കൊലേസ്യഗാറാര് 3 - സാമി സേദിക്റ്സ്ത്ത്ന ബെത്ത് പെ്ളേക്കുവ പുദ്യ പെ്ളേപ്പ് 1 അദ്‌നാലെ ഏസ്സ് ക്‌റ്‌സ്‌ത്ത് ഉജുര്‌ളാഗാട്ടി നിമ്മാമ് അയാളോഡൊപ്പ ഉജുര്‌ളാഗ്‌ന്റ്‌റ് എന്നുവാദ്‌ന നമ്പ്‌നദാന ഉജുര്‌ളാഗ്‌ന ഏസ്സ് സാമി തനാക്ക് കൊഡുത്ത പദാവിപട്ടാത്ത്‌ലിന്ത് ആളുവാദ്‌നാലെ അയാള് നാഡ്‌ല് നിമാക്ക് ബെത്ത്‌റ്‌ക്കുവ സൊത്തുക്കു ബേ്ണ്ടി ആസെപട്ട് കൊണ്ടു പെ്ളേന്. 2 ഈ ഉലഗാത്ത്‌ല് നിമാക്കിര്‌ക്കുവ സൊത്തുക്കു ബേ്ണ്ട്യല്ല, അയാള് നാഡ്‌ല് നിമാക്ക് ബെത്ത്‌റ്‌ക്കുവ സൊത്തുക്കു ബേ്ണ്ടിത്തെ ആസെപട്ട് കൊണ്ടു പെ്ളേന്. 3 എന്ത്‌ക്കെന്റ് സൊന്ന ഈ ഉലഗാത്ത്‌ല് നിമ്മ് മുന്നുക്കുല പെ്ളേപ്പ് ക്‌റ്‌സ്‌ത്തോഡ സാഗാട്ടി സാമിനാലെ ഉജുര്‌ളാക്ക്‌ന പുദ്യ പെ്ളേപ്പ്‌ലിര്‌ക്കുവ ഉജുരു ഏസ്സ്‌ലിന്ത്‌ത്തെ കെ്ഡേത്താദ്. 4 അദ്‌നാലെ ക്‌റ്‌സ്‌ത്ത് താന് ഉലഗാത്ത്‌ല് ആളുവ കാലാത്ത്‌ല് ഇന്നാല് മറേന്ത്‌റ്‌ക്കുവ നിമ്മ് പുദ്യ പെ്ളേപ്പിക്കിര്‌ക്കുവ മദ്‌പ്പ്‌നാമ് കാണ്‌ല. മുന്നുക്കുല പെ്ളേപ്പ്‌മ് ഇന്നാല്‌ല പെ്ളേപ്പ്‌മ് 5 അദ്‌നാലെ ബേസ്യാഡി നഡാക്കുവാദ്‌നാമ്, മെലിങ്കി നഡാക്കുവാദ്‌നാമ്, ഗൊഡ്ഡുക്കിക്കി നഡാക്കുവാദ്‌നാമ്, കെ്ട്ട കാര്യഗാള് ഗേയ ആസെപഡുവാദ്‌നാമ്, സെലെന കുമ്മുഡുവ പാസെ പണാക്ക് ബേ്ണ്ടി അളാവുക്കു മീ്റി ആസെപഡുവാദ്‌നാമ് ഇത്തെ നിമ്മ ബൂമില് ഗേവാദ്‌ന ഒട്ടുക്കു ബ്‌ട്ട് തള്ള്‌ന്. 6 എന്ത്‌ക്കെന്റ് സൊന്ന ഇത്തവ കാര്യഗാള് ഗേന്ത് കൊണ്ടു സാമി സൊല്ലുപഡിക്ക് പെ്ളേക്കാത്ത ഇവാര്‌ന സാമി മൊനേക്ക്‌പഡ്‌ന്റാന്. 7 മുന്നുക്കു നിമ്മ പെ്ളേത്ത്‌റ്‌ക്കാട്ടി നിമ്മാമ് ഇത്തവ കാര്യഗാള് ഗേന്ത്‌കൊണ്ടുത്തെ പെ്ളേത്തിന്ത്‌റ്. 8 അദ് താനേമല്ല ഇന്നി നിമ്മ മൊനേക്ക് തെ്ട്ടുവാദ്‌നാമ്, മൊനേക്ക് തെ്ട്ടി ദൂളുസുവാദ്‌നാമ്, കീ്ട്ട്‌ഗ ബെത്ത് നഡാക്കുവാദ്‌നാമ് ബ്‌ട്ട് തള്ള്‌ന്. നാണഗെ്ഡ്‌സുവ നായഗാളൊ, സാപ്പ ഇക്കുവ നായഗാളൊ നിമ്മ് ബായിലിന്ത് ബര്യ പാങ്കില്ലെ. 9 കെ്ട്ട കാര്യഗാള് ഗേവ നിമ്മ് മുന്നുക്കുല പളാക്കന നിമ്മ തള്ളിര്‌ക്ക്‌ന്റ്‌റ്. അദ്‌നാലെ നിമ്മ ആങ്കീങ്ക് പൊയി സൊല്ലാദേന്. 10 ഏസ്സ്‌ന ഉജുര്‌ളാക്ക്‌ഗാട്ടി തന്ന് നാഡ്‌ല് പെ്ളേക്കുവാദ്‌ക്ക് തഗ്‌ന്ത ഉരുവാത്ത്‌ല് നിമാനാമ് ഉജുര്‌ളാക്ക്‌നാന്. അദ്‌നാലെ അദ്‌ക്ക് തഗ്‌ന്ത ഗുണാത്ത്‌ല് നിമ്മ പെ്ളേന്. 11 അത്തെ അയാള് നാഡ്‌ല് എവന നാഡ്‌ഗാറാനൊ എഗുദാര് നാഡ്‌ഗാറാനൊ എന്നുവ ജാദി വിത്ത്യാസില്ലെ. പരിസേദനെ സാത്ത്‌റ ഗേന്തവാരൊ, പരിസേദനെ ഗേഗാത്തവാരൊ എന്നുവ മദ വിത്ത്യാസില്ലെ. പഡിത്തവാനൊ പഡിക്കത്തവാനൊ എന്നുവ അറുവു വിത്ത്യാസാമ് ഇല്ലെ. അഡിമേഗൊ മുദലാള്യൊ എന്നുവ സൊത്തു വിത്ത്യാസാമ് ഇല്ലെ. അദ്‌ല് എല്ലാര്‌ക്ക്‌മ് എല്ലാദ്‌ക്ക്‌മ് ഉജാന്തവനാന ക്‌റ്‌സ്‌ത്ത് താനെത്തെ ഇര്‌ക്കുവാന്. 12 അദ്‌നാലെ സാമി നിമ്മോഡ സീവാന്‌ബെത്ത് നിമാന സാമി തനാക്ക് മെച്ച്‌പ്‌ഡിത്തവാര്‌മ്, സാമിക്ക് പട്ടവാര്‌മ്, ആയി തെരിന്തെ്ഡ്‌ത്താദ്‌നാലെ ക്‌റ്‌സ്‌ത്ത്‌ക്ക് ഇര്‌ക്കുവ ഗുണ ഉള്ളവാരായി നിമ്മ ബേ്റ്‌വേന്റവാര്‌മ്, ഗവപഡ്‌ന്റവാര്‌മ്, തണിമോഡിര്‌ന്റവാര്‌മ്, മര്യാദോഡ നഡാക്ക്‌ന്റവാര്‌മ്, പൊറിമുള്ളവാര്‌മ് ആയിര്‌ക്കുഡൊ. 13 ആര് എന്തെല്ല ഗേന്താല്‌മ് അദ്‌ന നിമ്മ താങ്ക്‌ന്റവാരായി ഇര്‌ന്, എന്തൊന്റു കുറ്റഗാള് ഇന്തദാന ആണ്ടവാന് നിമാന പൊറുത്ത പാസെ നിമ്മാമ് ആങ്കീങ്ക് പൊറുത്തിര്‌ന്. 14 ഈ കാര്യഗാളെല്ല ഗേന്ത് നഡാക്കുവാദല്ലാദെ താനെ നിമ്മ സീവാന്‌ബെത്ത് നഡാക്ക്‌ന്റവാര് ആയിര്‌ന്. എന്ത്‌ക്കെന്റ് സൊന്ന സീവാന്‌ത്തെ എല്ലാ കാര്യഗാള്‌നാമ് നലമായി ഒന്റുക്കു സേത്തുവാദ്. 15 ഒന്റു സരിഗലാത്ത്‌ലിര്‌ക്കുവ പല മൂട്ടുമുറിഗാള്‌ന ഒന്റുക്കു മൂട്ടി ബെത്ത്‌റ്‌ക്കുവ പാസെ സാമി നിമാന ഒന്റുക്കു മൂട്ടി ബെക്കുവാദ്‌നാലെ ക്‌റ്‌സ്‌ത്ത് നിമ്മ്‌ദ്യോഡ ബെക്കുവ പെ്ളേപ്പ്‌ല് നിമ്മ പിര്യരിമോഡ പെ്ളേന്. അദ്‌നാലെ നിമ്മ സാമിക്ക്‌മ് അഡ്‌ത്തവാര്‌ക്ക്‌മ് നണ്ണ്യുള്ളവാര് ആയിര്‌ന്. 16 അദ്‌താനേമല്ല, ഏസ്സ് ക്‌റ്‌സ്‌ത്ത് സൊന്ന സൊല്ലുസുലാക്കാത്ത്‌ല് നിമാക്ക് ഇര്‌ക്കുവ അറുവുന ദൊഡ്ഡ അറുവായി എ്ഡ്‌ക്കുവാദ്‌നാലെ അയി അറുവുന ബെത്ത് സാമി നിമാന ഗവപഡുവാദ്‌ന പറ്റി പാഡുവ പാട്ട്‌ഗാള്‌മ് സാമിക്ക് നണ്ണി സൊല്ലുവ പാട്ട്‌ഗാള്‌മ് തെറ്റ്‌കുറ്റ ഗേഗാദിര്‌ക്ക്യ അഡ്‌ത്തവാര്‌ക്ക് ബുദ്ദി സൊല്ലുവ പാട്ട്‌ഗാള്‌മ് പാഡി സാമിന ഉജാത്ത്‌ന്. 17 അത്തെ നിമ്മ എന്ത് പാട്ട് പാഡ്‌നാല്‌മ് എന്ത്‌ന സൊന്നാല്‌മ് എന്ത് ഗേന്താല്‌മ് അദെല്ല നമ്മ് ആണ്ടവാന് ഏസ്സ് പേര്‌ല് ഗേന്. ഏസ്സ് പേര്‌ല് അപ്പാന് സാമിക്ക് നണ്ണി സൊല്ലി കൊണ്ടേ ഇര്‌ന്. സാമി സൊല്ലുപഡി നഡാക്കുഡൊ 18 പെ്ണ്ടച്ച്യാമെ, ആണ്ടവാന് ഏസ്സ്‌ക്ക് കെ്ട്ട്‌പട്ട് നഡാക്കുവ പാസെ നിമ്മ് ആളനാമ്‌ക്ക്‌മ് കെ്ട്ട്‌പട്ട് നഡാന്. 19 ആളനാമെ, നിമ്മ് പെ്ണ്ടച്ച്യാമോഡ മൊനേക്ക് തെ്ട്ടാദെ അവാരോഡ നല്ല സീവാന്‌ബെത്ത് നഡാന്. 20 പ്‌ള്ളെഗാളെ, നിമ്മ എല്ലാ കാര്യാത്ത്‌ല്‌മ് അവ്വ്യപ്പാന് സൊല്ലുപഡിക്ക് നഡാന്. അത്തെ നഡാക്കുവ പ്‌ള്ളെഗാള്‌നാത്തെ ആണ്ടവാന്‌ക്ക് പിര്യെന്റ. 21 അവ്വ്യപ്പനാമെ, നിമ്മ് മക്കാള് ദയിരില്ലത്തവാര് ആവ ദിന്‌സ്‌ല് അവാര്‌ന നൊഡിന്ത് കൊണ്ടേ ഇര്‌ക്കദേന്. 22 ഗിലാസഗാറാരെ, എല്ലാ കാര്യാത്ത്‌ല്‌മ് ബൂമിലിര്‌ക്കുവ നിമ്മ് പണ്ണാഡിഗാള് സൊല്ലുപഡിക്ക് നഡാന്. നിമ്മ് പണ്ണാഡിഗാള് നിമാന പിര്യപഡ്യ ബേ്ണ്ടി അവാര് കണ്ണ്‌ക്ക് താനേമല്ല ആണ്ടവാന്‌ക്ക് അഞ്ചി മനേസ്സാറ ഗേന്. 23 ആണ്ടവാന് നിമാന നോഡികൊണ്ടു ഇര്‌ക്കുവാദ്‌നാലെ നിമ്മ ഗേവാദൊട്ടുക്കു മന്‌സാര്‌ഗാള്‌ക്ക് ഗേവ പാസ്യല്ല ആണ്ടവാന്‌ക്ക് ഗേവ പാസെ മനേസ്സോഡ ഗേന്. 24 അത്തെ നേര്‌മോഡ ഗേവ ഗിലാസാക്ക് അയി ആണ്ടവാന്‌ലിന്ത് കൂലി കെ്ഡേക്ക്‌മ് എന്റ് തെരിന്ത് ആണ്ടവാനാന ക്‌റ്‌സ്‌ത്ത്‌ക്ക് ബേ്ണ്ടി നിമ്മ ഗിലാസ ഗേന്. 25 അയി ആണ്ടവാന് സ്‌ന്നവാനൊ ദൊഡ്ഡവാനൊ എന്റ് നോഡുവാദില്ലെ. അദ്‌നാലെ നേര്‌മോഡ ഗേന്റവാന്‌ക്ക് അദ്‌ക്ക് തഗ്‌ന്ത കൂലി കെ്ഡേക്കുവ പാസെ നേര്‌മോഡ ഗേഗാത്തവാന്‌ക്ക്‌മ് അദ്‌ക്ക് തഗ്‌ന്ത ദെ്ണ്ടണെ ആണ്ടവാന്‌ലിന്ത് കെ്ഡേക്ക്‌മ്. |
New Life Computer Institute