അപ്പോസുത്തലാര് 26 - സാമി സേദിപവുലോസു അഗ്‌റിപ്പ രാജാവു മുന്നുക്കു ബാദിക്ക്‌ന്റാന് 1 അഗ്‌റിപ്പാവു പവുലോസുക്കു: <<ഇന്നി നിനാക്ക് സൊല്ല്യ ഇര്‌ക്കുവാദ്‌ന സൊല്ലുല>> എന്റ് സൊന്നാന്. അദുക്കുള പവുലോസു കയിന നീ്ട്ടി കൊണ്ടു ബാദിക്ക്യ പ്‌ഡിത്താന്. 2 <<അല്ല അഗ്‌റിപ്പ രാജാവെ! എഗുദാര് എനാന പറ്റി സൊല്ലിര്‌ക്കുവ കുറ്റഗാള്‌ന ഒട്ടുക്കു ഇന്റ് നിന്ന് മുന്നുക്കു ബെത്ത് ബാദിക്ക്യ എനാക്ക് നേര കെ്ഡേക്ക്‌മെന്റ് നാന് നെനേക്കാഗേ ഇല്ലെ. 3 എന്ത്‌ക്കെന്റ് സൊന്ന എഗുദാര് സട്ട്‌മെ്ട്ട്‌ഗാള്‌ന ഒട്ടുക്കുമു അവാര് എ്ഡേല് ഇര്‌ക്കുവ തറ്‌ക്കഗാള്‌ന ഒട്ടുക്കുമു നിനാക്ക് നലമായി തെരിമ്. അദ്‌നാലെ നാന് സൊല്ലുവാദ്‌ന സെറ്റെ നീ പൊറിമോഡ കേ്ള്‌ക്കുഡൊ. 4 സ്‌റ്‌പ്പ മുദാലെ നാന് എത്തെ പെ്ളേത്തിന്തെ എന്റ് എഗുദാര്‌ക്ക് ഒട്ടുക്കു തെരിമ്. അദേപാസെ നാന് മുദാല് എന്ന് നാഡ്‌ല്‌മ് പ്‌റ എര്‌സലേമ്‌ല്‌മ് പെ്ളേത്തിന്താദ്‌ന ഒട്ടുക്കുമു അവാര്‌ക്ക് തെരിമ്. 5 എഗുദാര് കച്ചിഗാള്‌ല് താനെ ബേ്റെ കച്ചിഗാള്‌ന ബ്‌ഡ എഗുദ സട്ടഗാള്‌ന ഒട്ടുക്കു സൊക്കാന കേ്ട്ട് നഡാക്കുവ കച്ചിഗാറാര്‌ത്തെ പരിസാര്. അവാര്‌ല് ഒന്റാള്‌ത്തെ നാന്. അദ് മുന്നുക്കേ അവാര്‌ക്ക് തെരിമ്. ബേ്ഡ്‌മാന അവാര്‌ക്ക് അദ് നേര് എന്റ് സൊല്ലുല. 6 സാമി എമ്മ് പാട്ടനാമ്‌ക്ക് തരുവെ എന്റ് സൊല്ലിര്‌ക്കുവ ബാക്ക്‌വരഗാള്‌ന കെ്ഡേക്ക്‌മ് എന്റ് നമ്പി നാന് കാത്ത്‌റ്‌ക്കുവാദ്‌നാലെത്തെ എനാന ഇന്റ് നായ കേ്ള്‌ക്ക്‌ന്റ്‌റ്. 7 സാമി തരുവെ എന്റ് സൊല്ലിര്‌ക്കുവ ഈ ബാക്ക്‌വരഗാള്‌ന കെ്ഡേക്ക്‌മെന്റ് നമ്പിക്കോഡ കാത്ത്‌കൊണ്ടു എമ്മ് പന്നന്റ് ബമ്മേസഗാള്‌മ് ഇ്റ്‌ട്ട്‌പഗാല് സാമിന കുമ്മുഡി നഡാക്ക്‌ന്റാര്. മഗരാജാവെ, അത്തെ നാന് നമ്പി കാത്ത്‌റ്‌ക്കുവാദ്‌നാലെത്തെ ഈ എഗുദാര് എനാന കുറ്റഗാറാന് മാഡിര്‌ക്കുവാദ്. 8 സാമി സത്തവാര്‌ന ഉജുര്‌ളാക്കുവാന് എന്റ് നിമാക്ക് നമ്പ്യ മുഡ്യാത്താദ് എന്ത്‌ക്ക്? 9 നസറേത്ത്‌ഗാറാന് ഏസ്സ്‌ന നമ്പ്‌ന്റവാരോഡ ജൂദുപ്‌ഡിത്ത് എനാക്ക് ഗേയ മുഡിവാദ്‌ന ഒട്ടുക്കു ഗേഡൊ എന്റ് നാന് നെനേത്തിന്തേന്. 10 അദ് താനെത്തെ നാന് എര്‌സലേമ്‌ല്‌മ് ഗേന്താദ്. എഗുദാര് പൂസാരി തലെവാര്‌ഗാളോഡ അദിഗര കെ്ഡേസി സാമിന നമ്പ്‌ന എഞ്ചോ ആള്‌ഗാള്‌ന ജെയില്‌ക്ക് അഡേത്തേന്. അവാര്‌ന കൊല്ല്യ ബിദിക്കാട്ടി അദ്‌ന സെരി എന്റ് നാന് സൊന്നേന്. 11 നാന് എഞ്ചോ ഗളിഗെ എഗുദാര് പരേസുവ ബീ്ഡ്‌ക്ക്‌റാഗ പോയി അവാര്‌ന ദെ്ണ്ടിക്ക്യ കൊഡുത്തെ. അദല്ലാദെ ഇന്നി എന്നാല്‌ക്ക്‌മ് ഏസ്സ്‌ന നമ്പമാട്ടേമ് എന്റ് സൊല്ലുനു എന്റ് സൊല്ല്യ അവാര്‌ന നത്ത്‌നേന്. അവാരോഡ അത്ത്‌റാക്ക്‌മ് മൊനെ ഇന്താദ്‌നാലെ ബേ്റെ പട്ടണഗാള്‌ക്ക് ഗുഡി പോയി നാന് ഇത്തവാള്‌ഗാള്‌ന കൊഡിമെപഡ്‌സ്‌നേന്.>> പവുലോസു എത്തെ ഏസ്സ്‌ന നമ്പ്‌നേന് എന്റ് സൊന്റാന് 12 <<ഇത്തെല്ല ഗേയ എഗുദാര് പൂസാരി തലെവാര്‌ഗാള് അദിഗര തരുഡൊ എന്റ് നാന് കേ്ട്ടേന്. അവാര് അദ് ഗേവാദ്‌ക്കുള്ള അദിഗര തന്ത്‌റ്‌ക്കുവ എ്ള്‌ത്ത്‌നാമ് കെ്ഡേസി നാന് ദമാസ്‌കോസുക്കു പോനെ. 13 അത്തെ പോഗാട്ടി രാജാവെ, ബട്ടേല് ബെത്ത് ഉച്ചി നേരാത്ത്‌ല് നേരകാല്‌ന ബ്‌ഡ ദൊഡ്ഡ ഒന്റു ബെ്ള്‌സന നാന് കണ്ടെ. അദ് ബാന്‌ലിന്ത് ബന്ത് എനാക്ക്‌മ് എന്നോഡ ബന്തിന്തവാര്‌ക്ക് സുറ്റുമു അഡിത്ത്‌ദ്. 14 അന്നാല് താനെ എമ്മൊട്ടുക്കു മണ്ണ്‌ക്ക് ബ്‌ന്തേമ്. അദുക്കുള <സവുലെ, സവുലെ നീ എന്ത്‌ക്ക് എനാന കൊഡിമെപഡ്‌സ്‌ന്റായി? നീ എന്നോഡ മുട്ടുവാദ്‌നാലെ നീ നിനാക്ക് താനെത്തെ ഉറുസ്സുന സമ്പാരിക്ക്‌ന്റായി> എന്റ് എവുറായ നായാത്ത്‌ല് എനാക്ക് സൊല്ലുവ ഒന്റു ജദ്ദന നാന് കേ്ട്ടേന്. 15 <ആണ്ടവാനെ, നീ ആര്?> എന്റ് നാന് കേ്ട്ടേന്. അന്നാല് താനെ ആണ്ടവാന് എനാക്ക് ഇത്തെ സൊന്നാന്: <നീ കൊഡിമെ പഡിസികൊണ്ട്‌റ്‌ക്കുവ ഏസ്സ്‌ത്തെ നാന്. 16 സെരി നീ ഇന്നാല് ഇ്ളാഗി നില്ല്. നിനാന എന്ന് ഗിലാസഗാറാനായി ബെക്ക്യ നാന് നിനാക്ക് ബെ്ളിപട്ട്‌റ്‌ന്റെ. നീ ഇന്റ് എനാന കണ്ടാദ്‌നാമ് നാന് നിനാക്ക് ഇന്നി കാട്ടി തര്യ പോവ കാര്യഗാള്‌നാമ് നീ ആള്‌ഗാള്‌ക്ക് സൊല്ലുവായി. 17 എഗുദാര് പട്ട്‌ക്ക്‌മ് എഗുദാരല്ലാത്ത ജാദിഗാള് പട്ട്‌ക്ക്‌മ് നാന് നിനാന സൊല്ലി ബ്‌ഡ്‌ന്റെ. അവാര് കയിലിന്ത് നാന് നിനാന കാപാറ്റുവെ. 18 നീ അവാര്‌ക്ക് സത്ത്യ എന്തെന്റ് കാട്ടി കൊഡുക്കുഡൊ. അത്തെ അവാര്‌ന ഇ്റ്‌ട്ട്‌ലിന്ത് ബെ്ള്‌സ സാരിമ് സെയിത്താന് അദിഗരാത്ത്‌ലിന്ത് സാമി സാരിമ് തിര്‌ക്കുഡൊ. അവാര് എനാന നമ്പുവാദ്‌നാലെ സാമി അവാര് പാവഗാള്‌ന പൊറുക്കുവാന്. അത്തെ സാമി തെരിന്തെ്ഡ്‌ത്തവാര് പട്ട്‌ല് അവാര്‌ക്ക് ഇര്‌ക്കുവ പങ്ക്‌മ് കെ്ഡേക്കുവു.> >> തന്ന് ഗിലാസാന പറ്റി പവുലോസു സൊന്റാന് 19 <<അദ്‌നാലെ അഗ്‌റിപ്പ രാജാവെ, മേലോഗാത്ത്‌ലിന്ത് എന്ന് മുന്നുക്കു ബന്ത മന്‌സാന് സൊന്ന കാര്യഗാള്‌ന നാന് ഗേഗാദിര്‌ക്കാലെ. 20 ആള്‌ഗാള് ഒട്ടുക്കു പാവ ഗേവാദ്‌ന തെ്റിന്ത് തള്ളി സാമിസാരി തിര്‌ഗുഡൊ എന്റ്‌മ്, പാവ ഗേവാദ്‌ന തെ്റിന്ത് തള്ളി സാമിസാരി തിര്‌ഗ്‌നേമ് എന്റ് കാട്ടുവ ഗിലാസഗാള് ഗേഡൊ എന്റ്‌മ് നാന് സൊല്ല്യ പ്‌ഡിത്തേന്. മുദാല് ദമാസ്‌കോസുലുമു, എര്‌സലേമ്‌ല്‌മ് അദ്‌ക്ക് പ്‌റ എഗുദ നാഡ് സാരി ഒട്ടുക്കുമു, എഗുദാര് അല്ലാത്ത ബേ്റെ ജാദിഗാള് പട്ട്‌ല്‌മ് നാന് ഇദ്‌ന സൊന്നേന്. 21 ഈ കാര്യന സൊല്ലിത്തെ സാമിബീ്ഡ്‌ല് ബെത്ത് ഈ എഗുദാര് എനാന പ്‌ഡിത്ത് കൊല്ല്യ പട്ടാദ്. 22 ആന സാമി ഇന്നമാട്ട്‌ക്ക് എനാന കയി ബ്‌ഡാലെ. അദ്‌നാലെത്തെ നാന് ഇദ്‌ല് നിന്റ് കൊണ്ടു നാന് കണ്ടാദ്‌നാമ് കേ്ട്ടാദ്‌നാമ് പറ്റി താന്തവാരോഡാമ് ഉജാന്തവാരോഡാമ് ഒന്റേ പാസെ സൊന്റേന്. മോസേമ് സാമിദാസ്‌ഗാള്‌മ് നഡാക്ക്‌മെന്റ് സൊല്ലിര്‌ക്കുവ അയി കാര്യഗാള്‌നത്തെ നാന്‌മ് സൊല്ലുവാദ്: 23 <എഗുദാര്‌നാമ് എഗുദാരല്ലാത്ത ജാദിഗാള്‌നാമ് കാപാറ്റ്യ ബേ്ണ്ടി ക്‌റ്‌സ്‌ത്ത് സാഡൊ> എന്റ്‌മ് <അയാള് സത്തവാര്‌ലിന്ത് മുദാല് ഉജുര്‌ളാഗുവ ആള് ആയിര്‌ക്കുഡൊ> എന്റ്‌മ് അവാര് സൊല്ലിര്‌ക്ക്‌ന്റാര്.>> 24 പവുലോസു തനാക്ക് സൊല്ല്യ ഇര്‌ക്കുവാദ്‌ന ഇത്തെ സൊല്ലികൊണ്ട്‌റ്‌ക്കാട്ടി: <<പവുലോസെ, നിനാക്ക് പിരാന്ത്‌ത്തെ. നീ ദാസ്‌ത്തി പഡിത്ത്‌റ്‌ന്റായി. അദ്‌ത്തെ നിനാന പിരാന്ത് മാഡിര്‌ന്റ്>> എന്റ് പെസ്‌തോസു ദൊഡ്ഡാദ്‌ക്ക് സൊന്നാന്. 25 ആന പവുലോസു: <<അല്ല, ദൊഡ്ഡവാന് ആയിര്‌ക്കുവ പെസ്‌തോസെ, എനാക്ക് പിരാന്തില്ലെ, നാന് സൊല്ലുവാദ് നേര്‌ത്തെ. അദ് നാന് നല്ല ബുദ്ദ്യോഡത്തെ സൊന്റെ. 26 അഗ്‌റിപ്പാവു രാജാവെ ഈ കാര്യഗാള്‌ന പറ്റി നിനാക്ക് തെരിവാദ്‌നാലെ നാന് നല്ല ദയിരത്തോഡ നിനാക്ക് സൊന്റേന്. ഇദ്‌ന പറ്റ്യെല്ല നീ ഒറേപ്പായി കേ്ട്ട്‌റ്‌ക്ക്‌ന്റായി എന്റ് എനാക്ക് തെരിമ്. എന്ത്‌ക്കെന്റ് സൊന്ന ഈ കാര്യഗാളെല്ല ഏദാറ്റ മുക്കു മൂലേല് ബെത്ത് നഡാന്താദല്ല. 27 അല്ല, അഗ്‌റിപ്പ രാജാവെ, നീ സാമിദാസ്‌ഗാള്‌ന നമ്പ്‌ന്റായ?, നീ നമ്പ്‌ന്റായി എന്റ് എനാക്ക് തെരിമ്>> എന്റ് സൊന്നാന്. 28 അദുക്കുള അഗ്‌റിപ്പ രാജാവു പവുലോസുക്കു: <<നീ സട്ടന എനാന ഏസ്സ്‌ഗാറാന് മാഡ്യ നോഡുന്റായ?>> എന്റ് സൊന്നാന്. 29 അദുക്കുള പവുലോസു: <<സട്ടനഗൊ മെല്ലാഗൊ ആനാല്‌മ് ഇന്റ് എന്ന് നായന കേ്ട്ട്‌കൊണ്ടു ഇര്‌ക്കുവ ആള്‌ഗാള് ഒട്ടുക്കുമു നീയിമ് ഈ എല്ലാ കാര്യാത്ത്‌ല്‌മ് എനാന പാസെ ആഡൊ എന്റ്‌ത്തെ നാന് സാമിക്ക് പരേസ്‌ന്റേന്. ആന എനാന പാസെ നിമാനാമ് കയി കുട്ടെ ഇക്കി ബെക്കബേ്ഡ എന്റ് നാന് ആസെപഡ്‌ന്റേന്>> എന്റ് സൊന്നാന്. 30 അദുക്കുള പെസ്‌തോസുമു അഗ്‌റിപ്പ രാജാവുമു ബറ്‌ണിക്കാമ് അവാരോഡ ഒപ്പ ഇന്തവാര് ഒട്ടുക്കുമു ഇ്ളാഗ്‌നാര്. 31 പ്‌റ അവാര് ലേസ അത്തഗ നിന്റ് തമാക്ക് തമാക്ക്: <<കൊല്ല്യ ബിദിക്കുവാദ്‌ക്കൊ, ജെയില്‌ക്ക് ഇക്കി ദെ്ണ്ടിക്കുവാദ്‌ക്കൊ തഗ്‌ന്താദ് ഒന്റുമു ഇയാള് ഗേഗാലെ>> എന്റ് സൊന്നാര്. 32 അഗ്‌റിപ്പാവു രാജാവുമു പെസ്‌തോസുക്കു: <<റോമ നാഡ് രാജാവു തന്ന് കേസ്‌ക്ക് മുഡിവു സൊല്ലുഡൊ എന്റ് സൊല്ലാദെ പോയിന്തദാന ഇയാള്‌ന ബ്‌ട്ടിന്ത്‌റ്‌ക്ക്‌ല>> എന്റ് സൊന്നാന്. |
New Life Computer Institute