എപസോസുഗാറാര് 2 - സാമി സേദിപുദ്യ ഉജുരു 1 ക്‌റ്‌സ്‌ത്ത്‌ന നമ്പുവാദ്‌ക്ക് മുദാല് നിമ്മ സാമി സൊല്ലുപഡിക്ക് നഡാക്കാദെ പാവ ഗേന്ത് കൊണ്ടു പെ്ളേത്തിന്ത്‌റ്. അദ്‌നാലെ അയി ഗളിഗേല് നിമാക്ക് സാമ്യോഡ എ്ണേവ് ബെത്ത് നഡാക്ക്യ മുഡ്യാദെ നിമ്മ സാമി കണ്ണ്‌ക്ക് സത്തവാര്‌ന പാസെ ആയിന്ത്‌റ്. 2 അയി ഗളിഗേല് നിമ്മ ഉലഗാത്ത്‌ല് ബേ്റെ ആള്‌ഗാള്‌ന പാസെ സാമി സൊല്ലുപഡിക്ക് നഡാക്കാദെ പെ്ളേത്തിന്ത്‌റ്. എന്ത്‌ക്കെന്റ് സൊന്ന സാമി സൊല്ലുപഡിക്ക് നഡാക്കാത്തവാര്‌ന ഇന്നാല്‌മ് നഡാത്തുവാദ് മാഗെലോഗന ആണ്ട്‌റ്‌ക്കുവ ഗരഗഗാള്‌ത്തെ. ഈ ഗരഗഗാള്‌ത്തെ മുന്നുക്കു നിമ്മ് പെ്ളേപ്പ്‌നാമ് നഡാത്തിന്താദ്. 3 അദുക്കുള നമ്മ് മനേസ്സ്‌ക്ക്‌മ് സരിഗലാക്ക്‌മ് പിര്യര്‌ക്കുവ കാര്യഗാള്‌ന ഗേന്ത് കൊണ്ടു നമ്മാമ് അഡ്‌ത്തവാര്‌ന പാസെ പാവ ഗേന്ത് കൊണ്ടു നഡാന്താമ്. അത്തെ ഗേന്ത് നഡാന്ത് നമ്മ സാമി മൊനേക്ക് ആളായിന്താമ്. 4-5 ആന അളാവുക്കു മീ്റി സീവാന് പട്ട സാമി തന്ന് സൊല്ലുപഡിക്ക് നഡാക്കാദെ പാവ ഗേന്ത് കൊണ്ടു സത്തവാര്‌ന പാസെ ആയിന്ത നമാന ക്‌റ്‌സ്‌ത്തോഡൊപ്പ ഉജുരുളാക്ക്‌നാന്. സാമി നമാക്ക് പ്‌ണ്ണ്യ ഗേന്ത് സാമി മൊനേക്ക് ആളായിന്ത നമാന അദ്‌ലിന്ത് കാപാറ്റ്‌നാന്. അദ്‌നാലെ സാമി നമ്മോഡ ബെത്തിന്ത മൊനേന ബ്‌ഡ സാമി നമാന പട്ട ഗവാത്തെ എത്ത്‌റാഗോ ദൊഡ്ഡാദ്. 6 സാമി ക്‌റ്‌സ്‌ത്ത്‌ന ഉജുര്‌ളാക്ക്‌ന പാസെ സാമി സൊല്ലുപഡിക്ക് നഡാക്കാദെ സത്തവാര്‌ന പാസെ ആയിന്ത നമാനാമ് ഉജുര്‌ളാക്കി ക്‌റ്‌സ്‌ത്ത് ഏസ്സോഡൊപ്പ ആള്യ മേലോഗാക്ക് എ്ഡ്‌ത്ത് ബെത്താന്. 7 ഏസ്സ് ക്‌റ്‌സ്‌ത്ത് പേര്‌ല് സാമി നമാന പട്ട ഗവ എത്ത്‌റ ദൊഡ്ഡാദെന്റ് ഇന്നി ബരുവ കാലാത്ത്‌ല ആള്‌ഗാള് കാണ്യ ബേ്ണ്ടിത്തെ സാമി ഇത്തെ ഗവ പട്ടാദ്. 8 സാമി നിമ്മോഡ ബെത്തിന്ത മൊനേലിന്ത് നിമാന കാപാറ്റ്‌നാദ് നിമ്മ നല്ല കാര്യഗാള് ഗേന്താദ്‌നാലെ അല്ല. അദ്‌ക്ക് ബദ്‌ല നിമ്മ ഏസ്സ്‌ന നമ്പി പെ്ളേക്ക്യ നെനേക്കാട്ടി സാമി നിമാക്ക് പ്‌ണ്ണ്യ ഗേന്താദ്‌നാലെത്തെ സാമി നിമാന കാപാറ്റ്‌നാദ്. അദ്‌നാലെ നിമ്മ ഇന്നാല് പെ്ളേക്കുവ പുദ്യ പെ്ളേപ്പ് സാമി നിമാക്ക് തന്ത്‌റ്‌ക്കുവ സമ്മാനത്തെ. 9 അദ്‌നാലെ നമ്മ എന്തൊന്റു നല്ല കാര്യഗാള് ഗേന്താദ്‌നാലെത്തെ നമാന കാപാറ്റ്‌നാദ് എന്റ് ആര്‌ക്ക്‌മ് പെരിമെപഡ്യ മുഡ്യാമാട്ട. 10 ആന ക്‌റ്‌സ്‌ത്ത് ഏസ്സ് നല്ല കാര്യഗാള് ഗേന്ത പാസെ നമ്മാമ് നല്ല കാര്യഗാള് ഗേയ ബേ്ണ്ടിത്തെ ക്‌റ്‌സ്‌ത്ത് ഏസ്സോഡൊപ്പ സാമി നമാനാമ് പുദ്യ മന്‌സാര് മാഡ്‌നാദ്. ഇത്തെ നമ്മ നല്ല കാര്യഗാള് ഗേന്ത് പെ്ളേക്കുഡൊ എന്റ് സാമി മുദാല് താനെ നെനേത്തിന്താന്. ക്‌റ്‌സ്‌ത്ത് പേര്‌ല് എല്ലാര്‌മ് ഒന്റുത്തെ 11 അദ്‌നാലെ ഒന്റു കാലാത്ത്‌ല് നിമ്മ സാമി സൊല്ലുപഡിക്ക് പെ്ളേക്കാദെ എഗുദാരല്ലാത്ത ജാദിഗാളായിന്ത്‌റ് എന്റ് നിമ്മ നെനേത്ത്‌ക്കൊള്ളുഡൊ. എന്ത്‌ക്കെന്റ് സൊന്ന തമ്മ് സരിഗലാത്ത്‌ല് പരിസേദനെ സാത്ത്‌റ ഗേന്തവാര് സാമി സൊല്ലുപഡിക്ക് നഡാക്ക്‌ന്റവാര് എന്റ്‌മ് പരിസേദനെ സാത്ത്‌റ ഗേഗാത്തവാര് സാമി സൊല്ലുപഡിക്ക് നഡാക്കാത്ത എഗുദാരല്ലാത്ത ജാദിഗാള് എന്റ്‌മ് ഇസ്‌റവേല്‌ഗാറാര് നെനേത്തിന്താര്. 12 അദേപാസെ നിമ്മ സാമി സൊല്ലുപഡിക്ക് പെ്ളേക്കാദിന്ത കാലാത്ത്‌ല് നിമ്മ് പെ്ളേപ്പ്‌ല് ക്‌റ്‌സ്‌ത്ത് ഇര്‌ക്കാലെ. അദ്‌നാലെ സാമിപ്‌ള്ളെഗാള് എന്നുവ മദ്‌പ്പിര്‌ക്കുവ ഇസ്‌റവേല്‌ഗാറാര്‌ക്ക് എ്ണേയ മുഡ്യാദെ അന്ന്യ ജാദിഗാളായി ഇന്ത്‌റ്. അയി ഗളിഗേല് സാമി ഇസ്‌റവേല്‌ഗാറാരൊപ്പ ബെത്ത ഒപ്പന്തനാമ് സാമി കൊഡുത്ത ബാക്ക്‌നാമ് നിമ്മ നമ്പാലെ. സാമിക്ക്‌മ് നിമാക്ക്‌മ് എ്ണേവില്ലാദേമ് ഇന്ത്‌ദ്. 13 ആന സാമി സൊല്ലുപഡിക്ക് പെ്ളേക്കാദിന്ത കാലാത്ത്‌ല് ഗേന്ത പാവാന തീര്‌ക്ക്യ ഏസ്സ് ക്‌റ്‌സ്‌ത്ത് സൂസുന സോരേല് ഏസ്സോഡ എ്ണേന്ത് സാമ്യോഡ ഉറാവു ബെത്ത് നഡാക്കുവാദ്‌ക്കുള്ള ബാഗ്യ നിമാക്ക് കെ്ഡേത്ത്‌ദ്. 14-15 അദ് എത്തെന്റ് സൊന്നദാന സാമി ഇസ്‌റവേല്‌ഗാറാര്‌ക്ക് കൊഡുത്ത സട്ടഗാള്‌ക്ക്‌മ് കല്‌പനെഗാള്‌ക്ക്‌മ് നിമ്മ കെ്ട്ട്‌പട്ട് നഡാക്കാത്താദ്‌നാലെ നിമാക്ക് ഇന്നമാട്ട്‌ക്ക് സാമ്യോഡ എ്ണേവു ബെത്ത് നഡാക്ക്യ മുഡ്യാദെ നിമ്മാമ് സാമിമ് ആങ്കീങ്ക് പഗെഗാറാര് ആയിന്ത്‌റ്. അത്തെ ഗോഡെന പാസെ തഡെ ഇന്ത ഈ പഗെന ഏസ്സ് ക്‌റ്‌സ്‌ത്ത് മന്‌സാനായി ബന്ത് സത്താദ്‌നാലെ ഇല്ലദാറ്റ്. അദ്‌നാലെ ഏസ്സ് ക്‌റ്‌സ്‌ത്തോഡ എ്ണേന്ത് പുദ്യ മന്‌സാനായി സാമ്യോഡാമ് ഇസ്‌റവേല്‌ഗാറാരോഡാമ് രാജി കൂഡുവ ബാഗ്യ നിമാക്ക് കെ്ഡേത്ത്‌ദ്. 16 അത്തെ സാമി സട്ടാക്ക് കെ്ട്ട്‌പട്ട് നഡാക്കുവ ജാദിഗാള് സാമി സട്ടാക്ക് കെ്ട്ട്‌പട്ട് നഡാക്കാത്ത അന്ന്യ ജാദിഗാള് എന്റ് പ്‌റ്‌ത്ത് ബെത്തിന്ത മന്‌സാന് ജാദിക്കിര്‌ക്കുവ പഗെന, ഏസ്സ് കുരുസുലു സത്താദ്‌നാലെ ഇല്ലാദെമാഡി സാമിപ്‌ള്ളെഗാള് എന്നുവ പുദ്യ ഒന്റു മന്‌സാന് ജാദിന മാഡ്‌നാന്. 17 ഇത്തെ സാമ്യോഡ നിമ്മ്‌ദ്യായി പെ്ളേക്കുവ ഈ പുദ്യ മന്‌സാര് ജാദിക്ക് എ്ണേവ നല്ല സേദിന ക്‌റ്‌സ്‌ത്ത് കുരുസുലു സത്താദ്‌നാലെ നമാക്ക് സൊന്നാന്. സാമിപ്‌ള്ളെഗാള് എന്റ് സൊന്റവാര്‌ക്ക്‌മ് സാമിപ്‌ള്ളെഗാളല്ല എന്റ് സൊല്ലുവ അന്ന്യ ജാദിഗാള്‌ക്ക്‌മ് സൊല്ലുവ ഒന്റേ ഒന്റു സേദിത്തെ ഇദ്. 18 അദ് എത്തെന്റ് സൊന്നദാന സാമിപ്‌ള്ളെഗാള്, സാമിപ്‌ള്ളെഗാളല്ലത്തവാര് എന്റ് സൊല്ലുവ അന്ന്യ ജാദിഗാള് എന്റ് റാഡായി പ്‌റ്‌ന്തിന്ത നമ്മൊട്ടുക്കുമു അയി സേദിന നമ്പുവാദ്‌നാലെ ഒന്റേ സാമിനിഗാല്‌ല് അപ്പാനായിര്‌ക്കുവ സാമിക്ക് എ്ണേവ ബാഗ്യ നമാക്ക് കെ്ഡേത്ത്‌ദ്. 19 അദ്‌നാലെ അയി നല്ല സേദിന നമ്പി പെ്ളേക്കുവ നിമ്മൊട്ടുക്കുമു ഇന്നാല് അന്ന്യ ജാദിഗാളല്ല. അദ്‌ക്ക് ബദ്‌ല സാമിക്ക് ബേ്ണ്ടി പ്‌റ്‌ത്ത് ബെത്ത്‌റ്‌ക്കുവ ജാദിക്ക് എ്ണേന്ത്‌റ്‌ക്കുവ സാമിത്ത് സൊന്ത പ്‌ള്ളെഗാള്‌ത്തെ. 20 എത്തെന്റ് സൊന്ന ഒന്റു ബീ്ഡ്‌ന ഒറേപ്പ് മാഡി നില്ല്‌സുവ മൂലെകല്ല്‌ന പാസെത്തെ ക്‌റ്‌സ്‌ത്ത് ഏസ്സ്. അയി ബീ്ഡ്‌ക്കിര്‌ക്കുവ ബേസ്‌മട്ടന പാസെത്തെ സാമിദാസ്‌ഗാള്‌മ് അപ്പോസുത്തലാര്‌മ് ആയിര്‌ക്കുവ എമ്മാമ്. 21-22 അത്തെ സാമി, സാമിനിഗാല്‌ല് തങ്ക്യ, സാമി തനാക്ക് ബേ്ണ്ടി എ്ഡ്‌ക്കുവ ബീ്ഡ് എന്റ് സൊല്ലുവ കോയാല്‌ക്ക് നിമാനാമ് എമനാമ് അവാരോഡൊപ്പ സേത്തി എ്ണേന്ത ദിന്‌സ്‌ല് ബീ്ഡെ്ഡ്‌ത്ത് കൊണ്ട്‌റ്ക്ക്‌ന്റാന്. |
New Life Computer Institute