അപ്പോസുത്തലാര് 9 - സാമി സേദിസവുലു ആണ്ടവാന് സാരി തിര്‌ഗ്‌ന്റാന് 1 ആണ്ടവാന് സൊല്ലുപഡി നഡാക്ക്‌ന്റവാര്‌ന കൊന്റു തള്ളുവെ എന്റ് സവുലു മെ്റ്‌ട്ട്‌നാന്. 2 ദമാസ്‌കോസുലു ആണ്ടവാന് സൊല്ലുപഡിക്ക് നഡാക്കുവ പെ്ണ്ണ്‌മക്കാള്‌നാമ്, ഗണ്ടാള്‌നാമ് കണ്ടദാന പ്‌ഡിത്ത് കെ്ട്ടി എര്‌സലേമ്‌ക്ക് എ്ഡ്‌ത്ത് പോവാദ്‌ക്കുള്ള അദിഗര കൊഡുത്ത്‌റ്‌ക്കുവ എ്ള്‌ത്ത്‌ന സവുലു എഗുദാര് ദൊഡ്ഡ പൂസാരി കയിലിന്ത് ബാങ്കിന്താന്. ദമാസ്‌കോസുല എഗുദാര് പരേസുവ ബീ്ഡ്‌ഗാള്‌ക്ക് കൊഡുക്ക്യത്തെ ഈ കത്ത്‌ന ബാങ്കിന്താദ്. 3 അത്തെ സവുലു ദമാസ്‌കോസുക്കു അര്‌ഗെ എജ്ജ്‌നാന്. അദുക്കുള ദിഗിരന ബാന്‌ലിന്ത് ഒന്റു ബെ്ള്‌സ അയാള്ക്ക് സുറ്റുമു അഡിത്ത്‌ദ്. 4 അന്നാല് താനെ അയാള് മണ്ണ്‌ക്ക് ബ്‌ന്താന്. <<സവുലെ, സവുലെ, നീ എന്ത്‌ക്ക് എനാന കൊഡിമെപഡ്‌സ്‌ന്റായി?>> എന്റ് അയാള്ക്ക് സൊല്ലുവ ഒന്റു ജദ്ദന കേ്ട്ടാന്. 5 <<ആണ്ടവാനെ നീ ആര്?>> എന്റ് സവുലു കേ്ട്ടാന്. <<നീ കൊഡിമെ പഡിസികൊണ്ട്‌റ്‌ക്കുവ ഏസ്സ്‌ത്തെ നാന്>> 6 <<നീ ഇ്ളാഗി പട്ടണാക്ക് പൊ, നീ ഗേയ ഇര്‌ക്ക്‌വാദ്‌ന അദ്‌ല് ബെത്ത് നിനാക്ക് ഒന്റൊരുത്താന് സൊല്ലി തരുവാന്>> എന്റ് പിന്നേമ് ജദ്ദ കേ്ട്ട്‌ദ്. 7 സവുലോഡ ഒപ്പ പോയിന്തവാര് അയി ജദ്ദന കേ്ട്ടാദല്ലാദെ ആര്‌നാമ് കാണാഗേ ഇല്ലെ. അവാര് ഒന്റുമു മ്‌ണ്ടാദെ ബെക്കെന്റിന്താര്. 8 സവുലു മണ്ണ്‌ലിന്ത് ഇ്ളാഗി തന്ന് കണ്ണ്‌ന ത്‌റാന്താന്, ആന അയാള്ക്ക് ഒന്റുമു കാണ്യ മുഡ്യാലെ. അദ്‌നാലെ ഒപ്പ പോനവാര് അയാള് കയിന പ്‌ഡിത്ത് ദമാസ്‌കോസുക്കു കൂട്ടി പോനാര്. 9 അയാള്ക്ക് മൂറു നാള് കണ്ണ് കാട്ടാദെ ഇന്ത്‌ദ്, അദേപാസെ മൂറു നാള് ഒന്റുമു തിന്നാദേമ് കുഡിക്കാദേമ് അദ്‌ലിന്താന്. 10 ദമാസ്‌കോസുലു ഏസ്സ് സൊല്ലുപഡി നഡാക്കുവ അനനാസ് എന്നുവ ഒന്റൊരുത്താന് ഇന്തിന്താന്. അയാള്ക്ക് ഒന്റു തോറ്റ കാട്ട്‌റ്റ്. അയി തോറ്റാത്ത്‌ല് <<അനനാസെ>> എന്റ് ആണ്ടവാന് ബ്‌ളിക്കുവാദ്‌ന അയാള് കേ്ട്ടാന്. <<ആണ്ടവാനെ നാന് ഇദാഗെ>> എന്റ് അയാള് സൊന്നാന്. 11 അദുക്കുള ആണ്ടവാന് അയാള്ക്ക് ഇത്തെ സൊന്നാന്. <<നീ <നേരെ ബട്ടെ> എന്നുവ തെരുവുക്കു പോഡൊ, അദ്‌ല് ജൂദാന് ബീ്ഡ്‌ല് തറ്‌സോസുഗാറാന് സവുലു ഇര്‌ക്ക്‌ന്റാന എന്റ് കേ്ള്‌ക്കുഡൊ. അയാള് ഇന്നാല് അദ്‌ല് പരേസികൊണ്ടു ഇര്‌ന്റാന്. 12 സവുലുക്കു ഒന്റു തോറ്റ ബന്ത്‌ദ്. അയി തോറ്റാത്ത്‌ല് അയാള് അനനാസ് എന്നുവ ഒന്റാള് പോയി തനാക്ക് കണ്ണ് കാട്ട്യ ബേ്ണ്ടി തന്ന് തലേക്ക് കയി ബെക്കുവാദ്‌ന അയാള് കണ്ടാന്.>> 13 അനനാസ് അദ്‌ക്ക് ഇത്തെ ബദ്‌ല് സൊന്നാന്. <<ആണ്ടവാനെ, എര്‌സലേമ്‌ല് ഇര്‌ക്കുവ നിന്ന് ആള്‌ഗാള്‌ന അയാള് എഞ്ച്‌ക്കൊ കൊഡിമെപഡിസിര്‌ന്റാന് എന്റ് പല ആള്‌ഗാള് സൊന്നാദ്‌ന നാന് കേ്ട്ട്‌റ്‌ന്റേന്. 14 ദമാസ്‌കോസുലുമു നിനാന കുമ്മുഡുന്റവാര്‌ന ഒട്ടുക്കു പ്‌ഡിത്ത് എര്‌സലേമ്‌ക്ക് എ്ഡ്‌ത്ത് പോയാത്തെ അയാള് ഇന്നാല് ബന്ത്‌റ്‌ക്കുവാദ്. അദ്‌ക്കായി തനാക്ക് അദിഗര കൊഡുത്ത്‌റ്‌ക്കുവ കത്ത് അയാള് എഗുദാര് ദൊഡ്ഡ പൂസാര്യോഡ ഇന്ത് ബാങ്കിര്‌ക്ക്‌ന്റാന്.>> 15 ആണ്ടവാന് അനനാസ്‌ക്ക് ഇത്തെ സൊന്നാന്. <<എന്റാല്‌മ് നീ പോഡൊ, സവുലുന നാന് എനാക്ക് ബേ്ണ്ടി ഗിലാസ ഗേയ തെരിന്തെ്ഡ്‌ത്ത്‌റ്‌ന്റേന്. നാന് ആര് എന്റ് രാജാവുഗാള്‌ക്ക്‌മ്, ബേ്റെ ജാദിഗാള്‌ക്ക്‌മ്, ഇസ്‌റവേല്‌ഗാറാര്‌ക്ക്‌മ് അയാള് സൊല്ലുവാന്. 16 എനാക്ക് ബേ്ണ്ടി എന്തെല്ല കജട്ടഗാള് താങ്കുഡൊ എന്നുവാദ്‌ന നാന് താനെ അയാള്ക്ക് കാട്ടി കൊഡുക്കുവേന്>> എന്റ് സൊന്നാന്. 17 അദ്‌നാലെ അനനാസ് സവുലു ഇന്ത അയി ബീ്ഡ്‌ക്ക് പോയി അയാള് തലേക്ക് കയി ബെത്ത് കൊണ്ടു: <<അയ്യാ, സവുലെ, നിനാക്ക് കണ്ണ്‌കാട്ട്യാമ്, സാമിനിഗാല് മൂഡ്യാമ് നീ ബരുവ ബട്ടേല് ബെത്ത് നിനാക്ക് ബെ്ളിപട്ട ഏസ്സ് എന്നുവ ആണ്ടവാന് എനാന സൊല്ലി ബ്‌ട്ട്‌റ്‌ന്റാന്>> എന്റ് സൊന്നാന്. 18 അന്നാല് താനെ അയാള് കണ്ണ്‌ലിന്ത് മീന് സോക്കിന പാസെ എന്തോ ഒന്റു ജാദി അഡി അലേന്ത്‌ദ്. അന്നാല് താനെ അയാള്ക്ക് കണ്ണ് കാട്ട്‌റ്റ്. അയാള് ഇ്ളാഗി നീര്‌ക്ക് മുളുഗുനാന്. 19 തീനി തിന്റ പ്‌റ അയാള് ഒറേപ്പാനാന്. സവുലു ദമാസ്‌കോസുല ഏസ്സ്‌ഗാറാരോഡ ഒന്റരെ നാള് തങ്ക്‌നാന്. സവുലു ദമാസ്‌കോസുലു നായ സൊല്ലുന്റാന് 20 അദ്‌ക്ക് പ്‌റ അയാള് ഏസ്സ്‌ത്തെ സാമിമഗാന് എന്റ് എഗുദാര് പരേസുവ ബീ്ഡ്‌ക്ക്‌റാഗ പോയി സൊല്ല്യ പ്‌ഡിത്താന്. 21 അയാള് നായന കേ്ട്ടവാര്‌ഗാള് ഒട്ടുക്കു അദിസ്യപട്ട് കൊണ്ടു: <<എര്‌സലേമ്‌ല് ഏസ്സ്‌ന കുമ്മുഡുന്റവാര്‌ന ഒട്ടുക്കു കൊന്റിന്താദ് ഇയാള്‌ത്തേഗൊ? അത്തെ ഇദ്‌ല് ഏസ്സ്‌ന കുമ്മുഡുന്റവാര്‌ന പ്‌ഡിത്ത് കെ്ട്ടി എഗുദാര് പൂസാരിഗാള് തലെവാര് പട്ട്‌ക്ക് എ്ഡ്‌ത്ത് പോയല്ല ഇയാള് ബന്താദ്?>> എന്റ് സൊന്നാര്. 22 ആന മുദാലിന്താദ്‌ന ബ്‌ഡ നല്ല സക്‌ത്യോഡ സവുലു ഈ സേദിന സൊന്നാന്. അയാള് ദമാസ്‌കോസുല എഗുദാര്‌ക്ക് ഏസ്സ്‌ത്തെ ക്‌റ്‌സ്‌ത്ത് എന്റ് സൊന്നാന്. അത്തെ സൊല്ലി അയാള് എഗുദാര് ബായിന അഡാക്ക്‌നാന്. 23 എഞ്ചോ നാള് കളിന്ത പ്‌റ എഗുദാര് ഒന്റായി എ്ണേന്ത് സവുലുന കൊല്ല്യ സട്ട കെ്ട്ട്‌നാര്. 24 ആന സവുലുക്കു ഇദ് തെരിന്ത്‌ദ്. അയാള്‌ന പ്‌ഡിത്ത് കൊല്ല്യ ബേ്ണ്ടി അവാര് ഇ്റ്‌ട്ട്‌പഗാല് പട്ടണ ബാസഗാള്‌ക്ക് കാവഗാറാര്‌ന നില്ലിസിന്താര്. 25 ആന സവുലുന തന്ന് സൊല്ലുപഡി നഡാക്ക്‌ന്റവാര് ഒന്റു നാള് ജാമാത്ത്‌ല് താനെ പട്ടണ സിവാര് ഓട്ടെ മേലെ ഒന്റു ബട്ടിക്ക് ഇക്കി കെ്ട്ടി അഡി ഇ്റാക്കി ബ്‌ട്ടാര്. സവുലു എര്‌സലേമ്‌ല് 26 സവുലു എര്‌സലേമ്‌ക്ക് എജ്ജി അദ്‌ല ഏസ്സ് സൊല്ലുപഡി നഡാക്ക്‌ന്റവാര്‌ക്ക് എ്ണേയ ഓരാഡ്‌നാന്. ആന അവാര് അയാള്‌ന ഒന്റു ഏസ്സ് സൊല്ലുപഡി നഡാക്ക്‌ന്റവാന് എന്റ് നമ്പാലെ. അദ്‌നാലെ അവാര് ഒട്ടുക്കു അയാള്‌ന അഞ്ചിക്കെപട്ടിന്താര്. 27 അദുക്കുള ബറ്‌ണവാസ് എന്നുവ ഒന്റൊരുത്താന് ബന്ത് സവുലുക്കു തൊണെ നിന്റ് അപ്പോസുത്തലാര് പട്ട്‌ക്ക് കൂട്ടി പോനാന്. പ്‌റ സവുലു ആണ്ടവാന്‌ന കണ്ടാദ്‌നാമ്, ആണ്ടവാന് അയാളോഡ നായ നൊഡിന്താദ്‌നാമ്, ദമാസ്‌കോസുലു അയാള് ഏസ്സ്‌ന പറ്റി ദയിരത്തോഡ സൊന്നാദ്‌നാമ് ബറ്‌ണവാസ് അപ്പോസുത്തലാര്‌ക്ക് സൊക്കാന സൊന്നാന്. 28 അത്തെ സവുലു ഏസ്സ്‌ഗാറാരോഡ ഇന്താന്. അദ്‌ക്ക് പ്‌റ അയാള് എര്‌സലേമ്‌ല് ഇര്‌ക്കുവ എല്ലാ എ്ഡെഗാള്‌ക്ക്മ് ആണ്ടവാന് കൊഡുത്ത അദിഗരാത്ത്‌ല് പോയി ദയിരത്തോഡ ആണ്ടവാന് ഏസ്സ് പറ്റി സൊന്നാന്. 29 എവനനായ നൊഡിവ എഗുദാരോഡ സവുലു ഏസ്സ്‌ന പറ്റി നായനൊഡിന്ത് തറ്‌ക്ക്‌നാന്. ആന അവാര് സവുലുന കൊല്ല്യ നോഡുനാര്. 30 അദ്‌നാലെ അദ്‌ല ഏസ്സ്‌ഗാറാര് ഇദ്‌ന കേ്ട്ട് സവുലുന കയിസര്യാക്ക് കൂട്ടി എ്ഡ്‌ത്ത് പോനാര്, അദ്‌ലിന്ത് അവാര് അയാള്‌ന തറ്‌സോസുക്കു സൊല്ലി ബ്‌ട്ടാര്. 31 അത്തെ എഗുദ, ഗലീല, സമര്യ എന്നുവ ദേസഗാള്‌ല ഏസ്സ്‌ഗാറാര് കൂട്ടഗാള്‌ക്ക് ഒട്ടുക്കു ഇന്ത തൊന്തറെ ലേസ നാള് മാട്ട്‌ക്ക് തീന്ത് നലമായി ആറ്റ്. സാമിനിഗാല് കയി താങ്ക്‌നാദ്‌നാലെ ഏസ്സ്‌ഗാറാര് കൂട്ട ഒട്ടുക്കു ഒറേത്താര്. അത്തെ അവാര് മൊത്തനാക്ക് പെര്‌ഗ്‌നാര്. അവാര് ഒട്ടുക്കു ആണ്ടവാന് ബക്‌തില് പെ്ളേത്ത് ബന്താര്. പത്ത്‌റോസു ലുദ്ദാല്‌മ് ഓപാല്‌മ് 32 പത്ത്‌റോസു എല്ലാ സാരി സുറ്റി നഡാന്തിന്താന്. അത്തെ അയാള് ലുദ്ദ എന്നുവ നാഡ്‌ല് ഇര്‌ക്കുവ സാമിക്ക് പട്ടവാര് പട്ട്‌ക്ക് എജ്ജ്‌നാന്. 33 അദ്‌ല് സപ്പെനോയായി ഇ്ളാഗ്യ ഗുഡി മുഡ്യാദെ കെ്ഡെ മേലെ ഇന്ത അയിനാസ് എന്റവാന്‌ന പത്ത്‌റോസു കണ്ടാന്. അയാള്ക്ക് അയി നോയി തട്ടി എ്ട്ട് ബര്‌സ്സ ആയിന്ത്‌ദ്. 34 പത്ത്‌റോസു അയാള്ക്ക് സൊന്നാന്, <<അയിനാസെ, ഏസ്സ് ക്‌റ്‌സ്‌ത്ത് നിനാന തെ്ള്‌സ്‌ന്റാന്, ഇ്ളാഗി നീ താനെ പായിന ബിര്‌സ്സ്.>> അയാള് അന്നാല് താനെ ഇ്ളാഗി നിന്റാന്. 35 ലുദ്ദാല ആള്‌ഗാള്‌മ് സാരോണുല ആള്‌ഗാള്‌മ് ഇദ്‌ന കണ്ടാര്. അദ്‌നാലെ അവാര് മനേസ്സ് ഒട്ടുക്കു ആണ്ടവാന് സാരി തിര്‌ഗ്‌റ്റ്. 36 ഓപ്പാല് തവീദ എന്നുവ ഒന്റു ഏസ്സ് സൊല്ലുപഡി നഡാക്ക്‌ന്റവാള് ഇന്തിന്താള്. (തവീദ എന്നുവ പേര്‌ക്ക് എവന നായാത്ത്‌ല് <<ദോറുക്കാസ്>> എന്റ്‌ത്തെ സൊല്ലുവാദ്. <<ഒന്റു കഡാവെ>> എന്റ്‌ത്തെ ഇദ്‌ക്ക് അര്‌ത്ത). അവാള് എഞ്ച്‌ക്കൊ നല്ലാദ് ഗേന്തിന്താള്. അദേപാസെ ഒന്റുമു ഇല്ലത്തവാര്‌ക്ക് എഞ്ച്‌ക്കൊ ദറ്‌മ്മാമ് ഗേന്തിന്താള്. 37 അയി കാലാത്ത്‌ല് അവാള് നോയായി സത്താള്. ആള്‌ഗാള് അവാള്‌ന നീരട്ടി മേല്‌മാളിഗെകുളാക്ക് കെ്ഡെ ബീ്ക്ക്‌നാര്. 38 അയി ഗളിഗെ പത്ത്‌റോസു ഓപ്പാക്ക് അര്‌ഗെ ഇര്‌ക്കുവ ലുദ്ദാല് ഇന്തിന്താന്. ഇദ്‌ന ഓപ്പാല് ഇന്ത ഏസ്സ് സൊല്ലുപഡി നഡാക്ക്‌ന്റവാര് കേ്ട്ടാര്. അദ്‌നാലെ അവാര്: <<നീ സെറ്റെ സട്ടന എമ്മ് പട്ട്‌ക്ക് ബരുഡൊ>> എന്റ് പത്ത്‌റോസുക്കു സൊല്ല്യ റാഡാള്‌ന പത്ത്‌റോസു പട്ട്‌ക്ക് സൊല്ലി ബ്‌ട്ടാര്. 39 അദ്‌നാലെ പത്ത്‌റോസു അവാരോഡൊപ്പ ഓപ്പാക്ക് പോനാന്. അയാള് അദ്‌ക്ക് എജ്ജ്‌ഗാട്ടി അവാര് അയാള്‌ന മേല്‌മാളിഗേക്ക് കൂട്ടി പോനാര്. അദ്‌ല് ഇന്ത ആള്‌ഗാള്‌ല് മ്‌ണ്ടേസ്യാരെല്ല പത്ത്‌റോസുക്കു സുറ്റീല് നിന്റ് കേ്യ്‌ന്തിന്താര്. തവീദ പെ്ളേത്ത് ഇര്‌ക്കാട്ടി മാഡ്‌ന കമ്‌സ്‌ഗാള്‌നാമ് മേല് ഇക്കുവ കോട്ടുഗാള്‌നാമ് പത്ത്‌റോസുക്കു കാട്ട്‌നാര്. 40 പത്ത്‌റോസു അവാര്‌ന ഒട്ടുക്കു ബെ്ളിഗെ കഡാത്ത്‌നാന്. അദ്‌ക്ക് പ്‌റ അയാള് സന്തൂന്റി പരേസിന്ത് സാവു സാരി തിരിഗിന്ത് <<തവീദ, ഇ്ളാഗ്>> എന്റ് സൊന്നാന്. അന്നാല് താനെ അവാള് കണ്ണ് ത്‌റാന്താള്. പത്ത്‌റോസുന കണ്ട് അവാള് ഇ്ളാഗി കുക്കാന്ത. 41 പത്ത്‌റോസു അവാള് കയിന പ്‌ഡിത്ത് ഇ്ളാക്കി നില്ല്‌സ്‌നാന്. അദ്‌ക്ക് പ്‌റ അയാള് ഏസ്സ്‌ഗാറാര്‌നാമ് മ്‌ണ്ടേസ്യാര്‌നാമ് ബ്‌ളിത്താന്. അയാള് തവീദന ഉജുരോഡ കാട്ടി കൊഡുത്താന്. 42 ഓപ്പാല് എല്ലാ സാരിമ് ഈ സേദി പജാന്ത്‌ദ്. അദ്‌നാലെ എഞ്ചോ ആള്‌ഗാള് ആണ്ടവാന്‌ന നമ്പ്‌നാര്. 43 പ്‌റ പത്ത്‌റോസു എഞ്ചോ നാള് ഓപ്പാല് താനെ ഇന്താന്. തോലുഗാള്‌ന പളാര്യ ബെക്കുവ ഗിലാസ ഗേന്തിന്ത സീമോനു എന്റവാന് ബീ്ഡ്‌ല്‌ത്തെ അയാള് തങ്കിന്താദ്. |
New Life Computer Institute