്ലാദെ താനെ അഡ്യാളഗാള് കാട്ടി കൊണ്ടുമു അദിസ്യഗാള് ഗേന്ത് കൊണ്ടുമു അദിസ്യപഡുവ ദൊഡ്ഡുദൊഡ്ഡ കാര്യഗാള് ഗേന്ത് കൊണ്ടുമു ഇദ് സത്ത്യ എന്റ് ആണ്ടവാന് കാട്ടി തന്ത്‌റ്‌ന്റാന്. സാമിനിഗാല് തരുവ ബരഗാള്‌ന തന്ന് ആസെപഡി കൊഡുത്തു കൊണ്ടുമു ഇദ് സത്ത്യ എന്റ് ആണ്ടവാന് കാട്ടി തന്ത്‌റ്‌ന്റാന്. നമാന കാപാറ്റ്‌ന്റവാന് 5 നമ്മ നായനൊഡിന്ത് കൊണ്ട്‌റ്‌ക്കുവ ബര്യ പോവ ഉലഗാന ആള്‌ന്റവാരായി ദൂദാര്‌ഗാള്‌ന സാമി എ്ഡ്‌ത്ത് ബെക്കാലെ. 6 സാമി സൊല്ലുസുലാക്കാത്ത്‌ല്: <<നീ മന്‌സാന്‌ന പറ്റി നെനേക്ക്യ അയാള് തഗ്‌ദ്യുള്ളവാന? മന്‌സാനായി ഇര്‌ക്ക്‌ന്റവാന്‌ന കാക്ക്യ അയാള് അത്ത്‌റാക്ക്‌മ് മുക്ക്യമാന ആള? 7 ലേസ കാല മാട്ട്‌ക്ക് ദൂദാര്‌ഗാള്‌ന ബ്‌ഡ താന്തവാനായി നീ അയാള്‌ന ഉണ്ടാക്കിര്‌ക്ക്‌ന്റായി. നീ അയാള്‌ക്ക് മാനനാമ് മദ്‌പ്പ്‌നാമ് ഗിര്യാഡായി കൊഡുത്ത്‌റ്‌ന്റായി. 8 എല്ലാദ്‌നാമ് അയാള് കാല്‌കഡി മാഡി ബെത്ത്‌റ്‌ന്റായി>> എന്റ് ഒരുത്താന് ഒന്റു പട്ട്‌ല് എ്ള്‌ദിര്‌ക്ക്‌ന്റാന്. <<എല്ലാദ്‌നാമ് അയാള് കാല്‌കഡി മാഡി ബെത്ത്‌റ്‌ന്റായി>> എന്റ് സൊല്ലുഗാട്ടി അയാള് അദിഗരാക്ക് പഡാത്തദായി ഒന്റുമു ഇല്ലെ എന്റ്‌ത്തെ കാട്ട്‌ന്റ്. ആന ഇന്നാല് എല്ലാദ്‌മ് അയാള് അദിഗരാക്ക് പട്ടാദായി കാണുവാദില്ലെ. 9 ആന സാമി പ്‌ണ്ണ്യാത്ത്‌ല് എല്ലാവാര്‌ക്ക്‌മ് ബേ്ണ്ടി സായ, ഏസ്സ് ലേസ കാല മാട്ട്‌ക്ക് ദൂദാര്‌ഗാള്‌ന ബ്‌ഡ താന്തവാന് ആനാന്. താന് കജട്ട പട്ട് സത്താദ്‌നാലെ അയാള്‌ക്ക് മാനനാമ് മദ്‌പ്പ്‌നാമ് ഗിര്യാഡായി കൊഡുത്ത്‌റ്‌ന്റാന് എന്റ് നമ്മ കാണ്‌ന്റാമ്. 10 എല്ലാദ്‌നാമ് ദ്‌ട്ടിസി പാദ്‌ഗാത്ത് ബെക്ക്‌ന്റവാന്‌ത്തെ സാമി. എഞ്ചോ മഗാനാര് തന്ന് മദ്‌പ്പ്‌ക്ക് പങ്ക്‌ഗാറാര് ആയ ബേ്ണ്ടി അവാര്‌ന കാപാറ്റുവ ഏസ്സ്‌ന എഞ്ചോ കജട്ടഗാള്‌പഡ്യ ബ്‌ട്ട് ഒന്റുക്കുമു കൊറേവില്ലത്തവാന് മാഡുവാദ് അയി സാമിക്ക് നല്ലാദ്‌ത്തെ ആയിന്ത്‌ദ്. 11 പാവാന തീത്ത് സുത്താപ്പ് മാഡുവ ഏസ്സ്‌ത്ത്‌മ് സുത്താപ്പാനവാര്‌ത്ത്‌മ് അപ്പാന് ഒന്റാള്‌ത്തെ. അദ്‌നാലെത്തെ അവാര്‌ന തന്ന് പ്‌റാന്തപ്‌റാപ്പ്‌ഗാള് എന്റ് സൊല്ല്യ ഏസ്സ് നാണപഡാത്താദ്. 12 അയാള് സാമിക്ക് ഇത്തെ സൊന്റാന്: <<നീ ആര് എന്നുവാദ്‌ന നാന് എന്ന് ആള്‌ഗാള്‌ക്ക് സൊല്ലി നഡാക്കുവെ, അവാര് ഒന്റായി കൂട്ട കൂഡുവ പട്ട്‌ല് നാന് നിനാന ഉജാത്തി സൊല്ലുവെ.>> 13 പിന്നേമ് അയാള്, <<നാന് സാമിക്ക് അണ്ടി കൊള്ളുവെ>> എന്റ്‌മ് <<ഇദാഗെ, നാന്‌മ് സാമി എനാക്ക് തന്ത പ്‌ള്ളെഗാള്‌മ്>> എന്റ്‌മ് സൊന്റാന്. 14 പ്‌ള്ളെഗാള് സോരെനീര് ഇര്‌ക്കുവ മന്‌സാര്‌ഗാള് ആനാദ്‌നാലെ ഏസ്സ്‌മ് അവാര്‌ന പാസെ മന്‌സാന് ആനാന്. തനാക്ക് ബന്ത സാവുനാലെ സാവുക്കു അദിഗാരി ആന സെയിത്താന്‌ന അളിക്ക്യ ബേ്ണ്ടിത്തെ ഏസ്സ് ഇത്തെ അവാര്‌ന പാസെ ആനാദ്. 15 ഇത്തെ പെ്ളേക്കുവ കാല അഞ്ച്‌ക്ക്‌മ് സാവുക്കു അഞ്ചി അഡിമെഗാളായി ഇന്തവാര്‌ന ഒട്ടുക്കു തനാക്ക് ബന്ത സാവുനാലെ അയാള് ബ്‌ഡ്‌സ്‌നാന്. 16 എന്ത്‌ക്കെന്റ് സൊന്ന ഏസ്സ് ബന്താദ് ദൂദനാമ്‌ന പാദ്‌ഗാക്ക്യല്ല അവുറഗാമ് കാല്‌കെ്ളെഗാള്‌ന പാദ്‌ഗാക്ക്യത്തെ ബന്താദ്. 17 അദ്‌നാലെ അയാള് ജനഗാള് പാവഗാള്‌ന തീര്‌ക്ക്യ ബേ്ണ്ടി ഗവഗാറാന്‌മ് സാമിക്ക് ബേ്ണ്ടി ഗിലാസ ഗേവാദ്‌ല് നമ്പ്യ മുഡിവ ദൊഡ്ഡ പൂസാരിമ് ആഡൊ. അദ്‌ക്ക് ബേ്ണ്ടി അയാള്‌ക്ക് എല്ലാ ദിന്‌സ്‌ല്‌മ് തന്ന് ജനഗാള്‌ന പാസെ ആവ തേവി ബന്ത്‌ദ്. 18 താന്‌താനെ സോദണെ പട്ട് കജട്ടന താങ്കിര്‌ക്കുവാദ്‌നാലെ അയാള്‌ക്ക് ഇന്നാല് സോദണെപഡ്‌ന്റവാര്‌ന കയിതാങ്ക്യ മുഡിമ്. |
New Life Computer Institute