എവുറായാര് 10 - സാമി സേദി1 ബര്യ പോവ നല്ല കാര്യഗാള്‌ന മാഗെമാഗ്യ ദിന്‌സ്‌ല് കാട്ടുവ ഉരുവാത്തെ മോസെ ബെത്ത സാമിസട്ട. ആന അദ് സെരിക്കുള്ള ഉരുവല്ല. അയി സട്ടാക്ക് കെ്ട്ട്‌പട്ട് ഇര്‌ക്ക്‌ന്റവാര് എല്ലാ ബര്‌സ്സാമ് മറിസി മറിസിമ് ഒന്റേ പലി താനെ കൊഡുക്കുന്റാര്. ഇത്തെ പലി കൊഡുക്കുവാദ്‌നാലെ കുമ്മുഡ്യ ബന്റവാര്‌ന ഒന്റേപെ്ട്ട് കൊറേവു ഇല്ലത്തവാര് മാഡ്യ അയി സട്ടാക്ക് മുഡ്യാമാട്ട. 2 അത്തെ മാഡ്യ മുഡിന്തിന്തദാന പലി കൊഡുക്കുവാദ് താനെ നിന്റ് പോയിര്‌ക്ക്‌മല്ല? കുമ്മുഡ്യ ബന്റവാര് ഒന്റേ ജമ്പ് താനെ സുത്താപ്പുള്ളവാര് ആയിന്തദാന തമ്മ പാവ ഗേന്തവാര് എന്നുവ നെനേവു പിന്നെ അവാര്‌ക്ക് ഇന്ത്‌റ്‌ക്കമാട്ട. 3 ആന ഇത്തെ പലി കൊഡുക്കുവാദ്‌നാലെ തമ്മ പാവ ഗേന്തവാര് എന്നുവ നെനേവു അവാര്‌ക്ക് എല്ലാ ബര്‌സ്സാമ് ബന്റ്. 4 എന്ത്‌ക്കെന്റ് സൊന്ന ആഡ്‌ഗാള്‌ത്ത്‌മ് ഓരി മാഡ്‌ഗാള്‌ത്ത്‌മ് സോരേക്ക് പാവഗാള്‌ന തീര്‌ക്ക്യ മുഡ്യാമാട്ട. 5 അദ്‌നാലെ ക്‌റ്‌സ്‌ത്ത് ബൂമിക്ക് ബര്‌ഗാട്ടി, <<നേര്‌സെഗാള്‌മ് പലിഗാള്‌മ് നീ ആസെപഡാലെ. ആന നീ എനാക്ക് ബേ്ണ്ടി ഒന്റു സരിഗല ഒരിക്കി ബെത്ത്‌റ്‌ന്റായി. 6 ബേ്ണ്ട്‌ഗാള്‌ന സുട്ടു ബൂദി മാഡുവാദ്‌ലൊ പാവഗാള്‌ന തീര്‌ക്ക്യ ബേ്ണ്ടി പലിഗാള് കൊഡുക്കുവാദ്‌ലൊ നീ പിര്യപഡാലെ. 7 അദുക്കുള സാമി സൊല്ലുസുലക്കാത്ത്‌ല് എനാന പറ്റി എ്ള്‌ദിര്‌ക്കുവ പാസെ നാന് സൊന്നെ, <ഇദാഗെ നാന് ബന്റെ, ദെയിവമേ, നിനാക്ക് പ്‌ഡിത്താദ് ഗേയ നാന് ബന്റെ> >> എന്റ് സൊന്നാന്. 8 <<നേര്‌സെഗാള്‌ലൊ പലിഗാള്‌ലൊ ബേ്ണ്ട്‌ഗാള്‌ന സുട്ടു ബൂദി മാഡുവാദ്‌ലൊ പാവഗാള്‌ന തീര്‌ക്ക്യ ബേ്ണ്ടി പലിഗാള് കൊഡുക്കുവാദ്‌ലൊ നീ പിര്യപഡാമില്ലെ, ആസെപഡാമില്ലെ>> എന്റ് അയാള് മുദാല് സൊന്നാന്. ഇദ്‌ഗാളെല്ല മോസെ ബെത്ത സാമി സട്ടപഡി കൊഡുക്കുവ പലിഗാള്‌ത്തെ. 9 പ്‌റ <<ദെയിവമേ, നിനാക്ക് പ്‌ഡിത്താദ് ഗേയ നാന് ബന്റെ>> എന്റ്‌മ് അയാള് സൊന്നാന്. അത്തെ പലി കൊഡുക്കുവ പള്യ സട്ട്‌മെ്ട്ട്‌ന തള്ളി അദ്‌ക്ക് പുദ്യ സട്ട്‌മെ്ട്ട് ബെത്താന്. 10 താന് ഗേഡൊ എന്റ് സാമി ആസെപട്ടാദ്‌ന ഏസ്സ് ക്‌റ്‌സ്‌ത്ത് ഗേന്താന്. അത്തെ തന്ന് സരിഗലന താനെ ഒന്റേ ഒന്റു ജമ്പ് പലി കൊഡുത്തു നമാന സുത്താപ്പ് മാഡ്‌നാന്. 11 ഒന്റൊന്റു പൂസാരിഗാള്‌മ് എല്ലാ നാള്‌മ് നിന്റ് കൊണ്ടു ഒന്റേ പലിന താനെ മറിസി മറിസി കൊഡുത്തു തമ്മ് ഗിലാസഗാള്‌ന ഗേന്റാര്. അയി പലിഗാള്‌ക്ക് പാവഗാള്‌ന തീര്‌ക്ക്യ മുഡ്യാമാട്ട. 12 ആന ക്‌റ്‌സ്‌ത്തൊ പാവഗാള്‌ക്ക് ബേ്ണ്ടി ഒന്റേ ഒന്റു പലി കൊഡുത്താന്. എല്ലാ കാലാക്ക്‌മ് അയി പലി മദി. പ്‌റ അയാള് സാമി ബല സാരി കുക്കാന്ത്‌റ്‌ക്ക്‌ന്റാന്. 13 തന്ന് പോട്ടിഗാറാര്‌ന തന്ന് കാല്‌കഡി മാഡമാട്ട്‌ക്ക് ക്‌റ്‌സ്‌ത്ത് അദ്‌ല് കാത്ത്‌റ്‌ക്ക്‌ന്റാന്. 14 തനാന താനെ ഒന്റേ ഒന്റു ജമ്പ് കൊഡുത്ത പലിനാലെ പാവാന തീത്ത് സുത്താപ്പ് മാഡ്‌നവാര്‌ന എല്ലാ കാലാക്ക്‌മ് ഒന്റേപെ്ട്ട് കൊറേവു ഇല്ലത്തവാര് മാഡ്‌നാന്. 15-17 ഇദ്‌ന പറ്റി ആണ്ടവാന് ഇത്തെ സൊന്റാന് എന്റ് സാമിനിഗാല്‌മ് നമാക്ക് സൊല്ലുന്റു, <<ഇന്നി ബര്യ പോവ കാലാത്ത്‌ല് നാന് അവാരോഡ ബെക്കുവ ഒപ്പന്ത ഇദ്‌ത്തെ, എന്ന് സട്ടഗാള്‌ന നാന് അവാര് നെഞ്ച് കുള്ളുക്കു ബെക്കുവെ. അവാര് മനേസ്സ്‌കുള്ളുക്കു നാന് അയി സട്ടഗാള്‌ന എ്ള്‌ദുവെ.>> അദ്‌ക്ക് പ്‌റ <<അവാര് ഗേവ പാവഗാള്‌നാമ് കെ്ട്ട കാര്യഗാള്‌നാമ് നാന് എന്നാല്‌ക്ക്‌മ് നെനേക്കമാട്ടെ>> എന്റ്‌മ് സൊല്ലുന്റു. 18 ഈ കാര്യഗാള്‌ക്കെല്ല പൊറിമെ കെ്ഡേത്തനാലെ പാവഗാള്‌ന തീര്‌ക്ക്യ ഇന്നി ബേ്റൊന്റു പലി ബേ്ഡ. സാമിന അണ്ടി കൊണ്ടേ പെ്ളേക്കുഡൊ 19 അദ്‌നാലെ ഏസ്സ്‌ഗാറാരെ, ഏസ്സ് സൂസുന സോരെനാലെ ദയിരത്തോഡ നമാക്ക് അരാങ്ക കുച്ചുക്കു പോയ മുഡിമ്. 20 ഏസ്സ് നമാക്ക് ബേ്ണ്ടി ഉജുരുള്ളാദ്‌മ് പുദ്യാദ്‌മാന ഒന്റു ബട്ടെ മാഡി തന്ത്‌റ്‌ക്ക്‌ന്റാന്. അദ് തന്ന് സരിഗല എന്നുവ തെരെസീലെ മേലെത്തെ. 21 അദ്‌താനേമല്ല സാമിബീ്ഡ്‌ന നോഡിനഡാത്തുവ ഒന്റു ദൊഡ്ഡ പൂസാരിമ് നമാക്ക് ഇര്‌ന്റാന്. 22 അദ്‌നാലെ കുറ്റ ഗേന്തെ എന്റ് മനേസ്സ്‌ല് ഇര്‌ക്കുവ നെനേവുഗാള്‌ലിന്ത് സുത്താപ്പായ ബേ്ണ്ടി ക്‌റ്‌സ്‌ത്ത് സോരെ തളിത്ത മനേസ്സോഡാമ്, തെങ്ക്‌തെങ്ക നീര്‌ല് കച്ച്‌ന സരിഗലോഡാമ്, കവാഡ് ഒന്റുമില്ലാത്ത മനേസ്സോഡാമ്, ഒറേത്ത നമ്പിക്കോഡാമ് നമ്മ സാമി പട്ട്‌ക്ക് പോഗാന്. 23 നമ്മ എദ്‌ക്ക സൊല്ലുവ നമ്മ് നെഞ്ചഡേല് ഒറേത്ത് നില്ല്‌ഗാന്. എന്ത്‌ക്കെന്റ് സൊന്ന നമാക്ക് ബാക്ക് തന്ത്‌റ്‌ക്കുവ സാമി അദ്‌ന നഡാത്തി തരുവാന് എന്റ് സാമിന നമാക്ക് നമ്പ്യ മുഡിമ്. 24 സീവാന്‌ബെത്ത് നഡാക്ക്യാമ് നല്ല കാര്യഗാള് ഗേയാമ് ബേ്ണ്ടി ആങ്കീങ്ക് എത്തെ കയി താങ്ക്‌ല എന്റ് നമ്മ നെനേക്ക്‌ഗാന്. 25 ഏസ്സ്‌ഗാറാര് കൂട്ടഗാള്‌ക്ക് ഒന്റായി കൂഡുവാദ്‌ന പഗ്‌ദ്യാള്‌ഗാള് തെ്റിന്ത് തള്ളുവ പാസെ നിമ്മാമ് തള്ളദേന്. അദ്‌ക്ക് ബദ്‌ല് ആണ്ടവാന് ബരുവ നാള് അഡ്‌ത്ത്‌റ്‌ക്കുവാദ്‌നാലെ നിമ്മ ആങ്കീങ്ക് അദിഗ രുജ കൂട്ടി കൊഡുക്കുഡൊ. 26 സത്ത്യ എന്തെന്റ് നമ്മ തെരിന്ത പ്‌റാമ് പിന്നേമ് പാവ ഗേയ നമ്മ മുഡിവെ്ഡ്‌ത്തദാന, നമ്മ ഗേവ പാവാന തീര്‌ക്ക്യ ഇന്നി ബേ്റൊന്റു പലിമ് ഇല്ലെ. 27 അദ്‌ക്ക് ബദ്‌ല അഞ്ചിക്കോഡ സാമി ബിദിന കാത്ത്‌റ്‌ക്കുവാദ്‌മ് സാമ്യോഡ ഏദ് ബെത്ത്‌റ്‌ന്റവാര്‌ന മൊനെപട്ട് അളിത്ത് തള്ളുവ ദൊഡ്ഡ തീയിമ്‌ത്തെ നമാക്ക് ഇര്‌ക്കുവാദ്. 28-29 സാമി ബെത്ത ഒപ്പന്തന ഒറേപ്പ് മാഡ്യ ബെത്ത സോരെത്തെ നമാന പാവാത്ത്‌ലിന്ത് ബ്‌ഡിസി സുത്താപ്പ് മാഡ്‌നാദ്. മോസെ ബെത്ത സാമി സട്ടാക്ക് കെ്ട്ട്‌പട്ട് നഡാക്കാത്തവാര്‌ന റാഡൊ മൂറൊ ആള്‌ഗാള് സൊല്ലുവ നായന കേ്ട്ട് ഒന്റു ഗവാമ് പഡാദെ കൊന്റു തള്ള്‌നാര്. അത്ത്യാനദാന, നമാന സുത്താപ്പ് മാഡ്‌ന അയി സോരെന ബെലെ ഇല്ലത്താദെന്റ് നെനേക്ക്‌ന്റവാര്‌ക്ക്‌മ്, സാമി മഗാന്‌ന നാണഗെ്ഡ്‌സ്‌ന്റവാര്‌ക്ക്‌മ്, സാമി പ്‌ണ്ണ്യന നമാക്ക് തന്ത തന്ന് നിഗാല്‌ന കുറ്റ സൊല്ലുന്റവാര്‌ക്ക്‌മ് എത്ത്‌റ മ്‌ഗ്‌ന്ത ദെ്ണ്ടണെ കെ്ഡേക്ക്‌മ് എന്നുവാദ്‌ന നെനേത്ത് നോഡുനു. 30 എന്ത്‌ക്കെന്റ് സൊന്ന <<നാന് അവാര്‌ന പള്യെ്ഡ്‌ക്കുവെ, അവാര് ഗേന്ത പാവഗാള്‌ക്ക് നാന് അവാര്‌ന ദെ്ണ്ടിക്കുവെ>> എന്റ്‌മ് <<ആണ്ടവാന് തന്ന് ജനഗാള്‌ന ദെ്ണ്ടിക്കുവാന്>> എന്റ്‌മ് സൊല്ലിര്‌ക്കുവ സാമിന നമാക്ക് തെരിമല്ല. 31 ഉജുരുള്ള സാമി കയിക്ക് പഡുവാദ് എത്ത്‌റ കഡ്‌പ്പ ഉള്ള കാര്യ. 32 സത്ത്യന തെരിന്ത മുദാല്‌ല നാള്‌ഗാള്‌ന പറ്റി നിമ്മ നെനേത്ത് നോഡുനു. അയി നാള്‌ഗാള്‌ല് പല കാര്യഗാള്‌നാലെ നിമ്മ കജട്ട പട്ടിന്ത്‌റ്. എന്റാല്‌മ് നിമ്മ അയി കാര്യഗാള്‌നാലെ സോറ്റു പോഗാലെ. 33 എ്ഡെക്കെ്ഡേക്ക് ആള്‌ഗാള് മുന്നുക്കു ബെത്ത് നിമാന നാണാമ് ഗെ്ഡ്‌സ്‌നാര്, കൊഡിമേമ് പഡ്‌സ്‌നാര്. ബേ്റെ ഗളിഗേല് അത്തെ നാണാമ് പട്ട് കൊഡിമേമ് പട്ടവാരോഡ നിമ്മാമ് എ്ണേന്ത്‌റ്. 34 ജെയില്‌ക്ക് അഡേത്തിന്തവാര്‌ന നിമ്മ കയി താങ്ക്‌ന്‌റ്. നിമ്മ് സൊത്തു മുദാല്‌ന പ്‌ഡിങ്കിപറ്‌ത്ത് എ്ഡ്‌ക്കാട്ടിമ് നിമ്മ അദ്‌ന പിര്യപിര്യാത്ത് താങ്ക്‌ന്‌റ്. എന്ത്‌ക്കെന്റ് സൊന്ന എല്ലാദ്‌ക്ക്‌മ് ബ്‌ഡ മ്‌ഗ്‌ന്താദ്‌മ് എന്നാല്‌ക്ക്‌മ് ഇര്‌ക്കുവാദ്‌മ് ആന സൊത്തു മുദാല് നിമാക്ക് ഇര്‌ക്ക്‌ന്റ് എന്റ് നിമാക്ക് തെരിന്തിന്ത്‌ദ്. 35 അദ്‌നാലെ നിമാക്ക് മുദാല് ഇന്ത ദയിരന നിമ്മ കയി ബ്‌ഡാദേന്. എന്ത്‌ക്കെന്റ് സൊന്ന അദ്‌ക്ക് മ്‌ഗ്‌ന്ത കൂലി ഇര്‌ക്ക്‌ന്റ്. 36 സാമി ആസെപഡുവാദ്‌ന ഗേയാമ് സാമി തന്റെ എന്റ് സൊല്ലിര്‌ക്കുവാദ് കെ്ഡേക്ക്യാമ് നിമ്മ പൊറിമോഡ ഇര്‌ക്കുഡൊ. 37 സാമി സൊല്ലുസുലാക്കാത്ത്‌ല് എ്ള്‌ദിര്‌ക്കുവ പാസെ <<ഇന്നി ലേസ നാള് കളിന്ത പ്‌റ ബര്യ ഉള്ളവാന് ബരുവാന്. അയാള് ബര്യ ഗളിഗാഗ മാട്ട. 38 ആന എന്ന് കണ്ണ്‌ക്ക് നേര്‌മെഗാറാന് ആയിര്‌ക്ക്‌ന്റവാന് നമ്പിക്കെനാലെ പെ്ളേക്കുവാന്. ആരാറ്റ പിന്ന്‌കാല് മെ്ട്ടി പോന അയാള്‌ന നാന് പിര്യപഡമാട്ടെ.>> 39 ആന നമ്മ പിന്ന്‌കാല് മെ്ട്ട്‌ന്റവാര്‌മ് കെ്ട്ട് പോന്റവാര്‌മല്ല. നമ്മ നമ്പ്‌നവാര്‌മ് സാമി കാപാറ്റ്‌നവാര്‌മ്‌ത്തെ. |
New Life Computer Institute