ഗലാത്ത്യഗാറാര് 5 - സാമി സേദിമറിസിമ് അഡിമെഗാളാഗാദേന് 1 അഡിമെഗാളാഗാദെ പെ്ളേക്ക്യത്തെ ക്‌റ്‌സ്‌ത്ത് നമാന ബ്‌ഡ്‌സ്‌നാദ്. പിന്നേമ് നിമ്മ മോസെ ബെത്ത സാമി സട്ടാക്ക് അഡിമെഗാളാഗാദെ ഒറേത്ത് നില്ല്‌ന്. 2 പവുലോസു എന്റ് സൊല്ലുവ നാന് നിമാക്ക് സൊല്ലുവാദ്‌ന കേ്ള്‌ന്, നിമാന പരിസേദനെ സാത്ത്‌റ ഗേന്തദാന ക്‌റ്‌സ്‌ത്ത് നിമാക്ക് ബേ്ണ്ടി ഗേന്താദെല്ല ഉവഗരില്ലത്താദ് ആമ്. 3 പരിസേദനെ സാത്ത്‌റ ഗേയ പോവ ആള്‌ഗാള്‌ക്ക് നാന് പിന്നേമ് സൊന്റെ: അവാര് മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവ കാര്യഗാള്‌ന ഒട്ടുക്കു ഗേന്ത്‌റ്ക്കുഡൊ. 4 മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവ കാര്യഗാള്‌ന ഗേന്ത് സാമി തമാന നേര്‌മെഗാറാര് മാഡ്യ ബേ്ണ്ടി ആസെപഡുവ നിമ്മ ക്‌റ്‌സ്‌ത്തോഡിന്ത് ഒന്റേപെ്ട്ട് പ്‌റ്‌ന്ത്‌റ്‌ന്റ്‌റ്. സാമി നിമാക്ക് ഗേന്ത പ്‌ണ്ണ്യന നിമ്മ ബേ്ഡെന്റ്‌മ് ബെത്ത്‌റ്‌ന്റ്‌റ്. 5 ആന ക്‌റ്‌സ്‌ത്ത്‌ന നമ്പുവാദ്‌നാലെ സാമി എമാന നേര്‌മെഗാറാന് മാഡ്‌നാന് എന്റ് സാമിനിഗാല് എമാക്ക് ഒറേപ്പ് തന്റ്. അദ്‌ക്ക് ബേ്ണ്ടി എമ്മ നെഞ്ചഡെബെത്ത് കാത്ത്‌റ്‌ക്ക്‌ന്റേമ്. 6 ക്‌റ്‌സ്‌ത്ത് ഏസ്സ്‌ന നമ്പി നഡാക്കുവാദ്‌നാലെ പരിസേദനെ സാത്ത്‌റ ഗേവാദൊ ഗേഗാദിര്‌ക്കുവാദൊ അല്ല ദൊഡ്ഡ കാര്യ. ക്‌റ്‌സ്‌ത്ത് ഏസ്സ്‌ന നമ്പി നഡാക്കുവാദ്‌നാലെ നമ്മ ബെത്ത് നഡാക്കുവ സീവാന്‌ത്തെ ദൊഡ്ഡ കാര്യ. 7 നിമാക്ക് പഡിസി തന്ത സാമി സൊല്ലുസുലാക്കാന നിമ്മ നലമായി നമ്പി നഡാന്തിന്ത്‌റ്. ആന അയി സത്ത്യാക്ക് കെ്ട്ട്‌പട്ട് നഡാക്കാദിര്‌ക്ക്യ നിമാന തഡ്‌ത്ത് ബെത്താദാര്? 8 നിമാന ബ്‌ളിത്ത സാമ്യല്ല നിമാന അത്തെ തഡ്‌ത്താദ്. 9 കലേസി ബെക്കുവ മാവുക്കു ലേസ പുളിര്‌ക്കുവ മാവുന സേത്തിബെത്തദാന അയി മാവൊട്ടുക്കു പുളിത്ത് തള്ള്‌മ്. <<നേരല്ലാത്ത ബുദ്ദിനായഗാള് പുളിമാവുക്കു സമാത്തെ.>> 10 നാന് സൊല്ലുവ ഈ കാര്യഗാള്‌ന പറ്റി നിമ്മ കുറ്റ സൊല്ലമാട്ട്‌റ് എന്റ് എനാക്ക് നിമാന പറ്റി ഒറേപ്പിര്‌ക്ക്‌ന്റ്. അയി കാര്യാത്ത്‌ല് നാന് ആണ്ടവാന്‌ന നമ്പ്‌ന്റെ. ആന നിമാന തപ്പ് ഗേയ ബെക്കുവ ആരാനാല്‌മ് സെരി അയാള്‌ന സാമി ദെ്ണ്ടിക്കുവാന്. 11 ആന ഏസ്സ്‌ഗാറാരാന എന്ന് എ്ണേവുഗാറാരെ, പരിസേദനെ സാത്ത്‌റ ഗേഡൊ എന്റ് നാന് ഇന്നാല്‌മ് സൊല്ലുവദാന നാന് എന്ത്‌ക്ക് കൊഡിമെപഡുവാദ്? ക്‌റ്‌സ്‌ത്ത് കുരുസുലു സത്ത് നമാക്ക് ബേ്ണ്ടി ഗേന്ത കാര്യന നമ്പുഡൊ എന്റ് സൊല്ലുവാദ്‌ക്ക് ബദ്‌ല പരിസേദനെ സാത്ത്‌റ ഗേസുഡൊ എന്റ് സൊല്ലിന്തദാന നാന് എഗുദാര് കണ്ണ്‌ക്ക് കുറ്റഗാറാന് ആയിന്ത്‌റ്‌ക്കമാട്ടെ. 12 നിമാന തപ്പ് ഗേയ ബെക്കുവ ആരാനാല്‌മ് സെരി അവാര് നിമ്മ് കൂട്ടാത്ത്‌ലിന്ത് ഒന്റേപെ്ട്ട് അറ്റ് പോഡൊ എന്റ് നാന് ആസെപഡ്‌ന്റെ. 13 ഏസ്സ്‌ഗാറാരാന എന്ന് എ്ണേവുഗാറാരെ, നിമ്മ ആങ്കീങ്ക് സീവാന്‌ബെത്ത് കയിതാങ്കി നഡാക്ക്യ ബേ്ണ്ടി സട്ടഗാള്‌ക്ക് അഡിമ്യായിന്ത നിമാന അയി അഡിമേലിന്ത് ഏസ്സ് ക്‌റ്‌സ്‌ത്ത് ബ്‌ഡ്‌സ്‌നാന്. അത്തെ ഇര്‌ക്കുവ നിമ്മ ഇന്നി സരിഗലസുഗാക്ക് ബേ്ണ്ടി പാവ ഗേഗാദേന്. 14 <<നിമ്മ നിമാന സീവാന്‌പഡുവ പാസെ അഡ്‌ത്തവാര്‌നാമ് സീവാന്‌പഡുഡൊ>> എന്റ് സൊല്ലിര്‌ക്കുവ ഒന്റേ ഒന്റു സട്ടപഡി നഡാന്തദാന മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവ കാര്യഗാള്‌ക്കൊട്ടുക്കു കെ്ട്ട്‌പട്ട് നഡാക്ക്‌ന്റാമ്. 15 ആന ഈ സട്ടാന മറാന്ത് ബേ്ണ്ട്‌ഗാള് തമാക്ക് തമാക്ക് കപ്പികൊഡേന്ത് ഗേവ പാസെത്തെ നിമ്മാമ് നഡാക്കുവദാന ഒന്റേപെ്ട്ട് കെ്ട്ട് തള്ളുവുറു. അദ്‌നാലെ സൂസാരിത്തിര്‌ന്. സാമിനിഗാല്‌ക്ക് കെ്ട്ട്‌പട്ട് നഡാന് 16 സാമിനിഗാല് സൊല്ലുക്കു കെ്ട്ട്‌പട്ട് നഡാന്, അത്തെ നഡാന്തദാന നിമ്മ് പിര്യാക്ക് പോയി നിമ്മ പാവ ഗേഗമാട്ട്‌റ് എന്റ് നാന് സൊന്റെ. 17 നിമ്മ പിര്യപഡുവ കാര്യഗാളല്ല സാമിനിഗാല് പിര്യപഡുവാദ്. സാമിനിഗാല് പിര്യപഡുവ കാര്യഗാളല്ല നിമ്മ പിര്യപഡുവ കാര്യഗാള്. ഇദ് റാഡ്‌മ് ഒന്റായി എ്ണേഗമാട്ട. അദ്‌നാലെ നിമ്മ പിര്യപഡുവ കാര്യഗാള് ഗേയ നിമാക്ക് മുഡ്യാമാട്ട. 18 സാമിനിഗാല് സൊല്ലുക്കു കെ്ട്ട്‌പട്ട് നഡാക്കുവദാന നിമ്മ മോസെ ബെത്ത സാമി സട്ടാക്ക് അഡിമ്യല്ല. 19 മന്‌സാന് പിര്യപഡുവ കെ്ട്ട കാര്യഗാള്: ബേസ്യാഡുവാദ്, ആഡ്‌മാഡ്‌ന പാസെ ഏ്റി നഡാക്കുവാദ്, ഗണ്ട്‌പെ്ണ്ണ് ആങ്കീങ്ക് ആസെ ബെത്ത് നഡാക്കുവാദ്, 20 സെലെന കുമ്മുഡുവാദ്, മന്ത്‌റ ഗേവാദ്, ആങ്കീങ്ക് പോട്ടി പ്‌ഡിത്ത് നഡാക്കുവാദ്‌മ് മല്ല്‌പ്‌ഡിക്കുവാദ്‌മ്, അഡ്‌ത്തവാന്‌ത്ത് ബേ്ഡ്‌മെന്നുവ ആസെ, മൊനേക്ക് തെ്ട്ടുവാദ്, പ്‌ഡ്യാറപ്‌ഡിക്കുവാദ്, ആള്‌ഗാള്‌ന പ്‌റ്‌ത്ത് ബേ്റെബേ്റെ കൂട്ട മാഡുവാദ്, 21 കണ്ണ്‌കഡി, കുഡിക്കുവാദ്, കുഡിത്ത്‌കൂത്താഡി നഡാക്കുവാദ് ഇത്തെ ഗേവ പല കാര്യഗാള്‌മ്‌ത്തെ. ഇത്തവാള്‌ഗാള്‌ന സാമി ആളമാട്ടാന് എന്റ് നാന് മുന്നുക്കു സൊന്ന പാസെ ഇന്നാല്‌മ് സൊന്റെ. 22 ആന സാമിനിഗാല് സൊല്ലുക്കു കെ്ട്ട്‌പട്ട് നഡാക്ക്‌ന്റ്‌വാര് പളാക്കഗാള്: അവാര് സീവാനിര്‌ക്ക്‌ന്റവാര്‌മ്, പിര്യപിര്യാത്ത് ഇര്‌ക്ക്‌ന്റവാര്‌മ്, നിമ്മ്‌ദ്യോഡ ഇര്‌ക്ക്‌ന്റവാര്‌മ്, പൊറിമുള്ളവാര്‌മ്, ഗവപഡ്‌ന്റവാര്‌മ്, ഉവഗര ഗേന്റവാര്‌മ്, നമ്പ്യ മുഡിന്റവാര്‌മ്, 23 തണിമോഡ ഇര്‌ക്ക്‌ന്റവാര്‌മ്, അവനവാന് ആസേന അഡാക്കി ബെക്ക്‌ന്റവാര്‌മ് ആയിര്‌ക്കുവാര്. ഇത്തെ പെ്ളേക്ക്‌ന്റവാര്‌ന ദെ്ണ്ടിക്കുവ ഒന്റു സട്ടാമില്ലെ. 24 ക്‌റ്‌സ്‌ത്ത് ഏസ്സ്‌ക്ക് പട്ടവാര് പാവ ഗേവ തമ്മ് പെ്ളേപ്പ്‌ന കുരുസുക്കു സേത്തി ആണി അഡിത്ത് കൊന്റാര്. 25 സാമിനിഗാല്‌ത്തെ നമാക്ക് പുദ്യ ഉജുരുന തന്താദ്. അദ്‌നാലെ അയി സാമിനിഗാല് സൊല്ലുക്കു കെ്ട്ട്‌പട്ട് നഡാന്. 26 നമ്മ ആങ്കീങ്ക് പോട്ടിക്ക് നിന്റ് കൊണ്ടുമു എര്‌സ്സ ബെത്ത് കൊണ്ടുമു നാന്‌ത്തെ ദൊഡ്ഡവാന് എന്റ് പെരിമെപഡ ബേ്ഡ. |
New Life Computer Institute