അപ്പോസുത്തലാര് 28 - സാമി സേദിപവുലോസുക്കു മാള്‌ട്ടാല് എന്താറ്റ് 1 തപ്പിസി കഡാന്ത് ഏ്ട്ടിക്ക് എജ്ജ്‌ഗാട്ടി അദ് സുറ്റുമു നീര്‌റ്‌ക്കുവ മാള്‌ട്ട എന്നുവ എ്ഡെ എന്റ് എമാക്ക് തെരിന്ത്‌ദ്. 2 അദ്‌ലിന്തവാര്‌ക്ക് എമാന കാണ്‌ഗാട്ടി തീയായി ബേ്റ്‌വെന്ത്‌ദ്. അയി ഗളിഗെ മഗെ കാല ആയിന്താദ്‌നാലെ എമാക്ക് നല്ല സളി പ്‌ഡിത്തിന്ത്‌ദ്. അദ്‌നാലെ അവാര് എമാന ബ്‌ളിത്ത് തീബെ്ണ്ടിക്കി കുക്കാസ്‌നാര്. 3 പവുലോസു പോയി മൊത്തന സുള്ള പൊറിക്കി ബന്ത് തീക്ക് ഇക്ക്‌നാന്. അദുക്കുള സൂഡു തട്ടി അദ്‌ലിന്ത ബിര്യാന് പാമ്പ് ബെ്ളിഗെ കഡാന്ത് പവുലോസു കയിന കഡിത്തിന്ത്‌ദ്. 4 അയി പാമ്പ് അയാള് കയില് നേന്റ്‌ര്‌ക്കുവാദ്‌ന അയി നാഡ്‌ലവാര് കണ്ടാര്. അദുക്കുള അവാര്: <<ഇയാള് ഒന്റു കൊലെഗാറാന്‌ത്തെ, അദ്‌ക്ക്‌ത്തെ കഡാല്‌ലിന്ത് തപ്പിസി കഡാന്ത് ഗുഡി ആള്‌ഗാള് ഗേവ പാവഗാള്‌ക്ക് ദെ്ണ്ടണെ കൊഡുക്കുവ അമ്മ സാമി ഇയാള്‌ന പെ്ളേക്ക്യ ബ്‌ഡമാട്ടെന്റ്‌ര്‌ന്റ>> എന്റ് തമ്മ തമ്മ സൊന്നാര്. 5 ആന പവുലോസു അയി പാമ്പ്‌ന കൊഡേന്ത് തീക്ക് ഇക്ക്‌നാന്. അയാള്‌ക്കൊ ഒന്റുമാഗാലെ. 6 പവുലോസു ഇന്നാല് ഊത്തുവാനെന്റൊ സത്ത് തള്ളുവാനെന്റൊ അവാര് കാത്തിന്താര്. ആന അവാര് നല്ല ഗളിഗെ കാത്തിന്ത് ഗുഡി അയാള്‌ക്ക് ഒന്റുമാഗാലെ. അദ്‌ന കണ്ട് അവാര് അയാള്‌ന പറ്റി മനേസ്സ്‌ല് നെനേത്തിന്താദ്‌നെല്ല തള്ളി <<അയാള് ഒന്റു സാമി>> എന്റ് സൊന്നാര്. 7 ഈ മാള്‌ട്ട എന്നുവ നാഡ് മൂപ്പാന് പുബുളിയോസുക്കു അദ്‌ല് ലേസ കാഡ് ഇന്ത്‌ദ്. അയാള് എമാന തന്ന് ബീ്ഡ്‌ക്ക് ബരിസ്സി മൂറു നാള് നലമായി നോഡുനാന്. 8 പുബുളിയോസു അപ്പനച്ചാന് പനി ബന്ത് ബേ്റെ്ഡ്‌പ്പ്‌മ് പ്‌ഡിത്ത് ക്‌ഡാന്തിന്താന്. പവുലോസു അയാള്‌ന നോഡ്യ പോയി അയാള് തലേക്ക് കയി ബെത്ത് പരേസ്‌നാന്. അദുക്കുള അയാള് നോയി തെ്ളിന്താന്. 9 ഇത്തെ നഡാന്താദ്‌ന കണ്ട് അയി നാഡ്‌ല മൊത്തന നോയിഗാറാര്‌മ് പവുലോസു പട്ട്‌ക്ക് ബന്ത് നോയി തെ്ളിന്താര്. 10 അത്തെ അദ്‌ലവാര് എമാക്ക് നല്ല നല്ല സാമനഗാള് തന്താര്. മൂറു മാസ കളിന്ത് എമ്മ അദ്‌ലിന്ത് പോഗാട്ടിമ് എമാക്ക് ബേ്ഡ്‌മാന സാമനഗാളൊട്ടുക്കു അവാര് കപ്പാല്‌ക്ക് എ്ഡ്‌ത്ത് ബന്ത് ഏ്റിസി തന്താര്. പവുലോസാമ് മാള്‌ട്ടാലിന്ത് റോമ പട്ടണാക്ക് പോന്റാര് 11 അലസാണ്ടറിയ പട്ടണാത്ത്‌ലിന്ത് ബന്ത ഒന്റു കപ്പാല് സളിഗളിഗെ തീര മാട്ട്‌ക്ക് മാള്‌ട്ടാല് നില്ലിസി ബെത്തിന്താര്. <<റട്ടെ സാമിഗാള്>> എന്റ് ബ്‌ളിത്തിന്ത അയി കപ്പാല്‌ക്ക് ഏ്റിത്തെ എമ്മ പോനാദ്. 12 അത്തെ എമ്മ സൂറക്കോസു പട്ടണാക്ക് എജ്ജ്‌ന പ്‌റ മൂറു നാള് അദ്‌ല് തങ്ക്‌നേമ്. 13 അദ്‌ലിന്ത് എമ്മ പോയി രെഗ്യോനു പട്ടണാക്ക് എജ്ജ്‌നേമ്. അത്തെ മറ്‌നാള് തെക്ക് സാരിന്ത് കാറ്റഡിത്ത്‌കൊണ്ടു ഇന്താദ്‌നാലെ റാഡ് നാള് ആഗാട്ട്യെല്ല പുത്തൊല്ല പട്ടണാക്ക് എജ്ജ്‌നേമ്. 14 അദ്‌ല് ബെത്ത് എമ്മ ലേസ ഏസ്സ്‌ഗാറാര്‌ന കണ്ടേമ്. ഒന്റു ബാര തമ്മോഡ തങ്കുഡൊ എന്റ് അവാര് എമാക്ക് സൊന്നാര്. അദ്‌ലിന്ത് എമ്മ റോമ പട്ടണാക്ക് പോനേമ്. 15 അദ്‌ല ഏസ്സ്‌ഗാറാര് എമ്മ ബന്ത സേദിന കേ്ട്ടാര്. അദ്‌നാലെ അവാര്‌ല് ലേസ ആള്‌ഗാള് അപ്പീസ് സന്തെ എന്നുവ പട്ടണമാട്ട്‌ക്ക്‌മ് ലേസ ആള്‌ഗാള് മൂറു ബീ്ഡ്‌ഗാള് എന്റ് ബ്‌ളിക്കുവ പട്ടണമാട്ട്‌ക്ക്‌മ് എമാന കൂട്ടി പോയ ബന്താര്. അവാര്‌ന കാണ്‌ഗാട്ടി പവുലോസു സാമിക്ക് നണ്ണി സൊന്നാന്. അത്തെ അയാള്‌ക്ക് ദയിര ബന്ത്‌ദ്. പവുലോസാമ് റോമ പട്ടണാക്ക് എജ്ജ്‌നാര്. 16 എമ്മ റോമ പട്ടണാക്ക് എജ്ജ്‌ന പ്‌റ റോമ നാഡ് അദിഗാരിഗാള് പവുലോസുന തനിഗെ ഇര്‌ക്ക്യ ബ്‌ട്ടാര്. അയാള്‌ക്ക് കാവ ഇര്‌ക്ക്യ ഒന്റു പട്ടളഗാറാന്‌നാമ് ബെത്താര്. 17 മൂറു നാള് കളിന്ത പ്‌റ റോമ നാഡ്‌ല എഗുദാര് തലെവാര്‌ഗാള്‌ന പവുലോസു ബ്‌ളിത്ത് ബരിസ്സി ഇത്തെ സൊന്നാന്, <<എന്ന് കൂട്ടാരാന ഇസ്‌റവേല്‌ഗാറാരെ, നാന് നമ്മ് ആള്‌ഗാളോഡാഗൊ, നമ്മ് പാട്ടനാമ് സട്ട്‌മെ്ട്ട്‌ഗാളോഡാഗൊ ജൂദുപ്‌ഡിത്ത് ഒന്റുമു ഗേഗാലെ. അത്തെ ഇന്ത് ഗുഡി എര്‌സലേമ്‌ല് ബെത്ത് എനാന കുറ്റഗാറാന്‌ന പാസെ ജെയില്‌ക്ക് അഡേത്താര്. പ്‌റ എനാന റോമഗാറാര് കയിക്ക് കൊഡുത്താര്. 18 റോമഗാറാര് എനാന കേ്ള്‌വി കേ്ള്‌ക്കാട്ടി എനാന കൊല്ലുവാദുക്കുള്ള ഒന്റു കുറ്റാമ് നാന് ഗേഗാലെന്റ് അവാര്‌ക്ക് തെരിന്ത്‌ദ്. അദ്‌ക്ക് അവാര്‌ക്ക് എനാന ബെ്റ്‌ദെ ബ്‌ഡ്യ ആസെല്ല ഇന്ത്‌ദ്. 19 ആന എഗുദാര്‌ക്ക് എനാന ബെ്റ്‌ദെ ബ്‌ഡ്യ ആസെ ഇര്‌ക്കാലെ. അദ്‌നാലെ നാന് റോമ നാഡ് രാജാവു താനെ ബിദിക്കുഡൊ എന്റ് സൊന്നെ. ആന നമ്മ് ആള്‌ഗാള്‌ന പറ്റി നാന് ഒന്റു കുറ്റാമ് സൊല്ല്യ ഇല്ലെ. 20 അദ്‌നാലെത്തെ നാന് നിമാന കണ്ട് സൊല്ല്യ ബ്‌ളിത്താദ്. ഇസ്‌റവേല്‌ഗാറാര് നമ്പിക്കോഡ കാത്ത്‌റ്‌ക്കുവ ആള്‌നാലെത്തെ നാന് ഇന്റ് ജെയില്‌ക്ക് അഡേത്തവാന് ആയിര്‌ക്കുവാദ്.>> 21 അയി എഗുദാര് പവുലോസുക്കു: <<എമാക്ക് നിനാന പറ്റി എഗുദാലിന്ത് ഒന്റു എ്ള്‌ത്ത്‌മ് കെ്ഡേക്കാലെ. അദ്‌ലിന്ത് ബന്ത നമ്മ് ആള്‌ഗാള് നിനാന പറ്റി ഒന്റു കുറ്റാമ് സൊല്ലാലെ. 22 ആന നിനാക്ക് സൊല്ല്യ ഇര്‌ക്കുവാദ്‌നെല്ല കേ്ള്‌ക്ക്യ എമാക്ക് ആസെ ഇര്‌ക്ക്‌ന്റ്. എന്ത്‌ക്കെന്റ് സൊന്ന എല്ലാ സാരിമ് ഇര്‌ക്ക്‌ന്റവാര്‌ഗാള് നീയെല്ല കൂഡിര്‌ക്കുവ ഈ കൂട്ടോഡ ജൂദുപ്‌ഡിത്ത് സൊല്ലുവാദ്‌ന എമാക്ക് തെരിമ്>> എന്റ് സൊന്നാര്. 23 അവാര് പവുലോസോഡ നായനൊഡ്യ ഒന്റു നാള് സൊല്ലി ബെത്താര്. അത്തെ അയി നാള് മൊത്തന എഗുദാര്‌ഗാള് പവുലോസു ഇര്‌ക്കുവ പട്ട്‌ക്ക് ബന്താര്. റാവെതാനിന്ത് സന്ത്യോഡ മാട്ട്‌ക്ക് സാമി ആള്യ പോവ കാലന പറ്റി അവാര്‌ക്ക് സൊക്കാന സൊല്ലി കൊഡുത്താന്. മോസെ സട്ടാത്ത്‌ല്‌മ് സാമിദാസ്‌ഗാള് എ്ള്‌ദി ബെത്ത്‌റ്‌ക്കുവ ബൊക്കുലുമു സൊല്ലിര്‌ക്കുവ കാര്യഗാള്‌ന സൊല്ലി കൊഡുത്തു കൊണ്ടു ഏസ്സ് ആര് എന്റ് അവാര്‌ക്ക് തെ്ള്‌വു മാഡി കൊഡുത്താന്. 24 ലേസ ആള്‌ഗാള് പവുലോസു സൊന്നാദ്‌ന സെരി എന്റ് നമ്പ്‌നാര്. ആന ലേസ ആള്‌ഗാള് അദ്‌ന നമ്പാലെ. 25 അവാര് തമ്മ തമ്മ സൊല്ലുവാദ് ഒത്തുവരാദെ പോയ ഒരുങ്കുഗാട്ടി പവുലോസു അവാര്‌ക്ക് ഇത്തെ സൊന്നാന്: <<ഏസ്സയ്യ സാമിദാസ്‌ന ബെത്ത് നിമ്മ് പാട്ടനാമ്‌ക്ക് സാമിനിഗാല് സൊന്നാദ് എത്ത്‌റാഗോ സെരിത്തെ. 26 അയാള് ഇത്തെ സൊല്ലിര്‌ക്ക്‌ന്റാന്, <നീ ഈ ആള്‌ഗാള് പട്ട്‌ക്ക് പോയി സൊല്ലു: <<നിമ്മ എഞ്ച്‌ക്ക് കേ്ട്ടാല്‌മ് നിമാക്ക് നെപ്പ് കെ്ഡേക്കമാട്ട, നിമ്മ എത്തെ നോഡുനാല്‌മ് കാണമാട്ട്‌റ്.>> 27 എന്ത്‌ക്കെന്റ് സൊന്ന ഈ ആള്‌ഗാള് എന്ത്‌ന സൊന്നാല്‌മ് കേ്ള്‌ക്ക്യ മനേസ്സില്ലത്തവാര് ആയിര്‌ന്റാര്. കാദിന്താല്‌മ് ഇവാര് കേ്ള്‌ക്കുവാദില്ലെ, കണ്ണ് ഇന്താല്‌മ് ഇവാര്‌ക്ക് കാണ്യ മനേസ്സില്ലെ. അല്ലാദെ പോന അവാര്‌ക്ക് കണ്ണ് കാട്ടിന്ത്‌റ്‌ക്കു, അവാര് കാദ് കേ്ട്ടിന്ത്‌റ്‌ക്കു, അവാര് മനേസ്സ്‌ക്ക് അഡിപട്ട് നെപ്പ്കെ്ഡേത്തിന്ത്‌റ്‌ക്കു. അവാര് എന്ന് സാരി തിരിഗിന്ത്‌റ്‌ക്കുവാര്. അത്തെ അവാര്‌ന നാന് സൊക്കാന മാഡിന്ത്‌റ്‌ക്കുവെ എന്റ് സാമി സൊന്നാന്.> 28 അദ്‌നാലെ സാമി കാപാറ്റുവ ഈ സേദി എഗുദാര് അല്ലാത്ത ജാദിഗാള്‌ക്ക് ബ്‌ട്ട്‌റ്‌ന്റാന്. അദ്‌ന അവാര് സൊക്കാന കേ്ള്‌ക്കുവാര് എന്റ് നിമ്മ തെരിന്ത്‌റ്‌ക്കുഡൊ.>> എന്റ്‌ഗുഡി സൊല്ലി പവുലോസു തന്ന് നായന മുഡിത്താന്. 30 പവുലോസു ബാഡഗേക്ക് ബീ്ഡ് എ്ഡ്‌ത്ത് സൊന്ത സിലാവുലു റാഡ് ബര്‌സ്സ അദ്‌ലിന്താന്. തന്ന് പട്ട്‌ക്ക് ബന്റവാര്‌നെല്ല അയാള് തങ്കാരിത്താന്. 31 അത്തെ അവാര്‌ക്ക് സാമി ആള്യ പോവ കാലന പറ്റി സൊന്നാന്. അദ്‌താനെ അല്ല ആണ്ടവാന് ഏസ്സ് ക്‌റ്‌സ്‌ത്ത്‌ന പറ്റിമ് ഒളുസാദെ നല്ല ദയിരത്തോഡ അവാര്‌ക്ക് പഡ്‌സ്‌നാന്. |
New Life Computer Institute