അപ്പോസുത്തലാര് 27 - സാമി സേദിപവുലോസുന പട്ടളഗാറാര് റോമ പട്ടണാക്ക് കൂട്ടി പോന്റാര് 1 എമ്മ കഡാല് മേലെ ഇദല്ല്യ നാഡ്‌ക്ക് പോഡൊ എന്റ് റോമ നാഡ് അദിഗാരിഗാള് മുഡിവാക്ക്‌നാര്. അദുക്കുള പവുലോസുനാമ് ജെയില്‌ക്ക് അഡേത്തിന്ത ബേ്റെ ലേസ ആള്‌ഗാള്‌നാമ് നൂറു പട്ടളഗാറാര് തലെവാന് ജൂല്യാസ് കയിക്ക് നോഡ്യ ഒപ്പുസുനാര്. ജൂല്യാസ് റോമ നാഡ് പട്ടളാത്ത്‌ല് റോമ നാഡ് രാജാവു കാര്യഗാള് നോഡിനഡാത്തുവ പട്ടളാത്ത്‌ല ഒന്റാളായിന്താന്. 2 എമ്മ അദ്‌റമുത്തു എന്നുവ കഡാലോരാത്ത്‌ലിന്ത് ബരുവ കപ്പാല്‌ക്ക് ഏ്റി പോനേമ്. അയി കപ്പാല് ആസ്യ നാഡ്‌ല ഒന്റൊന്റു കഡാലോര മേലെഗേ പോയ ബേ്ണ്ടി ഒരിങ്കിന്ത കപ്പാല് ആയിന്ത്‌ദ്. അരിസ്‌ത്തറ്‌ഗോസുമു എമ്മോഡ ഇന്തിന്താന്. അയാള് മക്കെദോന്യ നാഡ്‌ല തെസലോനിക്ക്യ പട്ടണാത്ത്‌ല് ഇര്‌ക്കുവ ഒന്റാളായിന്താന്. 3 മറ്‌നാള് എമ്മ സീദോനു പട്ടണാക്ക് എജ്ജ്‌നേമ്. ജൂല്യാസ്‌ക്ക് പവുലോസുന ബേ്റ്‌വെന്താദ്‌നാലെ പവുലോസുക്കു അയാള് എ്ണേവുഗാറാര്‌ന പോയി കാണ്യാമ് അയാള് എജേവുഗാറാര്‌ക്ക് പവുലോസു കാര്യഗാള്‌ന നോഡ്യാമ് ബ്‌ട്ടാന്. 4 അദ്‌ലിന്ത് എമ്മ പോനേമ്. അദുക്കുള കാറ്റ് കപ്പാല്‌ക്ക് നേരെ അഡിക്കുവാദ്‌നാലെ കാറ്റ് കമ്മി അഡിക്കുവ സുറ്റുലുമു നീര് ഇര്‌ക്കുവ കുപ്പുറോസു നാഡ്‌ല ഒന്റു ഓരമേലെ താനെത്തെ പോനേമ്. 5 കിലിക്ക്യ, പമ്പുല്ല്യ നാഡ്‌ഗാള്‌ല കഡാല് മേലെ പോയി ലുക്ക്യ നാഡ്‌ല് ഇര്‌ക്കുവ മുറ പട്ടണാക്ക് എമ്മ എജ്ജ്‌നേമ്. 6 അദ്‌ല് ബെത്ത് പട്ടള തലെവാന് അലസാണ്ടറിയ പട്ടണാത്ത്‌ലിന്ത് ഇദല്ല്യ നാഡ്‌ക്ക് പോവ ഒന്റു കപ്പാല്‌ന കണ്ടാന്. അയാള് എമാന അദ്‌ക്ക് ഏ്റ്‌സ്‌നാന്. 7 പിന്നെ എഞ്ചോ നാള് എമ്മ മെല്ലാത്തെ പോനേമ്. സെര്യായി കജട്ട പട്ട് കഡേഗല എമ്മ കിനിദോസു എന്നുവ കഡാലോര പട്ടണാക്ക് എജ്ജ്‌നേമ്. കാറ്റ് കപ്പാല്‌ക്ക് നേരെ അഡിക്കുവാദ്‌നാലെ അയി ബട്ടെമേലെ എമാക്ക് ദാസ്‌ത്തി ദൂര പോയ മുഡ്യാലെ. അദ്‌നാലെ എമ്മ ക്‌റേത്ത എന്നുവ സുറ്റുമു നീര്‌റ്‌ക്കുവ എ്ഡേക്ക് തെക്ക് സാരി ഇര്‌ക്കുവ സല്‌മോനു എന്നുവ നൂഞ്ചു ഓരമേലെ പോനേമ്. അദ്‌ല് കാറ്റ് കമ്മിത്തെ അഡിത്തിന്ത്‌ദ്. 8 സെര്യായി കജട്ട പട്ട് കഡാലോരമേലെ താനെ എമ്മ കപ്പാല്‌ന ഓട്ടി പോനേമ്. അത്തെ പോയി ലാസയ്യ പട്ടണാക്ക് അര്‌ഗെ കപ്പാല്‌ഗാള്‌നെല്ല സൂസാരിത്ത് നില്ലിസി ബെക്ക്യ മുഡിവ കഡാലോര പട്ട്‌ക്ക് എജ്ജ്‌നേമ്. 9 അദ്‌ല് എമാക്ക് എഞ്ചോ നാള് ഇര്‌ക്കുവാദ്‌ക്ക് ആയി തള്ള്‌ട്ട്. അദുക്കുളെല്ല പാവഗാള്‌ന പൊറുത്തു കെ്ഡേത്താദ്‌ക്കുള്ള എഗുദാര് നോമ്പി നാള്‌മ് തീന്ത്‌ദ്. അയി ഗളിഗെ കാറ്റഡിക്കുവ ഗളിഗേമ് സളിഗളിഗേമ് ആയിന്താദ്‌നാലെ കഡാല് മേലെ പോവാദ്‌മ് സെര്യാന ബുദ്ദിമുട്ടു ആറ്റ്. അദ്‌നാലെ പവുലോസു അവാര്‌ക്ക്: 10 <<നമ്മ ഇദ്‌ലിന്ത് പോഗാട്ടി സാമനഗാള്‌ക്ക്‌മ് കപ്പാല്‌ക്ക്‌മ് സെര്യായി നാസനജട്ട ബരുവു എന്റ് എനാക്ക് തെരിന്റ്. അദ്‌താനെ അല്ല നമ്മ് ഉജുരുക്കുമു ആവാത്ത് ബര്‌മ്>> എന്റ് സൊന്നാന്. 11 ആന പട്ടള തലെവാന് പവുലോസു സൊന്നാദ്‌ന ബ്‌ഡ അയി കപ്പാല്‌ല് ഗിലാസ ഗേന്റവാര് തലെവാന്‌മ് കപ്പാല്‌ഗാറാന്‌മ് നായന നമ്പ്‌നാന്. 12 അയി കപ്പാല് ഇന്നാല് നില്ലിസിര്‌ക്കുവ എ്ഡേല് സളിഗളിഗേക്ക് ഇര്‌ക്ക്യ മുഡ്യാമാട്ട. അദ്‌നാലെ അദ്‌ലിന്ത് പോയി മുഡിന്തദാന പൊയിനിക്ക്യാക്ക് എജ്ജ്യ ഓരാഡുഡൊ എന്റ് സൊന്നാദ്‌ന മുക്കാബാസി ആള്‌ഗാള്‌മ് സെരി എന്റാര്. ക്‌റേത്താല് കപ്പാല് നില്ലുസുവ ഒന്റു എ്ഡേത്തെ പൊയിനിക്ക്യ. അദ്‌ല് കോഡെഗളിഗേക്ക് ഇര്‌ക്ക്യ മുഡിമ് എന്റ് അവാര് നെനേത്തിന്താര്. തെക്ക്‌മേക്ക് സാരിക്ക്‌മ് ബഡാക്ക്‌മേക്ക് സാരിക്ക്‌മ് നേരെ ഇര്‌ക്കുവ എ്ഡേത്തെ പൊയിനിക്ക്യ. ദൊഡ്ഡ കാറ്റ് അഡിക്ക്‌ന്റ് 13 അദുക്കുള തെക്ക് സാരിന്ത് കാറ്റ് മെല്ല മെല്ല അഡിക്ക്യ പ്‌ഡിത്ത്‌ദ്. അദ്‌നാലെ അവാര് കണാക്കാക്ക്‌ന പാസെ പൊയിനിക്ക്യാക്ക് എജ്ജുവാര് എന്റ് നെനേത്ത് നങ്കൂരന ബലിത്തെ്ഡ്‌ത്ത പ്‌റ കപ്പാല്‌ന ഓട്ട്യ പ്‌ഡിത്താര്. ക്‌റേത്ത ഓരമേലെ താനെത്തെ പോനാര്. 14 അത്തെ പോഗാട്ടി സട്ടന ക്‌റേത്താലിന്ത് ദൊഡ്ഡ ഒന്റു കാറ്റ് അഡിക്ക്യ പ്‌ഡിത്ത്‌ദ്. അദ് ബഡാക്ക്‌ക്ക്‌മ് ക്‌ളാക്ക്‌ക്ക്‌മ് നഡ്‌ക്കെ ഇര്‌ക്കുവ സാരിന്ത്‌ത്തെ അഡിത്താദ്. 15 കാറ്റ്‌ക്ക് നേരെ മുന്നുക്കു പോയ മുഡ്യാദെ ആഗാട്ടി എമ്മ അയി ഓരട്ടന തെ്റിന്തേമ്. കാറ്റഡിക്കുവ സാരി കപ്പാല്‌ന ബ്‌ട്ടേമ്. 16 അത്തെ എമ്മ കാറ്റ് കമ്മി അഡിത്തിന്ത സുറ്റുമു നീര് ഇര്‌ക്കുവ കവുദ എന്നുവ സ്‌ന്ന എ്ഡേക്ക് തെക്ക് സാരിമേലെ പോനേമ്. അദ്‌ല് ബെത്ത് കപ്പാല്‌ല് പിന്ന് സാരി കെ്ട്ടി തൂക്കിന്ത തോണിന എമ്മ സെര്യായി ബുദ്ദിമുട്ടി പ്‌ഡിത്ത് എ്ഡ്‌ത്തേമ്. 17 അദ്‌ന ബലിത്ത് എ്ഡ്‌ത്ത് കപ്പാല്‌ക്ക് ഏ്റ്‌സി കപ്പാല്‌ന ദൊഡ്ഡ കണ്ണില് കെ്ട്ടി ഒറേപ്പ് മാഡ്‌നേമ്. കപ്പാല് ലിവ്യ കഡാലോരാക്ക് അര്‌ഗെ ഇര്‌ക്കുവ ഗജ ഇല്ലാത്ത എ്ഡേല് മണാല് ദീ്ണേക്ക് പോയി ഏ്റ്‌മെന്റ് അവാര് അഞ്ച്‌നാര്. അദ്‌നാലെ അവാര് കപ്പാല് പായിന താത്തി കാറ്റ്‌സാരി കപ്പാല്‌ന ബ്‌ട്ടാര്. 18 ദൊഡ്ഡ കാറ്റ് മൂട്ടില്ലാദെ അഡിത്ത്‌കൊണ്ടിന്ത്‌ദ്. അത്തെ ബുദ്ദിമുട്ടി ബലേന്താദ്‌നാലെ മറ്‌നാള് അവാര് കപ്പാല്‌ലിന്ത ലേസ സാമനഗാള്‌ന തെ്റ്യ പ്‌ഡിത്താര്. 19 അത്തെ അദ്‌ക്ക് മറ്‌നാള് ആഗാട്ടി കപ്പാല്‌ല മരദൂണുഗാള്‌നാമ് പായിഗാള്‌നാമ് കണ്ണിഗാള്‌നാമ് അവാര് എ്ഡ്‌ത്ത് തെ്റിന്താര്. 20 എഞ്ചോ നാള് എമാക്ക് നേരനാഗൊ ബെ്ള്ളിഗാള്‌നാഗൊ കാണ്യ മുഡ്യാലെ. ദൊഡ്ഡ കാറ്റ് മൂട്ടില്ലാദെ അഡിത്ത് കൊണ്ടേ ഇന്ത്‌ദ്. കഡേഗല എമ്മ പെ്ളേക്കുവേമ് എന്നുവ ആസെ ഒട്ടുക്കു ഇല്ലാദെ ആയി തള്ള്‌ട്ട്. 21 കപ്പാല്‌ല് ഇന്തവാര് തീനി തിന്നാദെ എഞ്ചോ നാളായിന്ത്‌ദ്. അദുക്കുള പവുലോസു അവാര്‌ക്ക് നഡ്‌ക്കെ നിന്റ് കൊണ്ടു ഇത്തെ സൊന്നാന്, <<മന്‌സാര്‌ഗാളെ, ക്‌റേത്താലിന്ത് പ്‌റപഡ ബേ്ഡ എന്റ് നാന് സൊന്നാദ്‌ന നിമ്മ കേ്ട്ടിന്ത്‌റ്‌ക്കുഡൊ. എന്റ ഈ കജട്ടനജട്ടഗാള് ബന്ത്‌റ്‌ക്കമാട്ട. 22 എന്റാല്‌മ് നാന് ഇന്നാല് നിമാക്ക് സൊന്റെ: ദയിരപഡ്‌ന്, നിമ്മ ആര്‌മ് സാഗമാട്ട്‌റ്. കപ്പാല് താനെത്തെ ഒഡേന്ത് തള്ളുവു. 23 നെന്നെ ജാമാത്ത്‌ല് നാന് കുമ്മുഡുവ സാമി പട്ട്‌ലിന്ത് ഒന്റു ദൂദാന് എന്ന് പട്ട്‌ക്ക് ബന്താന്. നാന് അയി സാമിഗാറാന്‌ത്തെ. 24 അയി ദൂദാന്: <പവുലോസെ അഞ്ചബേ്ഡ! നീ റോമ നാഡ് രാജാവു മുന്നുക്കു നില്ലുവായി. സാമിക്ക് നിനാന ബേ്റ്‌വെന്താദ്‌നാലെ നിന്നോഡ കപ്പാല്‌ല് ഇര്‌ക്ക്‌ന്റവാര് ഉജുരുക്കുമു ഒന്റുമാഗമാട്ട> എന്റ് സൊന്നാന്. 25 അദ്‌നാലെ മന്‌സാര്‌ഗാളെ ദയിരപഡ്‌ന്! എനാക്ക് സൊന്ന പാസെത്തെ നഡാക്ക്‌മ് എന്നുവ നമ്പിക്കെ എനാക്ക് സാമ്യോഡ ഇര്‌ക്ക്‌ന്റ്. 26 എന്റാല്‌മ് നമ്മ സുറ്റുമു നീര്‌റ്‌ക്കുവ ഒന്റു പട്ട്‌ക്ക് പോയി സിക്ക്‌ല.>> 27 അത്തെ കാറ്റഡിത്ത് പദ്‌നാല് നാള് ആഗാട്ടി എമ്മ അദ്‌റ്യ കഡാല് മേലെ അലേന്ത്‌പലേന്തിന്തേമ്. പദ്‌നാലാവാദ് ജാമാത്ത്‌ല് ഏ്ട്ടിക്കര്‌ഗെത്തെ എജ്ജിര്‌ക്ക്‌ല എന്റ് കപ്പാല്‌ല് ഗിലാസ ഗേന്റവാര് നെനേത്താര്. 28 അദ്‌നാലെ അവാര് കഡാല് നീര് എമ്മാട്ട് ഗജ ഇര്‌ക്ക്‌ന്റ് എന്റ് അളാന്ത് നോഡ്യ ഇയ്യ കട്ടിന ഒന്റു കണ്ണിക്ക് കെ്ട്ടി നീര്‌ക്ക് ഇക്ക്‌നാര്. നാപ്പദ് തോളു ഗജ ഇര്‌ക്ക്‌ന്റ് എന്റ് അവാര്‌ക്ക് തെരിന്ത്‌ദ്. ലേസ അത്തഗ പോയി അവാര് പിന്നേമ് അളാക്ക്‌ഗാട്ടി മുപ്പാദ് തോളു എന്റ് കണ്ടാര്. 29 കപ്പാല് കല്ല്‌ഗാള്‌ക്ക് പോയി മുട്ടുമെന്റ് അഞ്ചി കപ്പാല്‌ക്ക് പിന്ന് സാരി പോയിന്ത് നാക്ക് നങ്കൂരന ഇക്ക്‌നാര്. അദ്‌ക്ക് പ്‌റ ബെ്ഡ്യ ബേ്ണ്ടി അവാര് പരേസികൊണ്ടു ഇന്താര്. 30 കപ്പാല്‌ല് ഗിലാസ ഗേന്റവാര് കപ്പാല്‌ലിന്ത് തപ്പിസി കഡാക്ക്യ നോഡുനാര്. അദ്‌ക്ക് ബേ്ണ്ടി അവാര് കപ്പാല്‌ക്ക് മുന്നുസാരി പോയിന്ത് നങ്കൂരന ഇക്കുവ പാസെ നഡിത്ത് തോണിന കഡാല്‌ക്ക് ഇ്റാക്ക്‌നാര്. 31 അദുക്കുള പവുലോസു പട്ടള തലെവാന്‌ക്ക്‌മ് പട്ടളഗാറാര്‌ക്ക്‌മ്: <<ഇവാര് കപ്പാല്‌ലിന്ത് പോനദാന നിമ്മുജുരു മിച്ചാഗമാട്ട>> എന്റ് സൊന്നാന്. 32 അദ്‌നാലെ പട്ടളഗാറാര് തോണിന കെ്ട്ടി ഇ്റാക്ക്‌ന കണ്ണിന അറ്‌ത്ത് പറ്‌ത്താര്. 33 നേര ബെ്ഡിഗാട്ടി കപ്പാല്‌ലിന്തവാര്‌ന ഒട്ടുക്കു തീനി തിന്ന്യ പവുലോസു നത്ത്‌നാന്. <<നിമ്മ തീനി ഒന്റുമു തിന്നാദെ പദ്‌നാല് നാള് ആറ്റല്ല. 34 അദ്‌നാലെ നിമ്മ സെറ്റെ എന്താറ്റ തിന്നുഡൊ എന്റ് നാന് സൊന്റെ. നിമ്മുജുരുന മിച്ച മാഡ്യ അദ് ബേ്ഡ്‌മ്. നിമാക്ക് ഇന്നി ഒന്റുമു ബരമാട്ട>> എന്റ് സൊന്നാന്. 35 ഇത്തെ സൊന്ന പ്‌റ എല്ലാര്‌ക്ക്‌മ് മുന്നുക്കു ബെത്ത് അയാള് അഡേന എ്ഡ്‌ത്ത് സാമിക്ക് നണ്ണി സൊന്ന പ്‌റ മുറുത്തു തിന്ന്യ പ്‌ഡിത്താന്. 36 അദുക്കുള ഒട്ടുക്കു ദയിര ബന്ത് തീനി തിന്റാര്. 37 കപ്പാല്‌ല് എമ്മ മൊത്ത ഇര്‌നൂറ്റി എ്ള്‌വത്താറ് ആള്‌ഗാള് ഇന്തേമ്. 38 അവാര് തമാക്ക് ബേ്റ് തുമ്പമാട്ട് തിന്റ പ്‌റ ഗോദിമ്പെന കഡാല്‌ക്ക് കൊട്ടി തള്ളി കപ്പാല് ബാരന കമ്മി മാഡ്‌നാര്. കപ്പാല് ഒഡേന്റ് 39 ബെ്ഡിഗാട്ടി കപ്പാല്‌ല് ഗിലാസ ഗേന്റവാര് ഒന്റു ഏ്ട്ടിന കണ്ടാര്. ആന ഏദ് ഏ്ട്ടി എന്റ് അവാര്‌ക്ക് തെര്യാലെ. അദ് ഒന്റു കഡാല് ദോമ്പു എന്റ്‌മ് മണാല് തുമ്പ ഇര്‌ക്കുവ ഏ്ട്ടി എന്റ്‌മ് അവാര്‌ക്ക് തെരിന്ത്‌ദ്. മുഡിന്തദാന കപ്പാല്‌ന അയി ഏ്ട്ടിക്ക് എ്ഡ്‌ത്ത് പോയി പദിക്കുഡൊ എന്റ് അവാര് മുഡിവാക്ക്‌നാര്. 40 അവാര് നങ്കൂരന കെ്ട്ടിന്ത കണ്ണിന അറ്‌ത്ത് പറ്‌ത്ത് കഡാല്‌ക്ക് ബ്‌ട്ടാര്. കപ്പാല്‌ന ഓട്ടുഗാട്ടി അദ്‌ന ആങ്കീങ്ക് തിരിക്കി ബ്‌ഡ്യ ബേ്ണ്ടി പിന്ന് സാരി ബെത്ത്‌റ്‌ക്കുവ ദൊഡ്ഡ മര മുട്ടിന കെ്ട്ടിന്ത കണ്ണിന ഉക്കുനാര്. അദ്‌ക്ക് പ്‌റ കാറ്റ് കപ്പാല്‌ന എ്ഡ്‌ത്ത് പോയ കപ്പാല്‌ക്ക് മുന്നുസാരി ഇര്‌ക്കുവ പായിന അവാര് ഉജാത്ത്‌നാര്. പ്‌റ അവാര് ഏ്ട്ടി സാരി കപ്പാല്‌ന ഓഡുസുനാര്. 41 കപ്പാല് മണാല് ദീ്ണേക്ക് പോയി ഇ്ഡിത്ത് കപ്പാല്‌ല മുന്നുസാരി ബാഗ അഡി പദിന്ത്‌ദ്. അദ്‌നാലെ കപ്പാല്‌ക്ക് മുന്നുക്കു പോയ മുഡ്യാലെ. അദുക്കുള ദൊഡ്ഡ തെരെഗാള് അഡിക്കുവാദ്‌നാലെ കപ്പാല്‌ല പിന്ന് സാരി ബാഗാമ് പൊളി പൊള്യ ഒഡേന്ത് തള്ള്‌ട്ട്. 42 പ്‌ഡിത്ത് ബെത്ത്‌റ്‌ക്കുവ കുറ്റഗാറാര് നീസി തപ്പിസി കഡാക്കാദെ ഇര്‌ക്ക്യ അവാര്‌ന കൊല്ലുഡൊ എന്റ് പട്ടളഗാറാര് സട്ട കെ്ട്ട്‌നാര്. 43 ആന പട്ടള തലെവാന് പവുലോസുന കാപാറ്റുഡൊ എന്റ് ആസെപട്ടിന്താദ്‌നാലെ അത്തെ ഗേഗബേ്ഡ എന്റ് അവാര്‌ന തഡ്‌ത്താന്. അദ്‌ക്ക് അയാള്: <<നീസ്യ തെരിന്റവാരെല്ല മുദാല് നീര്‌ക്ക് ഗുദിത്ത് നീസി ഏ്ട്ടിക്ക് ഏ്റ്‌ന്, 44 നീസ്യ തെര്യാത്തവാര് പലാഗെഗാള്‌നഗൊ, ഒഡേന്ത് തള്ള്‌ന കപ്പാല് പൊളിപ്പ്‌ഗാള്‌നഗൊ പ്‌ഡിത്ത് ഏ്ട്ടിക്ക് ഏ്റ്‌ന്>> എന്റ് സൊന്നാന്. അത്തെ എമ്മ ഒട്ടുക്കു ഒന്റുമാഗാദെ ഏ്ട്ടിക്ക് ഏ്റ്‌നേമ്. |
New Life Computer Institute