അപ്പോസുത്തലാര് 22 - സാമി സേദി1 <<എന്ന് കൂട്ടാരാന ഇസ്‌റവേല്‌ഗാറാരെ, നാന് കുറ്റഗാറാന് അല്ല എന്റ് കാട്ട്യ ബേ്ണ്ടി എനാക്ക് നിമ്മോഡ സൊല്ല്യ ഇര്‌ക്കുവാദ്‌ന നിമ്മ കേ്ള്‌ന്.>> 2 എവുറായ നായാത്ത്‌ല് അയാള് സൊല്ലുവാദ്‌ന കേ്ള്‌ക്കാട്ടി അവാര് ഒട്ടുക്കു ഒന്റു ഗുഡി സപ്പെന്റിന്താര്. അദുക്കുള പവുലോസു പിന്നേമ് ഇത്തെ സൊല്ല്യ പ്‌ഡിത്താന്: 3 <<നാന് ഒന്റു എഗുദാര് ജാദിക്ക് പട്ടവാന്‌ത്തെ. കിലിക്ക്യ നാഡ്‌ല തറ്‌സോസു എന്നുവ പട്ടണാത്ത്‌ല്‌ത്തെ നാന് പ്‌റാന്താദ്. നാന് ബളാന്താദ്‌മ് എര്‌സലേമ് എന്റ് സൊല്ലുവ ഈ പട്ടണാത്ത്‌ല്‌ത്തെ. ഗമേലിയേല്‌ത്തെ എന്ന് ബാത്ത്യാന് ആയിന്താദ്. ഈ ഗമേലിയേല് ബാത്ത്യാന്‌ലിന്ത്‌ത്തെ നമ്മ് പാട്ടനാമ് സട്ടഗാള്‌ന എത്തെ കേ്ട്ട് നഡാക്കുഡൊ എന്റ് നാന് നലമായി പഡിത്താദ്. ഇന്നാല് ഇദ്‌ല് നിമ്മ ഇര്‌ക്ക്‌ന്റവാര് ഒട്ടുക്കുമു സാമിക്ക് ബേ്ണ്ടി എത്തെല്ല ഗേയ മുഡിമൊ അത്തെല്ല ഗേയ നിമാന താനെ ഒപ്പിസിര്‌ന്റ്‌റ്. അദേപാസെ ഗേയ നാന്‌മ് എനാന താനെ സാമിക്ക് ഒപ്പിസിര്‌ന്റെ. 4 ഏസ്സ് സൊല്ലുപഡി നഡാന്തിന്ത പെ്ണ്ണ്‌മക്കാള്‌നാമ്, ഗണ്ടാള്‌നാമ് പ്‌ഡിത്ത് കെ്ട്ടി ജെയില്‌ക്ക് അഡേത്തേന്, നാന് അവാര്‌ന കൊഡിമെപഡിസി ലേസ ആള്‌ഗാള്‌ന കൊലെ ഗേയാമ് കൊഡുത്തെ. 5 എഗുദാര് ദൊഡ്ഡ പൂസാരിക്ക്‌മ് എഗുദ കോഡിദില മൂപ്പനാമ്‌ഗാള്‌ക്ക് ഒട്ടുക്കുമു ഇദ് നേര് എന്റ് തെരിമ്. അവാര് പട്ട്‌ലിന്ത് ദമാസ്‌കോസു നാഡ്‌ല് ഇര്‌ക്കുവ എന്ന് സൊന്ത ജാദിക്ക് പട്ട എഗുദാര്‌ക്ക് കൊഡുക്ക്യ ഒന്റു എ്ള്‌ത്ത് നാന് ബാങ്ക്‌നേന്. അത്തെ ദമാസ്‌കോസുലു ഇര്‌ക്കുവ ഏസ്സ്‌ഗാറാര്‌ന പ്‌ഡിത്ത് കെ്ട്ടി എര്‌സലേമ്‌ക്ക് എ്ഡ്‌ത്ത് ബന്ത് ദെ്ണ്ടിക്ക്യ ബേ്ണ്ടി നാന് ആങ്ക് പോനെ.>> ഏസ്സ്‌ന എത്തെ നമ്പ്‌നേന് എന്റ് പവുലോസു സൊന്റാന്. 6 <<അത്തെ നാന് പോയി ദമാസ്‌കോസുക്കു അര്‌ഗെ എജ്ജ്‌ഗാട്ട്യെല്ല നേര ഉച്ചി ആറ്റ്. അയി ഗളിഗെ ദിഗിരന ബാന്‌ലിന്ത് ദൊഡ്ഡ ഒന്റു ബെ്ള്‌സ സുറ്റുമു അഡിത്ത്‌ദ്. 7 അന്നാല് താനെ നാന് മണ്ണ്‌ക്ക് ബ്‌ന്തേന്. അദുക്കുള <സവുലെ, സവുലെ നീ എന്ത്‌ക്ക് എനാന കൊഡിമെപഡ്‌സ്‌ന്റായി?> എന്റ് എനാക്ക് സൊല്ലുവ ഒന്റു ജദ്ദന നാന് കേ്ട്ടേന്. 8 <ആണ്ടവാനെ നീ ആര്?> എന്റ് നാന് കേ്ട്ടേന്. <നീ കൊഡിമെ പഡിസികൊണ്ട്‌റ്‌ക്കുവ നസറേത്ത്‌ഗാറാന് ഏസ്സ്‌ത്തെ നാന്> എന്റ് അയാള് എനാക്ക് സൊന്നാന്. 9 എന്നോഡ ഇന്തവാര് അയി ബെ്ള്‌സാന കണ്ടാര്. ആന എന്നോഡ നായ നൊഡിന്ത ആള് ജദ്ദന അവാര് കേ്ള്‌ക്കാലെ. 10 <ആണ്ടവാനെ നാന് എന്ത് ഗേയ?> എന്റ് നാന് കേ്ട്ടേന്. അദുക്കുള ആണ്ടവാന് എനാക്ക്: <നീ ഇ്ളാഗി ദമാസ്‌കോസുക്കു പൊ, നീ ഗേയ ബേ്ണ്ടി സാമി മുഡിവാക്കി ബെത്ത്‌റ്‌ക്കുവാദ്‌ന ഒട്ടുക്കു അദ്‌ല് ബെത്ത് നിനാക്ക് സൊല്ലുവാര്> എന്റ് സൊന്നാന്. 11 അയി ബെ്ള്‌സ ദിഗിരന അഡിത്താദ്‌നാലെ എന്ന് കണ്ണ് കെ്ട്ട് തള്ള്‌ട്ട്. അദ്‌നാലെ എന്നോഡ ഇന്തവാര് എന്ന് കയിന പ്‌ഡിത്ത് എനാന ദമാസ്‌കോസുക്കു കൂട്ടി പോനാര്. 12 അയി പട്ടണാത്ത്‌ല് അനനാസ് എന്നുവ ഒന്റൊരുത്താന് ഇന്തിന്താന്. അയാള് ഒന്റു കുറ്റാമ് സൊല്ല്യ മുഡ്യാത്ത ദിന്‌സ്‌ല് സാമിന കുമ്മുഡി നഡാന്തിന്തവാന്‌മ് എഗുദാര് സട്ടപഡി പെ്ളേത്തിന്തവാന്‌മ് ആയിന്താന്. അദ്‌ല എഗുദാര് ഒട്ടുക്കു അയാള്‌ന നല്ല മദിസിന്താര്. 13 അയാള് എന്നര്‌ഗെ ബന്ത് നിന്റ് <അയ്യാ സവുലെ, നിന്ന് കണ്ണ് കാട്ടുഡൊ> എന്റ് എനാക്ക് സൊന്നാന്. അന്നാല് താനെ എന്ന് കണ്ണ് പിന്നേമ് കാട്ട്‌റ്റ്. അദുക്കുള അനനാസ്‌നാമ് നാന് കണ്ടേന്. 14 അയാള് എനാക്ക്: <നമ്മ് പാട്ടനാമ് സാമി ആസെ ബെത്ത്‌റ്‌ക്കുവ കാര്യഗാള്‌ന നീ തെരിന്തിര്‌ക്ക്യാമ്, സാമി സൊല്ലുവ കാര്യഗാള്‌ന അദേപാസെ ഗേവ തന്ന് ഗിലാസഗാറാന്‌ന കാണ്യാമ്, അയാള് സൊല്ലുവ നായന അയാള് ബായിലിന്ത് താനെ കേ്ള്‌ക്ക്യാമ് നിനാന തെരിന്തെ്ഡ്‌ത്ത്‌റ്‌ന്റാന്. 15 നീ അയാള്‌ന പറ്റി കണ്ട കാര്യഗാള്‌നാമ്, കേ്ട്ട കാര്യഗാള്‌നാമ് എല്ലാ ആള്‌ഗാള്‌ക്ക് ഒട്ടുക്കുമു സൊല്ലുവായി. 16 ഇന്നി എന്ത്‌ക്ക് കാക്കുവാദ്? നീ ഇ്ളാഗി നീര്‌ക്ക് മുളുഗു, സാമി നിന്ന് പാവാന കച്ചുഡൊ. നിനാന കാപാറ്റ്യ ആണ്ടവാന് പേര്‌ല് ബേ്ണ്ടികൊള്ളു> >> എന്റ് സൊന്നാന്. എഗുദാര് അല്ലാത്ത ജാദിഗാള്‌ക്ക് നല്ല സേദി സൊല്ല്യ പവുലോസുന ബ്‌ളിക്ക്‌ന്റാന്. 17 <<നാന് എര്‌സലേമ്‌ക്ക് തിരിഗി പോയി സാമിബീ്ഡ്‌ല് പരേസികൊണ്ടിന്തേന്. അദുക്കുള എനാക്ക് ഒന്റു തോറ്റ ബന്ത്‌ദ്. 18 അയി തോറ്റാത്ത്‌ല് നാന് ആണ്ടവാന്‌ന കണ്ടേന്. <നീ എനാന പറ്റി സൊല്ലുവ കാര്യഗാള്‌നെല്ല ഇദ്‌ലിര്‌ക്കുവ ആള്‌ഗാള് ബെലേക്ക് എ്ഡ്‌ക്കമാട്ടാര്. അദ്‌നാലെ നീ സട്ടന എര്‌സലേമ്‌ന ബ്‌ട്ട് പോഡൊ> എന്റ് ആണ്ടവാന് എനാക്ക് സൊന്നാന്. 19 അദുക്കുള നാന് സൊന്നെ, <ആണ്ടവാനെ, എഗുദാര് പരേസുവ ബീ്ഡ്‌ക്ക്‌റാഗ പോയി നിനാന നമ്പ്‌ന്റവാര്‌ന നാന് പ്‌ഡിത്ത് അഡിത്ത്‌മ് ജെയില്‌ക്ക് അഡേത്ത്‌മ് ഇര്‌ന്റെ എന്റ് അവാര്‌ക്ക് നലമായി തെരിമ്. 20 നിനാന പറ്റി നായ സൊല്ലിന്ത തെപാനോസുന കൊല്ലുഗാട്ടി നാന്‌മ് അയാള്‌ന കൊല്ല്യ സൊല്ലി അയാള്‌ന കൊന്റവാര് ഉഡുപ്പുഗാള്‌ന കാത്ത്‌കൊണ്ട് അവാര്‌ക്കര്‌ഗെ നിന്റിന്തേന്.> 21 ആന ആണ്ടവാന് എനാക്ക്: <പൊ! നാന് നിനാന ദൂരാത്ത്‌ല് ഇര്‌ക്കുവ എഗുദാരല്ലാത്ത ജാദിഗാള് പട്ട്‌ക്ക് സൊല്ലി ബ്‌ഡ്‌വെ> എന്റ് സൊന്നാന്.>> 22 പവുലോസു ഇദ്‌ന ഒട്ടുക്കു സൊല്ലുവ മാട്ട്‌ക്ക് അവാര് കേ്ട്ട്‌കൊണ്ടിന്താര്. ആന എഗുദാരല്ലാത്ത ജാദിഗാള് പട്ട്‌ക്ക് പോഡൊ എന്റ് അയാള് സൊല്ലുവാദ്‌ന കേ്ള്‌ക്കാട്ടി: <<അയാള്‌ന കൊന്റു ഈ ബൂമിലിന്ത് ഇല്ലദെ മാഡുഡൊ>> എന്റ് സൊല്ലി അവാര് ദൊഡ്ഡാദ്‌ക്ക് ആലാക്ക്യ പ്‌ഡിത്താര്. 23 അവാര് ആലാത്ത് കൊണ്ടു തമ്മ് സീലെസിലാപ്പ്‌ഗാള്‌ന സൂറെ ബ്‌ട്ടാര്, ദൂളിഗാള്‌നാമ് ബാരി മേല് ബ്‌ദാറ്‌നാര്. 24 അദുക്കുള അയാള്‌ന പട്ടളഗാറാര് തങ്കുവ കോട്ടേക്ക് കൂട്ടി ബാന് എന്റ് പട്ടള തലെവാന് പട്ടളഗാറാര്‌ക്ക് സൊന്നാന്. അവാര് അയാള്‌ക്ക് നേരെ ഇത്തെ അഗാറി ക്‌ളാമ്പുവാദ് എന്ത്‌ക്കെന്റ് നെപ്പ്‌കെ്ഡേസ്യ ബേ്ണ്ടി സാട്ടെവാര്‌ല് അഡിത്ത് പവുലോസുന കേ്ള്‌വി കേ്ള്‌ക്ക്യ പട്ടള തലെവാന് പട്ടളഗാറാര്‌ക്ക് സൊന്നാന്. 25 സാട്ടെവാര്‌ല് അഡിക്ക്യ അവാര് തനാന കണ്ണില് ബരിഞ്ചി കെ്ട്ട്‌ഗാട്ടി, പവുലോസു അര്‌ഗെ നിന്റിന്ത നൂറു പട്ടളഗാറാര്‌ക്ക് തലെവാന് ആയിര്‌ക്ക്‌ന്റവാന്‌ക്ക് ഇത്തെ സൊന്നാന്, <<റോമ നാഡ്‌ക്ക് പട്ട ഒന്റു ആള്‌ന കുറ്റഗാറാന് എന്റ് കാണാദെ സാട്ടെവാര്‌ല് അഡിക്കുവാദ് നായഗ?>> 26 നൂറു പട്ടളഗാറാര്‌ക്ക് തലെവാന് ആയിര്‌ക്ക്‌ന്റവാന് ഇദ്‌ന കേ്ള്‌ക്കാട്ടി ആയിര പട്ടളഗാറാര്‌ക്ക് തലെവാന് ആയിര്‌ക്ക്‌ന്റവാന് പട്ട്‌ക്ക് പോയി: <<നീ എന്ത് ഗേയ പോന്റായി? അയാള് റോമ നാഡ്‌ക്ക് പട്ട ഒന്റാള്‌ത്തെ!>> എന്റ് കേ്ട്ടാന്. 27 അദുക്കുള ആയിര പട്ടളഗാറാര്‌ക്ക് തലെവാന് ആയിര്‌ക്ക്‌ന്റവാന് പവുലോസു പട്ട്‌ക്ക് പോയി: <<നീ റോമ നാഡ്‌ക്ക് പട്ടവാന്‌ത്തേഗ എന്റ് എനാക്ക് സൊല്ലു>> എന്റ് കേ്ട്ടാന്. <<നാന് റോമ നാഡ്‌ക്ക് പട്ടവാന്‌ത്തെ>> എന്റ് പവുലോസു സൊന്നാന്. 28 അദുക്കുള അയാള് പവുലോസുക്കു: <<നാന് എഞ്ചോ പണ കൊഡുത്തുത്തെ റോമ നാഡ്‌ക്ക് പട്ടവാനായിര്‌ന്റെ>> എന്റ് സൊന്നാന്. <<നാന് പ്‌റാന്താദ്‌ലിന്തേ റോമ നാഡ്‌ക്ക് പട്ടവാന്‌ത്തെ>> എന്റ് പവുലോസു സൊന്നാന്. 29 അദ്‌നാലെ അയാള്‌ന കേ്ള്‌വി കേ്ള്‌ക്ക്യ പോനവാര് സട്ടന ഒല്ലെന്റാര്. റോമ നാഡ്‌ക്ക് പട്ടവാന് എന്റ് തെരിന്ത പ്‌റ അയാള്‌ന പ്‌ഡിത്ത് സങ്കിലിക്കി കെ്ട്ട്‌നേനല്ല എന്റ് നെനേത്ത് ആയിര പട്ടളഗാറാര്‌ക്ക് തലെവാന് ആയിര്‌ക്കുവ അയി പട്ടള തലെവാന് അഞ്ച്‌നാന്. പവുലോസു എഗുദ കോഡിദില് 30 മറ്‌നാള് എഗുദാര് പവുലോസുന പറ്റി സൊല്ലുവ കുറ്റ എന്ത് എന്റ് തെര്യ ആയിര പട്ടളഗാറാര്‌ക്ക് തലെവാന് ആയിര്‌ക്ക്‌ന്റവാന് ആസെപട്ടാന്. അദ്‌നാലെ എഗുദാര് പൂസാരി തലെവാര്‌ഗാള്‌നാമ് എഗുദ കോഡിദിഗാറാര്‌നാമ് ഒട്ടുക്കു ഒന്റുക്കു കൂഡ്യ അയാള് സൊന്നാന്. പ്‌റ പവുലോസുന കെ്ട്ട്‌ന സങ്കിലിന ഉക്കി അവാര് പട്ട്‌ക്ക് നില്ല്‌സ്‌നാന്. |
New Life Computer Institute