എവുറായാര് 11 - സാമി സേദിനമ്പിക്കെ 1 നമ്മ നെഞ്ചഡെ ബെത്ത്‌റ്‌ക്കുവ കാര്യഗാള്‌ന പറ്റ്യുള്ള ഒറേപ്പ്‌മ് കാണാത്ത കാര്യഗാള് ആനാല്‌മ് അദ് സത്ത്യത്തെ എന്റ് തെരിവാദ്‌മ്‌ത്തെ നമ്പിക്കെ. 2 മുന്തെല കാലാത്ത്‌ല് പെ്ളേത്തിന്തവാര് നമ്പ്‌നാദ്‌നാലെത്തെ സാമി അവാര്‌ന തനാക്ക് തഗ്‌ദ്യുള്ളവാരായി കണ്ടാദ്. 3 സാമി തന്ന് സൊല്ലുസുലാക്കാന ബെത്ത് ഈ ഉലഗാന ഉണ്ടാക്ക്‌നാന് എന്റ് നമ്പിക്കെ ഇര്‌ക്കുവാദ്‌നാലെ നമ്മ നെപ്പ്കെ്ഡേസ്‌ന്റാമ്. അത്തെ കാണാത്ത കാര്യഗാള്‌ന ബെത്ത് കാണുവ കാര്യഗാള്‌ന ഉണ്ടാക്ക്‌നാന് എന്റ് നമാക്ക് കാണ്യ മുഡിമ്. 4 ആവേല്‌ക്ക് നമ്പിക്കെ ഇന്താദ്‌നാലെ കയീന് കൊഡുത്താദ്‌ന ബ്‌ഡ നല്ല നേര്‌സെ സാമിക്ക് കൊഡുത്താന്. അയാള് നമ്പ്‌നാദ്‌നാലെ അയാള്‌ക്ക് നേര്‌മെഗാറാന് എന്നുവ മദ്‌പ്പ്‌മ് കെ്ഡേത്ത്‌ദ്, അയാള് സാമിക്ക് കൊഡുത്ത പലി തനാക്ക് മെച്ച്‌പ്‌ഡിത്ത്‌ദ് എന്റ് സാമി സൊല്ലിമ് ഇര്‌ന്റാന്. അയാള് സത്താന്. ആനാല്‌മ് നമ്പിക്കെനാലെ അയാള് ഇന്നാല്‌മ് നായനൊഡിന്ത് കൊണ്ട്‌റ്ക്ക്‌ന്റാന്. 5 ആനോക്കുക്കു നമ്പിക്കെ ഇന്താദ്‌നാലെ സായ ബ്‌ഡാദെ സാമി അയാള്‌ന എ്ഡ്‌ത്ത് പോനാന്. സാമി അയാള്‌ന എ്ഡ്‌ത്ത് പോനാദ്‌നാലെ ആര്‌മ് അയാള്‌ന കാണാലെ. അയാള്‌ന എ്ഡ്‌ത്ത് പോവാദ്‌ക്ക് മുദാല് താനെ അയാള് സാമിന പിര്യപഡ്‌സ്‌നാന് എന്റ് സാമി സൊല്ലുസുലാക്കാത്ത്‌ല് സൊല്ലിര്‌ക്ക്‌ന്റ്. 6 നമ്പിക്കെ ഇല്ലാദെ ആര്‌ക്ക്‌മ് സാമിന പിര്യപഡിസ്യ മുഡ്യാമാട്ട. എന്ത്‌ക്കെന്റ് സൊന്ന സാമി പട്ട്‌ക്ക് ബന്റവാന് സാമി ഇര്‌ക്ക്‌ന്റാന് എന്റ്‌മ് സാമിന കേ്ട്ട്‌കണ്ട് നോഡുന്റവാര്‌ക്ക് സാമിലിന്ത് കൂലി കെ്ഡേക്ക്‌മ് എന്റ്‌മ് നമ്പുഡൊ. 7 നോഗേക്ക് നമ്പിക്കെ ഇന്താദ്‌നാലെ അന്നമാട്ട്‌ക്ക് താന് കാണാദിന്ത കാര്യഗാള്‌ന പറ്റി സാമി സൊന്നാദ്‌ന കേ്ള്‌ക്ക്യ മുഡിന്ത്‌ദ്. സാമി സൊന്നാദ്‌ന കേ്ട്ട് തന്ന് പെ്ണ്ട്‌പ്‌ള്ളെന കാപാറ്റ്യ നോഗെ ദൊഡ്ഡ ഒന്റു പെ്ട്ടി മാഡ്‌നാന്. അത്തെ അയാള് ഉലഗാന കുറ്റാമ് ബിദിത്ത് നമ്പുവാദ്‌നാലെ സാമി കണ്ണ്‌ക്ക് നേര്‌മെഗാറാന്‌മ് ആനാന്. 8 സാമി തനാക്ക് കൊഡുക്കുവെ എന്റ് ബാക്ക് കൊഡുത്തിന്ത നാഡ്‌ക്ക് പോയ സാമി അവുറഗാമ്‌ന ബ്‌ളിക്കാട്ടി, അയാള്‌ക്ക് നമ്പിക്കെ ഇന്താദ്‌നാലെ സാമി സൊന്നാദ്‌ന കേ്ട്ട് പോനാന്. താന് ഏങ്ക് പോന്റാന് എന്റ് തെര്യാദെ താനെ പ്‌റപട്ട് പോനാന്. 9 സാമി കൊഡുക്കുവെ എന്റ് ബാക്ക് കൊഡുത്തിന്ത അയി നാഡ്‌ല് അവുറഗാമ്‌ക്ക് നമ്പിക്കെ ഇന്താദ്‌നാലെ ഒന്റു അന്ന്യ നാഡ്‌ഗാറാന്‌ന പാസെ പെ്ളേത്താന്. സാമി അവുറഗാമ്‌ക്ക് കൊഡുക്കുവെ എന്റ് ബാക്ക് കൊഡുത്തിന്ത അദേ ബാക്ക് കെ്ഡേത്ത ഇസഗാക്കോഡാമ് ആക്കോവോഡാമ് ഗുഡുസുലുഗാള്‌ല് അയാള് തങ്ക്‌നാന്. 10 എന്ത്‌ക്കെന്റ് സൊന്ന എത്തവ ദിന്‌സ്‌ല് പട്ടണ മാഡുഡൊ എന്റ് സാമി താനെ മുഡിവാക്കിന്താദ്‌മ് സാമി താനെ മാഡ്‌നാദ്‌മ് ആന എന്നാല്‌ക്ക്‌മ് ഇര്‌ക്കുവ പട്ടണാക്ക് ബേ്ണ്ടി അവുറഗാമ് കാത്ത് കൊണ്ടിന്താന്. 11 സാറ ബറാഡി ആയിന്ത്‌മ് അവുറഗാമ് ഒന്റേപെ്ട്ട് പേറാള് ആയിന്ത്‌മ് ഗുഡി നമ്പിക്കെ ഇന്താദ്‌നാലെ അവുറഗാമ്‌ക്ക് പ്‌ള്ളെഗാറാനായ മുഡിന്ത്‌ദ്. സാമി ബാക്ക് തന്താദ്‌ന അയാള് ഗേന്ത് തരുവാന് എന്റ് അവുറഗാമ് നമ്പ്‌നാന്. 12 അത്തെ പേരാളായി സായായി ഇന്ത ഒന്റു മന്‌സാന്‌ലിന്ത് ബാന്‌ല ബെ്ള്ളിഗാള്‌ന പാസേമ് കഡാലോരാത്ത്‌ല എ്ണ്ണ്‌സി തീര്‌ക്ക്യ മുഡ്യാത്ത മണാല് തരിഗാള്‌ന പാസേമ് കാല്‌കെ്ളെ ഉണ്ടാനാര്. 13 ഇവാര് എല്ലാവാര്‌മ് സാവു മാട്ട്‌ക്ക് നമ്പിക്കേല് പെ്ളേത്തിന്താര്. സാമി തരുവെ എന്റ് ബാക്ക് കൊഡുത്തിന്ത കാര്യഗാള് ഒന്റുമു അവാര്‌ക്ക് കെ്ഡേക്കാലെ. എന്റാല്‌മ് ദൂര ഇന്ത് അദ്‌ഗാള്‌ന കണ്ട്‌മ് അദ്‌ഗാള്‌ന തങ്കാരിത്ത്‌മ് ഇര്‌ക്ക്‌ന്റാര്. തമ്മ ബൂമില് അന്ന്യ നാഡ്‌ഗാറാര്‌മ് പളാക്ക ഇല്ലത്തവാര്‌മ് എന്റ് ആള്‌ഗാള്‌ക്ക് എദ്‌ക്ക സൊന്നാര്. 14 ഇത്തെ സൊന്റവാര് തമാക്ക് സൊന്ത ആന ഒന്റു നാഡ്‌ക്ക് ബേ്ണ്ടി കാത്ത്‌റ്‌ക്ക്‌ന്റാര് എന്റ് സൊക്കാന കാട്ടി തന്റ്. 15 അവാര് തള്ളി ബന്ത നാഡ്‌ന പറ്റി നെനേക്കുവദാന അവാര്‌ക്ക് തിരിഗി പോയ മുഡിമായിന്ത്‌ദ്. 16 ആന അവാര് ഒന്റേപെ്ട്ട് നലമായിര്‌ക്കുവ നാഡ്‌ക്ക്, മേലോഗ നാഡ്‌ക്ക് ബേ്ണ്ടിത്തെ കാത്തിന്താര്. അദ്‌നാലെ അവാര്‌ന തന്ന് ജനഗാള് എന്റ് സൊല്ല്യ സാമി നാണപഡുവാദില്ലെ. അവാര്‌ക്ക് ബേ്ണ്ടി സാമി ഒന്റു പട്ടണ ഒരിക്കി ബെത്ത്‌റ്‌ക്ക്‌ന്റാനല്ല. 17-18 സാമി അവുറഗാമ്‌ന സോദണെ ഗേഗാട്ടി അവുറഗാമ്‌ക്ക് നമ്പിക്കെ ഇന്താദ്‌നാലെ തന്ന് മഗാന് ഇസഗാക്ക്‌ന ഒന്റു പലി ആയി സാമിക്ക് കൊഡുത്താന്. <<ഇസഗാക്ക് കാല്‌ലിന്ത് പ്‌റാക്ക്‌ന്റവാര് നിന്ന് കാല്‌കെ്ളെ എന്റ് ബ്‌ളിക്കുവാര്>> എന്റ് സാമി അവുറഗാമ്‌ക്ക് സൊല്ലി ബാക്ക് കൊഡുത്തിന്ത് ഗുഡി അവുറഗാമ് തന്ന് ഒന്റേ ഒന്റു മഗാന്‌ന പലി കൊഡുക്ക്യ ഒരുങ്ക്‌നാന്. 19 മന്‌സാന്‌ന സത്തവാര് പട്ട്‌ലിന്ത് ഉജുര്‌ളാക്ക്യ സാമിക്ക് മുഡിമ് എന്റ് അവുറഗാമ് നമ്പ്‌നാന്. ഒന്റു കണാക്ക്‌ല് സൊന്ന അവുറഗാമ്‌ക്ക് സാവുലിന്ത് ഇസഗാക്ക്‌ന തിരിക്കി കെ്ഡേത്ത്‌ദ്. 20 ഇസഗാക്ക്‌ക്ക് നമ്പിക്കെ ഇന്താദ്‌നാലെ ആക്കോവുക്കുമു ഏസ്സാവുക്കുമ് ബര്യ പോവ കാലാക്കുള്ള ബാക്ക്‌വരഗാള്‌ന കൊഡുത്താന്. 21 നമ്പിക്കെ ഇന്താദ്‌നാലെത്തെ ആക്കോവു താന് സാവ ഗളിഗേല് ഓസേപ്‌ത്ത് റാഡ് മക്കാള്‌ഗാള്‌ക്ക്‌മ് ബാക്ക്‌വര കൊഡുത്താദ്. കുത്തി നഡാക്കുവ ബഡില് ഊന്റി അയാള് സാമിന കുമ്മുഡുനാന്. 22 നമ്പിക്കെ ഇന്താദ്‌നാലെത്തെ ഓസേപ് സായാഗാട്ടി മിസ്‌റേമ് നാഡ്‌ലിന്ത് ഇസ്‌റവേല്‌ഗാറാര് പോവാദ്‌ന പറ്റി സൊല്ലിമ് അവാര് പോഗാട്ടി തന്ന് എല്‌മ്പ്‌ഗാള്‌ന എ്ഡ്‌ത്ത് പോഡൊ എന്റ് കല്‌പനേമ് കൊഡുത്താദ്. 23 മോസെ അവ്വ്യപ്പാന്‌ക്ക് നമ്പിക്കെ ഇന്താദ്‌നാലെ മോസെ പ്‌റാക്കാട്ടി അവാര് അയി മഗാന മൂറു മാസ ഒളിസി ബെത്തിന്താര്. അദ് അയി മഗ അളാഗുള്ളവാന് എന്റ് അവാര്‌ക്ക് തെരിന്താദ്‌നാലെത്തെ. രാജാവു കല്‌പനേന മീ്റി നഡാക്കുവാദ്‌ന അവാര് അഞ്ചാദേമ് ഇന്താര്. 24 മോസേക്ക് നമ്പിക്കെ ഇന്താദ്‌നാലെ അവാന് ദൊഡ്ഡാദാഗാട്ടി തനാന മിസ്‌റേമ് രാജാവു മഗാള്‌ത്ത് മഗാന് എന്റ് ബ്‌ളിക്കുവാദ്‌ന ബേ്ഡ എന്റ് ബെത്താന്. 25 പാവ ഗേന്ത് സെറ്റെ നേര കെ്ഡേക്കുവ പിര്യാത്ത്‌ല് പൊങ്കി നഡാക്കുവാദ്‌ന ബ്‌ഡ സാമി ജനഗാളോഡ കജട്ട പഡുവാദ്‌ന അയാള് തെരിന്തെ്ഡ്‌ത്താന്. 26 മിസ്‌റേമ് നാഡ്‌ല എല്ലാ സൊത്തു മുദാല്‌ഗാള്‌ന ബ്‌ഡ ക്‌റ്‌സ്‌ത്ത്‌ക്ക് ബേ്ണ്ടി കജട്ട താങ്കുവാദ്‌ത്തെ ബെലെപെറ്റാദ് എന്റ് മോസെ നെനേത്താന്. എന്ത്‌ക്കെന്റ് സൊന്ന സാമി അയാള്‌ക്ക് കൊഡുക്കുവെ എന്റ് സൊല്ലിന്ത കൂലിക്ക് ബേ്ണ്ടി മോസെ കാത്തിന്താന്. 27 മോസേക്ക് നമ്പിക്കെ ഇന്താദ്‌നാലെ രാജാവു മൊനേക്ക് അഞ്ചാദെ അയാള് മിസ്‌റേമ്‌ലിന്ത് പോനാന്. ആര്‌ക്ക്‌മ് കാണ്യ മുഡ്യാത്ത സാമിന കണ്ട പാസെ അയാള് ഒറേപ്പോഡ പോനാന്. 28 മോസേക്ക് നമ്പിക്കെ ഇന്താദ്‌നാലെ കൊല്ലുവ ദൂദാന് ഇസ്‌റവേല്‌ല തലെകോഡി മഗാനാര്‌ന കൊല്ലാദിര്‌ക്ക്യ ബേ്ണ്ടി പെസഗെ നോമ്പി ഗേയാമ് ബെത്താന്. ബാസാക്ക് സോരെന തളിക്ക്യ ആള്‌ഗാള്‌ക്ക് സൊല്ലിമ് ഇന്താന്. 29 നമ്പിക്കെ ഇന്താദ്‌നാലെ ഉലാത്തെ ഇര്‌ക്കുവ എ്ഡെ മേലെ പോവ പാസെ ഇസ്‌റവേല്‌ഗാറാര് സെങ്കഡാല് മേലെ കഡാന്താര്. അദേപാസെ താനെ മിസ്‌റേമ്‌ഗാറാര് ഗേയ നോഡുഗാട്ടി സെങ്കഡാല്‌ല് മുളിഗി പോനാര്. 30 നമ്പിക്കെ ഇന്താദ്‌നാലെ ഇസ്‌റവേല്‌ഗാറാര് എരിഗോവു പട്ടണന ഏ്ള് നാള് സുറ്റി നഡാക്കാട്ടി അയി പട്ടണ സിവാര് ഇ്ഡിന്ത് ബ്‌ന്ത്‌ദ്. 31 നമ്പിക്കെ ഇന്താദ്‌നാലെ റാഗാവു എന്നുവ ബേസി ഇസ്‌റവേല്‌ഗാറാരാന കാട്ടി കൊഡുക്കുന്റവാര്‌ന പിര്യപിര്യാത്ത് തങ്കാരിത്താള്. അത്തെ അവാള് സാമി സൊല്ലുന കേ്ള്‌ക്കത്തവാരോഡ കെ്ട്ട് പോഗാദിന്താള്. 32 ഇദ്‌ക്ക് മീ്റി നാന് എന്ത്‌ന സൊല്ല്യ? ഗിദ്യോനുനാമ്, ബാരാക്ക്‌നാമ്, സിമ്മുസോനുനാമ്, ഇപ്‌ത്താഗ്‌നാമ്, ദാവീദ്‌നാമ്, സമുവേല്‌നാമ്, ബാക്കി സാമിദാസ്‌ഗാള്‌നാമ് പറ്റി സൊല്ല്യ എനാക്ക് നേര ഇല്ലെ. 33 അവാര്‌ക്ക് നമ്പിക്കെ ഇന്താദ്‌നാലെ രാജ്യഗാള്‌ന സോലുസ്‌നാര്, നേര്‌മെ ഉള്ള കാര്യഗാള്‌ന ഗേന്താര്, സാമി തരുവെ എന്റ് ബാക്ക് തന്താദ്‌ന കെ്ഡേസ്‌നാര്, സിങ്കഗാള് ബായിന കെ്ട്ട്‌നാര്, 34 കത്തി എരേവ തീന കെ്ഡ്‌സ്‌നാര്, ബാള്‌ല് കൊല്ല്യപഡുവാദ്‌ലിന്ത് തപ്പ്‌സ്‌നാര്. അവാര് മുജുവില്ലത്തവാര് ആയിന്ത് ഗുഡി മുജുവുള്ളവാരാനാര്. അവാര് ജുദ്ദ ഗേവാദ്‌ല് ഗട്ടിഗാറാര് ആയിന്താര്. അവാര് അന്ന്യ നാഡ് പട്ടളഗാറാര്‌ന മുഡിക്കി ബ്‌ട്ടാര്. 35 സത്ത് പോന തമ്മ് സൊന്തഗാറാര്‌ന പെ്ണ്ണ്‌മക്കാള്‌ക്ക് ഉജുരോഡ തിരിക്കി കെ്ഡേത്ത്‌ദ്. ആന ലേസ ആള്‌ഗാള് ഉജുര്‌ളാഗി നല്ലൊന്റു പെ്ളേപ്പ് കെ്ഡേക്ക്യ ബേ്ണ്ടി തമാന കൊഡിമെപഡ്‌സാദെ ബെ്റ്‌ദെ ബ്‌ഡുവാദ്‌ന ബേ്ഡെന്റ് ബെത്ത് കൊഡിമെ പട്ട് സത്താര്. 36 ബേ്റെ ലേസ ആള്‌ഗാള്‌ന നാണാമ് ഗെ്ഡ്‌സ്‌നാര്, സാട്ടെവാര്‌ല്‌മ് അഡിത്താര്. സങ്കിലിക്ക്‌മ് കെ്ട്ട്‌നാര്, ജെയില്‌ക്ക്‌മ് അഡേത്താര്. 37 ബേ്റെ ലേസ ആള്‌ഗാള്‌ന കല്ലെ്റിന്ത്‌മ് കൊന്റാര്, ഈര്‌സെ ബാള്‌ല് അറ്‌ത്ത് റാഡ് തുണ്ടുമു മാഡ്‌നാര്, ബാള്‌ല് ബെ്ട്ടിമ് കൊന്റാര്. ആഡ്‌ഗാള്‌ത്ത്‌മ് കൊറ്യാഡ്‌ഗാള്‌ത്ത്‌മ് തോലുലു സരിഗലന മറേസി കൊണ്ടു അലേന്ത് നഡാന്താര്. അവാര് ഏ്ളെഗാള്‌മ്, കൊഡിമെ പട്ടവാര്‌മ്, നാണഗെ്ട്ടവാര്‌മ്‌ത്തെ. 38 അവാര് ബെ്ട്ടെകാഡ്‌ല്‌മ്, മലെഗാള്‌ല്‌മ്, അളെഗാള്‌ല്‌മ്, മണ്ണ് ബായിഗാള്‌ല്‌മ് അലേന്ത്‌പലേന്ത് നഡാന്താര്. അവാര്‌ന പെ്ളേക്ക്യ ബെക്കുവാദ്‌ക്കുള്ള തഗ്‌ദി ഈ ഉലഗാക്ക് ഇല്ലെ. 39 അവാര്‌ക്ക് ഇന്ത നമ്പിക്കെനാലെ അവാര് എല്ലാവാര്‌മ് നല്ല പേര് കെ്ഡേസ്‌നവാര്‌ത്തെ. എന്റാല്‌മ് സാമി കൊഡുക്കുവെ എന്റ് ബാക്ക് കൊഡുത്താദ് അവാര്‌ല് ആര്‌ക്ക്‌മ് കെ്ഡേക്കാലെ. 40 എന്ത്‌ക്കെന്റ് സൊന്ന അവാര് നമ്മോഡൊപ്പ അല്ലാദെ ഒന്റേപെ്ട്ട് ഒന്റുക്കുമു കൊറേവില്ലത്തവാര് ആയ സാമി നമാക്ക് ബേ്ണ്ടി എല്ലാദ്‌ക്ക്‌മ് ബ്‌ഡ മ്‌ഗ്‌ന്താദ് ഈ്ട്ടി ബെത്തിന്താന്. |
New Life Computer Institute