എവുറായാര് 1 - സാമി സേദിസാമി തന്ന് മഗാന്‌ന ബെത്ത് നായനൊഡിന്റാന് 1 മുന്തെല കാലാത്ത്‌ല് സാമിദാസ്‌ഗാള്‌ന ബെത്ത്‌ത്തെ സാമി നമ്മ് പാട്ടനാമോഡ നായ നൊഡിന്തിന്താദ്. അദ് എഞ്ചോ ജമ്പ് പല ദിന്‌സ്‌ല് സാമി നായ നൊഡിന്തിന്താന്. 2 ആന ഈ കഡേസി കാലാത്ത്‌ല് സാമി തന്ന് മഗാന്‌ന ബെത്ത് നമ്മോഡ നായ നൊഡിന്ത്‌റ്‌ന്റാന്. സാമി എല്ലാദ്‌ക്ക്‌മ് അയാള്‌ന ഉള്ളവാന് മാഡി ബെത്ത്‌മ് അയാള്‌ന ബെത്ത് ഈ അണ്ടസരാസരന ദ്‌ട്ടിസിമ് ഇര്‌ന്റാന്. 3 മഗാന് അപ്പാന് മദ്‌പ്പ്‌ക്ക് ഇര്‌ക്കുവ ബെ്ഡിപ്പ്‌ന കാട്ട്‌ന്റവാന്‌മ് സാമി ഏദ് ദിന്‌സ്‌ല് ഇര്‌ക്ക്‌ന്റാനൊ അദേപാസെ ഇര്‌ക്ക്‌ന്റവാന്‌മ്‌ത്തെ. മഗാന് തന്ന് സൊല്ലുസുലാക്കാക്ക് ഇര്‌ക്കുവ സക്‌തിനാലെ ഈ അണ്ടസരാസരന താങ്കിര്‌ന്റവാന്‌മ്‌ത്തെ. മന്‌സാര് പാവാന തീത്ത് തള്ള്‌ന പ്‌റ അയാള് മേലോഗാത്ത്‌ല് മദ്‌പ്പുള്ള സാമി ബല സാരി ആള്യ കുക്കാന്ത്‌റ്‌ന്റാന്. 4 അത്തെ സാമി അയാള്‌ക്ക് ദൂദാര്‌ഗാള്‌ന ബ്‌ഡ ഉജാന്ത പേര് ബെത്ത്‌റ്‌ക്കുവ പാസെ അയാള് ദൂദാര്‌ഗാള്‌ന ബ്‌ഡ ദൊഡ്ഡവാന് ആനാന്. മഗാന് ദൂദാര്‌ഗാള്‌ന ബ്‌ഡ ദൊഡ്ഡവാന് 5 എന്ത്‌ക്കെന്റ് സൊന്ന <<നീ എന്ന് മഗാന്, ഇന്റ് നാന് നിനാന പ്‌റാത്തിര്‌ന്റെ>> എന്റ്‌മ് <<നാന് അവാന്‌ക്ക് അപ്പാന്‌മ്, അവാന് എനാക്ക് മഗാന്‌മ് ആയിര്‌ക്കുവാന്>> എന്റ്‌മ് ദൂദാര്‌ഗാള്‌ല് ആര്‌ക്കാറ്റ എന്നാലെന്റാല് സാമി സൊല്ലിര്‌ക്ക്‌ന്റാന? 6 സാമി തന്ന് കോഡില മഗാന്‌ന ഉലഗാക്ക് സൊല്ലി ബ്‌ഡ്‌ഗാട്ടി, <<സാമിദൂദാര്‌ഗാള് എല്ലാവാര്‌മ് അയാള്‌ന കുമ്മുഡുഡൊ>> എന്റ്‌മ് സാമി സൊന്നാന്. 7 ദൂദാര്‌ഗാള്‌ന പറ്റി സാമി സൊല്ലുവാദ് എന്തെന്റ് സൊന്ന <<സാമി തന്ന് ദൂദാര്‌ഗാള്‌ന കാറ്റ്‌മ്, തന്ന് ഗിലാസഗാറാര്‌ന തീനാവാള്‌മ് മാഡ്‌ന്റാന്>> എന്റ്‌ത്തെ. 8 ആന സാമി തന്ന് മഗാന്‌ന പറ്റി സൊല്ലിര്‌ക്കുവാദ് എന്തെന്റ് സൊന്ന, <<ദെയിവമേ, നിന്ന് രാജ്യ എന്നാല്‌ക്ക്‌മ് ഇര്‌ക്ക്‌മ്, നീ നേര്‌മോഡ നിന്ന് രാജ്യന ആളുവായി. 9 ആള്‌ഗാള് ഗേവ നേര്‌മ്യാന കാര്യഗാള്‌ന നീ പിര്യപഡ്‌ന്റായി, ആള്‌ഗാള് ഗേവ കെ്ട്ട കാര്യഗാള്‌ന നീ ബെ്റ്‌ക്ക്‌ന്റായി അദ്‌നാലെ ദെയിവമേ, നിന്ന് സാമി താനെ നിന്ന് എ്ണേവുഗാറാര്‌ലിന്ത് എ്ണ്ണെ ഊറ്റി നിനാന തെരിന്തെ്ഡ്‌ത്ത് അവാര്‌ക്ക് കൊഡുത്ത പിര്യന ബ്‌ഡ ദൊഡ്ഡ പിര്യന നിനാക്ക് തന്ത്‌റ്‌ക്ക്‌ന്റാന്>> എന്റ്‌ത്തെ. 10 സാമി പിന്നേമ് സൊല്ലുവാദ് എന്തെന്റ് സൊന്ന, <<ആണ്ടവാനെ, നീ മുദാല് ബൂമിന ദ്‌ട്ട്‌സ്‌നായി, നിന്ന് കയില് താനെത്തെ ബാന്‌നാമ് ഉണ്ടാക്ക്‌നാദ്. 11 അദെല്ല അളിമ്, ആന നീയൊ എന്നാല്‌ക്ക്‌മ് ഇര്‌ക്കുവായി. അദെല്ല സീലെസിലാപ്പ്‌ന പാസെ ദുദ്ദുപ്‌ഡിക്ക്‌മ്. 12 അദ്‌നൊട്ടുക്കു ഒന്റു ജൊഗെന പാസെ നീ സുറുട്ടുവായി. സീലെസിലാപ്പ്‌ന മാറ്റുവ പാസെ അദ്‌നെല്ല നീ മാറ്റുവായി. ആന നീ എന്നാല്‌ക്ക്‌മ് അദേപാസെ താനെ ഇര്‌ക്കുവായി. നിന്ന് ആയിസ്‌ക്ക് മുഡിവേ ഇല്ലെ>> എന്റ്‌ത്തെ. 13 <<നാന് നിന്ന് പോട്ടിഗാറാര്‌ന നിന്ന് കാല്‌കഡി മാഡമാട്ട് നീ എന്ന് ബല സാരി കുക്കാന്ത് ഇര്‌ക്കുഡൊ>> എന്റ് ദൂദാര്‌ഗാള്‌ല് ആര്‌ക്കാറ്റ എന്നാലെന്റാല് സാമി സൊല്ലിര്‌ക്ക്‌ന്റാന? 14 ആന ദൂദാര്‌ഗാളെല്ല സാമിക്ക് ഗിലാസ ഗേയ ബെത്ത്‌റ്‌ക്കുവ നിഗാല്‌ഗാള്‌ത്തെ. തപ്പിസി കഡാക്ക്യ പോന്റവാര്‌ന കയിതാങ്ക്യ സാമി അവാര്‌ന സൊല്ലി ബ്‌ഡ്‌ന്റാന്. |
New Life Computer Institute