എപസോസുഗാറാര് 1 - സാമി സേദി1 ഏസ്സ് ക്‌റ്‌സ്‌ത്ത്‌ന നമ്പിര്‌ന്റവാര്‌മ് സാമി തനാക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റവാര്‌മ് ആയിര്‌ക്കുവ എപസോസു പട്ടണാത്ത്‌ലവാര്‌ക്ക് സാമി പിര്യാക്ക് ഏസ്സ് ക്‌റ്‌സ്‌ത്ത്‌ക്ക് ബേ്ണ്ടി അപ്പോസുത്തലാനായി ഗിലാസ ഗേവ പവുലോസു എ്ള്‌ദുവ എ്ള്‌ത്ത്. 2 നമ്മ് അപ്പാന് സാമിമ് ആണ്ടവാന് ഏസ്സ് ക്‌റ്‌സ്‌ത്ത്‌മ് നിമാക്ക് പ്‌ണ്ണ്യാമ് ഗേഡൊ, നിമാന നിമ്മ്‌ദ്യായിമ് ബെക്കുഡൊ. ക്‌റ്‌സ്‌ത്ത്‌ല് കെ്ഡേത്ത്‌റ്‌ക്കുവ ബരഗാള് 3 നമ്മ് നിഗാല് കുട്ടിക്ക് എന്നാല്‌ക്ക്‌മ് പെ്ളേക്കുവാദ്‌ക്കുള്ള എല്ലാ ബാക്ക്‌വരഗാള്‌മ് ക്‌റ്‌സ്‌ത്ത്‌ന ബെത്ത് തന്ത്‌റ്‌ക്കുവ സാമിക്ക് നാന് നണ്ണി സൊന്റെ. അയി സാമി നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌ത്ത് സാമിമ് അപ്പാന്‌മ് ആയിര്‌ക്ക്‌ന്റവാന്‌ത്തെ. 4 അദ് എത്തെന്റ് സൊന്ന, ഇന്നാല് ഏസ്സ് ക്‌റ്‌സ്‌ത്ത്‌ന നമ്പി ഒന്റായി പെ്ളേക്ക്‌ന്റവാര്‌ന സാമി ഉലഗാന ഉണ്ടാക്കാത്ത മുദാലെ തെരിന്തെ്ഡ്‌ത്താന്. സാമി കണ്ണ്‌ക്ക് കുറ്റകൊറേവു ഇല്ലത്തവാര് ആയിര്‌ക്ക്യ ബേ്ണ്ടിമ് സാമിക്ക് പട്ടവാര് ആയിര്‌ക്ക്യ ബേ്ണ്ടിമ്‌ത്തെ അവാര്‌ന അത്തെ തെരിന്തെ്ഡ്‌ത്താദ്. സാമി സീവാന്‌ബെത്ത്‌റ്‌ക്കുവാദ്‌നാലെ 5 ഏസ്സ് ക്‌റ്‌സ്‌ത്ത്‌ന ബെത്ത് നമാന തന്ന് മക്കാളായി എ്ഡ്‌ക്ക്യ ബേ്ണ്ടി സാമി മുദാല് താനെ നെനേത്തിന്താന്. ഇത്തെ മുദാല് താനെ നെനേത്തിന്ത കാര്യ സാമിന ദൊഡ്ഡാദ്‌ക്ക് പിര്യപഡിസിന്ത്‌ദ്. 6 ഇത്തെ സാമിക്ക് മെച്ച്‌പ്‌ഡിത്ത ഏസ്സ് ക്‌റ്‌സ്‌ത്ത്‌ന ബെത്ത് നമാന തന്ന് മക്കാളായി എ്ഡ്‌ക്ക്യ ബേ്ണ്ടി സാമി നമാക്ക് പ്‌ണ്ണ്യ ഗേന്ത്‌റ്‌ന്റാന്. അദ്‌നാലെ അയി സാമി ഗേന്ത പ്‌ണ്ണ്യന നെനേത്ത് നമ്മ നണ്ണ്യുള്ളവാര് ആയിര്‌ക്ക്‌ല. 7 സാമി നമാക്ക് ഗേന്ത പ്‌ണ്ണ്യ എത്ത്‌റ ദൊഡ്ഡാദെന്റ് കാട്ടി തര്യ ബേ്ണ്ടി ക്‌റ്‌സ്‌ത്ത് തനാന താനെ സോരെ പലി കൊഡുത്തു നമ്മ് പാവാന തീത്ത് തന്താന്. അത്തെ സാമി നമാന അളിന്ത് പോവ പെ്ളേപ്പ്‌ലിന്ത് തിരിക്കി എ്ഡ്‌ത്താന്. 8 അത്തെ അളാവുക്കു മീ്റ്‌ന ബുദ്ദിര്‌ക്കുവ സാമി ഇത്ത്‌റ ദൊഡ്ഡ പ്‌ണ്ണ്യ നമാക്ക് ഗേന്ത്‌റ്‌ന്റാന്. 9 ഈ ബുദ്ദിന സാമി ഇന്നമാട്ട്‌ക്ക് മറേസി ബെത്തിന്താന്. ഏസ്സ് ക്‌റ്‌സ്‌ത്ത്‌നാലെ നമ്മെല്ല ഇദ്‌ന തെരിഡൊ എന്റ് സാമിക്ക് പിര്യ ഇന്ത്‌ദ്. 10 ഇദ്‌ന എത്തെ തെരിവാദ് എന്റ് സൊന്ന, ഒന്റൊന്റു കാര്യഗാള് ഏദേദ് ഗളിഗേക്ക് നഡാക്കുഡൊ എന്റ് സാമി മുദാല് താനെ നെനേത്തിന്താന്. അദെല്ല നഡാന്ത് മുഡിഗാട്ടി മേലോഗാത്ത്‌ല്‌മ് ബൂലോഗാത്ത്‌ല്‌മ് ഇര്‌ക്കുവാദ്‌ന ഒട്ടുക്കു ക്‌റ്‌സ്‌ത്ത് ആള്‌വാനെന്റ്‌മ് സാമി മുദാല് താനെ നെനേത്തിന്താന്. 11 അയി ക്‌റ്‌സ്‌ത്ത്‌ന ബെത്ത്‌ത്തെ തന്ന് പ്‌ള്ളെഗാള് എന്നുവ ഉരിമെന സാമി നമാക്ക് തന്ത്‌റ്‌ക്കുവാദ്. ഇത്തെ ഗേയ തനാക്കിര്‌ക്കുവ അളാവുക്കു മീ്റ്‌ന ബുദ്ദില് സാമി മുദാല് താനെ നെനേത്ത് ബെത്തിന്താന്. അയി സാമി താന് നെനേത്ത് ബെത്ത്‌റ്‌ക്കുവ പാസെത്തെ ഈ എല്ലാ കാര്യഗാള്‌നാമ് നഡാത്തി ബരുവാദ്. 12 അദേപാസെ എല്ലാവാര്‌ക്ക് ബ്‌ഡ മുദാല് ക്‌റ്‌സ്‌ത്ത്‌ന നമ്പിര്‌ക്കുവ ഇസ്‌റവേല്‌ഗാറാര് ആയിര്‌ക്കുവ നമ്മ സാമിന പാഡി പെരിമെപഡുസുഡൊ എന്നുവാദ്‌നാമ് സാമി മുദാല് താനെ നെനേത്ത് ബെത്തിന്താന്. 13 ഇസ്‌റവേല്‌ഗാറാര് ആയിര്‌ക്കുവ എമ്മോഡിന്ത്‌ത്തെ അളിന്ത് പോവ പെ്ളേപ്പ്‌ലിന്ത് നിമാന തിരിക്കി എ്ഡ്‌ക്കുവ നല്ല സേദിന നിമ്മ കേ്ട്ടാദ്. അദ്‌ന കേ്ട്ട് നിമ്മ ക്‌റ്‌സ്‌ത്ത്‌ന നമ്പ്‌ഗാട്ടിത്തെ സാമി തന്റെന്റ് സൊല്ലിന്ത സാമിനിഗാല്‌ന നിമാക്ക് തന്ത് നിമ്മ സാമിപ്‌ള്ളെഗാള് എന്റ് അഡ്യാള ബെത്താദ്. 14 അത്തെ നമാന സാമിനിഗാല്‌ല് അഡ്യാള ബെത്ത് നമ്മ സാമിപ്‌ള്ളെഗാള് എന്റ് ഒറേപ്പ് മാഡ്‌നാന്. നമ്മ സാമിക്ക് സൊന്ത പ്‌ള്ളെഗാളായി നമ്മ സാമിന ദൊഡ്ഡവാനെന്റ് പെരിമെപഡിസ്യ ബേ്ണ്ടി അളിന്ത് പോവ പെ്ളേപ്പ്‌ലിന്ത് സാമി നമാന തിരിക്കി എ്ഡ്‌ത്താന്. പവുലോസു പരേസ 15-16 അദ്‌നാലെ ഏസ്സ്‌ഗാറാരാന എന്ന് എ്ണേവുഗാറാരെ, ആണ്ടവാന് ഏസ്സോഡ നിമാക്കിര്‌ക്കുവ നമ്പിക്കേന പറ്റിമ് സാമിക്ക് പട്ടവാരോഡ നിമാക്കിര്‌ക്കുവ സീവാന്‌ന പറ്റിമ് കേ്ട്ട നാള്‌ലിന്തേ നാന് നിമാക്ക് ബേ്ണ്ടി ഒപ്പ പരേസികൊണ്ടു സാമിക്ക് നണ്ണി സൊന്റെ. 17 നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌ക്ക് അപ്പാനായിര്‌ക്കുവ സാമി എത്ത്‌റ ദൊഡ്ഡവാനെന്റ് പെരിമെപഡ്യാമ് സാമിന പറ്റി സൊക്കാന തെര്യാമ് സാമിനിഗാല് നിമാക്ക് ഉദാവി ഗേയ ബേ്ണ്ടി നാന് സാമിക്ക് പരേസ്‌ന്റെ. 18 സാമി നമാന തന്ന് പ്‌ള്ളെഗാളായി തെരിന്തെ്ഡ്‌ത്ത ഉരിമേക്കിര്‌ക്കുവ മദ്‌പ്പ്‌ന പറ്റിമ് സാമി തന്ന് പ്‌ള്ളെഗാള്‌ക്ക് കൊഡുത്ത്‌റ്‌ക്കുവ ബാക്ക്‌വരഗാള്‌ക്ക് നമാന പങ്ക്‌ഗാറാര് മാഡിര്‌ക്കുവ മദ്‌പ്പ്‌ന പറ്റിമ് നിമാക്ക് സൊക്കാന തെരിവ ബുദ്ദി ബര്യ ബേ്ണ്ടി നാന് പരേസ്‌ന്റെ. 19 അദ്‌താനേമല്ല ബേ്റെ എല്ലാ സക്‌തിഗാള്‌ന ബ്‌ഡ സാമിന നമ്പി പെ്ളേക്ക്‌ന്റവാര് പെ്ളേപ്പ്‌ല് ഗേവ കാര്യഗാള്‌ക്ക് ഇര്‌ക്കുവ സക്‌തി എത്ത്‌റ ദൊഡ്ഡാദെന്റ് തെര്യ ബേ്ണ്ടിമ് നാന് പരേസ്‌ന്റെ. 20 അദേ സാമി സക്‌തിന ബെത്ത്‌ത്തെ സാമി ക്‌റ്‌സ്‌ത്ത്‌നാമ് സത്തവാര് പട്ട്‌ലിന്ത് ഉജുര്‌ളാക്കി എല്ലാദ്‌നാമ് ആള്യ ബേ്ണ്ടി മേലോഗാത്ത്‌ല് തന്ന് ബല സാരി ബെത്താദ്. 21 അത്തെ മാഗെലോഗനാമ് ബൂലോഗനാമ് ആള്‌ന്റവാര്‌ക്ക് ഇര്‌ക്കുവ അദിഗരഗാള്‌ക്ക്‌മ് എല്ലാ ലോഗാത്ത്‌ല് പേരെ്ഡ്‌ത്തവാര്‌ക്ക് ഇര്‌ക്കുവ അദിഗരഗാള്‌ക്ക്‌മ് ഇന്നാലിര്‌ക്കുവ ഉലഗാക്ക്‌മ് ഇന്നി ബരുവ ഉലഗാക്ക്‌മ് ഇര്‌ക്കുവ അദിഗരഗാള്‌ക്ക് ബ്‌ഡ ദൊഡ്ഡ അദിഗര സാമി ഏസ്സ്‌ക്ക് കൊഡുത്താന്. 22 സാമിപ്‌ള്ളെഗാള് എന്നുവ ഉരിമെ കെ്ഡേസിര്‌ക്കുവ ഏസ്സ്‌ഗാറാര് കൂട്ടാത്ത്‌ലവാര്‌ക്ക് ഒട്ടുക്കു ക്‌റ്‌സ്‌ത്ത്‌ന തലെവാന് മാഡി ബാക്കി എല്ലാ അദിഗരനാമ് സാമി ക്‌റ്‌സ്‌ത്ത് കാല്‌കഡി മാഡിബെത്താന്. 23 അത്തെ തലെ ആയിര്‌ക്കുവ ക്‌റ്‌സ്‌ത്ത്‌ത്ത് സരിഗലായി ഏസ്സ്‌ഗാറാര് കൂട്ട ആയിര്‌ക്കുവ നമ്മ ഇര്‌ക്ക്‌ന്റാമ്. അവാന് സരിഗലായിര്‌ക്കുവ ഏസ്സ്‌ഗാറാര് കൂട്ടന തുമ്പുസ്യ എല്ലാ ജാദിഗാള്‌നാമ് അയി കൂട്ടാക്ക് സേത്തി കൊണ്ട്‌റ്‌ന്റാന്. |
New Life Computer Institute