അപ്പോസുത്തലാര് 21 - സാമി സേദിപവുലോസു എര്‌സലേമ്‌ക്ക് പോന്റാന് 1 എമ്മ അവാര്‌ന ബിനാത്തി തള്ളി അദ്‌ലിന്ത് കപ്പാല്‌ക്ക് ഏ്റി നേരെ സുറ്റുമു നീര്‌റ്‌ക്കുവ കോസു എന്നുവ എ്ഡേക്ക് എജ്ജ്‌നേമ്. മറ്‌നാള് എമ്മ സുറ്റുമു നീര്‌റ്‌ക്കുവ രോദാസ് എന്നുവ എ്ഡേക്ക് എജ്ജ്‌നേമ്. അദ്‌ലിന്ത് എമ്മ പത്താര എന്നുവ പട്ടണാക്ക് പോനേമ്. 2 പൊയിനിക്ക്യ നാഡ്‌ക്ക് പോവ ഒന്റു കപ്പാല്‌ന എമ്മ അദ്‌ല് കണ്ടേമ്. അദ്‌ക്ക് ഏ്റി എമ്മ ദൂര പോനേമ്. 3 അത്തെ എമ്മ സുറ്റുമു നീര്‌റ്‌ക്കുവ കുപ്പുറോസു എന്നുവ എ്ഡേക്ക് അര്‌ഗെ എജ്ജ്‌നേമ്. അദ്‌ക്ക് പ്‌റ കുപ്പുറോസുക്കു തെക്ക് ബാഗമേലെ സ്‌റിയ നാഡ്‌ക്ക് പോനേമ്. കപ്പാല്‌ലിന്ത് സാമനഗാള് ഇ്റാക്ക്യ ഇന്താദ്‌നാലെ എമ്മ സോരു എന്നുവ കഡാലോര പട്ടണാക്ക് എജ്ജ്‌നേമ്. 4 അദ്‌ല് ലേസ ഏസ്സ്‌ഗാറാര്‌ന കണ്ട പ്‌റ എമ്മ അവാരോഡ ഒന്റു ബാര തങ്ക്‌നേമ്. സാമിനിഗാല് സൊല്ല്യ സൊന്നാദ്‌നാലെ എര്‌സലേമക്ക് പോഗ ബേ്ഡ എന്റ് അവാര് പവുലോസുക്കു സൊന്നാര്. 5 അവാരോഡ ഇന്ത് പോവ നേര ബര്‌ഗാട്ടി എമ്മ അവാര് പട്ട്‌ലിന്ത് പോനേമ്. അദുക്കുള അവാര്‌മ് അവാര് പെ്ണ്ടച്ച്യാമ്‌മ് മക്കാള്‌ഗാള്‌മ് ഒന്റായി എമ്മോഡ പട്ടണാക്ക് ബെ്ളിഗെ കഡാലോര മാട്ട്‌ക്ക് ബന്താര്. എമ്മ ഒട്ടുക്കു അദ്‌ല് സന്തൂന്റി നിന്റ് പരേസ്‌നേമ്. 6 അദ്‌ക്ക് പ്‌റ എമ്മ ആങ്കീങ്ക് ബിനാത്തി എമ്മ കപ്പാല്‌ക്ക് ഏ്റ്‌നേമ്. അവാര് ബീ്ഡ്‌ഗാള്‌ക്ക് തിരിഗി പോനാര്. 7 സോരുലിന്ത് പിദലെമായിസ് എന്നുവ കഡാലോര പട്ടണമാട്ട്‌ക്ക് കപ്പാല്‌ലേ എമ്മ പോയി എജ്ജ്‌നേമ്. അദ്‌ല ഏസ്സ്‌ഗാറാര്‌ന പോയി കണ്ട് അവാരോഡ ഒന്റു നാള് തങ്ക്‌നേമ്. 8 മറ്‌നാള് എമ്മ അദ്‌ന ബ്‌ട്ട് കയിസര്യ എന്നുവ കഡാലോര പട്ടണാക്ക് എജ്ജ്‌നേമ്. ഏസ്സ്‌ന പറ്റി സൊല്ലുവ നല്ല സേദിന സൊല്ലി നഡാക്കുവ പീലിപോസു എന്റവാന് ബീ്ഡ്‌ക്ക് പോയി അയാളോഡ തങ്ക്‌നേമ്. അയാള് എര്‌സലേമ് പട്ടണാത്ത്‌ല് ബെത്ത് സാമനസട്ടെഗാള് പങ്കി കൊഡുക്ക്യ തെരിന്തെ്ഡ്‌ത്ത ഏ്ള് ആള്‌ഗാള്‌ല് ഒന്റാള് ആയിന്താന്. 9 അയാള്‌ക്ക് കല്യണ മാഡാത്ത നാക്ക് മഗളാര് ഇന്താര്. സാമിക്ക് ആള്‌ഗാളോഡ സൊല്ല്യ ഇര്‌ക്കുവാദ്‌ന അവാര് സൊല്ലി നഡാക്ക്‌ന്റവാര് ആയിന്താര്. 10 എമ്മ അദ്‌ല് എഞ്ചോ നാള് ഇന്തേമ്. അദുക്കുള അഗവോസു എന്നുവ ഒന്റു സാമിദാസ് എഗുദ നാഡ്‌ലിന്ത് അദ്‌ക്ക് ബന്താന്. 11 അയാള് എമ്മ് പട്ട്‌ക്ക് ബന്ത് പവുലോസു കച്ചെന എ്ഡ്‌ത്ത് തന്ന് കയികാല്‌ന കെ്ട്ട്‌നാന്. അദ്‌ക്ക് പ്‌റ അയാള്: << <ഈ ബില്‌റ്റ്‌ഗാറാന്‌ന എര്‌സലേമ്‌ല എഗുദാര് ഇദേപാസെ കെ്ട്ടി എഗുദാരല്ലാത്ത ജാദിഗാള്‌ക്ക് കൊഡുക്കുവാര്> എന്റ് സാമിനിഗാല് സൊല്ലുന്റു>> എന്റ് സൊന്നാന്. 12 ഇദ്‌ന കേ്ള്‌ക്ക്‌ഗാട്ടി എര്‌സലേമ്‌ക്ക് സെറ്റെ പോഗഗേ ബേ്ഡ എന്റ് എമ്മാമ് അദ്‌ലവാര്‌മ് പവുലോസുക്കു സൊന്നേമ്. 13 അദുക്കുള പവുലോസു: <<നിമ്മ എന്ത്‌ക്ക് ഇത്തെ ഗേവാദ്? നിമ്മ എന്ത്‌ക്ക് ഇത്തെ കേ്യിന്ത് എന്ന് മനേസ്സ്‌ന ദുക്കപഡ്‌സ്‌ന്റ്‌റ്? എര്‌സലേമ്‌ല് എനാന കെ്ട്ടി ബെക്ക്യ താനെ അല്ല ആണ്ടവാന് ഏസ്സ്‌ക്ക് ബേ്ണ്ടി അദ്‌ല് സായ ഗുഡി നാന് ഒരിങ്കിര്‌ന്റെ>> എന്റ് സൊന്നാന്. 14 എമാക്ക് അയാള്‌ന സൊല്ലി ഒദിക്ക്യ മുഡ്യാലെ. അദ്‌നാലെ എമ്മ അയി കാര്യന തെ്റിന്ത് <<ആണ്ടവാന് ആസെപഡി നഡാക്കുഡൊ>> എന്റ് സൊന്നേമ്. 15 അദ്‌ല് ലേസ നാള് ഇന്ത പ്‌റ, എമ്മ എമ്മ് സാമനഗാള്‌ന എ്ഡ്‌ത്ത് ഒരിങ്കി എര്‌സലേമ്‌ക്ക് പോനേമ്. 16 കയിസര്യ എന്നുവ കഡാലോര പട്ടണാത്ത്‌ല ലേസ ഏസ്സ് സൊല്ലുപഡി നഡാക്ക്‌ന്റവാര് എമ്മോഡ എര്‌സലേമ്‌ക്ക് ബന്താര്. മുദാല് ഏസ്സ്‌ന നമ്പ്‌നവാര്‌ല് ഒന്റാള് ആയിന്ത മനാസോനു എന്നുവ ആള് ബീ്ഡ്‌ക്ക് അവാര് എമാന കൂട്ടി എ്ഡ്‌ത്ത് പോനാര്. അയാള് കുപ്പുറോസുഗാറാന് ആയിന്താന്. അയാള് പട്ട്‌ല്‌ത്തെ എമ്മ തങ്ക്യ എന്റ് നെനേത്ത് പോനാദ്. പവുലോസു ആക്കോവുന കാണ്യ പോന്റാന്. 17 എമ്മ എര്‌സലേമ്‌ക്ക് എജ്ജ്‌ഗാട്ടി അദ്‌ല ഏസ്സ്‌ഗാറാര് എമാന പിര്യപിര്യാത്ത് തങ്കാരിത്താര്. 18 മറ്‌നാള് പവുലോസു എമാന കൂട്ടി എ്ഡ്‌ത്ത് ആക്കോവുന കാണ്യ പോനാന്. ഏസ്സ്‌ന നമ്പ്‌നവാര് കൂട്ടാത്ത്‌ല മൂപ്പനാമ്‌ഗാള് ഒട്ടുക്കു അദ്‌ക്ക് ബന്തിന്താര്. 19 പവുലോസുമു അവാര്‌മ് ആങ്കീങ്ക് ബിനാത്ത്‌ന പ്‌റ തനാന ബെത്ത് സാമി എഗുദാര് അല്ലാത്ത ജാദിഗാള് പട്ട്‌ല് ഗേന്താദ്‌ന ഒട്ടുക്കു പവുലോസു അവാര്‌ക്ക് സൊന്നാന്. 20 അദ്‌ന കേ്ള്‌ക്കാട്ടി അവാര്: <<സാമി എത്ത്‌റാഗോ ദൊഡ്ഡവാന്>> എന്റ് സൊന്നാര്. അദ്‌ക്ക് പ്‌റ അവാര് അയാള്‌ക്ക് ഇത്തെ സൊന്നാര്: <<അയ്യാ പവുലോസെ, എഞ്ചായിര എഗുദാര് ഏസ്സ്‌ന നമ്പിര്‌ന്റാര് എന്റ് നിനാക്ക് തെരിമ്. അവാര് ഒട്ടുക്കു മോസെ കൊഡുത്ത സട്ടഗാള്‌ന ഒന്റുനാമ് തെ്റിന്ത് തള്ളാദെ ഇന്നാല്‌മ് അദ്‌ന എ്ഡ്‌ത്ത് നഡാത്തി ബന്റാര്. 21 അവാര് നിനാന പറ്റി ഇത്തെ സൊന്റാര്, <മോസെ സട്ടന തെ്റിന്ത് തള്ള്യ ബേ്ണ്ടി എഗുദാര് സട്ട്‌മെ്ട്ട്‌പഡി നഡാക്കുവാദൊ അവാര് തമ്മ് മക്കാള്‌ഗാള്‌ന പരിസേദനെ സാത്ത്‌റ ഗേവാദൊ പാങ്കില്ലെ എന്റ് എഗുദാര് അല്ലാത്ത ജാദിഗാള് നാഡ്‌ലിര്‌ക്കുവ എഗുദാര്‌ന> നീ പഡ്‌സ്‌ന്റായെന്റ. 22 നീ ഇദ്‌ക്ക് ബന്ത്‌റ്‌ക്ക്‌ന്റായി എന്റ് അവാര് ഒറേപ്പായി കേ്ള്‌ക്കുവാര്. അന്നാപ്പ് നീ ഇന്നി എന്ത് ഗേവായി? 23 അദ്‌നാലെ നീ എന്ത് ഗേഡൊ എന്റ് എമ്മ നിനാക്ക് സൊല്ലി തന്റേമ്. സാമിക്ക് എന്തൊന്റു ഗേഡൊ എന്റ് നേര്‌സെ നേര്‌ന്ത്‌റ്‌ക്കുവ നാക്ക് ഗണ്ടാള് ഇദ്‌ല് ഇര്‌ന്റാര്. 24 അവാരോഡ പോയി നീയിമ് സുത്താപ്പാവാദ്‌ക്കുള്ള സാത്ത്‌റന ഗേഗ്. അവാര്‌ക്ക് തമ്മ് തലേന മൊട്ടി കെരേക്കുവാദ്‌ക്കുള്ള സിലാവുന നീ കൊഡു. അത്തെ ഗേന്തദാന നിനാന പറ്റി എര്‌സലേമ്‌ല് ഏസ്സ്‌ന നമ്പ്‌ന എഗുദാര് കേ്ട്ട കാര്യഗാള് പൊയി എന്റ്‌മ്, നീ എഗുദാര് സട്ടപഡി നഡാക്ക്‌ന്റവാന് എന്റ്‌മ് എല്ലാ ആള്‌ഗാള്‌ക്ക്‌മ് പുരുപ്പാമ്. 25 ഏസ്സ്‌ന നമ്പ്‌ന എഗുദാര് അല്ലാത്ത ജാദിഗാള് സെലെഗാള്‌ക്ക് മേല്‌സ ബെത്താദ്‌ന തിന്ന ബേ്ഡ, ബേസ്യാഡ ബേ്ഡ, മുട്ടുമുട്ടുത്തു സത്ത ബേ്ണ്ട്‌ഗാള് സോരെ സൂസി തള്ളാത്താദ്‌നാലെ അയി ബേ്ണ്ട്‌ഗാള് കറിന തിന്ന ബേ്ഡ, ഏദ് ബേ്ണ്ട് സോരെനാമ് കുഡിക്ക ബേ്ഡ എന്റ്‌മ് സൊല്ലി മുഡിവെ്ഡ്‌ത്ത് അവാര്‌ക്ക് കത്ത് എ്ള്‌ദി ബ്‌ട്ട്‌റ്‌ന്റാമല്ല.>> 26 അദ്‌നാലെ പവുലോസു മറ്‌നാള് അവാര് നാക്കാള്‌ന കൂട്ടി പോയി അവാരോഡ സുത്താപ്പ് മാഡുവാദ്‌ക്കുള്ള സാത്ത്‌റന ഗേന്താന്. സുത്താപ്പാവാദ്‌ക്കുള്ള കഡേസി സാത്ത്‌റ ഗേവാദ്‌മ് തമാക്ക് ഒന്റൊന്റാള് പേര്‌ല് പലി കൊഡുക്കുവാദ്‌മ് എന്നാല്‌ക്കെന്റ് പവുലോസു സാമിബീ്ഡ്‌ക്ക് പോയി സൊല്ലി കൊഡുത്താന്. സാമി ബീ്ഡ്‌ല് ബെത്ത് പവുലോസുന പ്‌ഡിക്ക്‌ന്റാര്. 27 അയി ഏ്ള് നാള് തീര്യ ആഗാട്ട്യെല്ല ആസ്യ നാഡ്‌ല ലേസ എഗുദാര് പവുലോസുന സാമിബീ്ഡ്‌ല് കണ്ടാര്. അവാര് പവുലോസുന പ്‌ഡിത്ത് ആള്‌കൂട്ടാന ഒട്ടുക്കു ഇ്ളാക്കി ബ്‌ഡ്യ ബേ്ണ്ടി ഇത്തെ ബ്‌ളിത്ത് അഗാറ്‌നാര്. 28 <<ഇസ്‌റവേല്‌ഗാറാരെ തൊണേക്ക് ബാന്, ഇവാന്‌ത്തെ നമ്മ് ആള്‌ഗാളോഡാമ്, മോസെ സട്ടോഡാമ്, സാമിബീ്ഡോഡാമ് ജൂദുപ്‌ഡിത്ത് എല്ലാ സാരില്‌മ് ഇര്‌ക്കുവ ആള്‌ഗാള്‌ന ഒട്ടുക്കു പഡുസുവാദ്. ഇന്നാല് ഇയാള് എഗുദാര് അല്ലാത്ത ജാദിഗാള്‌ക്ക് പട്ട ആള്‌ഗാള്‌ന ഗുഡി സാമിബീ്ഡ്‌ക്ക് നൊഗേസി സുത്താപ്പോഡ ഇര്‌ക്കുവ എ്ഡെന അയിത്ത്യമാഡി തള്ളിര്‌ന്റാന്>> 29 (എപസോസുഗാറാന് ത്‌റോപിമോസുന എര്‌സലേമ് പട്ടണാത്ത്‌ല് ബെത്ത് മുദാല് താനെ അവാര് പവുലോസോഡ കണ്ടിന്താര്. അത്തെ അയാള്‌ന സാമിബീ്ഡ്‌ക്ക് കൂട്ടി പോയിര്‌ക്കുവാന് എന്റ് അവാര് നെനേത്താര്. അദ്‌നാലെത്തെ അവാര് അത്തെ സൊന്നാദ്.) 30 പട്ടണ ഒട്ടുക്കു സെര്യാന ഗിജ്‌റാറ്റ്. ആള്‌ഗാള് ഒട്ടുക്കു ഓഡി ഒന്റുക്കു എജേന്ത് പവുലോസുന പ്‌ഡിത്ത് സാമിബീ്ഡ്‌ക്ക് ബെ്ളിഗെ ഇ്ള്‌ത്തെ്ഡ്‌ത്ത് പോനാര്. അന്നാല് താനെ അയി സാമിബീ്ഡ് ബാസഗാള്‌നെല്ല അവാര് അഡേത്താര്. 31 പ്‌റ അവാര് അയാള്‌ന കൊല്ല്യ ഓരാഡ്‌നാര്. അദുക്കുള എര്‌സലേമ്‌ല് ഒട്ടുക്കു കലമ്പാല് ആയിര്‌ക്ക്‌ന്റ് എന്റ് അദ്‌ക്ക് കാവാക്ക് നിന്റിന്ത ആയിര പട്ടളഗാറാര്‌ക്ക് തലെവാന് ആയിന്ത പട്ടളഗാറാന്‌ക്ക് സേദി കെ്ഡേത്ത്‌ദ്. 32 അദ്‌നാലെ അയാള് അന്നാല് താനെ നൂറു നൂറു പട്ടളഗാറാര്‌ക്ക് തലെവാര് ആയിന്തവാര്‌ല് ലേസ തലെവാര്‌ഗാള്‌നാമ് പട്ടളഗാറാര്‌നാമ് കൂട്ടി എ്ഡ്‌ത്ത് ജനകൂട്ട പട്ട്‌ക്ക് ഓഡി എജ്ജ്‌നാന്. ആള്‌ഗാള് പട്ടള തലെവാന്‌ന പട്ടളഗാറാരോഡ കാണ്‌ഗാട്ടി പവുലോസുന അഡിക്കുവാദ്‌ന തെ്റിന്താര്. 33 പട്ടള തലെവാന് പവുലോസു പട്ട്‌ക്ക് പോയി അയാള്‌ന പ്‌ഡിത്താന്. പ്‌റ അയാള് പവുലോസുന റാഡ് സങ്കിലിക്കി കെ്ട്ട്യ സൊന്നാന്. എന്റിന്ത് അയാള് <<അയാള് ആര്?, അയാള് എന്ത് ഗേന്താന്>> എന്റ് ആള്‌ഗാള്‌ന കേ്ട്ടാന്. 34 ആള് കൂട്ടാത്ത്‌ല ലേസ ആള്‌ഗാള് ഒന്റു കാര്യനാമ്, ബേ്റെ ലേസ ആള്‌ഗാള് ബേ്റെ ഒന്റു കാര്യനാമ് സൊല്ലി ആലാത്ത് ക്‌ളാമ്പ്‌നാര്. അദ്‌ല് അത്തെ ഗിജ്‌റ്‌ബെ്ട്ടുവാദ്‌നാലെ നേര്‌മായി എന്ത് നഡാന്ത്‌ദെന്റ് പട്ടള തലെവാന്‌ക്ക് നെപ്പ്‌കെ്ഡേസ്യ മുഡ്യാലെ. അദ്‌നാലെ പവുലോസുന പട്ടളഗാറാര് ഇര്‌ക്കുവ എ്ഡേക്ക് എ്ഡ്‌ത്ത് പോയ അയാള് പട്ടളഗാറാര്‌ക്ക് സൊന്നാന്. 35 പട്ടളഗാറാര് പവുലോസോഡ പട്ടളഗാറാര് തങ്കുവ കോട്ടെ മെ്ട്ട്‌പഡിഗേക്ക് അര്‌ഗെ എജ്ജ്‌സ്‌നാര്. ജനഗാള് മൊനേക്ക് തെ്ട്ടി ബെ്റെബെ്റേത്താദെ ഇന്താര്. അദ്‌നാലെ പട്ടളഗാറാര് പവുലോസുന തൂക്കി എ്ഡ്‌ത്ത് കൊണ്ടു പോനാര്. 36 <<ആന അയാള്‌ന കൊന്റു തള്ളുഡൊ>> എന്റ് ആലാത്ത് കൊണ്ടു ആള്‌കൂട്ട ഒട്ടുക്കു അവാര് പിന്ന്‌മേലെ പോനാര് പവുലോസു ബാദാഡ്‌ന്റാന്. 37 പട്ടളഗാറാര് അയാള്‌ന എ്ഡ്‌ത്ത് പോയി തമ്മ ഇര്‌ക്കുവ കോട്ടെ കുളാക്ക് നൊഗേയ പഡ്‌ഗാട്ടി പവുലോസു ആയിര പട്ടളഗാറാര്‌ക്ക് തലെവാന് ആയിര്‌ക്ക്‌ന്റവാന്‌ന: <<എനാക്ക് ലേസ കാര്യഗാള് നിനാക്ക് സൊല്ല്യ ഇര്‌ക്ക്‌ന്റ്, അദ്‌ന സൊല്ല്യ ബ്‌ഡ്‌ഡൊ>> എന്റ് കേ്ട്ടാന്. അദുക്കുള അയി പട്ടള തലെവാന്: <<നിനാക്ക് എവനനായ തെരിമ് ലാ?>> എന്റ് പവുലോസുന കേ്ട്ടാന്. 38 <<അന്നാപ്പ് നീ എഞ്ചോ നാള് മുന്നുക്കു സര്‌ക്കാരോഡ ജൂദുപ്‌ഡിത്ത് മല്ല് കെ്ട്ടി നാലായിര കൊലെഗാറാര്‌ന ബെ്ട്ടെകാഡ്‌ക്ക് കൂട്ടി പോന മിസ്‌റേമ്‌ഗാറാന്‌ത്തെ ലാ?>> എന്റ് കേ്ട്ടാന്. 39 അദുക്കുള പവുലോസു തിരിക്കി സൊന്നാന്, <<നാന് കിലിക്ക്യാല തറ്‌സോസു എന്നുവ ഒന്റു പേര്‌കേ്ട്ട പട്ടണാത്ത്‌ല് പ്‌റാന്ത എഗുദാര് ജാദിക്ക് പട്ട ഒരുത്താന്‌ത്തെ. നാന് അയി പേര്‌കേ്ട്ട പട്ടണാക്ക് പട്ടവാന്‌ത്തെ. ഈ ആള്‌ഗാളോഡ നായനൊഡ്യ നീ എനാന സെറ്റെ ബ്‌ഡ്‌ഡൊ.>> 40 പട്ടള തലെവാന് അയാള്‌ന നായ സൊല്ല്യ ബ്‌ട്ടാന്. അദുക്കുള പവുലോസു മെ്ട്ട്‌പഡിഗേല് നിന്റിന്ത് ആള്‌ഗാള്‌ന സപ്പെന്റിരിക്ക്യ കയില് ജാഡെ കാട്ട്‌നാന്. ആള്‌ഗാള് സപ്പെന്റാഗാട്ടി അയാള് എവുറായ നായാത്ത്‌ല് ഇത്തെ സൊന്നാന്. |
New Life Computer Institute