അപ്പോസുത്തലാര് 19 - സാമി സേദിപവുലോസു എപസോസുലു 1 അപ്പലോസു കൊരിന്ത്യ പട്ടണാത്ത്‌ല് ഇര്‌ക്കാട്ടി പവുലോസു എപസോസുക്കു പോവ എ്ഡെഗാള്‌മേലെ പോയി എപസോസു പട്ടണാക്ക് എജ്ജ്‌നാന്. അദ്‌ല് ലേസ ഏസ്സ് സൊല്ലുപഡി നഡാക്ക്‌ന്റവാര്‌ന അയാള് കണ്ടാന്. 2 <<നിമ്മ ഏസ്സ്‌ന നമ്പ്‌നവാര് ആന പ്‌റ സാമിനിഗാല് കെ്ഡേത്ത്‌ദ?>> എന്റ് അയാള് അവാര്‌ന കേ്ട്ടാന്. അദുക്കുള അവാര്: <<സാമിനിഗാല് ഇര്‌ക്ക്‌ന്റ് എന്റ്‌ഗുഡി എമ്മ കേ്ള്‌ക്കാലെ>> എന്റ് സൊന്നാര്. 3 അദുക്കുള പവുലോസു: <<പിന്നെ നിമ്മ ഏദ് ദിന്‌സ്‌ല മുളുക്ക മുളുഗുനുറു?>> എന്റ് കേ്ട്ടാന്. <<ഓഗന്നാന് സൊന്ന മുളുക്ക>> എന്റ് അവാര് സൊന്നാര്. 4 അദുക്കുള പവുലോസു: <<പാവ ഗേവാദ്‌ന തള്ള്‌നേമ് എന്റ് കാട്ടുവാദ്ക്കുള്ള മുളുക്കത്തെ ഓഗന്നാന് മുളുഗുസുനാദ്, തന്ന് പിന്ന്‌ക്ക് ബന്റവാന് ഏസ്സ്‌ന നമ്പുഡൊ എന്റ്‌ത്തെ അയാള് ആള്‌ഗാള്‌ക്ക് സൊന്നാദ്>> എന്റ് സൊന്നാന്. 5 ഇദ്‌ന കേ്ള്‌ക്കാട്ടി അവാര് ആണ്ടവാന് ഏസ്സ് പേര്‌ല് നീര്‌ക്ക് മുളുഗുനാര്. 6 പവുലോസു അവാര് കുദ്ദാക്ക് കയി ബെക്ക്‌ഗാട്ടി സാമിനിഗാല് അവാര്‌ക്ക് ഏ്റ്‌റ്റ്. അദുക്കുള അവാര് ബേ്റെബേ്റെ നായഗാള്‌ല് നായ നൊഡിന്താര്. സാമിക്ക് സൊല്ല്യ ഇര്‌ക്കുവാദ്‌ന അവാര് സൊന്നാര്. 7 അവാര് പന്നന്റ് ഗണ്ടാള്‌ക്ക് പക്ക ഇന്താര്. 8 പവുലോസു എഗുദാര് പരേസുവ ബീ്ഡ്‌ക്ക്‌റാഗ പോയി മൂറു മാസ കാല ദയിരത്തോഡ ആള്‌ഗാള്‌ക്ക് നായ സൊന്നാന്. സാമി ആള്യ പോവ കാലന പറ്റി അവാര്‌ക്ക് തെരിവ മാട്ട്‌ക്ക് അയാള് അവാരോഡ തറ്‌ക്ക്‌നാന്. 9 ലേസ ആള്‌ഗാള് അദ്‌ന കാദ്‌ക്കിക്കാലെ. അവാര് അദ്‌ന നമ്പാമില്ലെ. ആണ്ടവാന് കാട്ടി തന്ത ബട്ടെന പറ്റി അവാര് ആള്‌ഗാള് മുന്നുക്കു കെ്ട്ട നായഗാള് സൊല്ലി കൊണ്ടിന്താര്. അദുക്കുള പവുലോസു അദ്‌ലിന്ത ഏസ്സ്‌ഗാറാര്‌ന ത്‌റാനോസു പഡുസുവ എ്ഡേക്ക് കൂട്ടി പോനാന്. അദ്‌ല് അവാര് നാള്‌ക്ക്‌മ് തമ്മ തമ്മ ഇദ്‌ന പറ്റി നായ നൊഡിന്ത്‌കൊണ്ടിന്താര്. 10 ഇത്തെ റാഡ് ബര്‌സ്സ ഗേന്തിന്താദ്‌നാലെ ആസ്യ നാഡ്‌ലിന്ത എഗുദാര് ഒട്ടുക്കുമു എഗുദാര് അല്ലാത്ത ജാദിഗാള് ഒട്ടുക്കുമു ആണ്ടവാന് സൊല്ലുസുലാക്കാന കേ്ട്ടാര്. ഈസ്‌കേവ മഗനച്ചനാര് 11 സാമി പവുലോസോഡ ഇന്ത് ദൊഡ്ഡുദൊഡ്ഡ അദിസ്യഗാള് ഗേന്താന്. 12 പവുലോസു സീലെ മുണ്ടുനാമ്, സിവാല്‌ക്ക് ഏ്റ്‌സി നഡാക്കുവ സീലെനാമ് നോയിഗാറാര് കുദ്ദാക്ക് അലേക്ക്‌ഗാട്ടി നോയിഗാറാര് തെ്ളിന്താര്. തട്ടിര്‌ക്കുവ കെ്ട്ടജാദിഗാള് അവാര് കുളാക്കിന്ത് ഇ്റാഗി പോറ്റു. 13 ഒന്റൊന്റു നാഡ്‌ഗാള്‌ക്ക് പോയി തട്ടിര്‌ക്കുവ കെ്ട്ടജാദിഗാള്‌ന ഇ്റാക്കി ബ്‌ഡുവ ലേസ എഗുദാര്‌മ് ഇന്തിന്താര്. അവാര്‌മ് ഏസ്സ് ആണ്ടവാന് പേര്‌ല് തട്ടിര്‌ക്കുവ ജാദിഗാള്‌ന ഇ്റാക്കി ബ്‌ഡ്യ ഓരാഡ്‌നാര്. <<പവുലോസു സൊല്ലി നഡാക്കുവ ഏസ്സ് പേര്‌ല് ബെ്ളിഗെ ഇ്റാഗി പോനു എന്റ് നാന് നിമാക്ക് സൊന്റെ>> എന്റ് അവാര് തട്ടിര്‌ക്കുവ കെ്ട്ടജാദിഗാള്‌ക്ക് സൊന്നാര്. 14 ഈസ്‌കേവ എന്നുവ എഗുദാര് ദൊഡ്ഡ പൂസാരിത്ത് ഏ്ള് മഗനച്ചനാര്‌ത്തെ ഇത്തെ ഗേന്താദ്. 15 ആന കെ്ട്ടജാദി തട്ടിന്തവാന്‌ല് ഇന്ത കെ്ട്ടജാദി അവാര്‌ക്ക്: <<ഏസ്സ്‌ന എനാക്ക് തെരിമ്, പവുലോസുനാമ് എനാക്ക് തെരിമ്, ആന നിമ്മ ആര്?>> എന്റ് സൊല്ലുറ്റു. 16 പ്‌റസാരി കെ്ട്ടജാദി തട്ടി ഇര്‌ക്ക്‌ന്റവാന് അവാര് കുദ്ദാക്ക് പറാന്ത് ബ്‌ന്ത് അവാര്‌ന അഡിത്ത് ബീ്ക്ക്‌നാന്. അയാള്‌ക്ക് അവാര്‌ന ബ്‌ഡ മുജുവു ഇന്ത്‌ദ്. അദ്‌നാലെ അയാള് അവാര്‌ന ഗായ മാഡി അവാര് സീലെസിലാപ്പ്‌ന പീ്റി തളള്‌നാന്. അയി എഗുദാര് ഈ്ഡ് കെ്ഡേസി അയാള് ബീ്ഡ്‌ലിന്ത് ബെ്റ്‌ദെകറി ഓഡി പോനാര്. 17 എപസോസുലിന്ത എഗുദാര് ഒട്ടുക്കുമു എഗുദാര് അല്ലാത്ത ജാദിഗാള് ഒട്ടുക്കുമു ഇദ്‌ന പറ്റി കേ്ട്ടാര്. അവാര്‌ക്ക് ഒട്ടുക്കു അഞ്ചിക്കെ പ്‌ഡിത്ത്‌ദ്. അത്തെ ആണ്ടവാന് ഏസ്സ് പേര്‌ക്ക് ദൊഡ്ഡ മദ്‌പ്പാറ്റ്. 18 നമ്പ്‌നവാര്‌ല് എഞ്ചോ ആള്‌ഗാള് ബന്ത് തമ്മ ഗേന്ത പാവഗാള്‌നെല്ല തപ്പ് എന്റ് നേരെ സൊന്നാര്. 19 മന്ത്‌റവാദ ഗേന്തിന്ത എഞ്ചോ ആള്‌ഗാള് തമ്മ് ബൊക്കുഗാള്‌ന ഒന്റായി എ്ഡ്‌ത്ത് ബന്ത് എദ്‌ക്ക സുട്ടു തള്ള്‌നാര്. അയി ബൊക്കുഗാള്‌ക്ക് ഇര്‌ക്കുവ ബെലെ കണാക്ക് മാഡി നോഡുഗാട്ടി അമ്പദായിര ബെ്ള്ളി കാസ് എന്റ് തെരിന്ത്‌ദ്. 20 ഇത്തെ ആണ്ടവാന് സൊല്ലുസുലാക്കാന മൊത്തു മൊത്ത ആള്‌ഗാള്‌മ് കേ്ട്ടാര്, മൊത്തു മൊത്ത ആള്‌ഗാള്‌മ് നമ്പ്‌നാര്. എപസോസുല കലമ്പാല് 21 ഈ കാര്യഗാളെല്ല നഡാന്ത പ്‌റ പവുലോസു എര്‌സലേമ്‌ക്ക് പോയ ബേ്ണ്ടി മക്കെദോന്യ നാഡ്‌മേലേമ് അഗായ നാഡ്‌മേലേമ് പോഡൊ എന്റ് സാമിനിഗാല് സൊന്ന പാസെ മുഡിവാക്ക്‌നാന്. <<എര്‌സലേമ്‌ക്ക് പോന പ്‌റ നാന് റോമ പട്ടണാക്ക് ഗുഡി പോഡൊ>> എന്റ് പവുലോസു നെനേത്താന്. 22 തന്ന് തൊണെഗാറാര് തിമിത്തോസുനാമ്, എരസ്‌തോസുനാമ് മക്കെദോന്യ നാഡ്‌ക്ക് സൊല്ലി ബ്‌ട്ട പ്‌റ പവുലോസു ആസ്യ നാഡ്‌ല് താനെ ലേസ കാല ഇന്താന്. 23 അയി ഗളിഗേല് ആണ്ടവാന് പഡ്‌സ്‌ന കാര്യഗാള്‌ന സൊല്ലി എപസോസു പട്ടണാത്ത്‌ല് സെര്യാന കലമ്പാലാറ്റ്. 24 ബെ്ള്ളില് താനെ ഒന്റൊന്റു ജാദിഗാള് ഉണ്ടാക്കുവ ദെമോത്തിര്യോസു എന്നുവ ഒന്റൊരുത്താന് അദ്‌ല് ഇന്തിന്താന്. അയാള് അറ്‌ത്തമിസമ്മ കോയാല്‌ന പാസെ സ്‌ന്ന സ്‌ന്ന കോയാല് ഉരുപ്പഗാള് ബെ്ള്ളില് താനെ ഉണ്ടാക്കിന്താന്. അത്തെ ഈ ഗിലാസ ഗേവ തന്ന് ഗിലാസഗാറാര് എഞ്ചോ പണ സമ്പാരിത്തിന്താര്. 25 തന്ന് ഗിലാസഗാറാര്‌നാമ് ഈ ഗിലാസഗേന്റവാര്‌നാമ് ബ്‌ളിത്ത് സേത്തി അയാള് ഇത്തെ സൊന്നാന്, <<അയ്യനാമെ, നമാക്ക് പണ കെ്ഡേക്കുവാദ്‌ക്കുള്ള ഗിലാസത്തെ ഈ ഗിലാസ എന്റ് നിമാക്ക് തെരിമല്ല. 26 ആന മന്‌സാന് കയില് മാഡ്‌നാദ് സാമിഗാള് അല്ല എന്റ് പവുലോസു എന്റവാന് സൊല്ലുവാദ്‌ന നിമാക്ക് താനെ കാണ്യാമ് കേ്ള്‌ക്ക്യാമ് മുഡിമ്. അത്തെ സൊല്ലി അയാള് എപസോസുല പട്ടണാത്ത്‌ല് താനെ അല്ല ആസ്യ നാഡ്‌ല് ഒട്ടുക്കുമു എഞ്ചോ ആള്‌ഗാള്‌ക്ക് സൊല്ലി അദ് നേര്‌ത്തെ എന്റ് അവാര്‌ന നമ്പ്യ ബെത്ത്‌റ്‌ന്റാന്. 27 ഇത്തെ ഗേവാദ്‌നാലെ നമ്മ ഗേവ ഗിലാസാക്ക് മോസ പേരാവു. ഇദ് നമാക്ക് ആവാത്ത്‌ത്തെ. അദ്‌താനെ അല്ല ദൊഡ്ഡ അറ്‌ത്തമിസമ്മ സാമി കോയാല്‌ക്ക് ഇര്‌ക്കുവ ബെലേമ് ഇല്ലാദെ ആമ്. ആസ്യ നാഡ്‌ല്‌മ് ഉലഗാത്ത്‌ല്‌മ് ഇര്‌ക്കുവ ആള്‌ഗാള് ഒട്ടുക്കു കുമ്മുഡി നഡാക്കുവ അമ്മ സാമി മദ്‌പ്പ്‌മ് കെ്ട്ട് തള്ളുവു>> 28 ഇദ്‌ന കേ്ള്‌ക്ക്‌ഗാട്ടി ആള്‌ഗാള്‌ക്ക് ഒട്ടുക്കു മൊനെ ബന്ത്‌ദ്. <<എപസോസുലവാര് അറ്‌ത്തമിസമ്മ സാമി ദൊഡ്ഡവാള്‌ത്തെ!>> എന്റ് ആള്‌ഗാള് ആലാക്ക്യ പ്‌ഡിത്താര്. 29 അത്തെ അയി കലമ്പാല് പട്ടണാക്ക് ഒട്ടുക്കു പജാന്ത്‌ദ്. ജനകൂട്ട ഒന്റായി പവുലോസോഡ നഡാന്തിന്ത ഗായോസുനാമ്, അരിസ്‌ത്തറ്‌ഗോസുനാമ് പ്‌ഡിത്താര്. അവാര് റാഡാള്‌മ് മക്കെദോന്യഗാറാര് ആയിന്താര്. പ്‌റസാരി കലമ്പാല് മാഡ്‌നവാര് അവാര്‌ന ഉന്ത്യെ്ഡ്‌ത്ത് കൊണ്ടു പട്ടണാത്ത്‌ല് ആള്‌ഗാള് കൂട്ട കൂഡുവ പട്ട്‌ക്ക് ഓഡി പോനാര്. 30 പവുലോസു ജനകൂട്ട പട്ട്‌ക്ക് പോയ പട്ടാന്. ആന ഏസ്സ്‌ഗാറാര് അയാള്‌ന അദ്‌ക്ക് പോയ ബ്‌ഡാലെ. 31 ആസ്യ നാഡ്‌ല ലേസ അദിഗാരിഗാള് പവുലോസു എ്ണേവുഗാറാര് ആയിന്താര്. അദ്‌നാലെ പവുലോസു ആള്‌ഗാള് കൂട്ട കൂഡുവ പട്ട്‌ക്ക് പോഗ ബേ്ഡ എന്റ് അവാര് സേദി സൊല്ലി ബ്‌ട്ടാര്. 32 തമ്മ എന്ത്‌ക്ക് ബന്ത് കൂഡുനാദ് എന്റ്‌ഗുഡി മുക്കാബാസി ആള്‌ഗാള്‌ക്ക് തെര്യാദെ ഇന്ത്‌ദ്: അദ്‌നാലെ ലേസ ആള്‌ഗാള് ഒന്റു കാര്യനാമ്, ബേ്റെ ലേസ ആള്‌ഗാള് ബേ്റെ ഒന്റു കാര്യനാമ് സൊല്ലി ആലാത്ത് ക്‌ളാമ്പ്‌നാര്. 33 അദുക്കുള ലേസ എഗുദാര് തലെവാര്‌ഗാള് അലസാണ്ടാര്‌ന ഉന്തിതള്ളി ആള്‌കൂട്ട മുന്നുക്കു എ്ഡ്‌ത്ത് ബന്ത് നില്ല്‌സ്‌നാര്. പ്‌റ തനാക്ക് സൊല്ല്യ ഇര്‌ക്കുവാദ്‌ന ആള്‌ഗാള്‌ക്ക് സൊല്ല്യ അവാര് അലസാണ്ടാര്‌ക്ക് സൊന്നാര്. അയാള് ആള്‌ഗാള്‌ന സപ്പാന ഇര്‌ക്ക്യ കയില് താനെ ജാഡെ കാട്ട്‌നാന്. അദ്‌ക്ക് പ്‌റ ഇദ്‌ല് നഡാന്ത കാര്യഗാള്‌ക്കെല്ല എമാക്ക് പൊറുപ്പില്ലെ എന്റ് കാട്ട്യ ബേ്ണ്ടി ആള്‌ഗാളോഡ നായനൊഡ്യ ഓരാഡ്‌നാന്. 34 ആന അയാള് എഗുദാര് ജാദിക്ക് പട്ട ഒരുത്താന് എന്റ് ജനഗാള്‌ക്ക് തെരിന്ത്‌ദ്. അദുക്കുള അവാര് <<എപസോസുലവാര് അറ്‌ത്തമിസമ്മ ദൊഡ്ഡവാള്‌ത്തെ!>> എന്റ് ഒന്റായി ആലാത്ത് ക്‌ളാമ്പ്‌നാര്. അവാര് ഇത്തെ റാഡ് മണിക്കൂറു മാട്ട്‌ക്ക് ആലാത്ത് ക്‌ളാമ്പ്‌നാര്. 35 കഡേഗല പട്ടണ തലെവാന് ആള്‌കൂട്ടാന സപ്പാന മാഡികൊണ്ടു ഇത്തെ സൊന്നാന്, <<എപസോസുലവാരെ, എപസോസു പട്ടണത്തെ ദൊഡ്ഡ അറ്‌ത്തമിസമ്മ കോയാല്‌നാമ്, മേലോഗാത്ത്‌ലിന്ത് അഡി അലേന്ത സുത്താപ്പോഡ ഇര്‌ക്കുവ അയി കല്ല്‌നാമ് കാക്കുവാദ് എന്റ് ആള്‌ഗാള്‌ക്ക് ഒട്ടുക്കുമു തെരിമല്ല? 36 ഇദെല്ല ഇല്ലെ എന്റ് ആര്‌ക്ക്‌മ് സൊല്ല്യ മുഡ്യാത്ത കാര്യഗാള്‌ത്തെ. അദ്‌നാലെ നിമ്മ സപ്പാന ഇര്‌ന്, നെപ്പ്‌നേരില്ലാദെ ഒന്റുമു ഗേഗാദേന്. 37 ഇവാര് റാഡാള് കോയാല്‌ന ത്‌റ്‌ഡ്‌ന്റവാരൊ, നമ്മ് അറ്‌ത്തമിസമ്മാന പറ്റി കെ്ട്ട നായ സൊല്ലുന്റവാരൊ അല്ല. എന്റിന്ത് ഗുഡി നിമ്മ ഇവാര്‌ന ഇദ്‌ക്ക് പ്‌ഡിത്ത് എ്ഡ്‌ത്ത് ബന്ത്‌റല്ല. 38 ആന ദെമോത്തിര്യോസുക്കുമു അയാള് ഗിലാസഗാറാര്‌ക്ക്‌മ് ആര്‌നാറ്റ പറ്റി സാഡി സൊല്ല്യ ഇന്തദാന അദ്‌ന കേ്ള്‌ക്ക്യ നമ്മ് ദേസാത്ത്‌ല് അദിഗാരിഗാള്‌മ് കോഡിദില് ഒന്റൊന്റു നാള്‌മ് ഇര്‌ക്ക്‌ന്റ്. അയി നാള്‌ഗാള്‌ല് അദ്‌ക്ക് ബന്ത് അവാര്‌ക്ക് സാഡിന സൊല്ലുല. 39 ആന നിമാക്ക് ഇദ്‌ക്ക് ബ്‌ഡ മൊത്തന കാര്യഗാള് ഇര്‌ക്കുവദായിന്തദാന പട്ടണഗാറാര്‌ക്ക് ബേ്ണ്ടി പട്ടണാത്ത്‌ല് അദിഗാരിഗാള് ബ്‌ളിത്ത് സേത്തുവ കൂട്ടാക്ക് ബാന്. അദ്‌ല് ബെത്ത് അദ്‌ക്ക് മുഡിവു എ്ഡ്‌ക്ക്‌ഗാന്. 40 ഇന്റ് ഇദ്‌ല് ഈ കാര്യഗാളെല്ല നഡാന്താദ്‌നാലെ ഒന്റു കലമ്പാല് മാഡ്‌നാമ് എന്നുവ പാവ നമ്മ് തലേക്ക് ബരുവു. ഈ ഗിജ്‌റെല്ല ഉണ്ടാക്ക്‌നാദ് എന്ത്‌ക്കെന്റ് കേ്ട്ടദാന നമാക്ക് ഒന്റുമു സൊല്ല്യ മുഡ്യാമാട്ട.>> 41 ഇത്തെ സൊല്ലി അയാള് ആള്‌കൂട്ടാന പിരിത്ത് ബ്‌ട്ടാന്. |
New Life Computer Institute